738. శివ పదము శివ పాదము

 

శివ పదము   శివ పాదము

”శివ పదము  శివ పాదము”  ఏదో ఒకటి పట్టుకొని వ్రేలాడు,  నీ జీవితం చరితార్థం అవుతుంది.  నాకు తెలిసినది  నీకు తెలిసినది  ఒక్కటే  కానక్కరలేదు , కానీ మన గతులన్నీ  పదగతులుగా  , ఆచరణలు చరణాగతులుగా  శివుణ్ణి చేరితే చాలు , నువ్వు నేను మనందరం శివ తత్వంలో ఇమిడి పోయినట్టే.

వ్యాకరణము చేత వ్యాకులత  కొంతమందికి . . .  వేపకము లేక వెర్రితలలు మరి కొందరికి , ఇలా అందరిని ఆదుకొనే శివుడికి వాడు వీడు అను భేదము లేదు.

పలుకు  నేర్చిన  వాడికి  పద్యాలు గద్యాలు , పలకలేని  వాడికి ఢమరుక శబ్దాలు . . .  కనులున్న వాడికి శిలలు రూపాలు  , కనులు లేని వాడికి దివ్యమైన వెలుగు గాను ఏదైతేనేమి  భవుని నిండుగా కొలుచుటకు .

రోజులో కొన్ని లక్షల పదములు పలుకగ  నా నాలుక శివ అను రెండక్షరములకై  వెఱయునా !  

నేను ఇదివరలో చెప్పినట్లుగా  “ కైవల్యపు కడ చూపులు కనుపాపలు దాట లేవు ” ఈ ఆఖరి స్థితి లో  నీ చూపు కూడా నిన్ను  , అంటే నీ కనుపాపను  దాటి  “పోదు”.  అలాంటి చివరి క్షణంలో నువ్వు భగవంతుడు నీ ముందు అవతరించినా చూడలేవు కదా !  . . . మరి జీవించినంత కాలమూ కాలక్షేపం తో గడిపేయడం దేనికి ?

నీకు సమయం ఉన్నప్పుడల్లా  లేదా  సమయం చేసుకొని  నీ శివుడిని  యధార్థ  రూపంలో చూడు , గుర్తు పెట్టుకో మనసున నిలుపుకో , పనికి వస్తాడు.

జ్ఞానం అనే జ్యోతి  నీ లో  వెలగాలంటే  చుట్టూ ప్రాణవాయువు  నిండి ఉండాలి , అదే విధంగా నీ చుట్టూ భగవంతుడు లేదా భక్తి , పారవశ్యంతో కమ్మెయ్యాలి . ముక్తి మోక్షం అనేవి చాలా పెద్ద మాటలు కావచ్చు కానీ మంచి మార్గము ప్రేరణ అనే మాటలు చాలు కదా  సామాన్య జీవునకు భగవంతుని  సేవించడానికి .

గుర్తుంచుకో . . . దేహమున అవయవములన్నీ సక్రమముగా పనిచేసిన నాడు చేయలేని శివ స్మృతి , మూలన చేరిన నాడు మూలిగినా ఫలితమేమి కాలాతీతం తప్పా .

సమస్త ఆలోచనలలో శివం నిండినపుడు కడ లో శవం చేరేది శివుని చెంతకే .

ఈ స్వరం . . . ఈ శ్వరం.

ఓం శాంతి 

ఓం నమః శివాయః 🙏

యడ్ల శ్రీనివాసరావు 24 Apr 2026 5:00 AM.

737 . శివానుభవాలు

 

శివానుభవాలు

• శివుని గురించి ఆలోచించాలన్నా , శివుని గురించి మాట్లాడాలన్నా , శివుని గురించి రాయాలన్నా శివుని గురించి పాడాలన్నా   కేవలం  శివుని అనుమతి ద్వారా  శరీరం లోపల ఉన్న ఆత్మ పొందే అనుభవం తోనే సాధ్యం.

  శివుడు పరమాత్మ , మన శరీరం ద్వారా చూసే రెండు కళ్ళకు (Two Dimensional Eyes) కానరాడు , తాకడానికి స్పర్శ కి అందడు . అందుకే శివుడు అనుభవం అవుతాడు .

  ఈ అనుభవం లేనిదే , అనుభవం పొందనిదే శివుని గురించి పెదవులు పలకలేవు , మెదడు ఆలోచించ లేదు , చేతులు రాయలేవు , గొంతు ఎలుగెత్త  లేదు. . . ఎందుకంటే , విశ్వ సృష్టి నిర్మాణం లో  భాగంగా మానవ దేహాన్ని సృష్టించింది తండ్రి  శివుడు .

• అందుకే శివుడు అంటే అనుభవం. శివుడు అంటే సంతోషం, శివుడు అంటే అనంతం, శివుడు అంటే సత్యం. శివుడు అంటే మనసు రమించే శోభనం. శివుడు అంటే జ్ఞాన ధ్యాన యోగాల బీజం, అన్నింటినీ మించి శివుడు అంటే విశ్వ శక్తి .

• శివుని అనుభవం మనం చవిచూస్తే  ఎలా ఉంటుంది ? ఎన్ని విధాలుగా ఉంటుంది? . . . . అంటే అది వర్ణనాతీతం. ప్రధానంగా మానసిక శక్తి లో అనంతమైన నూతన ఉత్తేజం నిండుతుంది .  మాట్లాడే మాటల కు, ఆలోచించే శుద్ద సంకల్పాల కు కార్య సిద్ధి  సఫలం అవుతుంది.  భూత వర్తమాన భవిష్య   త్రికాలాల  దర్శనం  ప్రాప్తిస్తుంది . అసాధారణం  అనుకునే  ధర్మ యుక్త  కార్య వ్యవహారాలు సాధారణంగా జరుగుతాయి . విఘ్నాలే విజయాలను వరింపచేస్తాయి . దుష్ట తత్వాలు గల రహస్య శత్రువులు దూరం అవుతారు తిరిగి సమీపంలోకి కూడా రాలేరు . ఏ బంధం లేని  సజ్జనులు  అత్యంత ఆప్తులు గా సహకరిస్తారు . మంచి చెడుల సూక్ష్మ విచక్షణ తెలియవస్తుంది. ఎంతటి విపత్కర పరిస్థితిలైనా సునాయాసంగా అధిగమించడం జరుగుతుంది.

• భూత దయ కలుగుతుంది. అసంపూర్ణ కర్మలు సంపూర్ణం అవుతాయి . శరీరం మనసు నిత్యం తేలుతూ భార రహిత స్థితి లో ఉంటుంది . రహస్యంగా ఆత్మ లో దాగి ఉన్న అనేక జన్మల ప్రతిభలు ( hidden talents ) సహజంగా పైకి వస్తాయి. ఇతరుల మాటలలో సత్య అసత్యాలు గ్రహించే పరీశీలనా శక్తి  ప్రాప్తిస్తుంది . మనో నేత్రం (Third Dimension of Eye) తెరుచుకుంటుంది. అమృత వేళలో (తెల్లవారుజామున 3 గంటలకు) నిత్యం  మెలకువ వస్తుంది . మౌనం , ఏకాంతం లో ఇమిడి ఉన్న శాంతి సాగరపు అలల తో మమేకం జరుగుతుంది . నిష్కామ (ఫలితం ఆశించని)  సేవా కర్మలు అలవడతాయి. మనసు లోని భావోద్వేగాలు శూన్య స్థితికి చేరుకోవడం వంటి ఎన్నో విశేషమైన అనుభవాలు అన్నింటినీ శివుడే  , మనిషి కి చేయిస్తూ తన అక్కురకు చేర్చుకుంటాడు .

• పంచభూతాల లో  ఇమిడి  ఉన్న  శివుని శక్తి ని పొంది , పంచేంద్రియాల ద్వారా అందరికీ అనుభూతి పొందేలా చేసేవారే శివుని ప్రతినిధులు. వారినే Messengers or Servents of God అంటారు. మనకు చాలా అరుదుగా కనిపించే నాగ సాధువులు , ముని పుంగవులు , అఘోరాలు , కర్మ యోగులు , రాజయోగులు ఈ కోవ లోని వారే .

• జ్ఞాన సముపార్జనకు సాధనాలు పంచేంద్రియాలు అయితే వాటిని ప్రభావితం చేయువారు , సుష్కర్మలను ఆపాదన చేయువారు , మంచి చెడు విచక్షణ ను బోధించు వారు మహిమాన్వితులే  కానక్కరలేదు! . మంచి మనసు తో చెప్పే శుద్ధమైన మాటలు చాలు , మనసు తేజోన్మయమై  శివుని పై దృష్టి దగ్గర అవడానికి .

తెలిసో తెలియకో మనిషి వేసుకున్న ,  బంధాల చిక్కు ముడులు  నుంచి  సంతోషంగా విడిపించేది  కేవలం . . . కేవలం శివుడు మాత్రమే. 

శివ అంటే శుభం . శివం లోనే శవం ఉంది. అందుకే శివలింగాన్ని స్మశానంలో ఉంచుతారు . దీని అర్థం జననం మరణం రెండూ మనిషి కి  మంగళం కళ్యాణం .

• శివుడు అంటే నాట్యం (నటరాజు) . మన మనసు లో శూన్యం నింపి , ఆ శూన్యం లో ఆయన నాట్యం చేస్తూ మన చేత నాట్యం చేయించే వాడు శివుడు . ఇంతకు మించిన శివానుభం ఉందా అంటే తెలియదు . ఒకవేళ ఉంటే , అది శివుడే ఈ చేతులతో రాయించాలి . . . ఎప్పుడైనా .

• సర్వం . . . ఈ శ్వరం . . . ఈ స్వరం .

ఓం శాంతి 🙏

ఓం నమఃశివాయ 🙏

యడ్ల శ్రీనివాసరావు 14 April 2026 , 10:00 PM

736. నీ తోడు - భాగస్వామ్యం ఎవరు ?

 

నీ తోడు - భాగస్వామ్యం ఎవరు ?

• ఈ భూమి మీద జన్మించిన ప్రతి ప్రాణి కి ఒక తోడు అవసరం. ఆ ప్రాణి మనిషి  , పక్షి , పశువు , జంతువు ఇలా ఏ రకమైన జీవి అయినా కావచ్చు.

 ఈ తోడు . . . అవసరం . . . అనేవి ప్రతి ప్రాణి యొక్క జీవన స్థితి  మరియు  తమ ధర్మాన్ని అనుసరించి ఉంటాయి .

• మనుషులమైన మనం ఏకాంతం గా జీవించగలం కానీ ఒంటరితనం తో జీవించలేము . ఈ ఒంటరితనం అధిగమించడానికే  మనిషి తనకు సరిపడా తోడు ను  కోరుకొని ఆశ్రయిస్తాడు . ఆ తోడు లోనే ఎన్నో రకాల బంధాలు ,  వివాహం, ‌స్నేహం , సహచర్యం , కుటుంబం , పిల్లలు ఇలా ఎన్నో ఎన్నెన్నో  అనుబంధాలు  .  వీటన్నింటిలో  అడుగడుగునా మనిషి ప్రాథమికంగా ఆలోచించేది తనకు కావలసిన తోడు . . .  తన ఆలోచనలకు సరిపడే తోడు .  ఎందుకంటే , ఔనన్నా కాదన్నా మనిషి స్వార్థజీవి . . . ఇందులో తప్పు లేదు.

• అసలు ఈ తోడు అవసరం ఎందుకు ? 

 ఈ మాయా ప్రాపంచిక లోకంలో మనిషి పుట్టిన దగ్గర్నుంచి జీవన పోరాటం లో  ఎన్నో సమస్యలను , సవాళ్ళను (ఛాలెంజెస్) నిరంతరం ఎదుర్కోవలసి వస్తుంది . అందుకు తనకు ఉన్న మానసిక శక్తి అన్ని వేళలా సరిపోదు. ఆ సమయంలో తప్పక ఒక తోడు పై ఆధారపడ వలసిన అవసరం పూర్తిగా ఉంటుంది .

  శరీర ధర్మం ప్రకారం అవసరమయ్యే తోడు కోసం ఇక్కడ ప్రస్తావించడం లేదు . ఎందుకంటే ఏ మనిషి కైనా మానసిక మైన తోడు లభిస్తే నే   తన  జీవితాన్ని తీరం దాటించుకోగలడు  మరియు జన్మను  సార్థకం చేసుకోగలడు . అంతకంటే మోక్షం మరొకటి లేదు .

• కానీ . . .  ఈ తోడు భాగస్వామ్యం అనేది నేటి కాలం మనిషి తనకు  ఉన్న  స్నేహల ద్వారా గాని. . .  వివాహం ద్వారా గాని . . .  బంధాల ద్వారా  గాని పొందగలుగుతున్నాడా ?  తోడు ను అనుభవించ గలుగుతున్నాడా ? . . .  లేక  మనిషి ఈ బంధాలన్నింటిలో    జీవిస్తూ నే    నటిస్తూ నే ఒంటరితనం అనుభవిస్తున్నాడా ?

ఎందుకంటే  , నిజం గా  ఒక మనిషి కి సరియైన తోడు భాగస్వామ్యం  ఉంటే అసంతృప్తి , కొరత  అనే  అంశాలు మచ్చుకైనా  తన  జీవితంలో ఉండవు . నిత్యం సంతోషంగా , ఆనందంగా , ఏ లోటూ లేకుండా ఉంటాడు . ఈ స్థితి కి కారణం తనకున్న  తోడు ఎప్పటికప్పుడు  అర్దం చేసుకుని కావలసిన శక్తిని ఇస్తూ  బాలెన్స్ చేస్తుంది .

అందుకే . . . ప్రతి మనిషి తనను అర్దం చేసుకోవడం కోసం తోడు ఉండాలి అనుకుంటాడు . కానీ ఈ తోడు  అనే భాగస్వామ్యం లో ఉన్న వారు అదే ఫ్రీక్వెన్సీ కలిగి ఉండక పోవడం తోనే సమస్య ఆరంభం అవుతుంది . ఉన్న తోడు కాస్త శత్రుత్వం, సమస్య గా తయారవుతుంది. నేటి అధిక శాతం మానవుల జీవన సరళి లో  ఇదే జరుగుతుంది .

• భాగస్వామ్య తోడు అనేది మనిషి కి ఒక ధైర్యం , భరోసా , నమ్మకం . కానీ నేటి కలియుగంలో ఈ తోడు లో మాయ, మోసం , ద్వేషం, అసహనం, కామం , క్రోధం , కపట ప్రేమలు  వంటివి అణువణువునా ఎన్నో చొప్పించబడి మనుషుల జీవితాలు  అల్లకల్లోలంగా తయారవుతున్నాయి  అనడం లో    ఏ మాత్రం సందేహం లేదు . 

• ఒక మనిషి తన జీవితంలో తాను సరియైన తోడు కలిగి ఉన్నాను అనే భావన కలిగి ఉంటే . . . , ఆ తోడు ఉన్న వ్యక్తి భౌతికంగా అనుక్షణం తన ప్రక్కన ఉన్న లేకపోయినా సరే . . . నీడ లా తనతో నే ఉంది అనే భరోసా తో  కూడిన నమ్మకం ఒక మంచి భాగస్వామ్య  తోడు  మనసు కి  ఇవ్వగలదు .

  మరి మనిషి తనకు సరిపడా తోడు ను కలిగి ఉంటున్నాడా లేక రాజీపడుతున్నాడా అనేది మిలియన్ డాలర్ల ప్రశ్న .

• సున్నితమైన వారు కలిగి ఉన్న తోడు తో రాజీ పడతారు . కఠోరమైన వారు సరియైన తోడు దొరికేంత వరకు ప్రయత్నం చేస్తూనే ఉంటారు .

🌹 🌹 🌹 🌹 🌹

• ఇక  అసలు వాస్తవమైన  జ్ఞానం సత్యం లోని కి వస్తే  . . . ప్రతి  మనిషి ఎకైకం  , ఏకత్వం . అనగా ఏకైక తత్వాన్ని  కలిగి ఉండడం . 

అంటే  Every Human being  is Unique. 

ఏ ఇద్దరి మనుషుల రూపు రేఖలు, ఆలోచనలు , స్వభావాలు  ఒకే విధంగా ఉండవు. అందుకే ప్రతి మనిషి తనకు తాను విలక్షణం. 

మరి , ఏ ఇద్దరు మనుషుల స్వభావం ఒకేలా ఉండనపుడు,  ఒకరి  ఆలోచనలను పోలి సహకరించే విధంగా ఈ సృష్టిలో మరొకరు  ముమ్మాటికీ తయారయి ఉండరు . అటువంటప్పుడు ఒక మనిషి కి సరియైన తోడు లేదా ఒక మనిషి ని  యధార్థ రీతిలో  అర్దం చేసుకోవడానికి మరో మనిషి తోడు గా , భాగస్వామ్యం గా  ఎలా ఉండగలడు ? ఎలా సాధ్యం ? 

• అందుకోసమే  . . . దీనికి పరిష్కారం గా  భగవంతుడే   ప్రతి మనిషి కి  సరియైన విధంగా , ప్రతి మనిషి ని అర్దం  చేసుకునే  విధంతో   తోడుగా అవుతుంటాడు .  భగవంతుడైన  శివుడు ఒక తండ్రి గా, తల్లి గా,  సద్గురువు గా , భార్య గా, భర్త గా , ప్రియుడు గా , ప్రియురాలు గా,  టీచరు గా , స్నేహితుడు గా, ఎన్నో రూపాలలో అనుక్షణం మనిషి కి తోడు ఉండి  స్వచ్చత తో , సత్యత తో  ధైర్యంతో నమ్మకం తో  మనిషికి  అనుక్షణం  సేవ చేస్తూ మనిషి ని నడిపిస్తాడు .

కానీ , దురదృష్టం ఏమిటంటే , మనిషే భగవంతుడైన  శివుని  ని సరియైన తోడు గా భావించడం లేదు. కారణం  మనిషి లో ని మాయ. మాయ అంటే మనిషి లోని బలహీనతలు .

• మనిషి  , భగవంతుడు ని  ఎక్కడో దూరంగా గుడిలో ఉంచుతాడు , ఇంటిలో పూజ చేస్తాడు , మొక్కుతాడు , కోరికలు కోరుతాడు . . .  కానీ  అదే భగవంతుడు ని   తన గుండె లో , మనసు లో , తనకున్న  ప్రతీ ఆలోచనలో  తోడు గా ఉంచుకున్న నాడు  అద్బుతాలు జరుగుతాయి. మనిషి జీవితాన్ని  అతి సహజంగా  తీరం దాటించి గమ్యం చేరుస్తాడు శివుడు . కానీ ఈ విషయం మనిషి గ్రహించలేడు నమ్మడు విశ్వసించడు .  నోటితో పైకి మాటలు మాట్లాడుతాడు కానీ, మనసు లో భగవంతునికి చోటు ఇవ్వలేక పోతాడు . 

 ఓ మనిషి . . . నీతో , నీ చుట్టూ ఎవరు ఉన్నా ఎవరు లేకపోయినా, ఏమి ఉన్నా ఏమి లేకపోయినా నీ ఆలోచనలు శుభ్రమైనవి అయితే , వాటిని ఆచరిస్తూ ఉన్నట్లయితే  నీవు వ్యక్తిగా ఉన్నతి సాధించినట్లే . నీవు ఏకాంతం లో ఉండొచ్చు కానీ ఒంటరివి కానే కావు , ఎందుకంటే శివుడు నీకు తోడు గా నీతోనే ఉన్నాడు . . . ఎప్పటికీ ఉంటాడు . కానీ నీవు మాత్రం ఆ పరమ శివుని మరువకు , విడువకు .

• ఈ రచన యొక్క సారాంశం, మనకు తోడుగా ఉన్నవారిని ,  మనుషులందరినీ   విస్మరించమని కాదు …. ప్రతీ ఒక్కరితో అన్ని భవబంధాలలో ఉంటూనే   మనసు లో  శివుని ని మాత్రమే  తోడు గా  చేసుకోమని భావం . 

ఎందుకంటే భాగస్వామ్యం గా , తోడు గా  ఉన్న మనుషులు , ఏ రోజైనా మనల్ని వదిలి శాశ్వతంగా వెళ్లిపోవచ్చు లేదా వారి వలన కోలుకోలేని విధంగా వంచింప బడవచ్చు  . కానీ శివుడు నిన్ను ఎన్నడూ విడవడు, వంచించడు. శివుడు మాత్రమే నీ మేలు కోరే వాడు, అది నువ్వు శరీరం తో ఉన్నాసరే   లేదా  శరీరం విడిచి పెట్టినా సరే  అంటే మరణించినా సరే.

ప్రతి మనిషి కి , ప్రతీ ప్రాణి కి శివుడు పూల బాట ఎప్పడో వేశాడు. కానీ మనిషే  స్వయంకృతాపరాధం తో  ఆ బాట ను చెదర కొట్టుకుంటున్నాడు .

మూలం గమనిస్తే , అసాధ్యం లోనే  సాధ్యం ఉంది . . . విరక్తి  లోనే  రక్తి  దాగి  ఉంది .

మానవమాత్రులైన   తల్లి , తండ్రి , గురువు , పుత్రిక , పుత్రుడు , సామాజిక బంధాలు  ఇలా . . . ఏ మనిషి కూడా  ఇంకొక  మనిషి కి  ముక్తి ని , సద్గతి ని ప్రసాదించలేడు . నిన్ను నన్ను సృష్టించిన వాడే ఆ పని చేయగలడు.  ముక్తి అంటే మరణం పొందడం, తిరిగి జన్మ పొందక పోవడం అని అనుకుంటారు. అది  పొరపాటు.  ముక్తి అంటే ప్రస్తుతం ఉంటున్న లేదా ఉన్న స్థితి నుంచి మనకు  మనం విడుదల అయి ఉన్నతమైన స్థితి కి మన ఆత్మ పయనించడం. ఇది కేవలం శివుని కి మాత్రమే సాధ్యం. అందుకే శివుని తోడు గా చేసుకుంటే నీకు నీడ గా ఉంటాడు. 

ఈశ్వరుని తోడు గా  చేసుకొని బంధాలలో ఉన్న అందరినీ  ప్రేమించండి, అందరినీ గౌరవించండి . . . కానీ బంధీలుగా  కాకండి . 🙏

జీవితం లో   వదిలి  వెళ్ళిన వారి  గురించి ఆలోచించకు .  జీవితం లో ఉన్నవారందరూ శాశ్వతం అని భావించకు. 

ఎవరో వచ్చి నీ బాధను అర్థం చేసుకుంటారని ఊహించకు. నీకు నీవే ధైర్యం కావాలి. నీకు నీవే తోడు గా కావాలి.

గమనిక  : ఇవి  ఆలోచనలు, అభిప్రాయాలు అనుభవాలు అనడం కంటే , రచన లో సత్యా సత్యాలను సూక్ష్మ  విశ్లేషణ చేయగలగడం అభినందనీయం .

 ఓం శాంతి

 ఓం నమఃశివాయ 🙏

 యడ్ల శ్రీనివాసరావు 8 Apr 2026 . 11:00 PM.

735 .మూసిన కనులు మసకబారవు

 

మూసిన కనులు మసకబారవు

• కనులు మూయడం అంటే ఒకటి నిద్ర పోవడం, రెండవది మరణించడం . ఈ రెండింటిలో జరిగే సూక్ష్మం ఒక్కటే . నిద్ర పోయినప్పుడు , మన స్పృహ నుంచి శరీరం విడుదల అయి భారం తెలియకుండా తేలికగా అవుతుంది . తిరిగి నిద్ర లేచేటప్పుటికి కొత్త శక్తి నిండుకొని శరీరం భారవంతంగా ఉంటుంది.

మరణించినపుడు కూడా ఇదే ప్రక్రియ జరుగుతుంది . ఆత్మ శరీరం నుంచి విడుదల అయి తేలికగా అవడం జరుగుతుంది . మరణం తర్వాత సరికొత్త రూపం తో దేహం లభించి జన్మించడం జరుగుతుంది.

 ఈ రెండూ కూడా కనులు మూసికొని ఉన్నప్పుడు మాత్రమే జరుగుతాయి. కనులు మూస్తే మసకబారి చీకటి ఆవహిస్తుంది అనుకుంటాం . కానీ శక్తి పునరుత్తేజం పొందేది కనులు మూసి ఉన్నప్పుడే.

మూసిన కనులు ఎన్నడూ మసకబారవు , అంధత్వం తో ఉండవు .

• కనులు తెరిచి ఉన్నప్పుడు జరుగుతున్నది అంతా కూడా అలసట, ప్రయాస , అలజడి , అల్ప కాలిక మైన కృత్రిమ సంతోషం మరియు సుఖం. అందుకే చివరికి మనం అలసి పోతాం , ఇందులో మనం పొందే శక్తి ఏమీ లేదు.

 కనులు మూసినపుడు లభించేది ఈ భౌతిక మాయా ప్రపంచం నుండి విశ్రాంతి, విముక్తి , భార రహిత స్థితి .

• అతి ఆలోచనలు , ఆందోళనలు కలిగి ఉన్నవారు కనులు మూసినంత మాత్రన విశ్రాంతి  , నూతన శక్తి లభించదు . అది నిద్ర లేదా మరణం కావచ్చు. ఎందుకంటే వారి ఆలోచనలు శరీరానికి అతీతంగా బుద్ధి లో, ఆత్మ లో నిరంతరం అతిగా పని చేస్తూ ఉంటాయి . అవి శరీరానికి నిరంతరం శ్రమ, ఒత్తిడి కలిగిస్తూ ఉంటాయి . అటువంటి స్థితిలో వారు పునరుత్తేజం , నూతన శక్తి ఎన్నటికీ పొందలేరు. అది నిద్ర నుండి  మేల్కొవడం  కావచ్చు లేదా మరణం పొంది తిరిగి జన్మించడం కావచ్చు .

 దీనిని జయించాలంటే ఒకటే పరిష్కారం. ధ్యానం. మనం శివుని పై మనసు లగ్నం చేసి నిత్యం ఒక నిర్ణీత సమయంలో ధ్యానం చేయడం వలన వ్యర్ధ ఆలోచనల, అలజడులు, ఆందోళనలు క్రమేపీ తగ్గి మనసు పై నియంత్రణ కలిగి విశ్వం లో శక్తి ని (cosmic energy) తీసుకుని మన వెన్నుముక లో పొందుపరచు కోవచ్చు. మనకు ఇక్కడ ఒక సందేహం కలగవచ్చు, అది కేవలం ఒక శివుని పై మాత్రమే ఎందుకు మనసు లగ్నం చేయాలి అని. అవును శివుడు మాత్రమే మానవుని కి ధ్యాన యోగం ద్వారా శక్తి ఎలా పొందవచ్చో తెలియచేశాడు. అందుకు ప్రతీకగా శంకరుడు ని ఫోటో లలో ధ్యాన స్థితిని చూపించడం జరిగింది. శివుడు ఈ విశ్వానికి జ్ఞాన ధ్యాన యోగ గురువు.

• మనం ఆహారం తీసుకోవడం ద్వారా పొందే శక్తికి పూర్తి భిన్నంగా ఈ శక్తి ఉంటుంది. దీనిని యోగశక్తి అంటారు. రెండు మూడు రోజులు ఆహారం తీసుకోకపోయినా సరే యోగశక్తి వెన్ను లో నిల్వ ఉండడం వలన మానసికంగా శారీరకంగా దైనందిన కార్యక్రమాలు చేసుకోవచ్చు. ఎన్నో అనారోగ్యాలను , వాటికి గల కారణాలను జయించవచ్చు. నిత్యం నూతనోత్సాహం తో ఉండవచ్చు.

 అందుకే , మూసిన కనులు మసకబారవు . ఆలోచన నీ శక్తి అయినపుడు కనులు తెరిచి ఆలోచించి నిర్ణయం తీసుకున్న దానికి , కనులు మూసి మనో నేత్రం తో ఆలోచించి నిర్ణయం తీసుకున్న దానికి , సఫలత పొందే విషయం లో చాలా వ్యత్యాసం ఉంటుంది.

• ఈ భౌతిక మాయా ప్రపంచం లో నీ రెండు కళ్ళు నిన్ను ఎప్పుడూ మోసం చేస్తూనే ఉంటాయి . అందుకే ఏం చేసినా, ఏం పొందినా చివరికి అశాంతి దుఃఖం వెంటాడుతూ ఉంటాయి. కలియుగంలో జన్మించిన ఏ మనిషి అతీతం ఇందుకు కాదు.

 కనులు మూసినపుడు మాత్రమే , ఏకాంత స్థితిలో మన బలహీనతలు మనకు స్పష్టంగా కనిపిస్తాయి. అవి సరిచేసుకొనే అదృష్టం లభిస్తుంది.

• మనం ఒకరిని ఎక్కువగా నమ్మడం వలన రెండు రకాల ఫలితాలు ఎదురుకావచ్చు. ఒకటి మనకు జీవితాంతం తోడుండే  ఓ మిత్రుడు దొరకచ్చు . ఇంకోటి జీవితాంతం గుర్తుంచుకోదగిన  గుణపాఠం నేర్పేవాళ్ళు  దొరకవచ్చు . 

 ఈ రెండింటి కి అతీతంగా కావాలంటే మన లో ఉన్న ఆత్మను గుర్తించి , ఆత్మను గమనించినపుడు , ఆత్మ పై నమ్మకం (విశ్వాసం) ఉంచి  ఉన్నతి చేసుకున్నపుడు  . . . ఆత్మ , పరమాత్మ అయిన శివుని తో శాశ్వతంగా అనుభవ పూర్వకంగా అనుసంధానం అవుతుంది . అపుడు మన జీవితం మనకు స్పష్టం గా కనిపించడం మాత్రమే కాకుండా ఇతరులకు కూడా మార్గదర్శకం అవుతుంది.

మనల్ని మనము (మనసు ను) పట్టుకోవడంలో కలిగేది అమితమైన ఆనందం , అదే ఇతరులను (మనసులను ) పట్టుకోవడం లో మిగిలేది భరించలేని నొప్పి, దుఃఖం .

• నీ లోని నీ ఆత్మ మరియు నీ పై లోకంలోని శివ పరమాత్మ , కేవలం మూసిన కనులకు మాత్రమే చైతన్య శక్తి స్వరూపం లో కనిపిస్తారు. అందుకే అన్నాను , మూసిన కనులు మసకబారవు .

 ఓం శాంతి 🙏

 ఓం నమఃశివాయ 🙏

 యడ్ల శ్రీనివాసరావు 4 APR 2026 , 10:30 PM.

734. మలుపుల జీవితం

 

మలుపుల  జీవితం

• మలుపుల   జీవితం     మకరందం

  నా మలుపుల   జీవితం   మకరందం.

• తలపు లన్ని     తరిగి   తరిగి

  శివుని    వలపుకి    చేరాయి .

• తపన లన్ని      తిరిగి   తిరిగి

  శివుని   కలిమి కి  చేరాయి.

  

• మలుపుల   జీవితం      మకరందం

  నా  

  మలుపుల   జీవితం   మకరందం .

• ప్రతి  మలుపు లోని    చీకటి

  ఓ  కొత్త   వెలుగు  నిచ్చింది  .

• ప్రతి  తలపు లోని     తరంగం 

  సరికొత్త    తీరం   చేరుస్తున్నాయి .

• ఆశించిన   ఆశల   కంటే

  ఆశించని    "అందల మై"

  సొంతమయ్యాడు    శివుడు .

• ఊహించిన   దారుల   కంటే

  ఊహించని    ఉన్నతులెన్నో 

  ధారణ   చేస్తున్నాడు   శివుడు .

• మలుపుల   జీవితం     మకరందం

  నా  

  మలుపుల  జీవితం    మకరందం.

• ఆట  తెలియని    

  ఈ  మనసు

  ఆడి ఆడి   అలిసింది .

• ఆడేందుకు   కాదు   

  నీ   మనసు

  అని

  ఆట కు  నిర్ణేతగా  చేశాడు  శివుడు .

• కోరుకున్న   వాటి   కంటే

  కొండంత   ఇస్తున్నాడు   శివుడు .

• ఈ ఆనందం    కొలవడానికి

  ఎన్ని   కాలాలు   పయనించాలో . 

• మలుపుల   జీవితం    మకరందం

  నా 

  మలుపుల   జీవితం   మకరందం.

• తలపు లన్ని    తరిగి తరిగి

  శివుని    వలపుకి   చేరాయి .

• తపన లన్ని    తిరిగి   తిరిగి

  శివుని    కలిమి కి   చేరాయి .

• మలుపుల    జీవితం   మకరందం

  నా 

  మలుపుల  జీవితం    మకరందం.

తలపు = ఆలోచన

తరిగి‌ = తగ్గి , కరిగి.

వలపు = అభిలాష , ప్రేమ 

తపన = ఆసక్తి ,  కోరిక , ఉత్కంఠ.

కలిమి = స్నేహం 

యడ్ల శ్రీనివాసరావు 24 March 2026 9:00 PM .

733 . నవ వసంతం

 

 నవ వసంతం 

• ఏ  సంతమిది     ఏ  వసంతమిది .

  సమిధలు    విరిసే    కాలమిది

  సమయం   చిగురించే   రాత ఇది .

• ఎగిరే   తూనిగ లు    పైరు  గాలిని

  పలకరించి   పోతున్నాయి .

• కలిగే    భావన లు     చిరు గాలి లో 

  చిలకరించి    వెళుతున్నాయి . . .

  నా పై   . . . 

  చిలకరించి     వెళుతున్నాయి.

• భావన లో       ఏముందంటే

  ఉరుము    లాంటి    సంతోషం .

• చిరుగాలి లో     ఏముందంటే

  చెప్పలేని      సంబరం .

• ఏ  సంతమిది      ఏ  వసంతమిది

  సమిధలు    విరిసే    కాలమిది

  సమయం   చిగురించే   రాత ఇది .

• పూత   పూసిన    మామిడి

  పిందె   అయిన   తరుణమిది.

• కూత    కూసిన   కోయిల

  అందె    వేసిన   సమయమిది .

• పంచభూతాల     సోయగాలు

  ప్రకృతి కి     పాదరవిందం .

• విను  వీధిన      వైభోగాలు

  ధరణి కి     దివ్యానందం .

• ఉత్సవాలు      ఉత్సాహలు

  మేళతాళాల     మేళవింపులు .

• పసిడి  పచ్చని     అందాలు

  పల్లవింపుల    పులకరింపులు . . . .

  నా    మది కే   పులకరింపులు .

• ఏ   సంతమిది     ఏ  వసంతమిది

  సమిధలు   విరిసే    కాలమిది

  సమయం   చిగురించే    రాత ఇది .

యడ్ల శ్రీనివాసరావు 23 March 2026 10:00 PM.

732. ఋణానుబంధ రూపేణ

 

ఋణానుబంధ రూపేణ

• "మేము బాగా ఆధ్యాత్మిక సాధన, పూజలు , పుణ్యాలు చేస్తాము మాకు ఎందుకు కష్టం వచ్చింది , అనారోగ్యం వచ్చింది " అని అడుగుతారు , కానీ సూక్ష్మంగా చేసే పొరపాట్లు మరియు అనారోగ్యం తెచ్చుకోవడానికి కారణమైన ఆహారపు అలవాట్లు బుద్ధి లో స్థిరం గా  గుర్తు ఉండవు . అందుకే ఆ కర్మలను భరించడానికి కావలసిన శక్తిని భగవంతుని నుంచి కోరుకోవాలి . ఆ కర్మలను వదిలించుకోవడానికే మనం పుట్టాము  అని గుర్తు ఉంచు కోవాలి .

• మన తల్లిదండ్రులు, జీవిత భాగస్వామి మన పిల్లలు , కుటుంబ పరిసరాలు , స్నేహితులు బంధువులు ఇవన్నీ చూస్తే మనము ఎలాంటి కర్మ చేసుకుని పుట్టి ఉంటాము అనే విషయం ఎవరూ చెప్పకుండానే అర్థం అయిపోతుంది.

  ఎంత కష్టంలో ఉన్నా కూడా మళ్లీ తప్పులు చేయకుండా ఉంచమని భగవంతుని కోరాలి, మళ్ళీ పాప కర్మలు చేయకుండా ఉంచినందుకు భగవంతుడుకి  కృతజ్ఞతతో  ధన్యవాదములు తెలియచేయాలి,

• కష్టాన్ని దాటించే నావలాగ భగవంతుని  తోడు మనం కోరాలి మరియు అలాంటి జీవితాన్ని మనం తయారుచేసుకోవాలి . అంతే కానీ , కష్టమే రాకూడదు అని అంటే , నువ్వు అంత పుణ్యం చేసి ఉండి ఉంటే నీకు ఈ కలియుగములో కష్టమైన జన్మ అనేది ఉండదు కదా...

• భూమి పైన పుట్టావు అంటే , అది కేవలం నీ ఋణం తీర్చుకోవడానికి మాత్రమే . ఎంతటి మహా యోగులైనా , మహా చక్రవర్తులైనా కర్మ భూమిలో పుట్టిన తర్వాత కష్టాలు తప్పించుకోలేరు .. అదే విధంగా దాటలేని కష్టం అంటూ ఏది లేదు. మనము ఎక్కువగా పట్టించుకుంటేనే  కష్టం , దానిగురించి ఆలోచించడం మానేసి , నేను చేయ వలసినది ఈశ్వర కర్తవ్యం అనుకొని , చేసుకుంటూ పోవాలి , అనుభవించే కొద్దీ ఆస్తులే కాదు కష్టాలు కూడా కరిగిపోతాయి .

• మనలో అందరూ ఎన్నో కష్టాలు చెప్పుకుంటూ ఉంటారు   . . . 

గయ్యాళి భార్య నువ్వు చేసుకున్న కర్మ , 

బాధ్యత కలిగిన భర్త నువ్వు చేసిన పూజ ఫలితం ,

బిడ్డలు మీరు చేసిన ఋణాల ఫలితం , 

స్నేహితులు బంధువులు చేసిన దానాలకు ఫలితం ,

తల్లిదండ్రులు నువ్వు చేసిన ఆధ్యాత్మిక ధర్మ కార్యాలకు ఫలితం , 

వృత్తి వ్యాపారం  సృష్టి లోని సర్వ ప్రాణుల పట్ల ఉండే నీవు చూపిన భూత దయకు ఫలితం .

అందుకే ఋణానుబంధ  రూపేణా కనుక నువ్వు ఎవ్వరినీ నిందించడానికి అవకాశం లేదు . ఎందుకంటే    కోపం లో   ఒక మాట అయితే తరచూ   అంటుంటాము , “నా కర్మ కొద్దీ దొరికావు” అని . అది నిజం , మనకు ఈ జన్మలో దొరికిన వారు  అన్నీ  కూడా చేసిన కర్మల అనుసారమే . చేసిన పాప కర్మలు బాధించి , పుణ్య కర్మలు రక్షించి మనకు విముక్తి కలిగిస్తాయి .

మనం గత జన్మల లో చేసిన పాపాల రూపం వీళ్ళందరి  రూపంలోనే , అలాగే చేసిన పుణ్యాల రూపం కూడా వీరి రూపంలోనే  ఉంది , అనే విషయం గ్రహించి వాళ్ళను భరించే శక్తిని భగవంతుడుని కొరుకుని  , వారిని మీ ఆధ్యాత్మిక సేవ ద్వారా, యోగ సాధన ద్వారా మళ్ళీ ఆ బంధాలను గొప్పగా మార్చుకునే రాతను అవకాశం భగవంతుడు నీకు ఎప్పుడో ఇచ్చాడు . అదే నిత్యం శివ స్మృతి తో కొత్తగా ఏ పాప కర్మలు చేయకుండా జీవితాన్ని ఉన్నంతలో ఉన్నతంగా జీవించాలి .. చేతనైన సహాయం చేద్దాము ఒకరికి సహాయం చేయకపోయినా ఒకరికి ద్రోహం చేయకూడదు ఒకరి గురించి మంచి చెప్పకపోయినా  చెడు ప్రచారం చేయకూడదు.. అసూయ, అహంకారం , ఈర్ష్య , కామం , క్రోధం చాలా ప్రమాదం అవి మనకు శత్రువులు వాటిని వదిలేద్దాము . 

 శ్లోకం !!

• ఋణానుబంధ రూపేణ ! 

  పశు పత్ని సుతాలయాః !

  ఋణక్షయే క్షయం యాంతి! 

  కా తత్ర  పరిదేవనా !! హితోపదేశం .

  పశువులు , భార్యాపుత్రాదులు  , ఇళ్లు వాకిళ్లు బంధువులు స్నేహితులు - ఇవి ఋణానుబంధ రూపముగా వచ్చి , ఋణము తీరగనే  మళ్ళీ మనుష్యుని వదలి పోతున్నాయి. అట్టి వానిని గూర్చి తెలివైన జ్ఞానులు  అర్ద సహితం గా వేల సంవత్సరాల క్రితం  విచారించారు . 

మనిషి మహాజ్ఞాని . . . అని ఉద్దేశిస్తూ చేసిన ఉపదేశం ఇది .

 పశువులు , భార్యా భర్త పుత్రులు , ఇళ్ళు వాకిళ్ళు , ధనం , బంధువులు స్నేహితులు, ఏవి పోయినా దుఃఖించటం  తగదు . జ్ఞాని అయిన మానవుడు ఎన్నడూ వీటి నుంచి దుఃఖం పొందడు - అని గీత లో చెప్పబడింది.

• ఆధ్యాత్మికత మరియు శివుని జ్ఞానం ద్వారా మానవుని యొక్క సమస్త ప్రశ్నలకు, సమస్యలకు , వికారాలకు , వివాదాలకు , అన్నిటికి చక్కటి పరిష్కారాలు శివుని రాజయోగ  విద్య ద్వారా లభించును .

• సహనం తో  సేవ , ప్రేమతో సాధన చేయడం ఆరంభిస్తే జీవితంలో సుఖ, శాంతులను పొందగలం. సుఖం శాంతి అనేవి మనిషి మరణం పొందిన తరువాత ఆత్మ  పొందవలసినవి  కానే కావు , దేహం తో మనం జీవించి ఉన్నప్పుడే మన ఆత్మ అవి పొందాలి , అనుభవించాలి , అప్పుడే ముక్తి జీవన్ముక్తి.

• శివుని కి చేరువయ్యే సమయంలో ప్రతీ సూక్ష్మం స్పష్టం . అర్దం చేయించేది శివుడు, చేసుకో వలసినది మన బుద్ధి.

చేసిన బుణం  తప్పని సరిగా  తీర్చ వలసిందే . ఆ బుణం  తిరిగి చెల్లించలేని  దుస్థితి లో  ఉన్నప్పుడు  శివ స్మృతి ఉండాలి . ఎందుకంటే బుణాలను కరిగించే వాడు శివుడు .  కరిగించే వాడే కానీ , తొలగించే వాడు కాదు . 

అంతే గానీ బుణాలను తప్పించుకొని తిరగడం అసంభవం. ఎన్ని జన్మలెత్తినా బుణాల నీడలు  జాడలు  నిన్ను అల్లుకొని , నీ చుట్టూ నే తిరుగుతూ ఉంటాయి . ఇదే జీవన సత్యం.

మనకు ఉన్న బాధ్యత యే  బుణం .

సర్వం  శివ మయం

ఓం శాంతి 

ఓం నమఃశివాయ 🙏 

యడ్ల శ్రీనివాసరావు 18 March 2026 . 10:30 PM.

731. యుగాది

 

యుగాది

• ఉగాది   ఉగాది

  యుగముకి   జీవం  పోసే   ఆది .

• యుగములు    నాలుగైనా

  ఉగాదులు   మాత్రం   ఎన్నో . . . ఎన్నెన్నో…

• ఉగాది    ఉగాది

  యుగముకి    జీవం  పోసే   ఆది .

• ఈ  కాలం  లోని    సౌందర్యం

  మనసు   కోరుకునే    ఔషధం .

• ఈ  సమయం  లోని   సంతోషం

  మనిషి    అనుభవించే   ఇంధనం .

• ఉగాది    ఉగాది

  యుగముకి   జీవం   పోసే   ఆది .

• మామిడి    చిగుళ్ళు

  మది   పచ్చదనానికి   తోరణాలు  .

• కోయిల     సవ్వళ్లు

  శ్రవణ    సొంపుల    తరంగాలు .

• ఉగాది    ఉగాది

  యుగముకి    జీవం  పోసే  ఆది .

• యుగములు     నాలుగైనా

  ఉగాదులు   మాత్రం    ఎన్నో . . . ఎన్నెన్నో…

• భావోద్వేగాల    సంబరం 

  షడ్రుచుల        మేళనం .

• కొత్త  ఆశల      అంబరం 

   రాశిఫలాల      రాజసం .

• పంచాంగ    శ్రవణం 

  పంచభూతాల    ఆశీర్వాదం .

• ఈ ఆచారాల    సాంప్రదాయం

  తెలుగు  సంస్కృతి     ఉల్లాసం.

• ఉగాది      ఉగాది

  యుగముకి    జీవం  పోసే   ఆది .

• యుగములు    నాలుగైనా

  ఉగాదులు  మాత్రం   ఎన్నో . . . ఎన్నెన్నో…

• బుతువుల    బుణానుబంధం

  ఈ వసంతాల    వైభోగం .

• ఉగాది    ఉగాది

  యుగముకి   జీవం   పోసే   ఆది .

ప్రపంచ వ్యాప్తంగా 

" గోదావరి గలగలలు "  బ్లాగు ను 

ఆదరిస్తున్న తెలుగు వారందరికి 

నా హృదయ పూర్వక 

కృతజ్ఞతలు 🙏

  ఉగాది శుభాకాంక్షలు 💐 .

ఓం శాంతి

ఓం నమఃశివాయ 🙏

యడ్ల శ్రీనివాసరావు 18 March 2026 , 9:00 PM.

730. యజ్ఞం దాహం

 

యజ్ఞం  దాహం 

ఒక ఊరిలో యజ్ఞం జరుగుతోంది యజమానికి యజ్ఞకుండంలో బంగారం ముద్ద దొరికింది. ఆయన ఆశ్చర్యపోయాడు .

అప్పుడు భార్య ఇలా చెప్పింది.

“నిన్న పొరపాటున యజ్ఞ కుండంలో తాంబూలాన్ని ఉమ్మేశాను . అదే ఈ రోజు బంగారు ముద్ద అయింది.”

ఇంటి యజమాని పరీక్షించేందుకు తానూ యజ్ఞ కుండంలో తాంబూలాన్ని ఉమ్మేశాడు .

మరుసటి రోజు మరో బంగారు ముద్ద దొరికింది.

ఈ వార్త ఆనోటా ఈ నోటా పాకింది. అంతే యజ్ఞాలు చేసే బ్రాహ్మణులంతా యజ్ఞ కుండంలో ఊసేశారు . బంగారు ముద్దలు పొందారు. ఒక్క అర్క సోమయాజి తప్ప.

“యజ్ఞం పవిత్రమైనది. యజ్ఞ కుండం పవిత్రమైనది. యజ్ఞం చేయడం నా ధర్మం. నా కర్తవ్యం. బంగారు ముద్దలు వచ్చినా బ్రహ్మాండమే  బద్దలైనా  నేను అందులో ఉమ్మేసే ప్రసక్తే లేదు” అన్నాడాయన.

 ఊరు ఊరంతా ధనవంతులయ్యారు . ఒక్క అర్క సోమయాజి తప్ప.

ఆయన భార్యకు ఇది నచ్చలేదు.

“మనమూ ఉమ్మేద్దాం . బంగారం పొందేద్దాం” అని నచ్చచెప్పింది .

అర్కసోమయాజి  ససేమిరా అన్నాడు.

చివరికి ఆమె కోపంతో పుట్టింటికి పయనమైంది .

ఆమెకు నచ్చచెబుతూ అర్క సోమయాజి కూడా ఆమె వెనకే వెళ్లాడు.

ఊరి పొలిమేర దాటాడో  లేదో... ఊళ్లో పెద్దగా గొడవలు మొదలయ్యాయి. బంగారం ముద్దల పేరిట కొట్టుకోవడం మొదలైంది. ఇళ్లు కాలిపోతున్నాయి . మనుషులు చచ్చిపోతున్నారు. మొత్తం ఊరు ఊరు బూడిదైపోయింది. ఒక్కరూ మిగల్లేదు.

అర్క సోమయాజి, ఆయన భార్య తప్ప.

అప్పుడే *కలిపురుషుడు* వారికి ఎదురు వచ్చాడు.

ఇన్నాళ్లూ నువ్వున్నావనే ఊరిని వదిలేశా. ఊరు ఊరంతా బంగారం ముద్దల కోసం ధర్మం తప్పినా, నువ్వు, నీ కుటుంబం ధర్మాన్ని పాటించింది.

అందుకే నువ్వు ఊళ్లో ఉన్నంత సేపూ ఊరిని ముట్టుకోలేదు. నువ్వు ఊరు వదిలేయగానే నాపనిని నేను చేసి, ధర్మ హీనులను ధ్వంసం చేశాను. అన్నాడు కలిపురుషుడు.

...*ధర్మం తప్పని వాడు ఎప్పుడూ విజేతే*...

ధర్మం ఆచరించే వారికి చిన్న చిన్న ఇబ్బందులు ఎదురు అయినప్పుడు అది చూసి కొందరు మూర్ఖులు నవ్వుతూ హేళన చేస్తూ రాక్షసానందం పొందుతారు ...

కానీ చివరకు  *ధర్మమే గెలుస్తుంది* ...

II ధర్మో రక్షతి రక్షితః II.

పై కధ  రాసిన  రచయిత కి  మనస్ఫూర్తిగా ధన్యవాదాలు .🙏

ప్రతి  మనిషి  ఆలోచనల తోనే  కర్మలు చేయడం ఆరంభిస్తాడు  .  ఆ ఆలోచనలే  ఒక శక్తి  అయి  తన చుట్టూ ఒక (ఆరా) వలయం వలే ఏర్పడుతుంది.   ఈ ఆలోచనలు మంచివి లేదా చెడువి  ఏవైనా అయి ఉండవచ్చు. 

ఉదాహరణకు  పాజిటివ్ ఆలొచనలు కలిగి ఉండి , ధర్మ యుక్తం గా మనిషి  కర్మలు ఆచరిస్తున్నపుడు   తనలోని ఆరా తనకు మరియు  తన చుట్టూ ఉన్న కుటుంబీకులకు , సమాజం లోని అందరికీ ఒక రక్షణ కవచం వలే ఏర్పడి , నీడ వలే ఉంటుంది . ఇక్కడ  అర్దం చేసుకో వలసిన విషయం , మంచి  అనేది   చెడు ను కూడా సంరక్షిస్తుంది.  

ఏనాడైతే మంచి అనేది  దూరం అవుతుందో , అప్పుడు చెడు స్వైరవిహారం  చేస్తుంది , పిదప చెడు తనను తానే  శిక్షించుకొని  చివరికి  భక్షించు కుంటుంది .  అదే  కలిపురుషుడు  లీల .

మంచి  అనేది  చెడుని ఆకళింపు చేసుకుని ఉండగలదు. మంచి లో ఉండేది  భగవంతుని శక్తి .  అందుకే భగవంతుడు అయిన శివుడు తారతమ్యం ఎరుగక  అందరినీ ఆదరిస్తాడు .  అందరినీ మంచి గా మార్చడానికి కావలసిన శక్తిని ధారణ చేస్తాడు .

చెడు మాత్రం  మంచి తో   కలిసి  సుధీర్ఘంగా ఉండలేదు. చెడు లో  ఉండేది అసుర శక్తి . అందుకే అసురుడు అయిన రావణుడు ,   శివుని (మంచి) చెంత  చేరినప్పటికిని  తన బుద్ధి హీనత వలన  కామాంధుడై  చివరికి శివుని (మంచి) విడిచి  పోతాడు .

మంచి కి   ,  చెడు కు   ఉన్న   భేదం  ఇదే .

మంచి చెడు అనేవి మనుషుల లో ఉండే గుణాలు మరియు  లక్షణాలు . మనుషులు ఎంచుకున్న  స్నేహాలు , సాంగత్యాల లో  కూడా ఇవి ప్రస్ఫుటంగా  కనిపిస్తాయి .  అందుకే అనుభవజ్ఞులైన పెద్దవారు  అంటారు ,  నీవు ఎలాంటి వాడివి  అనేది , నీ  స్నేహితులను , నీ సాంగత్యాలను  చూసి  చెప్పవచ్చు  అని . . . 

ఓం శాంతి 🙏 

ఓం నమఃశివాయ 🙏 

యడ్ల శ్రీనివాసరావు 17 March 2026 , 8:00 PM.

729. శకునాలు - మూఢనమ్మకాలు

 

శకునాలు - మూఢనమ్మకాలు

చెడు శకునాలు మరియు మూఢనమ్మకాల ప్రభావం నుండి అతీతంగా అవ్వండి.

కొన్ని గ్రహాలు,  ప్రదేశాలు,  సంఖ్యలు, రంగులు, వస్తువులు,  వ్యక్తులు , జీవాలు  మరియు భౌతిక శరీరాల వెలుపల ,  సూక్ష్మ శరీరాలలో ఉండే కొన్ని ఆత్మల శక్తి మరియు ప్రకంపనలు (vibrations) – దురదృష్టాన్ని  తెస్తాయని  మనం నమ్మకం కలిగి ఉండడం తో, ఆ భయం వలన బాధితులులా జీవిస్తాము .   కాబట్టి , మనం వాటి నెగెటివ్ ప్రభావానికి లోనయ్యి  మన జీవితంలో నెగెటివ్ పరిస్థితులను ఆకర్షిస్తాము . 

చెడు శకునాలను మరియు మూఢనమ్మకాలపై నమ్మకం మన మనస్సులలో అనాది నుంచి చాలా లోతుగా పాతుకుపోయి ఉన్నాయి . అదే మన బలహీనత అని గ్రహించలేని స్థితి తో  నేడు  జీవిస్తున్నాము .  కొన్ని వస్తువులను లేదా సంఘటనలను అదృష్టం లేదా దురదృష్టంతో కనెక్ట్ చేయడం వల్ల మనకు సహజంగా  ఉన్న  స్థితి , పరిస్థితుల కంటే కూడా అది మనల్ని బలహీనంగా తయారు చేస్తుంది. ఇది సత్యం.

1. మీ మూఢనమ్మకాలను  సవాలు చేస్తే అవి మీ మనస్సులో ఉన్నాయని మీరు గ్రహిస్తారు. గ్రహల కదలికలు,  వస్తువులు,  పరిస్థితులు, తమ శక్తిని ప్రసరింపజేస్తాయి . అదే విధంగా మనుషులు కూడా తమ ఆలోచనల ద్వారా శక్తి ని ప్రకంపనల (vibrations) రూపేణా విడుదల చేస్తారు , ఇది వాస్తవం.  

కానీ , ఇతర బాహ్య ప్రభావం నుంచి రిలీజ్ అయ్యే శక్తుల కంటే   , మీ  జీవితంపై మీ మనస్సు యొక్క ప్రభావం ఎక్కువగా ఉంటుంది. అందుకే మన మనస్సును  దృఢం గా ఉంచుకునే అభ్యాసం చేయాలి.

2. మీ ఆలోచనలు మీ భావాలుగా మారుతాయి. మీ భావాలు  మీ వైఖరిని ఏర్పరుస్తాయి . మీ వైఖరి కార్యరూపం దాల్చుతుంది. పదే పదే చేసే కర్మలు అలవాటుగా మారతాయి. మీ అలవాట్లన్నీ  కలిసి, మీ వ్యక్తిత్వం గా  తయారు అవుతుంది . మీ వ్యక్తిత్వం మీ అదృష్టాన్ని సృష్టిస్తుంది. కాబట్టి, మీ ఆలోచనలు మీ అదృష్టాన్ని సృష్టిస్తాయి.

3. మీ ఆలోచనలు నెగెటివ్ గా, బలహీనంగా ఉంటే, బాహ్య శక్తులు మీ ఆలోచనలను మరియు ఫలితంగా మీ అదృష్టాన్ని ప్రభావితం చేస్తాయి. 

మీ ఆలోచనలు స్వచ్ఛంగా, పాజిటివ్ గా , శక్తిశాలి వైబ్రేషన్స్ కలిగి ఉంటే, బాహ్య అంశాలు మీ అదృష్టం పై ప్రభావం చూపవు. మీ లో ఉన్న నెగెటివ్ భావాలు (మైనస్ “-“) ఆలోచనలను మొదట మీ  మనసు అంగీకరించ గలిగాలి. అంగీకరించినపుడు మనసు మొదట నిర్లిప్తత  శూన్యం (జీరో  “0” ) దిశగా అడుగులు వేయడం ప్రారంభిస్తుంది . శూన్యం నుంచి పాజిటివ్ భావాలు ( ప్లస్   “ + ” ) , ఆలోచనలతో ఎదుగుదల జరుగుతుంది  మరియు అదృష్టం తయారవుతుంది .

4. మిమ్మల్ని మీరు ఆశీర్వదించుకోండి మరియు ఉన్నతమైన ఆధ్యాత్మిక ఆలోచనలు మరియు భాషా పదాలతో మీరు చేసే పనులను ఆశీర్వదించండి. మీ స్వంత భావోద్వేగ  ఫిట్ నెస్ , సంకల్పం, క్రమశిక్షణ మరియు పాజిటివ్ ఆధ్యాత్మిక ప్రయత్నాలు కావలసిన అదృష్టాన్ని మీ కోసం సృష్టిస్తాయి.

5. మెడిటేషన్ ద్వారా భగవంతునికి కనెక్ట్ అవ్వండి మరియు మీ మైండ్ వైబ్రేషనల్  ఫ్రీక్వెన్సీని పెంచుకోండి. శక్తిశాలి వైబ్రేషన్స్ తో , మీరు మీ మనస్సుకు యజమానిగా, మీ జీవితం మరియు పరిస్థితులపై మాస్టర్ అవుతారు. చెడు శకునాలు మరియు మూఢనమ్మకాల భయాన్ని అధిగమిస్తారు . ఆనందం గా జీవిస్తారు. అందరికీ ఆనందం పంచుతారు .

ఓం శాంతి

ఓం నమఃశివాయ 🙏.

యడ్ల శ్రీనివాసరావు 15 March 2026 , 9:30 PM.

728. అభిప్రాయాలు - ఇసుక రాతలు

 

అభిప్రాయాలు - ఇసుక రాతలు

• సముద్ర తీరాన ఒక కుర్రాడు ఆడుకుంటూ ఉండగా ఓ చెప్పు కనిపించకుండా పోయింది. అతను వెంటనే ఈ సముద్రం మహా దొంగ అని రాశాడు.

• కాస్తంత దూరంలో ఒక వ్యక్తి అదే సముద్రంలో వల వేసి చేపలు పట్టాడు. ఆ రోజు తాననుకున్న దానికన్నా ఎక్కువ చేపలు దొరకడంతో ఈ సముద్రం గొప్ప దాత అని రాశాడు.

• ఇంకొక వ్యక్తి ఈదుకుంటూ ప్రమాదవశాత్తు మునిగి పోయాడు. అతని తల్లి ఈ సముద్రం నా కొడుకులాంటి అమాయకులను పొట్టన పెట్టుకున్న మహమ్మారి అని రాసింది.

• ఒక పెద్దతను సముద్రంలోకి వెళ్లి ముత్యాలు సేకరించి విజయవంతంగా ఒడ్డుకు చేరి ఆ ఇసుకలో ఈ సముద్రం ఒకటి చాలు జీవితమంతా హాయిగా బ్రతికేస్తాను అని రాశాడు.

• అనంతరం ఒక పెద్ద అల వచ్చింది. వీరందరూ రాసిన మాటలను తుడిచి పెట్టేసింది. రకరకాల అభిప్రాయాలను సముద్రం తన అలలతో తుడిచేసుకుంది అలానే మన జీవితంలో ఎవరెవరో ఏదేదో అన్నారని బాధపడరాదు... ఇంకా ఇతరులు ఏవేవో చెప్పిన మాటలన్నింటిని విని ఎవరిపైనా చెడు అభిప్రాయానికి రాకూడదు. వీలయితే వారిని కూడా మంచిగా మార్చేందుకు ప్రయత్నం చేయాలి.

• ఈ ప్రపంచాన్ని ఒక్కొక్కరు ఒక్కో కోణంలో చూస్తారు. చేదు అనుభవం ఎదురైనప్పుడు అలా ఎందుకు జరిగిందో అని కొంత మేరకు మాత్రమే ఆలోచించండి. అందులో కొన్ని సార్లు మన పొరపాట్లు ఉండవచ్చు. పొరపాట్లు ఉంటే సరిచేసుకోవడం , లేకపోతే కర్మ బుణం (Karmic debt) తీరిపోయింది అని భావించి ముందుకు అడుగు వేయండి.

• నిజాయితీగా , అంతరాత్మతో ఈశ్వరుణ్ణి తోడుగా చేసుకోండి . వినయం, విధేయతతో విజయం మీ సొంతం అవుతుంది

ఓం శాంతి

ఓం నమఃశివాయ 🙏

యడ్ల శ్రీనివాసరావు 14 March 2026 , 8:00 PM.

727. होली

 

  होली

• హోలీ అంటే హిందీలో జరిగిందేదో జరిగింది అని అర్దం. హోలీ భారతదేశ సంస్కృతి సంప్రదాయాలలో ఒక విశిష్టత కలిగిన పండుగ. మనుష్యులు అందరూ రంగులు పూసుకుని ఆనందడోలికల్లో తేలియాడడం ప్రధానం గా అందరం బయటకు చూస్తుంటాం.

• కానీ ఈ పండుగ మూల సారాంశం లో నేటి మనిషి యొక్క సామాజిక జీవనంలో శ్రేయస్సు కోసం , మానసిక ఆనందం, పరిపక్వత తో కూడిన రహస్యం ఇమిడి ఉంది.

• మనిషి పుట్టుక నుంచి మరణం వరకు బంధాలు అనుబంధాలు బంధుత్వాల తో జరిగే ప్రయాణం లో తోటి వ్యక్తుల తో  కొన్ని సార్లు సానుకూలంగా, కొన్ని సార్లు సమస్యాత్మకంగా ,  కొన్ని సార్లు ఆనందం భరితంగా ఉంటుంది.

• ఏ మనిషి అయినా తోటి వ్యక్తుల తో ఎప్పుడూ ఆనందమయంగా ఉండాలని ఆశిస్తాడు. స్వభావ సంస్కారాలు , పరిస్ధితుల రీత్యా కొన్ని సార్లు కొంత కాలం  మరియు కొన్ని సార్లు   పూర్తి జీవితకాలం వ్యక్తుల  మధ్య సమస్యలు ,  వైరాలు సృష్టించబడతాయి. వీటికి కారణం కూడా మనుషులే . దీని వలన ఒక మనిషి లో లేదా మనుషుల మధ్య అశాంతి  నెలకొని మానవ సంబంధాలు పూర్తిగా దుర్భరంగా తయారవుతాయి . కాలక్రమేణా ఇది హింసకు  లేదా మానసిక రుగ్మతలకు ప్రేరణ అవుతుంది.

 నేడు సమాజంలో పూర్తిగా వంద శాతం జరుగుతున్నది ఇదే .

• అయితే , నేటి పరిస్థితులు ఎలా ఉన్నా నాటి పరిస్థితుల వలన జరిగిందేదో జరిగింది అని , మనిషి అన్నీ విడిచి పెట్టి  మరచి పోయి  జీవితానికి ఆనందం , శాంతి, సుఖం, ప్రేమ, సత్యత, సఖ్యత , శక్తి అనే గుణాలను కొత్త రంగులు  పూసుకుని , అవి ఇతరుల పై జల్లుతూ సంతోషం అనే మిఠాయి తింటూ తినిపించుకుంటూ  పంచు కోవడమే హోలీ పండుగ సూక్ష్మ రహస్యం  .

• ఆ రోజు తెల్ల వస్త్రాలు ధరించడం లో అర్దం , సమస్యలకు కారణం అయిన నా పాత ఆలోచనలను విడిచి పెట్టాను . నేడు నా మనసు తెల్లగా స్వచ్చం గా ఉంది అని అర్దం. ఒకవేళ ఇంకా ఏమైనా మనసు లో చిన్న చిన్న లోపాలు , మరకలు వలే నాలో ఉన్నా సరే , వాటి పై నేడు పూస్తున్న రంగులతో ఆవి కనుమరుగయి …. నేను సంతోషం అనే మిఠాయి తింటూ , అందరికీ సంతోషం అనే  మిఠాయి పంచుతూ ఉంటాను  అనే సంకేతం ఇమిడి  ఉంది.

• ఇదే మనం హోలీ పండుగ మనకు తెలియ చేసే ముఖ్యమైన సందేశం .

• ఇంగ్లీష్ లో Holy అంటే పవిత్రం. మన మనసు ను పవిత్రం గా తయారు చేసుకుంటూ , అందరి మనసులను పవిత్రంగా తయారు చేయడమే హోలీ.

• హోలీ పండుగ పౌర్ణమి రోజున వస్తుంది. చంద్రుడు యొక్క విశ్వ శక్తి ఎల్లప్పుడూ మనిషి యొక్క మనసు , మెదడు ఆలోచనలపై పూర్తి ప్రభావం చూపుతుంది. పౌర్ణమి రోజున చంద్రుడి నిండు వెలుగు వలే , మన మనసు నిత్యం వెలుగుతూ ఉండాలి అని  శుభ సూచకంగా హోలీ ని  ఆ రోజు జరుపుకుంటారు.

• నా భారత దేశం చాలా గొప్పది. అడుగడుగునా మనిషి ఎలా బ్రతకాలో సంస్కృతి లో పండుగలు సాంప్రదాయాల రూపం లో మనందరికీ నేర్పుతూ నే ఉంది. కానీ దరిద్రం, దురదృష్టకరం ఏంటంటే మాయా బలహీనతలకు వశం అయి , వీటి సూక్ష్మం గ్రహించలేక పాశ్చాత్య పోకడలకు దాసోహం అవుతూ మనకు మనమే స్వయంగా ఊబిలో కూరుకుపోతూ  బలిహరం అవుతున్నాం.

ఓం శాంతి

ఓం నమఃశివాయ 🙏

యడ్ల శ్రీనివాసరావు 4 March 2026 . 7:00 AM.

726 . సత్యం

 

సత్యం

• భగవంతుని వైపు అడుగులు వేస్తూ పయనం సాగిస్తూ ఉంటే సత్యమే స్పష్టం గా  కనపడుతుంది. సత్యమే తెలుస్తుంది. సత్యమే మాట్లాడడం జరుగుతుంది . ఎందుకంటే భగవంతుడు అంటే నే సత్యం కాబట్టి.

  అదే  “సత్యం శివం సుందరం”.

  ఈ సత్యం తెలుస్తూ , అనుభవం అవుతూ , ఆచరిస్తూ ఉన్నప్పుడు , తొలి దశలో మన లో లోపల అనాది గా   దాగి  ఉన్న అసత్యాలు మనకు తెలియడం ప్రారంభం అవుతుంది , ఆ తరువాత వాటిని  నిర్మూలించడం ఆరంభిస్తుంది . దీనినే పరివర్తన దశ అంటారు. అనగా మనలో మార్పు సంభవించే  కాలం అని అర్థం. ఈ సమయంలో మన మనసు ఎన్నో ఆటుపోట్లకు గురి అవుతూ , ఇటు అంతరంగం లోను అటు బాహ్య ప్రపంచంతోను ఘర్షణ పరిస్థితులు ఎదుర్కొనవలసి వస్తుంది.

• ఎందుకంటే ఎన్నో జన్మలు గా మన బుద్ధి అనేక అసత్యాలు కు  నెలవు గా  అయిపోయింది . మన ఆత్మ లో  పేరుకు పోయి ఉన్న అసత్యాలు , వాటితో కూడిన నమ్మకాలు మార్పు చెందుతూ ఉన్న దశలో మనసు లో అంతర్గతం గా  ఒక కురుక్షేత్రం జరుగుతుంది. ఈ దశలో  అంతర్గతంగా నే కాకుండా బాహ్య ప్రపంచం లో ముడిపడి ఉన్న వారితో కూడా తప్పని సరిగా అలజడులు తో కూడిన ఒక యుద్దం మనసు చేస్తుంది . ఎందుకంటే , బుద్ధి లో అలవాటు అయిపోయి ఉన్న అసత్యం బయటకు వెళ్లి , అందులో సత్యం ఆచరణ కోసం నిండాలి అంటే పోరాటం, ఘర్షణ అనేది మనసు కి సహజంగా ఎదుర్కొంటుంది .

• మనం  ఎప్పుడైతే   సత్యం తో  మెలగడం ఆరంభిస్తామో  , అప్పటి వరకూ  మనతో కలిసి మెలిసి ఉన్న ప్రతీ ఒక్కరూ ఇంటా బయటా మనల్ని ఒక శత్రువు గా భావించడం మొదలు పెడతారు . చెప్పాలంటే ఇది వారి యొక్క తప్పు కూడా కాదు. వారికి లేని అవగాహన, అతీతమైన మార్పు నీ లో సంభవిస్తుంది అంటే అది చూసిన వారు మొదట నిన్ను  అర్దం చేసుకోలేరు , గ్రహించ లేరు . అలా అని వారి వలే ప్రవర్తించడం నీకు  సాధ్యం కాదు .

• దీనికి కారణం, ఏనాడైతే నీవు భగవంతుడి ధ్యాస లో ఉంటూ సత్యం మాట్లాడుతూ ఉంటావో , అది నీ చుట్టూ దగ్గర గా  ఉన్న వారికి కొన్ని సందర్భాల్లో తమను కించ పరస్తున్నట్లు  భావిస్తారు. దానికి కారణం  వారిలో  కొలువై ఉన్న  అసత్యం . 

కానీ కాలక్రమేణా , నీ లోని సత్యతను ,   సత్యం యొక్క శక్తిని అందరికీ  అర్దం అవుతుంది . ఎందుకంటే సత్యం ఒక నిప్పు , నీ లో మలిన గుణాలను దహిస్తూ భగవంతుని వైపు తీసుకెళ్తూనే, ఆ నిప్పు జ్యోతి వలే ప్రకాశిస్తూ నీ చుట్టూ ఉన్న అందరికీ  వెలుగు అవుతుంది .

 సత్యాన్ని చెప్పడం , రాయడం కంటే, ఆచరించడం లోనే అద్భుతమైన అనుభవం జరుగుతుంది .

అదే  " సత్యమేవ జయతే "  .

• వాస్తవానికి సత్యం , సత్యమైన విషయాలు , నిజాలు అనేవి ప్రతి మనిషి కి తెలిసినవే . బాల్యం లో పాఠశాల  విద్యాభ్యాసం లో  ఎన్నో సత్య వాక్యాలు   కాపీ రైటింగ్ పుస్తకాల లో  నిత్యం పలుమార్లు  రాయడం ,  చదవడం జరిగేది . ఉదాహరణకు . . . తల్లి తండ్రులను ప్రేమించవలెను , గురువులను గౌరవించవలెను, ఈర్ష్య ద్వేషాలు ఉండరాదు , కామ క్రోధాలు మహా శత్రువులు , అబద్ధం మాట్లాడ రాదు , ఐకమత్యమే మహా బలం , అందరితో సఖ్యతగా ఉండుము , కలిసి ఉంటే కలదు సుఖం , భగవంతుని యందు భక్తి కలిగి ఉండుము , శత్రువులను ప్రేమించుము , సొంత లాభం కొంత మానుకో , ఆరోగ్యమే మహా భాగ్యం , పొరుగు వారికి సహాయం చేయుము , మంచి అలవాట్లు పాటించుము ….. ఇలా ఎన్నో, ఎన్నెన్నో లెక్కలేనన్ని నేర్చుకోవడం జరిగింది. కానీ , నేడు అవి గుర్తు ఉన్నాయా ? అంటే అవును గుర్తు ఉన్నాయి .  కానీ , వాటిని ఆచరిస్తున్నామా ? అనేది  ఒక ప్రశ్నార్ధకం .

 ఎందుకంటే నేడు మనం బాల్యం లో లేము కదా అనేది సమాధానం కావచ్చు . లేదా ఇవి వ్రాయడానికి చదవడానికి మాత్రమే బాగుంటాయి కాని జీవితం లో  ఆచరించడం కష్టం అనిపించవచ్చు .

• కానీ , ఆనాటి  బాల్యం లో నేర్చుకున్న పాఠాలు మనసు లో  దృఢం గా  ఉంటేనే , వాటిని సజావుగా అంగీకరిస్తూ ఆచరిస్తే నే  కౌమారం , యవనం  , వృద్ధాప్యం  ఉన్నతంగా ఆనందం గా , ఏ  సమస్యలు  కొని  తెచ్చు కోకుండా   నడుస్తాయి  అనే విషయం బహుశా మన బుద్ధి ఏనాడో మరచి పోయింది .

• ఎందుకంటే నేటి మాయా ప్రపంచం లో మనం చాలా బిజీ . . .  గజిబిజి . మనకు మనం మన ఆధీనంలోనే (కంట్రోల్) లేని విచిత్రమైన స్థితులతో జీవితం జీవనం సాగిస్తున్నాము . భౌతిక పరిస్థితులు మనపైనే ఆధిపత్యం (డామినేట్) చేస్తున్నాయి . అందుకే అన్నీ సమృద్ధిగా ఉన్నా కూడా  , తెలియని ఆందోళనలతో , సమస్యలను నెమరు వేసుకుంటూ జీవించ వలసి  వస్తుంది.

 ఇది మన అభివృద్ధా ? లేక పతనమా ? అని ఆత్మ విమర్శ చేసుకునే సమయం కూడా నేడు లేదు .

• మనం పుట్టినప్పుడు భగవంతుని తోడు తో నే పుట్టాం , అందుకే పసి వయసులో నిద్రలో నవ్వుతూ ఆయనతో ఆడుకుంటూ ఉంటాం . ఊహా వస్తూ ఎదుగుతూ , మనలో మాయ ప్రవేశిస్తూ ఉండడం తోనే ఆయన్ను ఒక రాతి విగ్రహం గానే చూడడం ఆరంభించాం . మన మనసు లో నుంచి ఆయన్ను బయటకు పంపించి, మాయకు పెద్ద సింహాసనం వేశాం . అందుకే , మన లో లో ఉండవలసిన భగవంతుడు నేడు ఎక్కడో కొండలపైన ఉన్నాడు . అదే విధంగా మన, లో లో ఉండవలసిన సత్యం మనల్ని విడిచి ఎక్కడికో పోయింది .

నిజానంద స్వరూపం శివోహం శివోహం 

ఓం శాంతి 🙏

ఓం నమఃశివాయ 🙏

యడ్ల శ్రీనివాసరావు 28 Feb 2026 , 11:00 PM .

725 . మనశ్శుద్ధి – మనశ్శాంతి

 

మనశ్శుద్ధి – మనశ్శాంతి

• మనసు శుద్ధి గా ఉన్నప్పుడు మనస్సాక్షి అనేది జాగృతం (activate) అయి నిరంతరం మన ఆలోచనలను చర్యలను సరియైన దిశగా విశ్లేషణ చేస్తుంది . ముఖ్యంగా మానవ సంబంధాలలో , బంధుత్వాల లో , ప్రేమికులలో , ఒకరికి ఒకరు సత్సంబంధం కొనసాగాలి అంటే మనశ్శుద్ధి ప్రధానం . అప్పుడే మన మనసు సాక్షి భూతమై జీవితంలో జరిగే ప్రతి విషయాన్ని యధాతథంగా రికార్డ్ చేసి పొందుపరచి , అవసరమైన సమయంలో మన మనసు కి గా సాక్ష్యం గా చూపిస్తుంది. దీని వలన మన బుద్ధి ద్వారా చేసి మరచి పోయిన పొరపాట్లు గాని , సంఘటనలను కానీ తిరిగి సరి చేసుకునేందుకు దోహదం అవుతుంది.

• మనసు లో శుద్ది లేనిదే , శుద్ధి జరగనిదే ఒక మనసు మరొక మనసు తో కలవదు  కలవలేదు . ఒకవేళ కలిసినట్లు పైకి అనిపించినా , అది కేవలం మాటల వరకు లేదా శరీరం వరకు లేదా అవసరాల వరకు పరిమితం అవుతుంది . మానసిక మైత్రి అనేది ఇరువైపులా ఉండక పోవడం వలన ఎన్నో మానవ బంధాలకు పునాది వంటి ప్రేమ కేవలం మాటలకు , ఆకర్షణలకు పరిమితం అయి సుధీర్ఘంగా ఉండలేక , తక్కువ కాలంలోనే ఆ బంధం సమసిపోతుంది .

• ఈ ప్రపంచంలో అనేకులు మాటలతో ఉంటారు , మాటలకు పరిమితం అవుతారు అంతకు మించిన సహయ సహకారాలు ఇతరుల అవసరార్థం పంచవలసి నపుడు మాత్రం చేయలేరు . ఎందుకంటే తమ ఆలోచన లలో స్వార్దం, భయం, అంతర్గత గుణాలకు సంబంధించిన సమస్యల వలన మనసు సహకరించక కేవలం పై పై మాటల వరకే పరిమితం అవుతారు , కానీ చేతల వరకు చేయలేరు . కనీసం మానసిక  ప్రేమ ను  కూడా ఇతరులకు పంచలేరు సరికదా తిరిగి తమకు కావాలని ఆశిస్తారు . శుద్ధి గా మనసు ఉంటే ప్రేమను ఎన్ని మనసుల కైనా పంచవచ్చు .(ప్రేమ అంటే  కామం శృంగారం కాదు.) ప్రేమ అంటే  సంతోషం , స్వచ్చత , త్యాగం .

• మనసు ఎటువంటి అలజడులు లేకుండా శాంతిని పొందాలంటే ఏకాంతం లో  ఒంటరిగా  ఉన్నంతలో సాధ్యం కాదు. ఉన్న సంభంద బాంధవ్యాల పట్ల మన బాధ్యత ను నిర్వర్తిస్తూ , ఆ సమయంలో చేసే కర్మల పట్ల  యోగి గా  ఉండాలి . అంటే నేను నా ధర్మం  నిర్వర్తించాను అనే  భావన, స్పృహ ఉండాలి తప్ప, మన  మనసు ను ఆ బాధ్యతలతో కూడిన కర్మలతో పాటు విలీనం కానివ్వు కూడదు. ఇది మన ఆలోచనలను అలజడులకు గురి చేస్తుంది. అలజడుల తో కూడిన ఆలోచనలు వస్తూ ఉంటే ఎప్పటికప్పుడు క్రమబద్దీకరణ చేసుకోవాలి .

• మనసు కి శాంతి లభించాలంటే కర్మయోగ స్థితి అభ్యాసం ముఖ్యం. అన్ని కర్మలు చేస్తూ మనసు ను దేనికి వశం కానివ్వకుండా, అతీతంగా ఉంచుకోవడం. ఇదే మనసు శుద్ధి కి , శాంతి కి తారక మంత్రం.

• మనసు శుద్ధి ఉంటే , చేసిన చేస్తున్న, చేయబోతున్న ప్రతీ కర్మ సత్కర్మ అవుతుంది. తద్వారా కాలం ఎటువంటి విఘ్నాలను మనకు కలుగ చేయదు. దీని వలన నిత్యం మనసు కి శాంతి లభిస్తుంది.

• మనశ్శుద్ధి లేనిదే మనశ్శాంతి లభించదు. శుద్ధి లోనే శాంతి ఉంటుంది.

ఓం శాంతి 

ఓం నమఃశివాయ 🙏

యడ్ల శ్రీనివాసరావు 26 Feb 2026 10:00 PM.

724. వృషభం - శివం

 

వృషభం - శివం

• శివుని ధ్యానించడం లో అత్యంత ప్రీతికరమైన విషయం ఏమిటంటే   ప్రకృతి మరియు పశు పక్షాదుల సమజీవన సమతుల్యత నిండి ఉండటం. మనం శివుని గురించి తెలుసుకోగలిగితే  ఆయన ప్రకృతిలో ప్రతి జీవితో  తన అనుబంధం ఎంతగా ముడిపడి ఉంటుందో  అర్థం అవుతుంది .

• శివ గణములలో  ప్రప్రథమైనది  ప్రమథ గణము అయినటువంటిది  "నంది". నంది అంటే వృషభం . వృషభం అంటే ఎద్దు .  ఎద్దు పరమశివుడి వాహనంగా  అభివర్ణిస్తాం . 

ఒక్క సారి ఊహించుకోండి ఒంగోలు జాతి ఎద్దులను, పెద్ద పెద్ద శరీరాలతో పొడువాటి కొమ్ములతో బలమైన కాళ్ళతో నిండుగా ఉండే మోపురాలతో నెమ్మదిగా నడుస్తూ ఉంటే ఆ గిట్టలు  నుండి వచ్చే లయబద్దమైన శబ్దాలు , ప్రశాంతమైన చూపు ఇవన్నీ కలబోసి ఒక చిన్నపాటి కొండ కదులుతున్నట్టుగా  అనిపిస్తుంది కదూ ! . ఎంతో శక్తి ఉన్నప్పటికీ  ఓర్పు నేర్పు  సహనం   మౌనం లో   ధృడ శాలి  వృషభం .

 మహా దేవుడుకి  రక్షణ వలయం లాగ నందులు చుట్టూ కాపలాకాస్తూ  ఆయనకు వాహనమై  శివుని సేవలో తరించిపోతూ  ఉంటాయి.

  శివాలయములో  లింగ దర్శనానంతరం  నందిని ముట్టనిదే  మనసుకు ఆనందం ఎక్కడిది. చూసారో లేదో ఆయన శివుడి ముందే కూర్చొని నిత్యం శివుని చూస్తూ కాపలా కాస్తూ ఉంటాడు.

• ఇంకో గమ్మత్తైన విషయం ఏంటంటే నంది శివుని చూడటం కాదు , శివుడే నందిని చూస్తూ తనను నమ్మిన  అమాయకమైన  ప్రాణిని  చూస్తూ పరవశించిపోతుంటాడు .

• నంది శివుని వాహనం అయితే , నంది మరియు శివుడు మనవైపు చూస్తున్నట్లుగా ఉండాలి కదా ! . మిగతా అందరు దేవుళ్ళకు అందరూ తాము ఆసీనలైన వాహకాల తో  మనల్ని చూస్తున్నట్లు దర్శనం ఇస్తుంటాయి .  కానీ నంది విషయంలో శివుడు , నంది పరస్పరం  ఎదురెదురు ముఖాముఖిగా  ఉండడం లోని ప్రత్యేకత ఏమిటి ? అని మనం ఏ రోజైనా ఆలోచించామా ?

ఒక గొప్ప భక్తుడు తాను పూజించే దైవానికి అనునిత్యం  కాపలాగా  ఉంటూ  కన్ను రెప్ప ఆర్పకుండా కాపాడుకుంటూ ఉండే సంకేతమే దీనికి అర్థం .

ఇక్కడ అర్థమయ్యే విషయం భగవంతునికి భక్తునికి మధ్య ఉన్న అనుబంధం  ఈ చూపుల కలియక . 

భక్తులు తమ కోరికలను నంది చెవులో చెబితే ఆయన శివునికి చేరవేస్తాడు  అనేది నానుడి. ఒకరకంగా చెప్పాలంటే నంది తన భక్తితో శివునిలో సగమైపోయాడా  అనిపిస్తుంది . ఆయనకు అంతటి విలువనిచ్చాడు  శివుడు .

వాస్తవానికి  ఇందులో  జ్ఞాన యుక్తు  సూక్ష్మం గ్రహిస్తే , శివుని ని పారవశ్యంతో  పూజించే  ప్రతి భక్తుడు  ఒక  నంది . ఇదే సత్యం. 

  

• ఇదంతా రాయించేది శివుడు అయినప్పటికీ రాస్తున్నది వృషభరాశి లోని చంద్ర కాంత రోహిణి లో జన్మించిన ఒక వృషభం.

ఓం శాంతి 

ఓం నమఃశివాయ 🙏 

యడ్ల శ్రీనివాసరావు 22 Feb 2026 9:00 PM.

723. శివుని పై సందేహమా ?

 

శివుని పై సందేహమా ?

• ఈశ్వరుడు ఉన్నది నిజం , అది కూడా తన పిల్లల (భక్తుల) కోసం నిత్యం పరితపిస్తూ ఉంటాడు అన్నది మరింత నిజం . 

ఈ సృష్టి లో మానవ నైజాలు మూడు రకాలు. ఒకడు భగవంతుడు ఉన్నాడు అని గట్టిగా నమ్మేవాడు. ఇంకొకడు అసలు భగవంతుడు అన్నవాడు లేడు అనేవాడు. మూడవవాడు భగవంతుడు ఉన్నాడా లేదా అని మిధ్య లో కొట్టుకునేవాడు . చిత్రం ఏమిటంటే ఈ ముగ్గురినీ సృష్టించినవాడు  భగవంతుడే . కానీ వారి వారి కర్మానుసారం  వారి పోకడలు ఉంటాయి. అలాగని వారిని ఎవ్వరినీ వదిలిపెట్టి ఉండడు విశ్వమూర్తి .

 నీకు కనిపించినా కనిపించక పోయినా నీ చుట్టూ ప్రాణవాయువు నిన్ను ఎలాగ బ్రతికిస్తుందో  అలాగే అమరేశ్వరుడు నిన్ను కాపాడుతూ ఉంటాడు.

• భగవంతుడు లేడు అనే వాడికి శివుడు తెలియదు అన్నది నిజం కానే కాదు. కానీ, వాడు మాయ లో మునిగి ఉండడం వలన తానే అంతా అనే అహం లో ఉంటూ ,  తన మనసుని చంపుకొని పైకి బింకంగా దేవుడు లేడు లేడు అని చెబుతూనే మనసులో ఏదో తెలియని సందిగ్ధంలో  మదనం తో ఉంటాడు. ఇది సత్యం.

• ఇక మధ్యస్తంగా ఉండి దేవుడు ఉన్నాడా లేడా? ఉంటే , మరి ఎందుకు కనబడడు ? అసలు సత్యం (దేవుడు) అనేది నిజమా కాదా? అనే మీమాంస లో ఉంటూనే , కష్టం వస్తే మాత్రం కనపడని దేవుడు కి మొక్కుకోవడం , ఇతరత్రా సమయాలలో సందేహపడడం ఇవన్నీ ఈ కోవకు చెందిన మనుషులవి .

• నీ సమస్త సందేహాలకు నీకుగా  సమాధానం దొరికేలా చేసేవాడే మేధో దక్షిణామూర్తి. నీకు ఆలోచన ఇచ్చి నీ మనసును సన్మార్గంలో ప్రేరేపించి నడవడిక నేర్పు మహా జ్ఞాన రూపం దక్షిణామూర్తి గా కనబడే ఈశ్వరుడి రూపం. ఈ రూపంలో శివుడు సద్గురువు .

• ఉన్నాడు అన్నవాడికి  ఉండి మోక్ష మార్గాన్ని చూపడం , లేడు అన్న వాడికి లేనట్లు గా ఉండి నిరూపణ చేయడం , మధ్యస్తంగా ఉన్నవాడికి సందేహ నివృత్తి చేయడం ఇవన్నీ భగవంతునికి అవసరమా ? అంటే , ముమ్మాటికీ అవసరమే ఎందుకంటే తాను సృష్టించిన తన బిడ్డలే కదా ! వీరందరూ.  ఆయనకు ఓర్పు నేర్పు కూర్పు అన్నీ సహజసిద్ధం . అవి శక్తి స్వరూపం లో పుష్కలంగా ఆయనలో పొంచి ఉన్నాయి.

• ఏనాడైతే , ఓ సద్గురువారం (గురువారం) రోజు దక్షిణామూర్తి స్తోత్ర పఠనం , చిత్ర రూపంతో నీ ఇంట ఆరాధన అన్నది మొదలు పెడతావో , ఆనాటి నుండి నీ బుద్ధి లోని అజ్ఞానం అనే చీకటి గది తలుపులు తెరవబడి క్రమేపీ ధ్యాన యోగాల దిశగా అడుగులు పడి ప్రకాశవంతమైన జ్ఞాన వెలుగు నీలో నిండుతుంది. నీ గత జన్మల నుంచి పెండింగ్ గా మిగిలి పోయి ఉన్న అవశేష కర్మలు ఆధార భరితంగా పూర్తి అవుతాయి. అదే నిన్ను ముక్తి జీవన్ముక్తి దిశగా తీసుకువెళుతుంది .

• ఇంతకంటే నీ ఈ జన్మకు ఏం కావాలి .  తాపత్రయం గా సంపాదించిన స్థూలధనం , ఆస్తి సదుపాయాలు సౌకర్యాలు అనుభవించు, కానీ అవి నీతో పాటు పైసా కూడ మరుసటి జన్మ వరకు రావని  తెలుసుకో . నీతో పాటు శాశ్వతంగా వచ్చేవి సుక్ష్మ సంపాదన అయిన జ్ఞానం ,  జీవిత పాఠాల ద్వారా రూపు దిద్దుకున్న నీ స్వభావం, అనుభవాల ద్వారా మార్పు చేసుకున్న నీ సంస్కారం , మనసు లో నింపుకున్న ప్రేమ , తెలుసుకొని  ఆచరించే జ్ఞానం పవిత్రత ,  అనుభవం పొందుతున్న  శాంతి ,  సుఖం , ఆనందం , శక్తి  ఇవి మాత్రమే నీతో మరుసటి జన్మ కు వస్తాయని తెలుసుకో . 

మంచి తనం , మంచి మార్గం అనేవి ఎవరికోసమో కాదు నీ కోసం , నీ ఉన్నతి కోసం మాత్రమే .

ఓం శాంతి 🙏

ఓం నమఃశివాయ 🙏

యడ్ల శ్రీనివాసరావు 22 Feb 2026 . 4:00 AM.

722. మన ప్రభావం ఇతరుల పై ఎలా ఉంది?

 

  మన ప్రభావం ఇతరుల పై ఎలా ఉంది?

• మన జీవిత ప్రయాణంలో నిత్యం ఎంతో మంది తో సహగమనం చేస్తూ ఉంటాం. ఇందులో కుటుంబీకులు, రక్త సంబంధీకులు, మిత్రులు, వృత్తి లో సహచరులు, సమాజం లో అపరిచుతులు ఇలా అనేకుల తో మన కర్మ (పని) ఏదో రూపంలో ముడిపడి ఉంటుంది. దీని వలన నిత్యం మన యొక్క ఆలోచన , మాట , ప్రవర్తన తీరుల తో వారితో నడుస్తూ ఉంటాం . ఇటువంటి సమయంలో తప్పకుండా ఇతరుల ప్రభావం మనపై , మన ప్రభావం ఇతరుల పై తప్పకుండా ఎంతో కొంత ఉంటుంది అనేది వాస్తవం .

• ఇతరుల తీరును మనం చక్కగా గమనిస్తూ ఉంటాం , తెలియకుండానే గ్రహిస్తూ ఉంటాం. దీనినే ప్రభావం అంటారు. ఇదే చర్య మన నుంచి కూడా జరుగుతుంది. అంటే మన ప్రభావం కూడా ఇతరుల పడుతుంది . ఈ ప్రభావం లో మంచి చెడు ఏదైనా ఉండొచ్చు , అది బుద్ధి మీద ఆధారపడి ఉంటుంది.

• అయితే మన ప్రభావం ఇతరుల పై ఏ విధంగా ఉంటుంది అనే విషయం ఏ నాడైనా స్వయం పరిశీలించు కుంటున్నామా ? అందులో భాగంగా మనం ఇతరులకు ఇచ్చేది సంతోషమా ? దుఃఖమా ? రంజనమా ? . . . లేక , నా ధోరణి నాదే అన్నట్లు ఉంటున్నామా ? ఎందుకంటే మానవ సంబంధాలలో నిత్యం మనల్ని మనం పరిశీలించుకోవడం సవ్యమైన తీరును అవలంభించడం అనేది చాలా ముఖ్యమైన అంశం.

• ఇతరుల తో మన ప్రవర్తన ఆకర్షణ లతో నిండి ఉంటే , ఆ బంధం లో సఖ్యత అనేది కేవలం తాత్కాలికం మాత్రమే . మన  ప్రవర్తన   తీరు తెన్నులలో   కల్మషం లేని నాడే  సహజసిద్ధంగా సఖ్యత  దృఢం అవుతుంది. ప్రవర్తన లో సహజ సిద్ధమైన అమాయకత్వం , తెలియని తనం అనేవి సఖ్యత కు ఆధారంగా ఉంటాయి .

• మనకు ఉన్న అన్ని రకాల బంధాలలోని వ్యక్తుల వలన మన బుద్ధి కి నిత్యం ఎన్నో పరీక్షలు ఉంటాయి. ఇందులో మనకు ఆశలు , నిరాశలు , మభ్య పడడం , నిందలు , పొగడ్తలు , వ్యంగ్యాస్త్రాలు ఇలా ఎన్నో అంశాలు ఉంటాయి . ఈ పరిక్షలలో ఉత్తీర్ణత సాధించాలి అంటే బుద్ధి కి సూక్ష్మమైన పరిశీలన కావాలి . బుద్ధి బలోపేతం కావాలంటే అవగాహన తో కూడిన జ్ఞాన విషయాలు బుద్ధి లో నిరంతరం ధారణ జరగాలి. లేదంటే మన బుద్ధి విఫలమై , విషయ వికారాల ప్రభావాలకు లోనై మనసు అతలాకుతలమై చివరికి నైతికంగా పతనం ఆరంభం అవుతుంది .

• అందుకే మన ప్రవర్తన ను తప్పనిసరిగా నిరంతరం పరిశీలిన (check) చేసుకుంటూ ఉండాలి .

• మనం చేసే కర్మల గతి (direction) చాలా సూక్ష్మం మరియు అతి రహస్యం (hidden). కొన్ని సార్లు కర్మలు చేసేటప్పుడు ఆనందం గా చేస్తుంటాం . కానీ అనతి  కాలంలోనే   శిక్షలు అనుభవించే సమయంలో కూడా మనం చేసిన పాప కర్మలు మనకు గుర్తుకు రావు . దీనికి కారణం మన బుద్ధి , సూక్ష్మం ఎరుగక పోవడం .

 అందుకనే మన ఆలోచనలకు పదును పెడదాం , సూక్ష్మతను బుద్ధి కి అలవాటు చేద్దాం.

• మనం జన్మతః ఉన్నతులం కాదు. కానీ జీవిస్తూ ఎదుగుతూ ఉన్నతి సాధించడం కోసం జన్మ తీసుకున్నాం . ఈ విషయాన్నే మన పుట్టడం కంటే ముందు ఆత్మ  రూపులు మైన  మనం  పరమాత్మ కి వాగ్దానం చేసి ఆ తరువాతే జన్మ తీసుకున్నాం. కానీ జన్మించిన అనంతరం మాయా ప్రభావం వలన ఈ విషయం పూర్తిగా మరచి పోయాం. ఇదే సత్యం. అందుకు నిదర్శనం , నేడు ఇదంతా చదివి అర్దం చేసుకోవడం .

ఓం శాంతి .

ఓం నమఃశివాయ 🙏

యడ్ల శ్రీనివాసరావు 21 Feb 2026 , 10:00 AM.

721. దేవుడిని ఎందుకు నమ్మాలి ?

 

దేవుడిని ఎందుకు నమ్మాలి ?

• నేను దేవుడిని నమ్ముతాను . అవును దేవుడిని మాత్రమే నమ్ముతాను . నా దేవుడు నా కంటికి కనపడడు అయినా నేను నమ్ముతాను. నాకు నమ్మికయే  ప్రధానం.  నా శివుడు ఉన్నాడు నన్ను వింటున్నాడు , నాతో నే నడుస్తున్నాడు అనేది నా నమ్మకం . ఇది నాకే కాదు నాలాగ ఈ విశ్వం లో  కోటాను కోట్లమంది వారి మనసులలో ఇష్టపడి స్మరించే  దైవం అంటూ ఒకటుంది . అది ఎప్పుడూ తమను రక్షిస్తూ  ఉంటుంది  అనే  నమ్మకం  వారిని నడిపిస్తుంది .

• ఈ కలియుగంలో   దేవుడిని  కాకుండా  మానవమాత్రులను   గుడ్డిగా విపరీతంగా  ఆధారపడి  నమ్మినా చివరికి క్షోభే మిగులుతుంది.  ఇది సత్యం .  ఎందుకంటే మనం నమ్మిన ప్రతి ఒక్కరూ తిరిగి మనల్ని అదే విధంగా ముమ్మాటికీ  నమ్మరు . . . . ఎందుకంటే , ఒకరి  పట్ల   నమ్మకం  ఉంచుకోవడం, పెంచుకోవడం  అనేది  నీకు స్వభావ రీత్యా ఒక  అవసరం  అయితే  . . . .  వారికి మాత్రం  నీ పట్ల నమ్మకం  అనేది    లేకుండా  వేరే అవసరాలతో  నీతో ఉండొచ్చు .  కానీ భగవంతుడు అలా ఉండడు . నువ్వు ఎలా నమ్ముతావో , భగవంతుడు కూడా నిన్ను అలాగే  , లేదా అంతకు మించిన శ్రేయస్సు తో  నమ్ముతాడు . కారణం , మనుషుల మాదిరిగా భగవంతుని కి  స్వార్థపూరిత అవసరాలు ఉండవు . 

ఈ విషయాలను స్వయం గా నీకు దేవుడు మాత్రమే అర్దం చేయిస్తాడు , ఎందుకంటే నీవు ఎందరి పైనో   ఎన్నో విధాలుగా  నమ్మకం ఉంచుకొని మోసపోయావు కాబట్టి. 

నువ్వు భగవంతుడిని   ఏ నాడైతే   సత్యత తో  విశ్వసిస్తూ  నమ్ముతావో , అప్పుడు  మాత్రమే ,  ఇతరులకు  నీ పట్ల అంతులేని నమ్మకం కలుగుతుంది. ఎందుకంటే ఇందులో భగవంతుడే నమ్మకం అనే పాత్రలో  ఇమిడి  ఉంటాడు  కాబట్టి .

• ఒక్క మాట చెప్పండి మనలోని రక్తం పైనుండి కిందకి లేదా కింద నుండి పైకి మన శరీరం లో ప్రవహిస్తుందా  లేదా?

• మన గుండె తనంతట తానుగా ఊపిరి లేదా ప్రాణవాయువు అందుతున్నంత  వరకు కొట్టు కుంటూ  ఉందా లేదా?

 ఇవన్నీ నీకు నాకు సహజ లక్షణాలు అయితే మన జననం మరణం మన చేతులలో ఎందుకని  లేదు ఇప్పటి కీ  ?

• నీ ఆకారం , నీ  పొడుగు , నీ పొట్టి  , నీ రూపం నీ చేతులలో ఎందుకు లేదు ?

• నీ  ఆస్తి ,  నీ డబ్బు ,  నీ కుటుంబం ఎందుకు నిత్య సుఖసంతోషాలు  నీకు ఇవ్వట్లేదు ? 

• ఆరు బయట  అరుగుపై  పడుకున్న వాడు ఆనందహేళి  లో   ఎందుకు  ఉంటున్నాడు ?

• అంతెందుకు ఈ రోజు నువ్వు నేను ఇక్కడ , రేపు ఎక్కడో   ఏమిటో  మనకు  తెలుసా  ?

• దైవం మానవ కల్పితం అనుకుంటే ఆ ఆలోచన ఒక కల్పన మాత్రమే. ఈ సృష్టిని నడిపించే ఒక అతీంద్రియ శక్తి పరమాత్మ  . ఇది యదార్ధం , ఇదే సత్యం. సత్యాన్ని ఒప్పుకోవటం అంటే భగవంతుని అంగీకరించడమే , అదే శివం అదే సుందరం. నువ్వు సత్యాన్ని అంగీకరించిన నాడు  ఆ పరమేశ్వరుడు నిత్యమై నీకు నాకు సుందరమైన జీవితాన్ని జీవనాన్ని కలుగచేస్తాడు . భగవంతుడు నీ తో ఉన్నాడు అనడానికి నిదర్శనం,  మునుపెన్నడూ నీ లోని కానరాని  అద్వితీయ, అతీంద్రియ శక్తిని నీ లో నువ్వు  అనుభవించడం .

• నీ  నోటి వెంట సత్యం పలకని నాడు , శివుడు నీ వెంట ఉండడు. మాయ మాత్రమే నీకు తోడు నీడ గా ఉంటుంది. అది నిన్ను అందలం ఎక్కించినట్లు ఎక్కించి  అమాంతం గా  కింద పడేస్తుంది. ఇదే నీకు కోలుకోలేని దుఃఖం . మాయ అంటే నీ లోని అసత్యం  మరియు బలహీనత . 

అందుకే అంటాను . . . నువ్వు నేను అందరూ శివపరమాత్ముని  నమ్మాలి .  భగవంతుడిని సత్యతో   నమ్మిన నాడు , నువ్వు  ప్రతీ వ్యక్తి పై చూపించే నమ్మకం లో  నీకు భగవంతుడు కనిపిస్తూనే ఉంటాడు .  జరిగిన , జరుగుతున్న సంఘటనలు ద్వారా  నీకు  మంచి చెడులు  అర్దం చేయిస్తూ ఉంటాడు .  ఎందుకంటే భగవంతుడు నిన్ను శుద్ధి  గా , ముక్తుడు గా  చేసేందుకే ఉన్నాడు , నీకు సంబంధించిన అన్ని బంధనాలలో  అనేక  స్వభావ సంస్కారాలు కలిగిన  వ్యక్తులు నీ  చుట్టూ ఉంచాడు . స్వీయ పరివర్తన చెందడం , చెందక పోవడం అనేది  నీ బుద్ధి కి సంబంధించిన అంశం .

శివరాత్రి శుభాకాంక్షల తో 💐 . . .

ఓం శాంతి 🙏 

ఓం నమఃశివాయ 🙏 

Daimond Hall , Mount Abu ✍️ 

యడ్ల శ్రీనివాసరావు 13 Feb 2026 , 7:30 PM.