718. శివ గణం అంటే . . .

శివ గణం

• శివుని గురించి రాయడానికి , మాట్లాడటానికి , ఆలోచించడానికి , తెలుసుకోవడానికి శివ తత్వం బోధ పడక్కర్లేదు శివుని పై అనురక్తి కలిగితే చాలు.

ఆయన్ను  మనసులో స్మృతి చేస్తూ ఉంటే చాలు ,  శివుని తో మొదలవుతుంది శివ బంధం .  ఆ పరిచయం , ప్రయాణం , ఆయన తోడు ఉన్నాడు అనే అనుభూతి నీకు కైలాస శిఖరాల వెండి కొండలపై నడయాడు  వేల వేల మధుర స్మృతులను తలపిస్తుంది. ఇది అనుభవించిన వాడికి మాత్రమే ఎరుక.

• నువ్వు పరమ జ్ఞానివా   లేక  అక్షరం ముక్క తెలియని అవివేకివా  అన్న భేదం  శివ సాధనలో అణువంత  కూడా  లేదు . ఇక్కడ అందరూ సమానులే . ఒక్క సారి శివుడితో నీ నడక మొదలు అయితే , నీ జీవితపు నడవడిక దిశ దశ మారిపోతుంది.

• నువ్వు  ఏనాడైనా  ప్రేమతో నో , కోపంతో నో నాకు  దేవుడితో  పని లేదు అనే పరిస్థితి లోకి  వెళ్ళవా , అదికూడా అలకతో కూడిన సరియైన స్థితితో  మాత్రమే సుమా !  . . . నీ వెంట భగవంతుడు  పరుగెడుతూ వస్తాడు.  ఒక స్వచ్చమైన  అమాయకత్వ  మనసు కలిగి  సన్మార్గంలో  నడిచే భక్తుని  కొరకు భగవంతుడు  తనంతట తాను గా వెతికి  వెతికి  వస్తాడు. ఎందుకంటే , ఏ తండ్రి తన పిల్లల కు  దూరంగా  ఉండలేడు . . . ఉండాలని అనుకోడు . . .  ఉండడు  కూడా .

 పంచభూతాలను నియంత్రించేవాడికి  , నీ పంచ కర్మేంద్రియాలను  ,  నీ భావోద్వేగాలను  కట్టడి చేయడం  అంత కష్టం  ఏమీ కాదుకదా ! . . . కానీ నిన్ను నిన్నుగా ఆలోచింప చేసే పరిస్థితులు కలిగిస్తాడు  ,  నీ లోని చైతన్యం  మేల్కొనే లా  చేస్తాడు . నీ  అవశేష కర్మలను (Pending Karmas) ఆధార భరితంగా  ప్రత్యక్షం గా  చూపించి   అనుభవించేలా  చేస్తాడు . వాటిని మరల బేరీజు వేసి  , అప్పుడు వాటికి ఫలితాలు నిర్ణయిస్తాడు. ఇది శివ గణం లక్షణం . అందుకే  అంటున్నా , ఒక మానవ కణం ( అంటే నీ పుట్టుకలో నువ్వు ఒక కణం మాత్రమే ) శివ గణం గా మారటానికి బుద్ధి కుశలతే  ప్రధానం . మంచి చెడుల విచక్షణ శోధన సాధన ఇవన్నీ ఆచరణ మార్గాలే .

నిన్ను సర్వ శక్తి వంతుని గా  చేయడానికే శివుడు  ఉన్నది . అందుకు ఆయన శక్తి ని  నీకు ధారణ చేస్తూ నే ఉంటాడు . అందుకు నువ్వు చేయవలసినది ఒక్కటే ,  అది   మనసున  "శివయ్య" అనే  ప్రేమ పూర్వక పిలుపు తో కూడిన స్మృతి.

ఓం శాంతి 🙏 

ఓం నమఃశివాయ 🙏 .

యడ్ల శ్రీనివాసరావు 29 JAN 2026 10:30 AM.