266. శివ నామం ( The Power)

శివ నామం

The Power

• శివ నామం   శివ నామం

  శివ నామం   శివ నామం

• శివ నామం    శివ నామం

  స్వర నాదం   సమ్మోహనం

  సకల  శాస్త్రాల  సారంగం

  జీవన  వేదా న  అంతరంగం.

 

• శివ నామం     శివ నామం

  స్మృతి రాగం   యతి గానం

  సత్య  సాధ న    సోపానం

  వాణి  జ్ఞానా న   గీర్వాణం.

• శివ నామం    శివ నామం

  శివ నామం    శివ నామం

• శివ నామం    శివ నామం

  శుభ శ్రవణం   శుభ కలశం

  సర్వ దుష్కృత   సంహరణం

  అష్ట  భోగాల    సాధికారం.

• శివ నామం    శివ నామం

  సత్సంకల్పం   సర్వాభీష్టం

  అరిషడ్వర్గాల   సంహారం

  చిద్విలాసలా    వికాసం

• శివ నామం   శివ నామం

  శివ నామం   శివ నామం

• శివ నామం    శివ నామం

  సాక్షిభూతం    సాక్షాత్కారం

  ఆత్మ  చైతన్య   జాగృతం

  అభవ  విభవ   సాఫల్యం

భావం

• శివుని నామము పలుకుట చే కంఠ స్వరం    ఆకర్షణీయంగా మారుతుంది.

• శివుని నామము అనంతమైన జ్ఞాన శాస్త్రాలు కలిగిన ఏనుగు వంటి స్వరూపం.

• శివుని నామము ఒక జీవి ఎలా జీవించాలో తెలియచేసే అంతరంగం.

• శివ నామము నిత్యం  స్మృతి చేయుట వలన పద్యములు  రాగయుక్తం గా గానమవుతాయి.

• శివ నామము సత్యాన్ని అన్వేషించుటకు నిచ్చెన వంటిది.

• శివ నామము సరస్వతి దేవి పలికే జ్ఞానానికి దేవభాష వంటిది.

• శివుని నామము వినుట శుభకరం. శివ నామము పవిత్రమైన పూజా విశేషములు కలిగినటువంటి పూర్ణ కుంభం వంటిది.

• శివుని నామము పలుకుట చే సమస్త పాపాలు, కల్మషాలు నశిస్తాయి.

• శివుని నామము వలన ఎనిమిది రకాల భోగములు ఆధీనమవుతాయి.

• శివుని నామము మంచి ఆలోచనలు  కలిగించి ధర్మబద్ధమైన కోరికల్ని నెరవేరుస్తుంది.

• శివ నామం   కామం క్రోధం లోభం మోహం మదం మాత్సర్యాలను సంహరిస్తుంది.

• శివ నామము వలన చిరునవ్వు తో ఉంటూ మనసు తేజోమయం అవుతుంది.

• శివుని నామము జపించుట చే  మనో నేత్రం తో సమస్తం ప్రత్యక్షంగా  సాక్షి గా చూడగలరు

• శివ నామ జపము చే ఆత్మ లోని శక్తి  చైతన్యం తో మేల్కోంటుంది.

• శివుని నామము జపము చే తదుపరి  జన్మ తీసుకోకుండా జనన మరణ చక్రం నుండి బయట పడగలరు. ఈ జన్మలో కార్యసాధన, ఐశ్వర్యం, మోక్షం సిద్ధిస్తాయి.

ఓం నమఃశివాయ 🙏

సమ్మోహనం = తన్మయం తో ఇష్ణపడుట

సారంగం = ఏనుగు

వాణి = సరస్వతి దేవి, మాట, పలుకు

గీర్వాణం = దేవభాష, సంస్కృతం

దుష్కృతము = కల్మషము, పాపము.

సాక్షి భూతం = సమస్తం చూడటం

అభవ = పునర్జన్మ లేని వాడు, ముక్తుడు

విభవ = కార్యసాధన, ఐశ్వర్యం, మోక్షం

యడ్ల శ్రీనివాసరావు. 1 November 2022 2:00 AM

265. ఆత్మ జ్యోతి

 

ఆత్మ జ్యోతి

• వెలిగింది  జ్యోతి    ఆత్మ జ్యోతి

  వెలిగింది  జ్యోతి    ఆత్మ జ్యోతి

• కన్నీరు   తైలము గ

  దేహ  మనే   ప్రమిద లో

• వెలిగింది  జ్యోతి   ఆత్మ జ్యోతి

• కన్నీరు ఇంకినా    తైలము కరిగినా

  దేహము కాలిన     ప్రమిద యే పగిలినా

• ఆత్మ   దేదీప్యమై

  పరమాత్మని కోసం  పయనము  అయింది.

• వెలిగింది  జ్యోతి    ఆత్మ జ్యోతి

  వెలిగింది  జ్యోతి    ఆత్మ జ్యోతి

• రూపము లేని    పరమాత్మ  శివుడు

  అనుభవము నే   ఆసరా  అయ్యాడు

• ఏమని చెప్పాలి    ఎలా చెప్పాలి

  శివుడు   శక్తి యై   ఉన్నాడని

  యుక్తి నే   చేయిస్తున్నాడని.

• ధ్యాన మనే యోగము తో 

  దరి చేర్చుకున్నాడు

  జ్ఞాన మనే అమృతము ను 

  ధారణ చేస్తున్నాడు

• వెలిగింది  జ్యోతి    ఆత్మ జ్యోతి

  వెలిగింది  జ్యోతి     ఆత్మ జ్యోతి

• కన్నీరు   తైలము గ

  దేహ మనే   ప్రమిదలో

• వెలిగింది  జ్యోతి   ఆత్మ జ్యోతి

• జ్యోతి లోని    ప్రకాశం

  జన్మాంతర  జ్ఞాపకాలు   తెరుస్తుంటే

  దివ్యమైన  శివుని కి   ఎంత  చేరువై  నానో

  ఏ జన్మ భాగ్యమో   ఏ పుణ్య ఫలమో

• శివనామ స్మరణము 

  శతకోటి పాపాల హరణము

  పరమాత్మని స్మరణము 

  జీవన్ముక్తి సోపానం.

యడ్ల శ్రీనివాసరావు 30 Oct 2022 10:00 pm

264. మేలుకో మానవ మేలుకో

 

మేలుకో మానవ మేలుకో

• మేలుకో   మానవ   మేలుకో

  శివుని     జ్ఞానము  తెలుసుకో.

• నేను  నేను   అంటావు

  ఆ  “నేను”  మూలం  ఏమిటో   తెలుసుకో.

• కనులు  మూసుకొని  కోరికలు

  కోరేందుకు  కాదు రా   నీ జన్మము.

 

• నీ  కర్మను  తెలుసుకొని

  కరిగించుకుంటే  నే

  సార్ధకం  నీ జన్మ  సార్థకం.

• భక్తి  భక్తి   అంటావు

  భక్తి తో  నీకు  దుర్గతే

  కానీ

  సద్గతి  ఏనాటి  కో.

• భక్తి లోన  సుఖము  ఆవగింజే

  కానీ

  ఆకాశమంత  కాదురా  మానవా.

• మేలుకో    మానవ    మేలుకో

  మేలుకొని  శివుని  జ్ఞానము   తెలుసుకో.

• నేను  నేను  అంటావు

  ఆ  “నేను”  మూలం ఏమిటో   తెలుసుకో.

• గర్భం లో   లెక్కలు  వేసుకొని  పుడతావు

  గతి తప్పి  లెక్కలే  మరచిపోతావు

  అందుకే  కదా

  లెక్క లేనిది  గ    మారింది    నీ  జీవితం.

• శివుని    జ్ఞానం   నీకు  తెలియాలంటే

  నీలో ని   మౌఢ్యం   నువ్వు  తెలుసుకో.

• నాది  నాదంటూ   నరకమున  ఉంటావు.

• వారు  నా  వారంటు

  వీరు   నా   వారంటు

  మాయలో  పడి  మసిబొగ్గు  అవుతావు.

• నీవెవరివో    తెలియని   నీకు

  నీ వారు   ఎవ్వరు  రా   మానవా.

 

• మేలుకో  మానవ  మేలుకో

  మేలుకొని  శివుని   జ్ఞానము  తెలుసుకో.

• నేను  నేను  అంటావు

  ఆ   “నేను”  మూలం  ఏమిటో   తెలుసుకో.

 

• నాటకం లోని   పాత్రధారి వి    నీవు

  నీ  నాటకం  ఏమిటో 

  తెలియకపోవడమే   జగన్నాటకం.

• జ్ఞాన సాగరుని     చేరాలంటే

  ధ్యాన సాగరం లో   మునగాలి.

  సేవ నే   శక్తి గా     మలచాలి.

  యుక్తి నే   ముక్తి గా   తలచాలి.

• మేలుకో   మానవ   మేలుకో

  మేలుకొని   శివుని   జ్ఞానము   తెలుసుకో.

వివరణ :

  భక్తి భక్తి అంటావు  భక్తి తో నీకు దుర్గతే

  కానీ   సద్గతి ఏనాటి కో.

క్షమించాలి.... నేటి కాలంలో చేసే భక్తి,  భగవంతుని మీద ధ్యాస కంటే కూడా  కోరికలు, ఆడంబరాలు, వృధా ఖర్చులు , అవసరాలు కోసం,  ఇంకా  వ్యాపార దృక్పథం ఎక్కువ శాతం మనుషుల లో మరియు దేవాలయాల వ్యవస్థ నిర్వహణ లో ఉంది.  దీని వలన అధోగతే కాని సద్గతి పొందలేరు.  దేవుని ఎదుట నిలబడి మొక్కడం, ఏదో గుడికి రిలాక్సేషన్ కోసం , రిక్రియేషన్ కోసం వెళుతున్నాం అనే భావన చాలా మంది మనసులలో అంతర్గతం గా ఉంది. అలాంటి భక్తి చేసే వారి కి ఏ మాత్రం ఒక శాతం  ప్రయోజనం ఉండదు.  సుఖం, శాంతి లభించదు, అని చెప్పడం ఈ వాక్యం యొక్క ఉద్దేశం.  భగవంతుని పై నమ్మకం, విశ్వాసం నిజాయితీ గా ఉంటే, మనిషి తనను తాను మానసికంగా వదులుకుని , తనువు మనసు ధనం భగవంతుని కి అర్పించినపుడే , భగవంతుడు మనిషి ని చేయి పట్టుకొని నడిపిస్తాడు. ఇది కొంచెం అర్దం కావాలి, ఈ స్థితి పొందాలి అంటే పరమాత్మ అయిన శివుని జ్ఞానం మనిషి లో జాగృతం కావాలి.🙏

భగవంతుని పై భక్తి   భయం తో,  స్వార్థం తో  కాదు ప్రేమ తో  ఉండాలి. 

ఓం శాంతి 🙏

ఓం నమఃశివాయ 🙏

యడ్ల శ్రీనివాసరావు 30 Oct 2022 12:30 AM

263. శివుని ప్రేమ

 

శివుని ప్రేమ

• పదిలం పదిలం

  పరమ శివుని ప్రేమ పదిలం

• పదిలం పదిలం

  పురంధరుని ప్రేమ పదిలం

• కను  చెమ్మలో   చిగురించిన  ప్రేమ

  కంటిపాప న  దాచి న   కైలాస వాసా

• దాచిన  దాగేది కాదు   నీ ప్రేమ

  ఆపిన   ఆగేది   కాదు   నీ బాష్పం

• గరళమును  కంఠ  దాచిన

  గంభీరము   నిండు  కలిగిన

• పార్వతిని  నిలిపావు  నీ  లోన

  ప్రేమ నే  చాటావు  ఈ జగము న

• నీ వెంత  సఖుడవు  సదానందుడా.

• పదిలం  పదిలం

  పరమ శివుని ప్రేమ పదిలం

• పదిలం పదిలం

  పురంధరుని  ప్రేమ  పదిలం

 

• సతి  నిహతి కి  దహించి

  దక్షుని  హరియించి

• వీరభద్రుడి వై   విధ్వంసం  చేసావు

  విశ్వ వీధిలో    పాగలుడి వై  తిరిగావు

• నీ ప్రేమెంత   పదిలమో  పరమేశ్వరా

• మౌనము తో   జగతి నే   మోస్తావు

  బైరాగి  వై   భువనము  నేలుతావు

• నీ ప్రేమ  నిండిన  పార్వతి 

  నీ లో  కొలువై నందుకే  కదా

• పదిలం  పదిలం

  పరమ శివుని  ప్రేమ పదిలం

• పదిలం పదిలం

  పురంధరుని  ప్రేమ  పదిలం

• విశ్వప్రేమ ను  పంచేటి  నీకు

  ఎందుకీ  స్మశాన  వైరాగ్యం

  దేనికీ  నిశ్శబ్ద  యుద్ధం

• నీ కంట నీరు ను   రుద్రాక్ష చేసావు

• నీ  ప్రేమ వేదన తో   యోగి గా  మారావు

• ధ్యాన యోగము తో  తన్మయుని  వైనావు.

• అంతులేని  ప్రేమ ను అదిమి ఉంచి

  రౌద్రము తో  రుద్రుడి గ   మిగిలావు

  ఎందుకీ  స్థితి  హర

• పదిలం   పదిలం

  పరమ శివుని   ప్రేమ పదిలం

• పదిలం  పదిలం

  పురంధరుని  ప్రేమ  పదిలం.

యడ్ల శ్రీనివాసరావు 29 Oct 2022 5:00 AM.

262. వదలకు నా తండ్రి శివా

 

వదలకు నా తండ్రి శివా

• వదలకు నా తండ్రి  శివా

  వదలకు

  నా చేయి వదలకు

• జన్మ జన్మలు గా  కానరాని

  వాడివి

  కరుణ తో కలిసావు

  మమత ను  పంచావు.

• వదలకు నా తండ్రి  శివా

  వదలకు

  నా చేయి వదలకు

• వదిలితే మాయ లోకం లో

  మసకబారి పోతాను.

• దేహం వదులుతా నని

  రోదిస్తే వచ్చావు

• నేనెవరి నని అడిగితే

  నా చేయి పట్టావు

• ఇది ఏ జన్మ భాగ్యమో

  ఇది ఏ కర్మ ఫలమో.

• పిలిచిన   మాటలో   పలుకుతునే  ఉన్నావు

• తలచిన   కనుల లో  నిలుస్తునే  ఉన్నావు

• మన  బంధమేమిటో   చెపుతూనే ఉన్నావు.

• వదలకు నా తండ్రి  శివా

  వదలకు

  నా చేయి వదలకు

• వదిలితే అంధుడి నై

  ఇంకెన్ని జన్మలు ఎత్తేది.

• నీ స్మరణ యే   నా కర్మము

  నీ  బంధమే    నా బుణము.

 

• ఈ ఊపిరి నీది … ఈ చలనం నీది

  ఈ జీవం నీది   …  ఈ దేహం నీది

• సిద్దము తో  సిద్దుడినై  సంసిద్ధముగా  ఉన్నాను

• నీ కనుసైగ కై  ఎదురు  చూస్తూ నే  ఉన్నాను.

• వదలకు నా తండ్రి  శివా

  వదలకు 

  నా చేయి వదలకు

• జన్మ జన్మలు గా   కానరాని  

  వాడివి

  కరుణ తో   కలిసావు

  మమత ను  పంచావు

• బాధ్యతలు  

  కరిగించి

  నీ చేత నే   తీసుకుపో

• ఈ ఆనందం

  దివ్యా నందం

  నిత్యా నందం

  సత్యా నందం

  పరమానందం

• ఓం నమఃశివాయ     ఓం నమఃశివాయ

  ఓం నమఃశివాయ     ఆత్మం సమర్పయామి

  ఓం నమఃశివాయ     ఆత్మం సమర్పయామి

  ఓం నమఃశివాయ    దేహం సమర్పయామి.

🙏

యడ్ల శ్రీనివాసరావు 28 October 2022 , 2:00 AM.

261. శివుని యోగము

 

శివుని యోగము

• శివుని  మొక్కిన  చేతి కి  మోక్షము

  శివుని పలికిన  నోటి కి  యోగము  సంయోగము

• దేహమును  దాపురించిన  వికారములు

  మమకారములై   వీడలేనపుడు

• శివుని మొక్కిన  చేతి కి  మోక్షము

  శివుని పలికిన  నోటి కి  యోగము  సంయోగము

• అహము నిండిన చిత్తము కు  మిగిలేది ఆవేదన

  శాంతి నిండిన  ఆత్మకు   కలిగేది   సౌభాగ్యము.

• దేహభిమానం తో  చివరికి  మిగిలేది దౌర్భాగ్యము

  దేవాభిమానం తో  చిరకాలం  కలిగేది *ధవళము.

• శివుని  మొక్కిన  చేతి కి  మోక్షము

  శివుని పలికిన  నోటి కి  యోగము సంయోగము

• నరుని నటన లో   మిగిలేది  యాతన

 *హరుని స్మరణ తో  కలిగేది *సాధన

  గురుని బాటలో   దొరికేది  చైతన్యం

  యముని చెంతన  జరిగేది  ప్రక్షాళనం

• శివుని మొక్కిన  చేతి కి  మోక్షము

  శివుని పలికిన  నోటి కి యోగము సంయోగము

యడ్ల శ్రీనివాసరావు 27 Oct 2022 2:00 AM

ధవళము = తెల్లని, స్వచ్ఛత, శుచి.

హరుడు = శివుడు

సాధన = సాధించుట, ఉపాయం, పరిష్కారం.

260. శివ రూపం

 శివ రూపం

• శివ రూపం   శివ రూపం

  శిలను శిల్పం  చేసే   మనోహరం

• శివ రూపం   శివ రూపం

  శిధిలానికి  జీవం పోసే   సాకారం

• జన్మ జన్మల  కర్మభోగం

  చిద్విలాసు ని   సాక్షాత్కారము

• శివ రూపం   శివ రూపం

  శిలను శిల్పం   చేసే మనోహరం

• నీ కంఠ మాలలో  రుద్రము    అక్షమై

  కంటి నీటి న   కారుతున్న దే    కైవల్యం.

• నీ సిగ మాటున  చంద్రము    జ్ఞానమై

  సెలయేరు లా   జారుతున్న దే   ఆహార్యం.

• శివ రూపం    శివ రూపం

  శిధిలానికి  జీవం  పోసే   సాకారం

• నీ మదిన  నిలిచిన   ధ్యానము    ధ్యాస యై

  వెన్ను న ఆడేటి   నృత్య మే   జాగృతం.

• నీ భృకుటి  ధారణ   నేత్రము    రక్ష యై

  నిశీధి  నేలేటి   దుష్ట శక్తుల  పరిరక్షణం

• శివ రూపం    శివ రూపం

  శిలను శిల్పం   చేసే  మనోహరం

• శివ రూపం    శివ రూపం

  శిధిలానికి   జీవం పోసే   సాకారం

• జన్మ జన్మల   కర్మభోగం

  చిద్విలాసు ని   సాక్షాత్కారము.

యడ్ల శ్రీనివాసరావు 26 Oct 2022 2:00 pm

259. జీవన పల్లవి

 

జీవన పల్లవి

• మనసు  సంయోగాల  సంగమం

  వైవాహిక  స్వాంతం

  మనిషి  సంయోజన  శ్రేష్టం

  మధురమైన  జీవితం

• రాగం విడిచే గానం

  భావం కలిపే జీవం

• సత్వ తమో రజో గుణాల వికారాల నుంచి విముక్తి పోందిన మనసు,   వివాహ బంధం అనే కలయిక తో కలిసినపుడు,  మనిషి ఆలోచనలు మధురమైన జీవితానికి ఉత్తమం గా ఉంటాయి.

• రాగం లోని గానం భావమై జీవం తో కలుస్తుంది.

🌟🌟🌟🌟🌟

• కాలం  కదలని  సమయం

  ఆస్వాంతం   స్తంభనం

  శాంతం  కలిగిన   మేళనం

  జీవన్ముక్తి కి  సోపానం

• శ్రావ్యం  పోసెను  ప్రాణం

  చరణం  చేసెను  లయం

• కాలం కలిసిరాని సమయంతా నిర్లిప్తత తో హృదయం స్తంభించి పోతుంది. శాంత స్వభావుల కలయిక జీవన ముక్తి కి ఎదుగుదల అవుతుంది.

• మధురమైన గొంతు కి  పద్యపదం  ప్రాణం మవుతుంది.

🌟🌟🌟🌟🌟

• శూన్యం    తరగని   తరంగం

  అంతరింద్రయ   చదరంగం

  బీజం   వేసిన   సంసృష్టం

  వీక్షణం లేని  సూక్ష్మం

• పల్లవి   సాగెను  సాంతం

  శృతి లో  కలిసే  సంగీతం

 

• అంతరంగం లోని ఇంద్రియములు (బుద్ది, మనసు, ఆలోచన, అహం), విత్తనం (ఆత్మ) తో సంయుక్తంగా కలిసిపోయి సూక్ష్మాతి సూక్ష్మమై శూన్యంలో ఉంటూ కనిపించకుండా తరగని అలలు వలె చదరంగం ఆడుతాయి.

• పరిపూర్ణమైన జీవన పల్లవి శృతి లో కలిసిన సంగీతం వలె సృష్టిలో ఐక్యమవుతుంది.

యడ్ల శ్రీనివాసరావు 25 Oct 2022 12:45 pm

258. జీవన దీపావళి

జీవన దీపావళి

• ఓ హో హో … ఆ హ హ

  ఆవళి ఆవళి మెరిసేను ఆవళి

  అది యే దివ్వెల దీపావళి

• ఓ హో హో … ఆ హా హా

  జావళి జావళి మురిసేను జావళి

  అది యే మల్లెల మజావళి

• వెలుగుతున్న దీపం లా

  మనసు నిండుతుంది మధురం గా.

• తరుగుతున్న చమురు లా

  తనువు నిండుకుంటుంది మధనం తో

• మధురమైన మనసు కు

  మధనపడే తనువు తో

  జత ఎందుకు…ఇంకెందుకో

 

• ఓ హో హో … ఆ హ హ

  ఆవళి ఆవళి మెరిసేను ఆవళి

  అది యే దివ్వెల దీపావళి

• ఓ హో హో … ఆ హా హా

  జావళి జావళి మురిసేను జావళి

  అది యే మల్లెల మజావళి

• లాలిపాట లాలన తో

  మనసు ఊగుతుంది మల్లె లా

• జోలపాట జావళి తో

  జీవితం నడుస్తుంది నావ లా

  అది యే మల్లెల మజావళి

• ఈ చీకటి వెలుగుల జీవనం

  శిలను శిల్పం చేసే మార్గం

  అది యే కోటి వసంతాల దీపావళి.

యడ్ల శ్రీనివాసరావు 24 Oct 2022 , 10:30 AM.

257. విష వలయం

 

విష వలయం

• ఎందుకు   అసలెందుకు

  జీవమే లేని   నా కే  ఎందుకు

• కాలమ నే   గమనము లో

  నే కనుమరుగై   ఉన్నపుడు

• కనుల లోని   కవితలకు

  జీవం  పోయడమెందుకు

• పడిలేచే హృదయమా

  పదనిసలు నీ కెందుకే

• అలవై ఎగర లేవు కానీ

  శిలవై శిధిలమవడానికా

• ఎందుకు  అసలెందుకు

  జీవమే  లేని  నా కే  ఎందుకు

• మరణించిన  క్షణము  నుంచి

  దేహం  దహనమై

  మనసు మనుగడ అవుతుంది.

• అది నేరమా పాపమా

• దేహమే లేని మనసును ఎలా హరించేది.

• ఎందుకు   అసలెందుకు

  జీవమే లేని  నా కే  ఎందుకు

• అక్ష“రాళ్ల”ను  రతనాలు గా   పేరుస్తూ

  రంగులద్దేటి   ఈ రచన   భవనాలెందుకు

 

• ఈ రాతలు    ఎందరికి     గుండె కోత లో

  మరెందరి కి  తలరాత లో   విధిరాత లో

• దేహం లేని   ఈ మనసు కు

  సాక్ష్యం   పంచభూతాలై

• ఈ రంగుల వలయం

  మెరిసే విష వలయం  అంటున్నాయి.

• ఏమో ఏమో   ఏమవుతుందో ఏమో

  మనసే లేని   మనుషుల తో

  ఈ మనసు ఇంకెంత కాలం ఉంటుందో.

• జననం  మరణాల  యోగం

  కర్మబంధాల  సాకారం

• బ్రహ్మ  రాసిన  జీవితం

  మనిషి  మనిషికొక   కావ్యం

• ఎందుకో అసలెందుకో

  సజీవమై   లేని   నాకు

• ఈ కర్మ   ఎందుకో  ఈశ్వరా!

యడ్ల శ్రీనివాసరావు 19 Oct 2022 , 12:30 AM.

256. బుట్ట బొమ్మ

 

బుట్ట బొమ్మ

• ఓ కుమారీ    సుకుమారీ

  నా కలల  కుమారీ     రాజ కుమారీ

  నవరత్నాల  రాశి వో    నవరసాల  సకియ వో

• నీ రూపం   అపురూపం

  నీ శ్రావ్యం  సమీరం

• నీ నగుమోము    అభినయం తో

  బుట్ట బొమ్మ లా    నడిచొస్తుంటే

  కాలిగజ్జె   నై   కావాలి

  నీ అరికాలి   నే   ముద్దాడాలి.

• నీ అరచేతి    సౌభాగ్యం తో

  కంటనీరు ని   తుడుస్తూ ఉంటే

  లాలి  పాప  నై   ఒదగాలి

  నీ కంటి పాప  నే   కావాలి.

• ఓ కుమారీ   సుకుమారీ

  నా కలల కుమారీ   రాజ కుమారీ

  నవరత్నాల రాశి వో     నవరసాల సకియ వో

• నీ మధురమై  న   మనసు లో

  ప్రేమ రాగం   కరుగుతు  ఉంటే

  దోసిలి  నే  పట్టాలి

  నీ  ముంగిట  నే  నిలవాలి

• నీ మేని   లోని  లావణ్యం

  లక్క అద్దిన  వర్ణాలు  అయితే

  కళ్ల నే  అర్పించాలి

  నీ పాదదాసి  నై   పడి ఉండాలి.

• ఓ కుమారీ సుకుమారీ

  నా కలల కుమారీ రాజ కుమారీ

  నవరత్నాల రాశి వో నవరసాల సకియ వో

• నీ రూపం అపురూపం

   నీ శ్రావ్యం సమీరం

   సమీరం = వీచే చల్లని గాలి

యడ్ల శ్రీనివాసరావు 18 Oct 2022 12:15 AM.

255. స్నేహ మిథునం

 

స్నేహ మిథునం

ఇవి 👇 మీ కంటి ముందు ఉన్న నిజాలు.

ఈ రచన 2022 October 15 న రాయబడింది.

ఆఖరి లో "చివరి మాట" మాత్రమే నేడు update చేయబడింది. మిస్ కాకుండా చదవండి.

దయచేసి ప్రశాంతంగా  ఉన్న సమయంలో మాత్రమే , పది నిమిషాలు కేటాయించి ఈ రచన  పూర్తిగా చివరి వరకు చదవమని  విజ్ఞప్తి 

🙏

(మనసు ఉన్న వారు ఆలోచించ గలిగే అంశాలు చాలా ఉంటాయి. ఒకటి రెండు సార్లు, చివరి వరకు తప్పకుండా చదవండి.)

 ప్రేరణ 

(ఈ రచన  ఎవరిని విమర్శించడానికి కాదు🙏.  

ఈ రచన అనేక మనసులకు  దర్పణం. 

 "మనం స్నేహం అనే బంధం లో  ఎక్కడ ఉన్నాం" అనే ఒక చిన్న ఆలోచన కోసం ...) 

 స్నేహం అనే మాట ను గౌరవించడం కోసం.  మానవ స్వభావాలను, అనుభవాలను  ప్రామాణికంగా తీసుకొని రాయబడింది. )

🌹🌹🌹

• ఈ మధ్య కొంత కాలం నుంచి కమ్యూనికేషన్ వ్యవస్థ పుణ్యమా అని సుమారు 1980 ల  కాలం నుంచి కూడా కలిసి చదువుకున్న ఎంతో మంది బాల్య స్నేహితులు , ముఖ్యం గా SSC చదువుకున్న వారందరూ వివిధ ఊర్లలో తాము చదువుకున్న స్కుళ్లలో   రీ యూనియన్  అని  ఆత్మీయ కలయిక అని  కలుసుకుంటున్నారు.  నేటికీ ఉన్న  తమ టీచర్లను సత్కరిస్తున్నారు.  ఈ  స్నేహితులు  అందరూ  50 సంవత్సరాలు నిండిన వారు.  ఇది ఆరోగ్యకరమైన పరిణామం.   వీరిలో కొందరు తమ పిల్లలకు పెళ్లిళ్లు చేసిన వారు,   జీవితం లో బాగా స్థిరపడిన వారు, ఇంకా  మరికొందరు  ఎన్నో  రకాల  సమస్యలతో  జీవితాన్ని  ఒడిదుడుకులతో ఈదుతున్నవారు  ఉంటున్నారు.  ఇలా  కలగూర గంప లా  వివిధ రకాల  మనస్తత్వాలతో  పరిణితి చెంది,  చెందక   ఉన్న  వీరందరూ కూడా  చెప్పుకోవడానికి  మంచి స్నేహితులే.  ఎందుకంటే బాల్యం లో అందరూ కలిసి ,  ఒకే చోట కూర్చుని ఎన్నో సంవత్సరాలుగా చదువుకున్న వారు.

• రీ యూనియన్ రోజు అందరూ పలకరింపులు, ఆప్యాయతలు , కబుర్లు అయిపోయాక,  ఫోన్ కాంటాక్ట్స్ తీసుకుని ,  ఆ రోజు సాయంత్రం వెళ్లి పోయేటప్పుడు  " జీవితంలో అంత మంచి రోజు తిరిగి రాదని , వారందరి స్నేహం చాలా విలువైనవదని , ఎంత కాలం జీవిస్తామో తెలియదు కానీ మరణించే వరకు అందరూ  కలిసి ఉండాలని,"   ఎన్నో  మధురస్మృతులు  పంచుకొని ఎంతో బాధగా,  కొందరైతే  కన్నీళ్లతో  ఆ రోజు ఇళ్లకు వెళ్లి పోతారు.

• ఆ తరువాత  అందరూ కలిసి వాట్సాప్ గ్రూప్ పెట్టుకుంటారు. తరచూ చిన్న తనం లో అనుభవాలు ఫోన్ ద్వారా షేర్ చేసుకుంటారు.  ఇలాంటి సమయంలో, అందరూ ఒకే రకమయిన మనస్కులు లా కనిపిస్తారు, అనిపిస్తారు.  రోజులు గడిచే కొద్దీ ప్రతీ ఒక్కరూ విడి విడిగా దాదాపు అందరు  మిత్రులతో , మిత్రురాళ్లతో   (సంఖ్యను బట్టి 30, 50, 100 మంది) మాట్లాడుకుంటూ  ఉంటారు.   సాన్నిహిత్యం పెంచుకుంటారు.   ఎందుకంటే స్నేహం లో ఉన్న మాధుర్యం అటువంటిది. అప్పటికే  (రా)బంధువులతో విసిగి పోయిన వీరందరికి ,   మిత్రుడు  అనే వాడు ఒక స్వతంత్ర్యం గా   కనిపిస్తాడు.   ఎందుకంటేే  యే కల్మషం ఎరుగని బాల్యం లో  కలిసి  పెరిగిన వాడు  మిత్రుడు కాబట్టి.  ఇందులో  ఆడ, మగ విడివిడిగా,  మరియు కలిసి కూడా ఉంటారు.  

బుద్ధి,  ఆలోచన, ప్రవర్తన  మంచివి గా  ఉంటే,   50 సంవత్సరాలు దాటిన  ప్రతి  స్నేహితుడికి  తన  జీవితంలో    ఈ ఆత్మీయత కలయిక  అనేది  ఒక  దివ్య  ఔషధం .... సజావుగా  జీవితం చివరి వరకు నిలబెట్టు కుంటే  ఒక అదృష్టం.

🍀🍀🍀🍀🍀🍀🍀

• మనిషి కి  బాల్యం  నుంచి  యవ్వనం దాటి వచ్చేటప్పటికి  మనస్తత్వం,  వ్యక్తిత్వం  చాలా  మారుతుంది.  తన  జీవితంలో  తల్లి తండ్రులు  పెంపకం తో కూడిన సంస్కారం  మరియు  బడిలో ఉపాధ్యాయుల ద్వారా  నేర్చుకున్న విలువలు,  తాను చదివిన  చదువులు,   ప్రస్తుతం  తనతో  ముడిపడిన  కుటుంబ బంధాలతో   ఉన్న   తీపి చేదు  అనుభవాల ఒత్తిడి,  వృత్తి రీత్యా  జీవితం లో సాధించిన జయాపజయాల ప్రభావం,   మరియు సామాజిక  ఆర్థిక  స్థితిగతుల   ప్రభావం తో ,   ఈ  ప్రస్తుత  వయసు లో  ప్రతి మిత్రుడు/మిత్రురాలి  మానసిక స్థితి  ఉంటుంది,  అనేది  పూర్తిగా  అక్షర  సత్యం.    

మిత్రులందరికీ,  రీ యూనియన్  జరిగిన సమయంలో  చాలా కాలం తరువాత,  అందరిని చూసిన   ఆ  ఆనంద సమయం లో  మాత్రమే    బాల్యం యొక్క  అనుభవం స్థితి,  ఆ ప్రేరణ  ప్రభావం  గొప్ప గా,  పులకింత గా  ప్రతీ ఒక్కరికీ  అనిపిస్తుంది.  ఇందులో ఏ సందేహాం లేదు. 

• ఏదో  సమయం కోసం ఇన్నాళ్లు  వేచి ఉన్నట్లు,  కొందరి మిత్రులలో  ఇక్కడి నుంచే,  తమ  మనసు లో అంత కాలం  దాచిపెట్టిన  అంతర్గత  శత్రువులైన  ఈర్ష్య,  ద్వేషం, కామం, అసూయ, అహంకారం అనే  పంచ వికారి గుణాలు  విపరీతం గా,  తమ లోపలి నుంచి  హద్దులు లేకుండా బయటకు రావడం మొదలవుతుంది....  వయసు పెరిగిన కొద్దీ  ఎవరికీ  జవాబు దారీ తనం లేకపోవడం,  పైగా  స్వేచ్ఛ అధికంగా  ఉండడం  వలన  విచక్షణ కోల్పోయి  తోటి బాల్య మిత్రుల/ మిత్రురాళ్లు  పై  తమ లోని వికారీ గుణాలను, అతి తెలివి తో  చూపిస్తూ , ఆనందం  పొందుతూ  ప్రవర్తించే వారు  ప్రతీ చోటా  తప్పకుండా  కొందరు  ఉంటారు .... ఉన్నారు.   అంత కాలం  కలిసి  చదువుకున్న   వీరిలో  స్నేహం,  స్నేహం లోని  ప్రేమ,  స్నేహం లోని  విలువ ,  గౌరవం  ఎక్కడికి  పోతాయో  వారి  రాతి  బుద్ధి కే  తెలియదు. 

అందరూ  మిత్రులే  అయినప్పటికీ కూడా ,  ఒకరికి లేనిది మరొకరి దగ్గర  ఉండడం,  పొందడం చూసి అసూయ మొదలవుతుంది.  ఓర్వలేని  తనం తో  విచక్షణ కోల్పోయి  సాటి బాల్య మిత్రులని బాధ పెట్టడానికి ఎలాంటి  నీచ మైన  మాటలైనా మాట్లాడుతూ,  అకృత్య కార్య కలాపాలకు  ఒడిగడతూ  కొందరు ఉంటారు.  పైగా  అది తమ  హక్కు గా భావిస్తారు. అది  టాలెంట్ గా ఫీల్ అవుతారు.  ఇందులో వేసే ఎత్తులు, పై ఎత్తులు రాజకీయ నాయకులు కూడా వీరికి సరి రారు .

• ఇందులో  ఉచ్ఛం నీచం లేకుండా ఎంతకైనా తెగిస్తారు. ఇలా  ఆడవారి లో,  మగ వారి లో  కూడా  కొందరు మాత్రం తప్పకుండా  చాలా చోట్ల  ఉంటారు.  చెప్పాలంటే,  నేడు  ఇలా ఉండడం అనేది వారి  మానసిక బలహీనత  లేదా   వారు  తమ జీవితం లో  నేటికీ అనుభవిస్తున్న  చేదు అనుభవాల పరిస్థితులు,  వైఫల్యాలు, ఆర్థిక ఇబ్బందులు, తమ సంసారిక సమస్యలు.  ఇలా ఒక అసంతృప్తి తో జీవితం గడుపుతూ  ఉన్న వీరికి  తమ తోటి మిత్రులు   కొందరు  ఆనందం గా కనిపిస్తూ ఉండేటప్పటికి ,  తమకు దక్కకనివి   ఇతరులకు దక్కుతున్నాయి అనే ఆలోచన తో,   జీవితం లో తాము ఓడిపోయాము,  సుఖంగా  లేము  అనే భావనలు  పెరిగి   తట్టుకోలేక  తమ  బాల్య స్నేహితుడు,    బాల్య స్నేహితురాలు   అని కూడా చూడకుండా  వయసు మీరినా  సరే నోటికి వచ్చినట్లు చెడు మాట్లాడుతూ, కుట్రలు  కుతంత్రాలతో  ఏదోక  నిందలు మోపి  , అదొక  ఉత్తమ మైన  కార్యంలా  విజయం సాధించినట్లు  ఆనందం పొందుతూ,  చేతిలో  మీడియా (ఫోన్)  ఉంది కదా అని   తమకు ఇష్టం వచ్చినట్లు  విషయాలను  వక్రీకరణ చేస్తూ  ఉంటారు.  ఇటువంటి  వారు  నిజానికి  విపరీతమైన మానసికంగా అనారోగ్యం తో  బాధపడుతూ ఉంటారని   మానసిక  వైద్య శాస్త్రం చెబుతోంది.  

మరికొందరైతే   ఇంకొక మెట్టు ఎక్కి బహిరంగంగా కాస్త ఉన్మాద  చర్యలతో  ప్రవర్తిస్తూ  ఆనందిస్తూ ఉంటారు.  ఇలా  భయబ్రాంతులకు సృష్టిస్తే , అందరూ భయపడి గౌరవం ఇస్తారు అనుకుంటారు.  ఇది కూడా మానసిక స్థితి బాగోలేని కారణం గా  ఇలా తాము చేస్తారని వారికి తెలియదు.   వాస్తవానికి  ఇటువంటి వారు సహజంగా మంచివారు.  కానీ జీవితం లో అనుకున్నది  మంచి తో  సజావుగా,  సాధించలేక పోవడం వలన  ఇలా ప్రవర్తిస్తూ ఉంటారు.

ఇలా సమాజం లో   రజో తమో గుణాలతో ప్రవర్తించడం వలన , తాము అందరికీ  చులకన అవుతాం అని  భావించలేరు.  ఇది తమ వ్యక్తిత్వాన్ని తాము  నిగ్రహించు కోలేని  బలహీనత అని తెలుసుకోలేరు. 

స్త్రీ, పురుష అనే  భేేదం లేకుండా ప్రతీ చోటా  బంధు  మిత్ర సముదాయం లో ఇటువంటి వారు కొందరు మాత్రం ఉంటారు.  

ఇటువంటి వారి మానసిక స్థితిలో మంచి మార్పు కోసం , ప్రతి ఒక్కరూ భగవంతుని కోరుకుంటూ మంచి సంకల్పం చెయ్యాలి.  అందరికీ వీరిపై శుభదృష్టి ఉండాలి. 

🍀🍀🍀🍀🍀🍀🍀

ఇంకా మరికొందరి,  మానసిక  స్థితి ఎలా ఉంటుంది అంటే, రాజ్యమే లేని చోట  ఒక  రాజ్యాధికారం కోసం పడే తపన,   శిలాఫలకాలపై  పేరు కోసం పడే తపన , ఎన్నో  కుటిల  యత్నాలకు దారి తీస్తుంది.  వీరి ఆలోచనలలో  అజ్ఞానం,  డొల్ల తనం నెమ్మదిగా కాలం గడిచేకొద్దీ  బయట పడుతుంది. 

సమాజం లో  ఎప్పుడైనా ఎవరైనా  ఎక్కడైనా  ఒక మంచి  బృహత్తర కార్యక్రమం చెయ్యాలి   అంటే  సహృదయంతో  అందరిని కలుపుకుని వెళ్లాలి. మంచి  ఆలోచనా పరులతో  చర్చించాలి.  ఈ మాత్రం కనీస  జ్ఞానం ఉండాలి.  లేకపోతే   ఉత్తమమైన కార్యక్రమం  అని అనుకొని  తలపెట్టే , ఏ పని అయినా  వృధా అయ్యే  అవకాశం ఉంటుంది. 

ఈ కలికాలంలో  మాయ కు  ఉండే ఆకర్షణ వలన , మాయకు వశం అయి,  కొందరు మాయ జీవులు చెప్పే మాటలకు  అనేక మంది  ఆకర్షితులై   వేల కొలది విరాళాలు, చందాలు సమర్పించిన  ఎందరో  తెలివైన  మిత్రులు కూడా చివరకు అమాయకులు గా  మిగులు తారు.   మాయ జీవుల యొక్క  వికారి బుద్ధి  ,    నెమ్మదిగా  తెలుసుకొని  లబోదిబో అంటారు.  కానీ నోరు  మెదపలేరు.  ఎందుకంటే తాము మాయ వలలో పడి  ఎంత బుద్ది తక్కువ పని చేశామో అని లోలోపల బాధ పడతారు. తమ బాధ ఎవరికైనా చెపితే చులకన అవుతాం అని భావిస్తూ, మౌనంగా ఉంటారు.... 

ఈ దశలో  మాయ  మాత్రం తన వికారి బుద్ధి తో  మనుషుల పై  విజయం సాధించాను అని సంబరపడుతుంది.  ఎందుకంటే మాయ ఎప్పుడూ మోసం చెయ్యడమే విజయం గా భావిస్తుంది. ఇది మాయా లోకం. 

మిత్రులారా! ఒకటి ఆలోచించండి. చిన్న తనం లో ప్రతీ స్కూల్ లో  తెలుగు టీచర్ చెప్పిన విషయం . "కుటిల యుక్తి కి మంచి శక్తి ఎప్పుడూ తోడు రాదు". అని 

ఒక  నెగెటివ్ ఎనర్జీ తో  ఆరంభించే   ఏ కార్యక్రమాలు కూడా సఫలం  అయిన దాఖలాలు లేవు. పైగా బూడిద లో పోసిన పన్నీరు వలే  ధనం వృధా అవుతుంది. దాని బదులు అనాధ పిల్లలు కు అన్నం పెట్టి,  బట్టలు ఇస్తే   పుణ్యం వస్తుంది.

పేరు, కీర్తి  కోసం కాకుండా, సేవా దృక్పథంతో  చేసే కార్యాలకు  పరమాత్మ ఆశీస్సులు ఎప్పుడూ ఉంటాయి. ఇది ప్రతి ఒక్కరూ గ్రహించాలి.

ఒకసారి కళ్లు మూసుకుని ఆలోచించండి ఈ విధమైన  మాయా  స్థితి  ప్రవర్తన లతో ,  ప్రతి మనిషి చుట్టూ ఎందరు ఉన్నారో .

🍀🍀🍀🍀🍀🍀🍀

మరొక  విషయం  ఏమిటంటే,  స్నేహితులు  అనబడే కొందరు , బహిరంగంగా తమకు గిట్టని వారిపై ఓర్వలేక    చేస్తున్న అకృత్యాలను  ఆగడాలను  అరికట్టడానికి,  ఖండించ డానికి ,  ఇది తప్పు ,  ఇలా చేయకూడదు  అనే  కనీస  జ్ఞానం చెప్పడానికి  మిగిలిన  మిత్రులెవరు   కూడా  చాలా సందర్భాల్లో ముందుకు రారు.  సరికదా  మౌనం గా   ఉంటారు.  ఎందుకంటే భయం.  ఈ  సమస్య నాది కాదు కదా ,  ఏమో వాళ్లకు వాళ్లు కు  మధ్య  ఏం గొడవలు ఉన్నాయో,   ధైర్యంగా  నిలదీస్తే  నా మీద  ఏ నిందలు ప్రచారం చేస్తారో   అని అనుకుంటారు.  నేను  ఇందులో  involve  అయితే  చెడ్డ అవుతాను అనుకుంటారు ....  

బహిరంగంగా ఒక హత్య జరుగుతున్నప్పుడు, ఆపడం పోయి .... హత్య ఎలా జరుగుతుందో అని ఆసక్తిగా చూస్తే , రేపు అదే  పరిస్థితి   ఎవరి కైనా  రావచ్చు.

 

తోటి వారిని కించపరుస్తూ  ఇబ్బంది పెట్టే  వారిని వదిలెయ్యడం మంచిది కాదు.  ఉత్తములైన వారు, ఇటువంటి వారి సమస్య ఏంటో తెలుసుకుని, వారి మానసిక స్థితికి  అర్దం అయ్యే రీతిలో మంచి  ఏంటో  చెప్పి, మంచి ప్రవర్తన తో  సహృదయులు గా  మార్చ వలసిన అవసరం ఎంతైనా ఉంది ... అలాకాదు  అనుకుంటే  స్నేహం అనే పదానికి అర్థం ఏమిటి. 

మంచి అనుకునే మనిషి  చెడు గాను  మారవచ్చు. చెడు  అనుకునే మనిషి  మంచి గాను మారవచ్చు.

మనిషి ,  ఒక మంచి పని  చేసి జీవితాంతం గుర్తించు కుంటాడు.  సంబరపడతాడు ....  కానీ  అంతకు మించి పది రెట్లు చేసిన చెడు పనులను ,  మసి పూసిన మారేడు కాయ లాగ  మరచి పోతాడు. ఇది మానవ నైజం.  ఆత్మ విమర్శ తో  తన చెడును తెలుసు కొని, మారితే అదే ఆ మనిషి కి మోక్షం.

ప్రతి మనిషి జీవితంలో తప్పులు చేస్తాడు. నిజానికి తప్పులు చేయడం  తప్పు  కానే కాదు. మానవ సహజం.... కానీ  చేసిన తప్పులు  సరిదిద్ధుకోక పోవడం  అసలు సిసలైన తప్పు, సమర్థించుకుంటూ  మరో  పది తప్పులు చేయడం మహా పాపం .... కాదనగలరా.

మనిషి  లో  చెడు తలంపులు  నిండినపుడు,  వ్యక్తిత్వం  సరిదిద్ధుకోవడం వలన ప్రవర్తన మారుతుంది.  ప్రవర్తన వలన పరిణితి వస్తుంది. పరిణితి వలన పరిపక్వత వస్తుంది. మనసు తేలిక అవుతుంది .... కానీ ఏ మార్పు రాకపోతే నే  జీవితం ఊహించని  శిక్షార్హం గా  క్రమేపీ అవుతుంది.  దీనికి ఎవరు బాధ్యులు కారు.

అహంకారం అనేది పరోపకార సేవ అయితే  అదే స్వర్గం.  అదే  అహంకారం కోపమో, మోసం గాని అయితే అదే నరకం. 

ఈ హిత బోధలు, ప్రవచనాలు, మాకు తెలుసు లే ... " సిన్నప్పట్నించి  సూత్తన్నాం,  యింటన్నాం" ... అనే వ్యంగ ధోరణి తో  నేటికీ  ఎవరైనా ఉంటూ ఆలోచిస్తే,   వారికి   పరమాత్ముడు  కూడా ఏ సహాయం చేయలేడు . రాబోయే రోజుల్లో  ఇటువంటి వారి జీవిత  ఫలితాలు కూడా  వారి  వ్యంగమైన మాట తీరు లాగే ఉంటాయి. ఇవి నగ్న సత్యాలు. వాస్తవాలు.  అర్దం చేసుకోవాలి.

కొందరు స్నేహితులు ,  వాస్తవ విషయాలు,  సూక్ష్మం గా,   పూర్తిగా,  నిజాయితీ గా తెలుసుకోకుండా,  ఎక్కడో  దూరంగా  ఉంటూ , తెలిసి తెలియని తనంతో  తమకు తోచిన విధంగా  మాట్లాడడం అనేది వారి విజ్ఞత  , గౌరవం  కోల్పోయే  లా చేస్తుంది. 

🍀🍀🍀🍀🍀🍀🍀

నేటి కాలంలో ... స్నేహం అనే జీవన ప్రయాణం లో  మిత్రులు మిత్రురాళ్లు  ప్రతీ చోటా తప్పకుండా కలిసి ఉంటారు.  స్త్రీ పురుష లింగ  భేదం అనేది చూడకుండా ఎవరైనా  సహృదయంతో , ప్రేమతో  ఇంటికి ఆహ్వానించి నపుడు కలిసి లేదా విడి విడిగా వెళ్లే వారు ఉంటారు , ఆ మాటకు వస్తే నేడు ఇలా ఎందరు లేరు,  ఆలోచించండి ... కానీ అది చూసి  అపార్థం గా  మాట్లాడే  వారి మనసు లో  కామం అనే  వికారం  పుష్కలంగా  ఉంటుంది. అదే  కామ  తలంపు లో  ఉండే  వారికి  దృష్టి(చూపు)  కోణం చాలా వక్రం గా (వంకర)  ఉంటుంది .... ఈ విధమైన వ్యర్థ విషయాలను  ఆసక్తి గా   వినే వారి లో  కూడా  స్థిత ప్రజ్ఞత  ఉండదు.    ఇటువంటి వారికి,   ఒక తల్లి కి జన్మించిన  అన్నా చెల్లి  కూడా  నడిరోడ్డుపై  వెళ్తుంటే ,  తేడా గానే  కనిపిస్తారు.  ఎందుకంటే  అది వారి  సంస్కారం .. ఎవరైనా  కాదనగలరా ... ఒకసారి ఆలోచించండి.

ప్రతీ ఒక్కరి కి   తల్లి, భార్య, కూతురు, సోదరీ  అనే స్త్రీ మూర్తులు ఉన్నారు.  అని బుద్ధి లో  గమనించు కోవాలి. 

"ఆడవారి కి ఆడవారు శత్రువు"  కాకూడదు. అలా ఉంటే  చదువు , జ్ఞానానికి అర్దం ఏముంది.

 

ఎవరైనా  సంస్కార హీనత  లేని వారు,    తమ నీచమైన మాట తీరు తో  వ్యర్థమైన విషయాలు మాట్లాడుతున్నప్పుడు  లేదా  ప్రచారం  చేసేటప్పుడు  వారి వ్యక్తిత్వం మరియు మానసిక స్థితి ఎలాంటిదో  ఒకసారి ఆలోచించండి. 

గాసిప్స్ (ఆధారం లేని పుకార్లు, లేదా  నిజాలను వక్రీకరించి న   విషయాలు)  ఎదుటి వారి గురించి  వింటున్నప్పుడు, మాట్లాడుకుంటున్నపుడు    చాలా మంది కి   మనసు లో   ఉత్సుహత ,  చాలా  ఆనందం గా,   ఆకలి తీరుతున్నట్లు  99 శాతం మంది కి  ఉంటుంది .... రేపు అవే గాసిప్స్  నా గురించి వస్తే,  నా గురించి ఎవరైనా ప్రచారం చేస్తే,  నా పరిస్థితి ఏంటి ,  నా కుటుంబ పరిస్థితి ఏంటి? .. అని ఏనాడైనా  ఎవరైనా ఆలోచించారా.  (మానసిక స్థితి  సరి లేని వారు ఎక్కడో ఉండరు.  మనుషుల మధ్య నే ఉంటారు) .... చెడు కర్మ లలో,  ఏ రకం గా  ఎవరు భాగస్వామ్యం అయినా, ఫలితం ఏదో రూపంలో తిరిగి వస్తుంది.... ఇది నిజం.

పనికట్టుకుని  చెడు ను  ప్రచారం చేసే  వారు ,  కనీసం,  ఏదో  శివనామస్మరణ ను  లేదా  అల్లా, జీసస్ నో   ప్రచారం చేసి ఉంటే ,   గత జన్మలలో  చేసిన పాపాలు  తొలగి,  నేటి జన్మలో  మంచి బుద్ధి తో ,   ఫలాలు ఇచ్చే  పచ్చటి చెట్టు లా  శ్రేష్టమైన  జన్మ పొంది,  కొందరి లా  ఉత్తమమైన  సుఖ భోగాలు  లభించేవి.  అలాగే  ఆ  దైవ నామం  వినే వారికి  కూడా పుణ్య ఫలం దక్కేది. 

ఒకరి  జీవితం లో  ఆసక్తి గా ఏం జరుగుతుందో అని  తొంగి  చూస్తే  ... మన జీవితం లో కి  వెయ్యి మంది తొంగి చూస్తారు.   సిద్ధం గా ఉండాలి.

మనిషి  చేసే ప్రతి కర్మ  రికార్డ్ అవ్వవలసిన చోట అవుతూనే ఉంటుంది. ఎవరు ఏం చేసినా ఎవరూ చూడడం లేదని అనుకుంటే అంత పిచ్చితనం మరొకటి ఉండదు.  

దైవత్వాన్ని అంకిత భావంతో జీవితం లో ఒక భాగం గా చేసుకున్న వారే చివరి దశలో మంచి మరణం పొందుతారు.

ఓం నమఃశివాయ 🙏

అల్లా జీసస్.

🍀🍀🍀🍀🍀🍀🍀

బాల్యం లో చదువుకున్న  ఆ మంచి పాఠశాల పేరు,  క్రమశిక్షణ,  మాష్టార్లు  నేర్పించిన  మంచి, మర్యాద, సంస్కారాలు,  విలువలు,  ప్రేమలు, అభిమానాలను మరచి పోయి ,  తల్లి తండ్రుల ద్వారా నేర్చుకున్న సంస్కారాలను గాలి లో వదిలి,  నటిస్తూ  గుడ్డిగా   జీవించడం  కొందరికి  అలవాటు అయిపోయింది.... కాదనగలరా.

బాల్యం లో కాదు,  నేడు  50 సంవత్సరాలు దాటిన తరువాత కూడా,  కొందరికి మాత్రం ఆ చింత కర్రతో  తొక్క తీసిన  స్కూల్  మాష్టారు ... పేక బెత్తం తో  చర్మం  ఒలిచిన  స్కూల్  హెడ్ మాస్టర్ గారు ఎంతైనా  నేడు  అవసరం.

స్నేహం అనే  గొప్ప  పేరుతో  మనం  జీవితంలో  ఉన్నతమైన  సంబంధాలతో   వృద్ధి చెందుతూ ఉన్నామా?  లేక  దిగజారుతున్నామా?   మనం ఎక్కడ ఉన్నాం , అని మనం మనసు లోకి తొంగి  నిజాయితీగా చూసుకుంటే ... నవ్వాలో  ఏడవాలో సిగ్గు పడాలో  తెలియని  వింత  స్థితి  కనిపిస్తుంది.

🎈🎊🎈🎊🎈🎊🎈🎊

• అదే విధంగా   కొందరు మిత్రులు,  మిత్రురాళ్లు  లింగ భేదానికి  అతీతంగా,   స్నేహాన్ని  గౌరవంగా  చూసుకుంటూ , ఒకరికొకరు  కుటుంబ సభ్యుల తో   స్నేహ బంధుత్వం కలుపుకుని,  పరిణితి తో  ఆదర్శం గా  భవిష్యత్తు తరాలకు,  పిల్లలకు మంచి స్నేహం విలువను అర్దం చేస్తూ,  ఇంత వయసు వచ్చిన,  మా బాల్య స్నేహం చూడండి ఎంత గొప్పదో అని సంతోషంగా,   నిజాయితీగా ,  మనస్సాక్షిి  తో  తమ పిల్లలకు  చెప్పుకొనే  వారు కూడా  అనేక  మంది  ఉంటారు ... ఉన్నారు.  ఇది ఒక ఆరోగ్యకరమైన స్నేహం, మర్యాద పూర్వక  స్నేహం,  మంచి మానవ సంబంధాలను సమాజానికి,  తరువాత తరాలకు ఇవ్వగలిగేది  స్నేహం.  

ఎందుకంటే  పెద్ద వారు  ఎలా ఉంటే వారి పిల్లలు కూడా అలానే ఉంటారు.  

అదే విధంగా ఎందరో ఉత్తముులైన కొందరు మిత్రులు , విదేశాల్లో ఉన్న వారు కూడా  ఏ పేరు, కీర్తి  ఆశించకుండా,  రెండో చేతికి తెలియకుండా  కష్టాల లో ఉన్న తోటి మిత్రులను,  తమ సహృదయంతో  ఆర్థికంగా  ఆదుకున్న వారు  ఉంటున్నారు. ఇదే కదా ,  అసలు కావలసింది. 

అంటే,  మిత్రులందరూ ఆర్థికంగా చేయూత నివ్వలేని వారు....  మనసా సేవ, వచసా సేవ తో కష్టం లో ఉన్న వారికి స్ఫూర్తి , ధైర్యం నింపేవారు కూడా చాలా మంది ఉన్నారు .  ఎందుకంటే  అన్నీ ఉన్నా మనోధైర్యం లేక ఆందోళనలతో జీవితం గడిపే స్నేహితులకు ఇది అవసరం.  ఇటువంటి వారికి చేయూత నివ్వడం కూడా మామూలు విషయం కాదు. 

50 సంవత్సరాల వయసు దాటినా  కూడా నేడు  కొందరికి  వివాహం కాని వారు ఉండొచ్చు,  కుటుంబ ఆర్థిక పరిస్థితి బాగోలేని వారు ఉండొచ్చు,  కొందరికి భార్య లేదా భర్త  లేదా  పిల్లలు కోల్పోయిన వారు ఉండొచ్చు.  ఆర్థికంగా  నష్టపోయిన వారు ఉండొచ్చు. కొందరికి చెప్పలేని అనారోగ్యాలు తో  ఉండొచ్చు.  కదిలిస్తే  ప్రతి ఒక్కరిలో ఎన్నో జీవిత విషాదాలు ఉంటాయి .  ఇటువంటి వారిని  కాస్త ప్రేమగా  పలకరించ గలిగేది ఎవరు? ... ఒక మంచి  స్నేహితుడు/ స్నేహితురాలు. ఎవరైనా ఇది కాదని అనగలరా ?.

🍀🍀🍀🍀🍀🍀🍀

ఇప్పటికే గత జన్మలలో గాని, నేటి జన్మలో గాని చేసిన చెడు కర్మల ఫలితం వలన,  ఏదొక సమస్యలతో  నేడు జీవితం సరిగా లేక  కొందరు , వికారాలకు బానిసలై కొందరు, ఒక  శాపగ్రస్తం తో కొందరు  , సుఖం శాంతి లేక  ఈర్ష్య, అసూయ, ద్వేషం, క్రోధం, మోహం, లోభం, కామం, వంటి వికారాల ముళ్ల కి  బానిసలు గా  జీవితం గడిపే స్థితి లో  ఎందరో ఉన్నారు.

ఒకటి ఆలోచించండి ... మంచి ఆరోగ్యం కోసం, నోటికి ఆహారాన్ని పరిశుభ్రం చేసి తింటున్నాం గాని కుళ్లిన ఆహారం తినడం లేదు కదా ....  మరి 50 సంవత్సరాలు దాటిన సరే,   కొందరికి  నోటితో మాట్లాడే  మాటలు ఎందుకు శుద్ధి గా ఉండడం లేదో ,    ఆలోచించు కోవాలి.   అశుద్ధపు మాటలు నోటిలో నుంచి వస్తున్నాయి అంటే, ఆ శరీరం మరియు  మనసు లో విషతుల్యమైన మలినాలు పేరుకు పోయి ఉన్నాయని అర్దం.  ఇలా అయితే చిన్న వయసు లోనే  చాలా ప్రమాదకరమైన అనారోగ్యాల బారిన పడతారు.  తద్వారా,  వారి కుటుంబం, పిల్లలు  ఇబ్బందులు పడతారు ...  కదా, ఇదంతా అవసరమా.... ఒకసారి ఆలోచించండి.

 

ముళ్ల వంటి వికారాల స్వభావం కలిగిన వారు తమ ముళ్లను ఆయుధాలు గా భావించి  గుచ్చుతూ ఉంటే,  ఏదోక రోజు  బలమైనది వచ్చి ముళ్లకు  తాకుతుంది.  ఆ ముళ్లు అర్ధాంతరంగా శాశ్వతంగా  నాశనం అవుతాయి,  కనుమరుగు అయిపోతారు .... కానీ ఇది కాదు కదా,  జీవిత పరమార్ధం.  ఆ ముళ్లు  పరివర్తన, మార్పు చెంది  గులాబీ పువ్వు లా  మారితే నే  జీవితం పరిమళభరితమై,  జన్మకు సార్థకత ఉంటుంది .... అర్దం చేసుకుంటే ఇందులో మంచి ఏంటో తెలుస్తుంది.  

ఒక వైపు  ప్రతి రోజూ ఇష్ట దైవాన్ని  ప్రార్ధిస్తూ  పూజలు చేస్తూ ,  మరో వైపు అకృత్యాలు , మానసిక  దౌర్జన్యాలు  చేస్తుంటే  మనిషి మనసు లో మలినాలు ఎలా తొలుగుతాయి. శుభ ఫలితాలు ఎలా వస్తాయి.  ఇది చాలా ప్రమాదకరం,  దీనినే  మనిషి తన గొయ్యి తానే స్వయంగా తవ్వుకోవడం అంటారు.

• ప్రతీ మిత్రుడు/మిత్రురాలి  లో  మంచి  చెడు .... బలం  బలహీనతలు  ఉంటాయి.  ఎందుకంటే అందరూ మనుషులే కాబట్టి.   మంచి మార్పు తెచ్చుకోవడానికి, సరిదిద్ది కోవడానికి  ఇక  జీవించి ఉండే  సమయం  కొంచెం మాత్రమే మిగిలి ఉంది. ఆలోచించండి.  ఎవరైనా,   నేను మారాను. నాలో మార్పు వచ్చింది,  నేను చేసిన తప్పుడు  పనులకు  క్షమాపణలు కోరుకుంటున్నాను  అని నలుగురికి చెప్పుకోవడం  లేదా  దేవుని ఎదుట క్షమించమని అడగడం,  అత్యంత గొప్ప విషయం.  ఇందులో సిగ్గు పడవలసిన విషయం ఏ మాత్రం లేదు.  చేసిన వికర్మలు తొలగించుకోవడానికి  ఇదే మొదటి  పరిష్కారం. ఇలా మారడం వలన నలుగురి కి ఆదర్శం అవుతారు..... వాల్మీకి వేటగాడు, పక్షులను చంపాడు ... మారడం వలన దైవాంశ సంభూతుడు అయ్యాడు.

మనుషులను దూషించడం, విమర్శించడం, మనసు బాధపెట్టే ఛలోక్తులు విసరడం ఏనాటికీ,  ఎవరికి  గొప్ప తనం కాదు... కాబోదు. ఎవరి పట్ల అయినా,  సరిదిద్దు  కోలేని  తప్పులు చేసినా సరే .... నేను తప్పు చేశాను, క్షమించమని అడిగితే ఎటువంటి వారైనా అర్దం చేసుకుంటారు.  అది వ్యక్తి శ్రేయస్సు కి మంచిది.

ప్రతి ఒక్కరిని ప్రేమించండి.  ప్రేమ అంటే కామం కాదు …. మానవత్వం.  ఇబ్బంది, కష్టం  ఉంటే  మంచి గా  చెప్పుకుంటే , ప్రతీ ఒక్కరూ సహృదయంతో  అక్కున చేర్చుకుంటారు.  

ఏ  మనిషి   మనసులో  నైనా   స్థానం సంపాదించాలి,  అంటే   నిజాయితీ  గల ప్రేమ  అవసరం.   నేను నటించకుండా  సహృదయంతో,  నా తోటి వారి ని  ఎందరిని   ప్రేమిస్తున్నాను అని  మనసు లో ఆలోచించి  చూడండి. 

 

పగ, ప్రతీకారాలు, కుట్రలు, కుతంత్రాలతో   ప్రవర్తిస్తే  సాధించేది  ఏమీ ఉండదు చివరికి  బూడిద  తప్ప .... ఈ పాటికే  ఇదంతా అర్దం అయి ఉంటుంది.  ఇవి సినిమా డైలాగులు కావు, ... మనస్సాక్షి ని అడిగితే  మనసే సమాధానం ఇస్తుంది. 

 

ఇదంతా సూక్ష్మం తో గ్రహించ వలసిన విషయం.  ఒకరి బుద్ధి, ఏ కోణంలో ఆలోచిస్తూ పని చేస్తుందో వారికి మిగిలిన వారు తమ లాగే కనిపిస్తారు. 

• ఒకటి మాత్రం నిజం  ఈ లోకంలో  ఎవరి కర్మకు వారే బాధ్యులు.  ఒక  మనిషి  తన లో ఉన్న మానసిక,  వికారాలను, దేహ వికార  చాపల్యాలను ,  తన తోటి వారికి ఆపాదిస్తూ,  కొందరి  దుఃఖానికి కారణం అవుతూ ఉంటే కనుక ,  ఆ దుఃఖం అనుభవించే  వారి  కర్మను  తీసుకుని  నెత్తిన వేసుకోవడమే.  అంటే నేలను పోయేది నెత్తిన రుద్ధుకోవడం అంటారు కదా అది.  దీనంత  దౌర్భాగ్యం , దారిద్ర్యం మరొకటి లేదు.

ఎవరైతే  తోటి వారిని  మాటలతో  కించపరుస్తూ, ఉంటారో  వారి  కుటుంబ శ్రేయస్సు కి, వారి పిల్లల పురోగతికి  వారే అవరోధం గా  మారుతారు.  ఇది శాస్త్రాలలో రాయబడి ఉంది. ఇది నిజం. 

అందుకే ఎప్పుడూ ఎవరికీ దుఃఖం ఇవ్వకూడదు... ఇవ్వకండి. ఎవరు పాపం చేసినా ఏదోక రూపం లో వడ్డీ తో సహ అనుభవించ వలసిందే . ఇందులో ఎవరికీ మినహాయింపు లేదు .... కర్మ సిద్ధాంతం చెప్పేది ఇదే.

కమ్యూనికేషన్ మీడియం ఉపయోగించుకొని నలుగురిని చెడ్డ గా చిత్రీకరించడం అనేది మంచి సంస్కారం కాదు.

ప్రతి మనిషి   ఇతరులలో లోపాలు  చక్కగా వెతుకుతారు.   మరి తమ లోని లోపాలను ఎందుకో గుర్తించలేరు. ఎవరికి వారు తమ లోపాలను గుర్తించి సరి చేసుకుంటే,  అసలు ఎవరికి ఎవరితో సమస్య అనేది ఉండదు కదా … ఆలోచించండి.

పోని లోపాలను సరిచేసే వారిని, ఎందుకని స్వాగతించ లేరు? ... అహంకారమా ?. అలా అయితే నష్టం జరిగింది, జరుగుతున్నది, జరగబోయేది ఎవరికి ? .... ఒకసారి ఆలోచించండి.   

ఇకనైనా  వ్యక్తి గత  అవసరాలు, స్వార్థం కోసం  స్నేహాన్ని ,  స్నేహితులని  వంచించకండి.  ఎదురుగా అందరిలో చెప్పేది ఒకటి,  వెనుక చేసేది మరొకటి అనే విధానానికి స్వస్తి చెప్పండి ..... ప్రతీ సమస్య పరిష్కారానికి   ఒక పద్ధతి,  తీరు, తెన్నూ  ఉంటాయని గ్రహించండి.  ఎవరి ఇష్టం వచ్చినట్లు వారు ప్రవర్తిస్తాం అని అనుకుంటే  .... నేటికీ  లాభం  పొందారా?  పొందుతున్నారా?    అనేది  ఆలోచించండి ...

• మిత్రమా! నీ లోని మానసిక వైకల్యం ఒక  వైఫల్యం. ఇది అంగవైకల్యం కంటే ప్రమాదకరం.  ఈ విషయం  నిజాయితీ తో  నువ్వు  అంగీకరించకుండా,  నిన్ను నువ్వు మోసం చేసుకుంటే ,  నువ్వు బాధ పెట్టిన వారు  తాత్కాలికంగా  మాత్రమే బాధ పడతారు. కానీ  నీ లో   చివరికి  జీవితాంతం  మిగిలేది  అంతులేని  దుఃఖం , క్షోభ .... .

• ఓ మిత్రమా!…. నిజాయితీగా  ఆత్మ విమర్శ  చేసుకొని,  చేసిన  వికర్మలు(పాపాలు)  కరిగించు  కున్నప్పడు  స్వర్గ లోకపు అంచులు తాక గలవు.

• ఏ స్నేహితుడు  తోటి  వారికి,  సాటి వారికి ఉపయోగపడక పోయినా  అణువంత నష్టం లేదు. కానీ  ఇతరులకు మాటలతో, చేతలతో  బాధను కలిగిస్తే  జన్మ జన్మల దుఃఖం అనుభవించడానికి సిద్దం అయినట్లే . కర్మ సిద్ధాంతం ఇదే చెబుతుంది.  ఎవరికి ఏది ఇస్తామో అదే తిరిగి  రెట్టింపు గా వస్తుంది.

•  ఓ స్నేహితుడా !   

నీ లో  దాగి  ఉన్న  మంచి,  సంతోషాలు,  సరదాలు,  ఆనందాలతో పాటు ... 

నీ వికారాలు,  నీ  అవలక్షణాలు,  నీ సమస్యలు,  నీ వ్యసనాలు , నీ అనారోగ్యాలు,   నీ వ్యక్తిత్వ లోపాలు , నీ చపల బుద్ది   బయటకు  తెలుస్తూ ఉన్నా  సరే ,    నీ  తోటి మిత్రుడు(లు)  ఓర్పు తో  భరిస్తూ,  నిన్ను  ఆదరిస్తున్నారంటే  అదే  స్నేహం.  మరియు  స్నేహం లోని   ప్రేమకు  ఇచ్చే విలువ, గౌరవం .... అంతేగానీ  నిన్ను  భరిస్తున్న  ఆ మిత్రుడి (ల) యొక్క బలహీనత కాదని తెలుసుకో!  లేదా  కాలక్షేపం కోసం అసలే కాదని తెలుసుకో!.    ఎందుకంటే ప్రతీ ఒక్కరికీ  బాధ్యతలతో  నిండిన  బరువులు తమ తమ పరిస్థితులను బట్టి ఉన్నాయి.

ప్రతీ మనిషి ఒక మంచి స్నేహితుడుగా జీవితకాలం ఎవరికోసం అయినా నిలబడాలి అంటే  ఈ మాత్రం ఆత్మ విమర్శ  తప్పని సరిగా చేసుకోవాలి.... ఇది రాస్తున్న వాడితో సహా.... ఎందుకంటే ఈ విషయం లో ఎవరికి మినహాయింపు లేదు. 

ఎవరు ఏ పని చేసినా జీవితం లో చివరికి  భగవంతుడికి సమాధానం చెప్పి తీరాలి.  తప్పుడు పనులు చేసి  తప్పించుకుంటూ  తోటి మనుషులను మాయ చెయ్యొచ్చు,  కాని  పరమాత్మ ని  మాయ చేసే వారు  సృష్టి లో ఇంకా పుట్టలేదు .... పుట్టబోరు.  జాగ్రత్తగా ఉండాలి.

మంచి పనులు నిజాయితీ తో  సహృదయంతో చేస్తే ఆశించ కుండానే  పేరు, కీర్తి , గుర్తింపు వస్తుంది.  ధర్మం గా  బ్రతకాలి ..... అంతే కాని,  పేరు , కీర్తి,  ప్రతిష్ట కోసం  ప్రాకులాడకూడదు.  అవి వెంపర్లాడితే దొరికేవి కావు.  అవి డబ్బు , హోదా ఉన్నంత  మాత్రాన దొరికేవి కావు. ముఖ్యంగా  అవి కావాలి అంటే  అందరికీ లభించవు.  అవి పరమాత్ముడు అర్హత కలిగిన వారికి ఇస్తాడు.

స్నేహం అంటూ ఆర్బాటంగా శుభాకాంక్షలు తెలుపుకుంటూ ,  వినోదాలు సంబరాలు జరుపుకునే  ప్రతి  సమయం లో,  గతంలో  మనం ఎవరికైనా  సంతోషం ఇచ్చామా  లేదా దుఃఖం ఇచ్చామా  అనేది  మన  మనస్సాక్షి కి  తప్పకుండా సమాధానం చెప్పుకోవలసిన అవసరం ఉంది.  అవసరమైతే క్షమించమని అడగడం లో   గౌరవం పెరుగుతుంది.   

ప్రతి  స్నేహితుడు మరియు స్నేహితురాలు  మిత్రులతో  మెలిగే టపుడు  తమ వ్యక్తిత్వం,  మానసిక  స్థితి , తమ అంతరంగం లో  ఎలా  ఉందో  గమనించు కోవలసిన అవసరం ఉంది.  ఇదంతా ఒక మంచి కోసం, ఆరోగ్య కరమైన  వాతావరణం  కోసం. 

తోటి వారితో   వయసు కి  తగిన  మంచి ప్రవర్తన,  మాట్లాడే  భాష,  ఆలోచన  ప్రతి ఒక్కరి  మనసు లో మంచిగా ఉందా  లేక  కేవలం  వారితో  ఎదురుగా ఉన్న సమయంలో నటిస్తూ వారు వెళ్లాక  వారిని  వెనుక   అసభ్య పదజాలంతో   వ్యంగ్యం గా  ఉన్నామా .... అని తప్పని సరి  ఆలోచన చేయాలి. ఎందుకంటే ఇవన్నీ భయంకరమైన పాపాలు గా తిరిగి చుట్టుకొని రాబోయే కాలంలో  మనశ్శాంతి లేకుండా చేస్తాయి.

మనుషులు  అందరూ మంచివారు .... కాని బలహీన పరిస్థితులు వలన అవలక్షణాలకు  దాసోహం అయి,  వారిని చెడ్డవి గా  తయారు చేస్తాయి... చెడ్డగా చూపిస్తాయి.  మార్చుకో గలిగితే వారంత మంచివారు  ఎవరూ ఉండరు. ఒక తప్పు చేసి కప్పి వేయాలి అనుకుంటే పది తప్పులు చేయవలసి వస్తుంది. ఇది దిగజారుడు స్థితి కి  ఆహ్వానం.

బాల్యం లో మనతో ఉన్న తల్లి తండ్రులు చాలా మందికి నేడు లేరు .... ఇంకా  కొన్ని విషయాలు నేడు చెప్పడానికి.

బాల్యం లో ఉన్న మంచి ఉపాధ్యాయులు , గురువులు చాలా మంది  లేరు .... ఇంకా మంచి విషయాలు నేడు చెప్పడానికి.

ఇది వరకు మనతోనే ఉండి , నిత్యం మంచి మార్గం గురించి  చెప్పే  ఉత్తములైన  పెద్దలు ప్రతీ చోటా ఉండేవారు.  నేడు ఆ పరిస్థితి లేక  పైగా విపరీతమైన  స్వేచ్ఛ ఉండడం వలన  ,  మనిషి ఏ మార్గం లో పయనిస్తున్నాడో  మనిషి కే తెలియడం లేదు .... ఇలా ఉంటే రేపు పిల్లల భవిష్యత్తు ఏంటి ..... ధనం కంటే విలువైనవి సృష్టిలో చాలా ఉన్నాయి.  అవే మనిషి కి  నిజమైన మార్గదర్శకాలు.

లోక కళ్యాణం జరగాలి  అనే ప్రతీ  ప్రదేశం లో   పరమాత్ముని  అంశం తో కూడిన శక్తి  ఏదోక రూపం లో  తప్పకుండా  ఉంటుంది.... ఈ శక్తి కంటికి కనిపించినా, కనిపించక పోయినా సరే.

అహంకారం విడిచినపుడు ఆత్మ లో వెలుగు కనిపిస్తుంది.

వికారాలను విడిచినపుడు ఆత్మ లో చైతన్యం పెరుగుతుంది. శరీరం లో శుద్ధి జరుగుతుంది.

మంచి మార్పు కోసం ... 

మంచి అవగాహన కోసం 

స్నేహితులు అనబడే వారందరి మంచి కోసం ....  

ఈ రచన అంకితం.

జీవితం అంటే    గెలుపు ఓటమి ల  ప్రయాణం కాదు .....  నిరంతరం  మంచిని  పెంపొందించుకునే  మార్పు  మాత్రమే  జీవితం.  

ఎందుకంటే జీవితం లో  గెలిచినా ఓడినా మనిషి  చివరికి కలిసేది మట్టి లోనే.   కానీ  మంచి మార్పు మరికొన్ని   జన్మలు వరకు  ఆత్మ లో  తోడుగా ఉండి  సంతోషంగా జీవించే  జ్ఞానం ఇస్తుంది. 

చివరి మాట 

ప్రత్యక్షంగా, పరోక్షంగా  స్పృహ లో  ఉంటూ  ఉద్దేశ్యపూర్వకంగా  ఎవరికీ  ఏనాడు అపకారం చేయక పోయినా, ఎవరిని ఒక  మాట  తూలనాడక పోయినా, కేవలం నిజాయితీ గా,  మౌనంగా  ఉన్నందుకు,  స్నేహితులు అందరూ నా వారు  అని అనుకున్నందుకు , అందరూ సమానమే అని అనుకున్నందుకు ........  ఎవరైతే  ప్రత్యేకించి  నన్ను    వక్రీకరించి  నిందలను,  దుఃఖం, బాధ  ఇచ్చిన  మిత్రులకు  మరియు మిత్రురాళ్లుకి  హృదయ పూర్వక  నమస్కారములు,  ధన్య వాదాలు మరియు కృతజ్ఞతలు.   

ఎందుకంటే  మీ లాంటి వారి  ప్రేరణ తో  ఇంత  మంచి మనోవికాస  రచన,  మరియు  ఇలాంటి వి  ఎన్నెన్నో  వ్యక్తిత్వ రచనలు రాయగలిగాను.  నాకు   మీరు    అప్పడు,  ఇప్పుడు  మంచే  చేసారు,  చేస్తున్నారు.   మీరు , మీ కుటుంబ సభ్యులు  అన్ని వేళలా శివుని ఆశీస్సులతో మంచి ఆరోగ్యం తో, సిరి సంపదలతో సంతోషంగా ఉండాలని మనసా వాచా కర్మణా నా తండ్రి పరమాత్మ  ఎదుట సంకల్పం  చేసి ప్రార్థిస్తున్నాను.🙏

నా పై  చేసిన  ప్రచారాలను  మంచి అయినా చెడు అయినా  అదృష్టమైన  కర్మ భోగం గా భావించి  శివుని కి  వదిలేశాను .... ఎందుకంటే ఆయనే అన్నింటికీ  ప్రత్యక్ష సాక్షి.   నా కర్మలకు ఎలాంటి  ఫలితం పొందాలి  అనేది   పరమాత్ముడే నిర్ణయం చేస్తాడు.  చెప్పాలంటే నాకు  రోజు రోజుకు మంచే జరుగుతుంది.

నాకు ఇంత మంచి  చేసిన వారికి కొంతైనా మంచి చేయాలి అనిపించి, ఇది రాయడం జరిగింది.  ఎందుకంటే  నా లోని,  నా కే తెలియని  అసాధారణ మైన  ఆధ్యాత్మిక శక్తి ని   మీరే  వెలికి తీసారు.  ఇదేమీ సామాన్యమైన విషయం కాదు.  చెప్పాలంటే  ఇది ప్రస్తుత  కాలానికి  సంబంధించిన అంశం పూర్తిగా కానే కాదు. ఇది ఎవరికీ అర్థం కాదు,  కాకపోవచ్చు.

మరణాన్ని  ప్రేమిస్తూ,  భగవంతుని కనుసైగలో,  నీడలో జీవించే వారికి , ఏది ఎందుకు జరుగుతుందో అర్థం అవుతుంది.  ఎందుకంటే  ఇదంతా  భగవంతుడు రచించిన జగన్నాటకం. పరమాత్మ ను  నిత్యం చూస్తూ జీవించే  ఆత్మలకు  , ఆయన త్రికాల జ్ఞానంతో అన్ని తెలియ చేస్తాడు.   

మౌనం ... కాలం రెండు చాలా చాలా శక్తివంతమైనవి.  సమయం వచ్చినప్పుడే అవి చెప్పాలి అనుకొని అనుకున్నవి చెప్పి వెళ్తాయి.

నేను ఆశించేది ప్రతీ ఒక్కరిలో , ముఖ్యం గా కొందరిలో  మంచి మార్పు.  ఇది నా కోసం కాదు. మీ కుటుంబం, మీ పిల్లలు, మీ భవిష్యత్తు కోసం. 

అవసరమైతే , 2020 జనవరి 19 తరువాత  జరిగిన  ప్రతీ సంఘటన  పైన వాస్తవాలు (సంజాయిషీ కాదు) ..... ఎప్పుడైనా,  ఎక్కడైనా,  ఎవరి ఎదుటైనా  బహిరంగంగా  మాట్లాడేందుకు  పరమాత్ముని  ఆశీస్సుల తో  మనస్సాక్షి తో ,  సిద్ధం గా  ఉన్నాను అని  సవినయంగా  మనవి  చేస్తున్నాను 🙏.

ప్రతీ ఒక్కరూ  తమ  తోటి వారి పట్ల  ఆలోచనలలో , ప్రవర్తన లో   మంచి మార్పు తెచ్చుకొని  సహృదయం తో   జీవించలేక పోతే, మన దగ్గర అన్నీ  ఉన్నా సరే  , రాబోయే  13 సంవత్సరాల కాలంలో  పరిస్థితులు ఎంత  దారుణం గా  మారుతాయో  ఎవరి  ఊహలకు కూడా అందదు.  ఇది నిజం....  ప్రవర్తన  అనేది సరి లేకపోతే  మనిషికి  శాపం గా  మారబోతుంది.  అవసరమైతే ఇది screen shot తీసి ఉంచుకోండి. అర్దం చేసుకో గలిగితే చేసుకోండి, లేకపోతే ఇదంతా  వ్యర్ద విషయం అనుకొని పూర్తిగా వదిలెయ్యండి.... మీకు మీరే బాధ్యులు. 

ఒకవేళ, నా వలన  ఎవరైనా, ఏనాడైనా  దుఃఖం, బాధ పొంది ఉంటే వారందరికీ (మిత్రులు/మిత్రురాళ్లు)  మనస్ఫూర్తిగా క్షమాపణలు 🙏 తెలియచేసు కుంటున్నాను. ... 

ఓం నమఃశివాయ 🙏 అల్లా జీసస్.

అదే విధంగా నాకు సంతోషం  పంచిన  ప్రతీ మిత్రుడు మరియు మిత్రురాలికి  బుణపడి  ఉంటాను.🙏

గమనిస్తే ....  పాజిటివ్ గా   తీసుకో గలిగితే  జీవితం లో  పడే  నిందలు,  అవమానాలు, బాధలు, దుఃఖం  అనేవి  ఎదుగుదలని ఇస్తూ  ఉన్నతమైన స్థితి కి తీసుకు వెళతాయి ....  ప్రతీ ఒక్కరిని.

నిజం లో జీవించండి.  నిజాయితీ ని ఆనందించండి.  

చివరిగా  నాలుగు లైన్లు  ఇది చదవండి బాగుంటుంది 👇

🍀🍀🍀🍀🍀🍀🍀🍀

• తెలుసుకో    మిత్రమా    తెలుసుకో

  స్నేహమంటే   స్వార్థం    కాదని    తెలుసుకో.

• ముగిసి  పోతున్న    నీ జీవితానికి

  మూల   ధనమని      తెలుసుకో.

• తెలుసుకో    మిత్రమా   తెలుసుకో

  ప్రేమంటే    కామ వికారం   కాదని  తెలుసుకో.

• పడిలేచే     నీ జీవితానికి

  చేయూత    అని   తెలుసుకో.

• తెలవారిన    నీ    జీవితం 

  తేట  తెల్లం     అవుతుంటే

• మనసు లోని    నీ మాయలు 

  మాటలు గా     వస్తాయి.

  అందరికీ    వికారాలను    ఆపాదిస్తాయి.

• కష్టం లో    కదలి వచ్చేది     స్నేహం.

  నష్టం లో     కలిసి ఉండేది    ప్రేమ.

• కష్టనష్టాల    కడలి లో      కాపలా

   కాసే ది     స్నేహం లో ని      ప్రేమ.

• తెలుసుకో    మిత్రమా   తెలుసుకో.

  స్నేహమంటే    స్వార్థం కాదని    తెలుసుకో.

  ప్రేమంటే      కామ వికారం    కాదని తెలుసుకో.

• ప్రేమ   స్నేహల    మిథునం

  లింగభేద  మెరుగని    ఆలింగనం.

• మిత్ర  బృందాల     బంధనం

  మనో  వికాసానికి    సోపానం.

• ఎదుగుతున్న    నీ వయసు కి

  వన్నె   తెచ్చేది    స్నేహం.

• ఒదుగుతున్న   నీ మనసు కి

  శాంతి   నిచ్చేది    ప్రేమ.

• మలినమైన   బుద్ది  కి  

  మూలం

  నీ  మాటలోని   వ్యంగ్యం.

• అది  మార్చుకుంటే  మరు  జన్మ కైన ధన్యం.

• మిత్రులంటే   పచ్చకామెర్ల    తీరు కాదు

  విలువలంటే    ఒలిచేటి     వలువలు కాదు.

• తెలుసుకో     మిత్రమా     తెలుసుకో

  స్నేహమంటే   స్వార్థం కాదని   తెలుసుకో.

• ముగిసి   పోతున్న    నీ జీవితానికి

  మూలధనమని    తెలుసుకో.

• తెలుసుకో   మిత్రమా   తెలుసుకో

  ప్రేమంటే    కామ వికారం కాదని   తెలుసుకో.

• పడిలేచే    నీ జీవితానికి

  చేయూత  అని తెలుసుకో.

• మానుకో    మిత్రమా    మానుకో

  అతి   తెలివి   తేటలు   మానుకో.

• ఆత్మ    విమర్శ  చేసుకో ...

  విశ్వాసం  పెంచుకో .

  అజ్ఞానం  తొలగించు కో ...

  ఆనందం  పెంచుకో ...  పంచుకో.

🍀🍀🍀🍀🍀🍀🍀🍀🍀🍀

ఓం నమఃశివాయ 🙏  అల్లా జీసస్ 

యడ్ల శ్రీనివాసరావు 15 Oct 2022 9:00 pm.

9293926810

ఈ రచన పాతది. కానీ చివరి మాటతో  నేడు  కొంచెం update చేశాను.

254. ఆలంబనము

 

ఆలంబనము

• కన్ను లే   కలవ నీ

  కంటిపాప   కే    ఎందు కీ    కలవరం

• కలత     వయసు    దాటి     ఊగిన

  కనులు   మనసు    మాటు    దాగిన

• కనుపాప  లో    కాంతి  యే     ప్రేమ ఐ

  చల్ల  నీ   చూపు తో    సేద  నీ    పంచెనే

• కన్ను లే     కలవ నీ

  కంటిపాప   కే    ఎందు కీ     కలవరం

• దిగులు  చెంత   చేరు వై     చెదిరి న

  మనసు   కంట   నీటి లో      తడిసి న

• మలిన  మే    వదిలి    మకరంద  మే ఐ

  తియ్య ని  తేనె లా      ప్రేమ నీ   పంచె నే

• కన్ను  లే    కలవ నీ

  కంటిపాప   కే     ఎందు కీ   కలవరం

• మనసు  పొరల లో    తెరలు  కరిగి

  వాగు  వంక లై     తరలు  తుంటే

• ఆకాశ  మే   కది లి   అవకాశ మై  వచ్చి

  ఆనందమే   తెచ్చి    ప్రేమ ను   పంచె నే

• వన్నె  యే   తరగ ని

  విరజాజి కే   ఎందు కీ    వేదన.

• తెల్ల  నీ   రూపము   తేట తెల్ల మైనప్పుడు

  సుగంధ మే   వాడినా  గంధమైన చాలదా.

భావం :

చూపులు ఏనాడు సరిగా చూసుకోక పోయినా కంటిపాప కు  ఎందుకు  ఈ కలవరం.

వయసుకు మించిన బాధలు మనసు లో ఉన్న

భయ పడే చూపులు మనసు చాటున దాగి ఉన్న

కంటి పాప లో ని వెలుగే ప్రేమ అవుతూ

చల్లని చూపులతో సంతోషం పంచుతుంది.

చూపులు ఏనాడు సరిగా చూసుకోక పోయినా కంటిపాప కు  ఎందుకు ఈ  కలవరం.

ఒంటరితనం దిగులు దగ్గరకు వచ్చినా బాధపెట్టి దూరం అయిపోయిన

మనసు కన్నీళ్ల లో తడిచి ముద్దై నపుడు

దుఃఖం అంతా వదలిపోయి

మనసు తియ్యని తేనే వలే ప్రేమ ను పంచుతుంది.

చూపులు ఏనాడు సరిగా చూసుకోక పోయినా కంటిపాప కు  ఎందుకు ఈ కలవరం.

మనసు పొరలలో తెరలుగా ఉన్న బాధలు కరిగి

వాగు వంక లా ప్రవహిస్తున్నప్పుడు

ఆకాశం కదిలి అవకాశం గా వచ్చి

ఆనందం తో ప్రేమను పంచుతుంది.

అందం తగ్గని ఓ విరజాజి

ఎందుకు నీకీ వేదన

స్వచ్చమైన  నీ తెల్లటి  రూపం  

స్పష్టం గా కనిపిస్తున్నప్పుడు

నీ సుగంధం అనుకున్న వారు వీడిపోయినా 

మిగిలిన గంధం లాంటి 

ప్రేమ నిండిన నీ మనసు నీకు చాలదా.

యడ్ల శ్రీనివాసరావు 13 Oct 2022 4:40 AM.

253. మేఘసందేశం

 

మేఘసందేశం

• మేఘమా ఓ మేఘమా

  మనసు మాధుర్యం నింపుకున్న సందేశమా

• నీలి రంగు నయనాలతో 

  ఎదురు చూపులు ఎందుకు

• నీటి బిందువుల బింబం తో 

  నిరీక్షణ ఇంకెందు

• మేఘమా ఓ మేఘమా

  మనసు మాధుర్యం నింపుకున్న సందేశమా

• చిలకరించే నీ తొలి జల్లులు

  చిటపటలై పలకరిస్తున్నాయి

• చిందు లేసేటి చినుకులతో

  చిత్తడి వుతుంది నా మనసు.

• దిగి వచ్చే ఆరాటం లో

  వయ్యారి సిగ్గు ల కంటే

  పోరాటం చేస్తున్నాయి

  నీ సూదంటి చూపులు

• మేఘమా ఓ మేఘమా

  మనసు మాధుర్యం నింపుకున్న సందేశమా

• చినుకు లోని చిత్రమా

  నను తాకిన అభీష్టమా

• కురిసే వర్షం నీవైనపుడు

  మెరిసే మెరుపు నేనవుతూ

• ఆకాశాన్ని ఆశ్రయించి చూస్తా

  అవనికి ఆరడుగుల లో విహరిస్తా

• మేఘమా ఓ మేఘమా

  మనసు మాధుర్యం నింపుకున్న సందేశమా

• నీ సందేశం తో సందడి చేస్తా

  దోసిట్లో నే బంధిస్తా

• కంఠము లో  నే పోసెస్తా

  నా ఎదలో నిను దాచెస్తా.

చిత్తడి = ఆర్దృత , తడి, చెమ్మ.

అభీష్టం = మనసులో ఉన్న బలమైన కోరిక.

అవని = భూమి, నేల

యడ్ల శ్రీనివాసరావు  11 Oct 2022 11:00 AM.

252. ప్రేమ పాశం

 

ప్రేమ పాశం

• ప్రేమ సృష్టి లో అధ్బుతమైన పదం. మనిషిని బట్టి , వయసుని బట్టి , అనుభవాన్ని బట్టి ప్రేమ పై అభిప్రాయం మారుతూ ఉంటుంది.

• ఒక తల్లి తన పిల్లల పై చూపించే వాత్సల్యం, ఒక తండ్రి తన పిల్లల పై చూపించే రక్షణ, ఒక భక్తుడు భగవంతుని పై చూపించే ఆరాధన , యుక్త వయసులో యువతీ యువకుల తొలి ఆకర్షణ , భార్య భర్తలు అలకలలో చిలిపి తనం, దాంపత్య జీవితంలో ఒడిదుడుకులను ఎదుర్కొని పండిపోయిన అనుభవాలు తో వృద్ద దంపతుల మధ్య అనురాగం, ఇలా ఎన్నో రకాలుగా ఒకే పేరు తో ఉన్న ప్రేమ వివిధ దశల్లో వివిధ రకాలుగా మనుషులకు అనుభవం అవుతుంది.

• అసలు ప్రేమ అంటే అర్దం ఏంటి ? ప్రేమ ఎందుకు పుడుతుంది ? మరి ఈ ప్రేమ యెక్క ఫలితం సంతోషమా లేక బాధ ? ఇలా అర్ధం కాని ప్రశ్నలు ఎన్నో ప్రతీ ఒక్కరికీ ఉంటుంటాయి.

•  నేడు ఈ  ప్రేమ అర్దం, తీరు ఒక్కొక్కరి ఒక్కోలా కనపడుతుంది.

• ప్రేమ అంటే ఒక స్త్రీ పురుషుల ఆకర్షణ అని , మనిషి తన శారీరక అవసరాల కోసమే కావాలనుకునే స్థితి అన్నట్లు నేడు సినిమాలు, మీడియా ప్రభావం వలన చాలా మంది కి అనిపిస్తుంది. కనిపిస్తుంది.

  కానీ,

• ప్రేమ అనేది ఒక మానసిక స్థితి, మనసు కి సంబంధించినది అనేది ఎంత మంది కి అర్ధం అవుతుందో తెలియదు.

• ఒక పరిణితి, అవగాహన లేని వారు ప్రేమ ను శారీరక అంశం గానే భావిస్తారు. ఇది ఒక చపలత్వ బుద్ధి కి నిదర్శనం. అందచందాలు , హావభావాలు , బాహ్య సొగసులు చూసుకొని శారీరక వాంఛల కోసం కలిగేది ప్రేమ కాదు. అది ఆకర్షణ, మోహం, కామం.

• ప్రేమ ఎప్పుడూ కూడా ఒక మానసిక అంశం. మనసు ల మధ్య చిగురించే మానసిక బంధం. రెండు మనసుల ఆలోచనలు, అభిప్రాయాలు, అభిరుచులు, కష్టనష్టాలు, సుఖదుఃఖాలు, నమ్మకం, విశ్వాసం, నిజాయితీ   ఇలా  పరస్పరం  ఎన్నో గుణగణాలను ఎంతో అర్దం చేసుకొని ఇద్దరు ఒకటిగా అయినపుడు మాత్రమే ప్రేమ పుడుతుంది. ఆ తదుపరి దశలో సృష్టి రీత్యా శారీరక బంధం అనేది ఏర్పడితే ఏర్పడుతుంది లేకపోతే లేదు.

• ఈ విషయం కూలంకషంగా అర్దం చేసుకోలేక పరిపక్వత లేని ఆలోచనలతో, తొందరపాటు చర్య లతో ప్రేమించుకుంటున్నాం అనే భావన చాలా మంది కలిగి ఉంటారు. అంతే వేగంగా విడిపోయి ఒకరినొకరు దూషించుకుంటూ మోసపోయామని బాధపడతారు.

• ప్రేమ అనేది ఇద్దరి మధ్య , రెండు వైపుల ఉంటేనే పరిపూర్ణం అవుతుంది.  ఒకరికి ప్రేమ ఉండి , మరొకరికి లేదంటే, లేేేదా   ప్రేమించిన వారితో కలిసి జీవించలేదు అంటే అది  తప్పనిసరిగా  కర్మ బంధము  మరియు  బుణానుబంధం గా భావించాలి.

• స్వచ్చమైన ప్రేమ ఎప్పుడూ కోరుకునేది, పంచేది ఒకటే సంతోషం. ప్రేమ సఫలం అయినపుడు రెండు జీవుల మధ్య ఆనందకరమైన శక్తి ఉత్పన్నమవుతుంది. ఇది మనిషి మెదడులో జరిగే ఒక రసాయనిక చర్య. ఈ రసాయనిక చర్య ద్వారా హార్మోన్ ఉత్పత్తి జరిగి మనసు స్పందించడం జరుగుతుంది. అందుకే ప్రేమ ద్వారా ఆనందం పొందుతూ ఉంటారు.

• ప్రేమ అంటే ఒక్కమాట లో చెప్పాలంటే ఇవ్వడం. మనిషి తన నుంచి ప్రేమించిన వారికి ఇస్తూ ఉంటాడు. అది ఆనందం, సంతోషం, ఇంకా ఏదైనా కావచ్చు. ఇవ్వడం అనేది ఇరువురి లోను ఉండవలసిన అంశం. అప్పుడే మనుషుల మధ్య ప్రేమ ఆరోగ్యకరం గా ఉంటుంది.

• కాని దురదృష్టవశాత్తు కొందరు మనుషుల లోని స్వార్థ బుద్ది , అహం తో మనసు లో చిగురించిన సున్నితమైన ప్రేమ తో అంతర్గతంగా లెక్కలు వేయడం మొదలు పెడతారు. అప్పుడే ప్రేమికుల మధ్య సమస్యలు మొదలవుతాయి.

• నిజమైన ప్రేమ కి తనకి కావలసిన ఆనందం దక్కినా దక్కక పోయినా ఎదుటి వ్యక్తి కి మంచి కోరుకుంటూ,  సంతోషం ఇస్తుంది. అది ప్రేమ యెక్క గొప్ప తనం.

• ప్రేమ ఎప్పుడూ సమస్యలు సృష్టించదు,  సమస్యలు కోరుకోదు. ఈ ప్రేమ ను అర్దం చేసుకోవాలంటే మనిషి కి పరిణితి కావాలి.  సాధారణంగా ప్రేమించిన మనిషిని పెళ్లి చేసుకుని సొంతం అయితేనే ప్రేమ ఫలించింది అని లేకపోతే ప్రేమ విఫలం అని అనుకుంటారు.  కానీ అది తప్పు,  ఎందుకంటే ప్రేమించి పెళ్లి చేసుకున్న తరువాత మనిషి పై అభిప్రాయం మారిపోయి , చీటికి మాటికి ఎన్నో కలహాలు సృష్టించుకున్న వారి  ప్రేమ సఫలం అయింది అని ఎలా అనుకోగలం. ఇలా ఉన్నవారిని ఎంత మంది ని చూడడం లేదు.

• ప్రేమించుకునే వారు ప్రేమ తో తమ జీవిత మాధుర్యం అనుభవించాలి అనుకుంటారు. తొలినాళ్ళలో ఒకరి కోసం మరొకరు పుట్టినట్లు గా అనుకుంటారు. కానీ కాలం గడిచే కొద్దీ అభిప్రాయ భేదాలు రావడం విడిపోవడం కొందరిలో చూస్తుంటాం. ఒకరికి నచ్చినట్లు మరొకరు లేరని , లేదా తమ స్వతంత్రం కోల్పోయినట్లు ఫీల్ అవుతారు. ఇక్కడి నుంచే లోపల ఉన్న అహం బయటకు వచ్చి విడిపోవడం జరుగుతుంది.

• అందుకే పరిణితి లేని ప్రేమ బంధాలు నిలబడవు. ప్రేమ,  త్యాగం కోరుకున్నప్పడే జీవంతో ఉంటుంది. త్యాగం అంటే మనిషి ని వదులుకోమని కాదు. అహం వదులు కోమని అర్దం. అహంకారం వలనే ఎటువంటి వారి లో నైనా ప్రేమ విఫలం అయ్యేది. అదే విధంగా త్యాగ గుణం వలనే ప్రేమ సఫలం అయ్యేది. ఇది అర్దం చేసుకునే వారు అదృష్టవంతులు.

• సాధారణంగా మనుషుల జీవితాల లో ఏ వయసు లో, ఏ సమయంలో ఎలాంటి మార్పులు సంభవిస్తాయి ఎవరికి తెలియదు ఒక్క భగవంతుడి కి తప్ప.

కొందరికి వివాహం చేసుకున్న సమయానికి కనీసం ప్రేమ అనే మానసిక అనుభూతి కూడా తెలియదు. కానీ జీవిత ప్రయాణంలో భార్య భర్తలు ఒకరినొకరు అర్థం చేసుకొని ప్రేమికులు గా అవుతారు. మన తాతలు, తండ్రులు , ముందు తరాల వారందరూ ఈ కోవలో ఉన్నవారే. మరి ఆ కుటుంబ వ్యవస్థ లు  ఎంత విజయవంతంగా ఉండేవో  మనకి బాగా తెలుసు.

• కొందరు బాగా ప్రేమించుకుని పరిస్థితులను బట్టి పెళ్లి చేసుకోలేక దూరం అయి మరొకరితో జీవితం పంచుకునే వారుంటారు. ఇది  చాలా బాాధాకరం. ఇటువంటి వారిలో కొందరు,   ఏం చేస్తాం నుదుటి రాతలో రాసి పెట్టిలేదు అని సమాధాన పరుచుకొని కాలక్రమేణా , వారు గతంలో ప్రేమ నుంచి పొందిన అనుభవాన్ని త్యాగనిరతి తో జీవితం లోకి వచ్చిన వారికి ను పంచిపెడతారు. ఎందుకంటే నిజమైన ప్రేమకు తెలిసింది పంచడమే. నాకు దొరకక పోతే ఏమయింది, ఇవ్వడం తెలుసు కదా అనుకుంటారు. ఇది నిజంగా  చాలా మంచి ఆలోచన.

• కానీ చాలా మంది అనుకునేది, ఇదేం ప్రేమ ఒకరిని ప్రేమించి ఇంకొకరి కి ఎలా పంచుతారు , మోసం, వంచన కదా అని అనుకోవచ్చు.

ప్రేమించి పెళ్లి చేసుకోనంత మాత్రాన ఒంటరిగా ఉండాలనుకోవడం, అదేదో సర్వం కోల్పోయిన విధంగా జీవితం వృధా చేసుకోవడం అమాయకత్వం.  ఈ జీవితం నిరంతరం  మార్పు,  రూపాంతరం చెందుతూనే ఉంటుంది. మనిషి కి వయసు ఎలా ఆగకుండా ఎలా మారుతూ ఉంటుందో  అలాగే  జీవితం లో మార్పులు కూడా ఆగకుండా సంభవిస్తూనే ఉంటాయి. జీవితంలో జరిగే ప్రతీ దానిని అంగీకరించడం నేర్చు కోవాలి.  ఎందుకంటే  నీ లో  మార్పు తెచ్చుకోకపోతే,  నువ్వే వెనకబడతావు కానీ  కాలం గాని, నీ చుట్టూ ఉన్న వారు గాని నీ కోసం ఆగిపోరు.  ఎందుకంటే ఇక్కడ ఎవరి జీవిత ప్రయాణం వారిది.

• ప్రేమ కి స్వార్థం తెలియదు,  వాస్తవం తెలుస్తుంది. కామానికి స్వార్థం తెలుస్తుంది,  వాస్తవం తెలియదు. అదే ప్రేమ, కామం రెండింటి మధ్య ఉన్న తేడా. స్వార్థం, వాంఛ అనేవి మనిషి లో గుణాలు. వాటిని ప్రేమ కు ఆపాదించడం అవివేకం.

• ప్రేమించడం అనే మాట కి అసలు అర్దం  పంచడమే కానీ తిరిగి  పొందుతున్నామా లేదా అనేది కాదు. ఇటువంటి గొప్ప గుణం స్త్రీ ల లోనే కనిపిస్తుంది. ప్రేమ తత్వాన్ని పురుషుడు కంటే స్త్రీలలో ఎక్కువగా ఉండే విధంగా  ప్రకృతి లో సృష్టించబడింది. ఎందుకంటే  స్త్రీ కి  ప్రతి సృష్టి చేయగల అదృష్టం ఉంది. అందుకే స్త్రీ ప్రేమ లో  త్యాగ నిరతి ఉంటుంది. పురుషుడు ప్రేమ లో స్వభావ రీత్యా కొంత స్వార్థం ఉంటుంది. అవునన్నా కాదన్నా ఇది నిజం.

• మరికొందరి పరిస్థితి  ప్రేమించిన వారితో పెళ్లి జరగనప్పుడు  వేరొకరిని పెళ్ళి చేసుకుని , ఒక వైపు కాపురం చేస్తూ మొదటి వారిని మర్చిపోలేక దుఃఖం అనుభవిస్తూ ఉంటారు. ఇది ఏ జన్మ లోనో చేసిన చెడు కర్మకు ఫలితం. ఈ దుఃఖం తో కొందరు జీవితాంతం యాతన అనుభవిస్తూ ఉంటారు.  ఇలా ఉండడం వలన  కాలక్రమేణా మానసికంగా బలహీన పడి  ఆరోగ్యం కోల్పోవలసి వస్తుంది. 

• పరిస్థితుల రీత్యా ప్రేమికులు విడిపోతే జీవితం త్యజించమని ఎక్కడా ఎవరూ ఎప్పుడూ చెప్పలేదు.

• ప్రేమ లో ఎప్పుడూ దైవత్వం ఉంటుంది. ప్రేమ ఎప్పుడూ దుఃఖం కోరుకోదు. మోసపూరితమైన ప్రేమ ఒకరిలో కలిగి ఉన్నప్పుడే వారికి  దుఃఖం తిరిగి వస్తుంది.

• ప్రేమించడం నేరం కాదు. ప్రేమించండి కాని ప్రేమకు బానిసలుగా కాకండి. ఎందుకంటే బానిస కి ఎప్పుడూ మిగిలేది దుఃఖం. సంతోషం తో కూడిన ప్రేమ ను పంచండి. ప్రేమిస్తే ధైర్యం చెయ్యండి. కష్టం అయినా నష్టం అయినా కలిసి ఉండండి. ఎందుకంటే నిజమైన ప్రేమ కి  సర్దుకు పోయే గుణం సహజంగా ఉంటుంది.

ప్రేమించుకున్నాం , ప్రేమిస్తున్నాం  అనుకునే వారు ఎవరైనా సరే ముందు ప్రేమ అంటే ఏంటో అర్దం చేసుకోండి. అప్పుడు మనుషులు అర్దం అవడం మొదలవుతారు. 

పైశాచిక వికారాలను ప్రేమగా భావించకండి.

• జీవితం లో  మన చుట్టూ జరుగుతున్న ప్రతీ సంఘటనలకు మనమే కారణం అవుతాం. అది అర్దం చేసుకోలేక చుట్టూ బలహీనంగా కనిపించే వారిపై, లేదా కాలం పై నిందలు వేస్తుంటాము. ఈ ఒక్క విషయంలో సత్యం తెలుసుకుని అంగీకరిస్తే , మనిషి తన జీవితంలో ఏది కోల్పోయినా సరే దుఃఖపడడు. నిత్యం ఆనందంగా ఉంటాడు. ఎందుకంటే మనిషికి తెలుసు తన కర్మకి తానే బాధ్యుడిని అని.

• ఈ విశ్లేషణ ఎందుకంటే ఎవరు దేని వలన , ఎవరి వలన దుఃఖం అనుభవించకండి. అలాగే దుఃఖం పంచకండి. దుఃఖం పంచితే పది రెట్లు తిరిగి అనుభవించ వలసి వస్తుంది. ఇది సత్యం.

• ఆనందంగా బ్రతకడం అంటే కోట్లాది రూపాయలు, బంగాళా లు, కార్లు, విలాసాలు, తోటి బంధువు ల తో లెక్కలేసు కొని నాకు బోలెడు ఆస్తి పాస్తులు ఉన్నాయి అని  గొప్ప గా ఫీల్ అవడం  ఇవి కాదు.  ఇవి తాత్కాలిక భ్రమతో కూడిన సుఖాలు మాత్రమే. ఇది ఒక అజ్ఞానం. 

మనసు లో నిత్యం వెలిగే ఆత్మజ్యోతి తో , అనాది గా పాతుకుపోయిన  మనిషి లోని వికారమైన గుణాలను దగ్దం చేసుకోవడం ద్వారా మనసు తేలికపడే స్థితి పొందడం సంపూర్ణ మైన ఆనందమయం. ఇది జ్ఞానం.

నీకు నువ్వు ఎవరో అర్దం అవుతున్నప్పుడే ఈ స్థితి కి బాట పడుతుంది.

మనిషి ఏం చేసినా నిజాయితీగా ఏదొక రోజు ఆత్మ ద్వారా పరమాత్మకు సమాధానం చెప్పి తీరవలసిందే. తప్పించుకోవడం అసాధ్యం.

ఓం నమఃశివాయ 🙏

యడ్ల శ్రీనివాసరావు 9 Oct 2022 5:00 AM.