Thursday, November 19, 2020

29. ఊహించలేదే.....

ఊహించలేదే....
  


• ఊహించలేదే....
  ఊపిరి అవుతావని నా ఊహలకి

• ఆలోచించలేదే....
  ఆయువువుతావని  నా కవితకి 

• కాన రాలేదే....
  కలుస్తావని  నా కనులకి 

• మననం చేయలేదే....
  నాందివవుతావని నా మనోగతానికి

• పదముల ప్రేరణ నీవైనప్పుడు.... 
  గజ్జెల వలే గలగల లాడింది నా గద్యం

• ఈశ్వరా!  ఏమి ఈ వింత…. 
  ఎందుకు ఇదంతా!  నీ ఆట ఎవరికెరుక



యడ్ల శ్రీనివాస్



28. బాల్య మిత్రుల కలయిక రూపమా అపురూపమా?....

 బాల్య మిత్రుల కలయిక రూపమా..... అపురూపమా...

• ఉన్నాం.. ఉన్నాం...అందరం ఒకేలా ఉన్నాం.... ఏం ఒకేలా లేకుంటే మరి ప్రతిబింబాలు ఎలా కా గలిగాం... మాట్లాడు మిత్రమా.... ఓ నేస్తమా ..

• ముప్పది సంవత్సరాల ఎడబాటును మైమరిపించే మహత్తరమైనదా!  మన స్నేహం ?
• అవును.....కాదనేది ఎవరు?   జ్ఞాపకాలు పదిలం.... అనుభవాలు మధురం.... బాల్య బంధం తాజాగా పరిమళంతో  ఉన్నప్పుడు కాలంతో.... వయసుతో... పని ఏముంది మిత్రమా ..


• కంటికి కనిపించని స్నేహ తరంగాలు ఎన్నో ఉన్నా....... నీ అంతరంగాన్ని స్పృశిస్తే  కనువిందుచేసే అలలే బాల్య మిత్రులు....

• సంతోషం సంబరపడుతోంది......ఆనందం ఆశ్చర్య పడుతుంది..... బాల్య మిత్రుల కలయికకి....

• తనువులు వేరైనా,  మనసులు వేరైనా,  ఒకే మూలంలో (ప్రదేశం) , సరిసమానమైన స్పర్శలతో కలిసి పెరిగాం…....మరి  ఆ జీవ స్పర్శ  మన జీవనాడి లో లేదంటారా.. మిత్రులారా....ఓ మిత్రులారా...

• ఏ క్షణాన ఏమి జరుగునో ఎవరికి తెలుసు .....వెనుకకు తిరిగి చూస్తే ఎంతో కొంత బరువులు అందరికీ ఉన్నాయి ( పేరు ,హోదా, ధనము, ఋణము, అనారోగ్యము, దుఃఖము) .....ఏది శాశ్వతం?  

• ఆరోగ్యంతో ఆనందమయమై.... వర్తమానంతో వర్ధిల్లాలంటే .....ఒకటే ఔషధం .... మనసుకు ఊరట....అది దొరికేది మన అందరి లోనే......కావున..... మిత్రులారా…..
• చేతులు కలుపుదాం........ చేయూత నిచ్చుకుందాం......
• మాటలు కలుపుదాం .......మనసుని బలోపేతం చేద్దాం…..

• తెరవకు..... తడమకు.....నీ అంతర్మథనం లోని చీకటి కోణాన్ని(అహంకారం, గర్వం,ఈర్ష్య, అసూయ,పగ, ప్రతీకారం, ద్వేషం,హేళన, వెకిలి మాటలు, వెకిలి చేష్టలు, మోసం).....పొరపాటున.... తెరిచినా.....తడిమినా.... చీకటిలో ఏకాకిగా   అంతరించిపోవాలి…..... సిద్ధమేనా ఆలోచించు…….. తదుపరి చీకటి కూడా నీ చిరునామా కనుగొనలేదు……ఇది అక్షర సత్యం.... జాగ్రత్త... మిత్రమా.


• సరియైన శక్తి మాత్రమే...... నీ దశ తిరిగే దిశను చూపిస్తుంది.....ఏం కాదనగలరా మిత్రులారా.....

మీ మిత్రుడు
యడ్ల శ్రీనివాసరావు

27. ఒక సందర్భంలో స్నేహితులను ఉద్దేశించి

స్నేహితులందరికీ మనవి,  నన్ను మన్నించాలి,  నా  ఆలోచనలను దయచేసి అర్థం చేసుకోండి . నేను ముందుగా వివరణ ఇచ్చినట్లు ఈ రాత ఒక వ్యక్తి రాసినది కాదు.....  ముమ్మాటికి కానేకాదు. వ్యక్తి ఎప్పుడూ ఒంటరి వాడే...కానీ వ్యక్తికి శక్తి కలిస్తేనే సంఘటితం అవుతుంది. ఆ శక్తే ఇక్కడ "మనం". మనలో ప్రతి ఒక్కరికి బడిలో అపురూపమైన అనుభవాలు ఉన్నాయి.  


ఈ రాతలో ప్రతి అక్షరం ఒక విద్యార్థి. అంటే ప్రతి ఒక్కరి సంతోషం, ఆనందం,  అనుభవాల సమ్మేళనమే ఈ రాత.  
మనమందరం కలిసి మనకు మనమే కృతజ్ఞతలు చెప్పుకోవాలి.. ఎందుకంటే ఈ రోజు మన బాల్య సంతోషాన్ని మనమే నెమరువేసుకుంటున్నాము, పండుగ వాతావరణం   సృష్టించుకున్నాము. అందుకు నిదర్శనమే ఈ రోజు.

నన్ను క్షమించాలి అర్థం చేసుకోవాలి,   మన వాళ్ళ యొక్క కృతజ్ఞతలను వ్యక్తిగా నేను స్వీకరించలేక పోతున్నాను. 

ఒకటి మాత్రం నిజం......ఇది  చదివిన ఆనందించిన ప్రతి ఒక్కరం భాగస్వామ్యులమే,   ఎవరికి వారే స్వయంగా, స్వీయ అనుభవంతో  రాసుకున్నదే ఇది. 

ఎందుకంటే బాల్య భావాలు బయటకు అందరం వ్యక్త పరచ లేకపోవచ్చు  . భగవంతుడి ఆశీస్సులు ఉన్నప్పుడు ఏదో ఒక రూపంలో మనపై ఆ వర్షం పడుతుంది. ఆ సమయం ఇప్పుడు ఆసన్నమైంది.  " ఓం శ్రీ గురుభ్యోనమః" ....... Praise the lord.... "జీసస్". 


"నేను" పలికి చూడండి రెండు పెదవులు కలవవు.
"మనం " పలికి చూడండి రెండు పెదవులు కలుస్తాయి .

ఏదైనా "నేనేదో చేసేసాను.... నేనేదో చేస్తాను.... నావల్లే ఇదంతా అనుకుంటే" మిగిలేది ఏకాంతం ,  ఒంటరితనం.  

కానీ  "మనం ....మనది.... మనమంతా కలిసి చేసాం" అనుకుంటే మిగిలేది కోటి దివ్వెల కాంతి,  సంతోషం .  

ఆ "మనం" లోనే ...."నేను"  చిన్నగా ఒక ప్రక్కన ఉంటాడు.
అదే "నేను" కు  "ఆనందం" ….... "మనం" కు  బలం.



మీ మిత్రుడు
యడ్ల శ్రీనివాసరావు

26. స్నేహం.... స్నేహితుల దినోత్సవ సందర్భంగా

స్నేహం…



• స్నేహమంటే విలువైనది,  అపురూపమైనది,  అమర మైనది. కానీ  ప్రతీ అంచుకు రెండు కోణాలు ఉన్నట్లే , మంచి,  చెడు అనే  గుణాలకి  స్నేహం కూడా ఏమీ అతీతం కాదు. 

• మంచి స్నేహం ఎప్పుడూ నీడలా వెన్నంటి ఉంటుంది..... ఆపదలో ఆసరా అవుతుంది...... సంతోషానికి సంబరం అవుతుంది.....బాధకు  భరోసా ఇస్తుంది..... ప్రతిభకు గుర్తింపు ఇస్తుంది...... పిలవకపోయినా నేనున్నా అంటుంది. 

• మంచి స్నేహానికి ఒక బలమైన,  విచిత్రమైన,  విపరీతమైన స్వార్థం ఉంటుంది.  ఆ స్వార్థం పేరు ఏంటంటే " సంతోషం " . సంతోషాన్ని స్నేహితులతో  పంచుకోవాలనే ఒక ఆరాటం.... అంతకుమించి స్వచ్ఛమైన మంచి  స్నేహం లో ఏ రకమైన స్వార్థం ఉండదు.

• మంచి స్నేహం... ఎప్పుడైనా, ఎక్కడైనా, ఏ సందర్భంలోనైనా, సాటి స్నేహితుడి యొక్క ఉన్నత తత్వాన్ని, అభ్యున్నతిని  మాత్రమే కోరుకుంటుంది.  అదేవిధంగా స్నేహితుడి యొక్క నిమ్నతత్వాన్ని  సరి చేయడానికి ప్రయత్నిస్తుంది.  

• మంచి స్నేహానికి   అర్థం చేసుకునే గుణం ,  సహాయపడే తత్వం భగవంతుడు సహజంగానే ప్రసాదిస్తాడు . మంచి..... వేగంగా నడవలేదు,  త్వరగా ఆకట్టుకోలేదు కానీ ఎప్పటికీ స్థిరత్వమే దాని గమ్యం.

• ఇక పోతే  చెడు స్నేహం……  స్నేహం ముసుగులో ఏదో ఒక లబ్ధి పొందాలనుకోవడం……..  వ్యక్తిగత అవసరాలకు స్నేహాన్ని ఆయుధంగా ,  ఒక వ్యాపారంగా మార్చుకోవటం…….. స్నేహితులతో ప్రేమగా ఉంటూ, వారి మనస్తత్వాన్ని,   బలహీనతలను, అనవసరమైన వివరాలు అడిగి  తెలుసుకుని జీవితాలతో ఆటలాడటం……. చెడు అలవాట్లను నేర్పించడం…….. నమ్మకద్రోహం తలపెట్టడం…….డబ్బు, హోదా ఉన్న వారితో ఒక రకమైన స్నేహం,  అది లేని వారితో మరొక రకమైన స్నేహం చేయడం .....ఇలా చెప్పుకుంటూ పోతే ఈ రకమైన చెడు స్నేహలతో ఎప్పటికీ మిగిలేది క్షోభే………..చెడు  వేగంగా నడవగలదు, త్వరగా ఆకట్టుకో గలదు …కానీ పతనమే దాని గమ్యం.

• స్నేహితులారా……మంచిని ప్రోత్సహిద్దాం....... మంచి స్నేహితులుగా ఉందాం.......... నిజం లో బ్రతుకుతూ ఆనందంగా ఉందాం. ఎందుకంటే మిగిలిన జీవితానికి కావలసింది ఆనందం. ఆనందంగా ఉంటేనే మనం బాగుంటాం......మనం బాగుంటేనే మన కుటుంబం బాగుంటుంది...... మన కుటుంబం బాగుంటేనే సమాజం బాగుంటుంది..... సమాజం బాగుంటేనే దేశం బాగుంటుంది.

• స్వచ్ఛమైన ఆలోచన...... స్వచ్ఛమైన జీవితానికి నాంది.

• స్వచ్ఛమైన స్నేహాన్ని బ్రతికిద్దాం.......స్వచ్ఛందంగా బ్రతుకుదాం.

• ఐదు పదుల వయసులో అడుగు వేయబోయే  స్నేహానికి కావలసింది ఆస్వాదనే....... కానీ ఆరాటం కాదు. 

• చివరిగా ఒక మాట……. స్నేహం అంటే కాలక్షేపం కాదు……కాలక్షేమం.

• (మిత్రులు గమనించాలి.... ఇవి నా ఆలోచన, అభిప్రాయం  మాత్రమే) 

స్నేహితుల దినోత్సవ సందర్భంగా .....
ప్రతి సంవత్సరం ఆగష్టు తొలి ఆదివారం .

మీ మిత్రుడు 
యడ్ల శ్రీనివాసరావు
2020 ఆగష్టు

25. ప్రక్రుతి పిలుస్తోంది

ప్రకృతి పిలుస్తోంది


• పిలుస్తోంది 
  పిలుస్తోంది   ప్రక్రుతి
 తన ఒడిలో   సయ్యాటకి  పిలుస్తోంది.

• అక్కున  చేర్చుకుని   మక్కువతో 
  ఊయలాడేందుకు   పిలుస్తోంది.


• తన సరసం తో   నీ విరహం 
  వినీలమైయ్యేందుకు  పిలుస్తోంది.


• చేతులు చాచి    సేదను తీర్చి
  ప్రేమ ను   పంచడానికి  పిలుస్తోంది
  పిలుస్తోంది   ప్రక్రుతి.


యడ్ల శ్రీనివాసరావు  







24. అలజడి...నా మనస్...సలజడి

అలజడి..




• అలజడి అలజడి ఈ చిరు ఆదః అధరాల  అలజడి ఎందుకో నాకే ఎందుకో...

• సూర్యోదయ మంచు పొరల తెరలతో చెలిమి చేసి,   చొరవతో చొరబడే వెచ్చా వెచ్చని సూర్యకిరణాలు ....రేప రెపలాడే పైరుపై చల్లా చల్లని స్వేద బిందువులు .....ఇసుక తిన్నెల వాలు జారే హోయలు పోయే నడుము పైన సన్నని పరికిణీ చిరుగాలి రెపరెపలు.


• అలజడుల నా మనస్ సవ్వడి .....గలగల నా తుమ్మెద రవళి .

• పైరుగాలి పై విహరించే పక్షి కిలకిలలా.......ఉరకలతో ఎగిసిపడుతోంది నా మనస్  సలజడి .....


• పొలము గట్టు బోదేలో  స్వచ్ఛమైన  ఉరకలేసే  నీరులా....విప్పారిన కన్నులతో నిశ్చలమైన నిరీక్షణ... నా మనస్  కోసం ...

• నడినెత్తిన సూర్యుడు ......క్షీణంతో , సహనంతో , వేడిమిని ఆస్వాదిస్తున్న  పైరులా .....ఎదురు చూపుల బలహీనతే చిగురుటాకులా....నా మనస్  కోసం నిరీక్షణ.


• అస్తమించిన సూర్యుడు,  పైరుగాలి సవ్వడులు,  పక్షుల గలగలలు,  పునః తేజానికి  ఆరంభాలు....ప్రకృతి నాకు ఇచ్చే , నా శక్తే   నా నిరీక్షణ , నా మనస్ కోసం....

• తెలుసు నా మనసు.... నాది కాదని తెలుసు.... నా దరికి రాదని తెలుసు .....అయినా నేను ప్రకృతిలో మమేకమై ఉన్నాను కదా అందుకే అచంచలమైన చిరకాల నిరీక్షణ.

యడ్ల శ్రీనివాస్

23. జాబిల్లి

జాబిల్లి


• మనసును మురిపే జాబిల్లి ...
  మగువను తలపించే జాబిల్లి.


• పసి హృదయాలకు తల్లివవుతావు ...
  పగిలిన హృదయాలకు వెన్నెల సేదనిస్తావు.


• నిశిరాత్రి కి ప్రాణం పోస్తావు ...
  కరిగే మంచును ముత్యం చేస్తావు.


• నీ ఏకాగ్రతకు అలలు ఉరకలేస్తాయి ...
  ఎందుకమ్మా మేఘాల చాటున దోబూచులు.

• సమస్త జీవరాశి మనసుకు 
  మూల స్వరూపం నీవేనమ్మా జాబిల్లి ...
  ఓ తల్లి జాబిల్లి .    

              
యడ్ల శ్రీనివాస్





22. చిరుగాలుల గలగలలు

చిరుగాలుల గలగలలు

• చిరుగాలుల గలగలలు. 

 గలగలల సవ్వడికి వయ్యారంగా 

 సుడులు తిరిగే నుదుట ముంగురులు.


• ముంగురుల అలజడి కి  

 టపటపలాడే  విప్పారిన  కనురెప్పలు.


• కనురెప్పల  సౌందర్యానికి 

  చంద్రబింబం వలె తిలకం.


• సన్నని సొగసరి సూదంటి ముక్కు కి 

  మేని ఛాయ ముక్కెర.


• ఉచ్ఛ్వాస , నిచ్ఛ్వాసాల అలజడి కి 

  సన్నగా అదియే అథరాలు

  వెరసిన ముఖారవిందం   సొంతం   నా సొంతం.


యడ్ల శ్రీనివాసరావు

21. చలనం....నిశ్చలనం

చలనం...నిశ్చలనం


• సాగర కెరటమంత చలనం గా 

  నీ ఆలోచనలు  (అల్లకల్లోలం  గా)

  సాగర గర్భమంత నిశ్చలం గా    నీ మనసు.


• ఏల సాధ్యం   ఎలా సాధ్యం.


• సాగర గర్భాన్ని   పున్నమి చంద్రుని వెన్నెల

  తాకినందుకా   అంత నిశ్చింత   నిశ్చలనం.


• నీ  నోట నుండి   మాట రాకపోయినా

  తనువు నుండి తరంగాలు  తాకుతూనే ఉన్నాయి.


• నీ  నోట‌ మాట  పదాల పదనిసలు 

  లయ తప్పవచ్చు

  కానీ   నీ మనసు సరిగమలు  శ్రుతి  తప్పవు.


• నీ రాతలు రూపాంతరమై 

  భావవ్యక్తీకరణ కాకపోతేనేం

  నా హ్రుదయం  అనుసంధానమై ఉంది కదా.


• నా కనులకు చూడాలని అంటాయి

  కానీ మనసు   మార్గం  తెలియదు అంటుంది.


• నా మనసు  మాట్లాడలని అంటుంది 

  కానీ కంఠం మూగపోతుంది.


• ఇక స్వేచ్చగా ఉన్నది ఈ చేయి 

  అందుకే ఇదంతా రాస్తుంది.


• బంథంలో జీవమున్నపుడు

  ఎన్ని బంథనాలున్నా చిరకాలం చిరస్మరణీయమే.


• అర్థం  నీవు అర్థం కావాలంటే

  నీ మౌనం చాలు   ఈ హ్రుదయానికి


• మరి అర్థం  నేను అర్థం కావాలంటే

  చీకటి లో   కూడా చూడు   

  నీడనై  నీ నీడనై  ఉన్నాను  ఆత్మగా.


• చూడగలుగుతున్నావా   కనిపిస్తున్నానా



యడ్ల శ్రీనివాసరావు















20. పదముల... చెలి... చెలిమి


 పదముల   చెలి  చెలిమి

• పదములు కలమున వదలక గాంచిన(చూసిన)

  చెలిమి సంతసించే.


• పదములు పిదపన(తదుపరి)

  చెలిమి మనసున్  దోచెన్.


• పదముల నాట్యమే

  చెలిమి ఊగిసలాడే వాలుజడ వలపు 
  
  నడక విన్యాసం.


• పదముల  అభినయమే

  చెలిమి నేత్రారవింద శృంగం (తామర పుష్పం ).


• పదముల పదనిసలే

  చెలిమి తలపుల్  వలపుల్  కులుకుల్.


• పదముల సరిగానం
  
  చెలిమి మేనిన హొయల్

  వర్ణించలేని భాండాగారం.


• పదముల ప్రవాహంలో జలకాలాడే

  చెలిమి నిత్యానంద శోభమయం.


• పదముల కదలికలే

  చెలిమి ఎదలోతుల్లో ప్రకంపనల్.


• పదముల  ప్రతి పాదమున

  చెలిమి తన ముఖారవిందం గాంచెన్.


• పదముల విరహం

  చెలిమి మోమున అలకతో అథరం అదిరెన్.


• పదముల పుట్టుక తనకైనని  తలచిన

  చెలిమి రక్తియై   అనురక్తియై   నేలకామడ

  ఆడుతుండే    మయూరిలా  నాట్యమాడుతుండే.



• పదమా.  పంచభూతాల ఆకర్షితమా

  ప్రకృతిని ( చెలిమిని)  పరవశింపజేసే

  పంచతంత్రమా.


• పదముల పరువానికి ప్రణమిల్లే చెలిమికి  

  పదములు రాసేడువాడు 

  శూన్యంబుగా  గాంచెను    ఎన్నడు.



• పదము పైన  ప్రేమ  చెలిమి సొత్తు

  పదము గాంచిన వాడు విభుడి(ఈశ్వరుడు) సొత్తు.



యడ్ల శ్రీనివాసరావు










19. ఓం నమఃశివాయ , ఉన్నాడులే... ఒకడున్నాడు లే

ఉన్నాడులే.... ఒకడున్నాడు లే


• ఉన్నాడు లే,  
  యుగమొక క్షణమును చేసే 
  యోగి  ఒకడున్నాడులే.


• జగమున 
  జనముకు  రక్షకుడైనాడులే
  పరిరక్షకుడై  యున్నాడులే.


• నట నాట్యం తో తాండవమెత్తి 
  ప్రక్రుతి పాలకుడై యున్నాడులే
  ఒకడున్నాడు లే.


• తేటతెల్లమైన  మేని  విభూది తో
  స్థితప్రజ్ఞడై    శాంతి కాముకుడై
  థ్యానముద్రకు  ప్రతీకుడై  యున్నాడులే.


• సుందర  మనోహర 
  చిద్విలాస  చిదానందుడి 
  కనుపాప  బాష్పమునైన  ధన్యం
  నా ఈ జన్మ ధన్యం.

• ఓం నమఃశివాయ….శివాయఃనమః ఓం.


యడ్ల శ్రీనివాసరావు








18. సుడిగుండాలు

సుడిగుండాలు


వికసించే విరజాజి   మంచు వెన్నెల జాబిల్లి

పరిమళాల సంపెంగ   కోటి తారల కాంతిమయి

ఆనందవల్లి

ఏది ఆది   ఏది అంతం

ఈ పయనం ఎందాకో  ఎందుకో 


బందమో 

   అనుబంధంమో  ఋణానుబందమో


బందమా  అంటే 

   బాధ్యతలు కాన రావడం లేదు

అనుబంధమా అంటే 

   అనుభవాలు కాన రావడం లేదు.

మరి ఇక మిగిలినది

   ఋణానుబందమే కదా


కలయిక చిత్రం కాదు 

   విచిత్రం కానే కాదు 

   యాదృచ్ఛికం అంతకంటే కాదు.


అవుతుందా

   అర్థం అవుతుందా

   శక్తిని చూడలేం  కాని అనుభవించగలం


చూడు  మనసు పొరలు చీల్చి చూడు

   నీ పట్ల ఈ ప్రకృతి లీల కనిపిస్తుంది.


పడ్డావు  పడ్డావు  

   సుడులు తిరిగే సుడిగుండాలే  

   ఆయాసపడే కష్టాలు పడ్డావు.


సుడిగుండాల్లో  సుడులెన్నునా  

   సున్నితమే  నీ  సుందరాభరణం.


ఆ సుందరాభరణానికే 

   ఎగిరే రెక్కల గుర్రం ఎక్కించుకుంది.


విహరించు  వినీలాకాశాన్ని

   ఆలంబనతో ఆస్వాదించు 

   సుడులు తిరిగే సుడిగుండాలని.


సాగరం లో శాంతిని చూసే 

   నీ మనసే నీకు  శ్రీ రామ రక్ష

ఉన్నాడు  ఒకడున్నాడు 

   ఈ సర్వం జగత్ వ్యాపించి ఉన్నాననే

   వాడొకడున్నాడు.  

   వాడిని చూడాలంటే 

   ఎన్నో సుడిగుండాలు  దాటాలి మరి.  

   వాడు అనుగ్రహిస్తే 

   ఏదో ఒక దేహం తో దర్శనమిస్తాడు.


యడ్ల శ్రీనివాసరావు









Sunday, July 26, 2020

17. మనసా ఓ మనసా

మనసా  ఓ   మనసా



మదిలోని మనసుకు  ఎన్ని పలకరింత లో,  
    ఎన్ని పులకరింత లో,  ఎన్ని కలవరింత లో.


మనస్సు పిచ్చిది ...
    బాధలో ఏకాంతం తో స్నేహం చేస్తుంది 
    సంతోషంలో సమూహంతో సందడి చేస్తుంది.


మనసు ఒంటరిది ... 
    ఎన్ని బంధాలతో పెనవేసుకున్నా  
    తనలాంటి మనసు కోసం నిరంతరం 
    ఆరాట పడుతుంది. 
    (అడిగి చూడు నీ మనసుని నిజమో కాదో).


మనసు అల్పమైనది ... 
    చిన్న చిన్న సంతోషాలు
    పెద్ద పెద్దగా పంచుకోవాలని  ఉవ్విళ్లూరుతోంది.


మనసు విశేషమైనది ... 
    కోరికలతో సతమతమవుతూ 
    నిర్ణయాలు   తీసుకోలేక 
    డోలాయమానంలో  ఊగిసలాడుతుంది.



మనసు దృఢమైనది ... 
    తన శక్తిని గుర్తిస్తే మరొక అద్భుతమైన 
    ప్రపంచాన్ని సృష్టిస్తుంది.


మనసు న్యాయవాది ... 
    సమస్యలను సృష్టించగలదు
    సమస్యలను తీర్చగలదు.



మనసు ఆశావాది ... 
    కోరుకున్నది పొందేవరకు 
    పరితపిస్తూ నే ఉంటుంది.



మనసు తేలికైనది ... 
    ఏ అండ లేకుండా 
    ఈ విశ్వమంతా విహరించగలదు.


మనసు భారమైనది ... 
    నిర్లిప్తతతో ఎన్నాళ్లైనా  
    కదలలేక  ఉండిపోతుంది.  


మనస్సు చంచలమైనది ... 
    సర్వం తెలుసని విర్రవీగుతుంది.
    అంతలోనే నాకేం ఎరుకని  మౌనంగా ఉంటుంది.



శరీరానికి అవయవాలున్నాయి,  
    అవి పరిమితం ... 
    మనసుకు అసంఖ్యాకమైన ఎన్నో
    గుణగణాలున్నాయి, అవి అపరిమితం.


మనసుకు వయసు లేదు
    శరీరానికి మాత్రమే వయసు
    అందుకే బాల్యం , కౌమారం,  
    యవ్వనం,  వృద్ధాప్యం  
    ఏ దశలలో కి  మనసు వెళ్ళినా  దానికి 
    తృప్తినిచ్చే దశలో తిష్ఠ వేసుకుపోగలదు.
    ఆనంద చక్రం  తిప్పగలదు.



ఈ రోజుకి  ఈ సృష్టిలో  మనిషికి 
     అర్థం కానిది ఏదైనా ఉంది  అంటే 
     అది ఒక్క మనసే.... 
     ఎందుకంటే దానికి భౌతిక రూపం లేదు.... 
     కాబట్టి ఎలాగైనా మారుతుంది.... 
     అదియే దైవం కావచ్చు  లేదా  దెయ్యం కావొచ్చు.


ప్రపంచానికి కనపడే మనిషికి  
    కనపడని మనసుతో నిరంతరం ఆరాటంతో 
    కూడిన పోరాటం ... ఏమిటో ఈ చిత్రం ... విచిత్రం.


యడ్ల శ్రీనివాసరావు.








Friday, July 10, 2020

16. మా బడి....అది మా బడి

మా బడి…అది మా బడి  
(సెయింట్  థెరిస్సా ఆర్.సి.యం.హైస్కూల్, పెద బొడ్డేపల్లి, నర్సీపట్నం,  విశాఖ జిల్లా)
మా బడి నినాదం  : 
DUTY  &  DISCIPLINE.
ENTER TO LEARN …LEARN TO SERVE.


మా బడి చిహ్నం(సుమారు గా ఇలా నే ఉండేది)

మా బడి.. అది మా బడి... బడిలో అడుగెడుతునే ఆవిరయ్యే మా  మదిలో  అలజడి.

ఊయల ఊగే యూకలిప్టస్ చెట్లు ...అందలమెక్కిన అశోక చెట్ల తో స్వాగతం..సుస్వాగతం.


రాచమార్గాన ఎర్రమన్ను రహదారి ... దారికి అటుఇటు తెల్లని గోడి ఇటుకలతో  గమకము(వరుస) విందము …. ముఖారవిందము.

ఆవరణలో   పచ్చగడ్డిలో ఏపుగా దాగిన పల్లేరు కాయలు ...లేత పాదాలకు నొప్పులు...తీయని మెత్తని నొప్పులు.


వైపుల్యమైన(ఘనమైన) వేదికకు(స్టేజ్) తోరణముల వలే అటుఇటు దేవదూతల అంజలిలు...నమఃస్సుమాంజలిలు.

మా బడి… అది మా బడి…మా జీవన నాడికి నడక నేర్పి నా బడి.


తెల్ల చొక్కాలు, ఖాకీ నిక్కర్లు... తెల్ల జాకెట్లు, నీలం లంగాలే  మా భరణాలు ..... ఆభరణాలు.


తలకి తైలం, ముఖానికి పౌడరు, చేతిలో సంచి, కాలికి రబ్బరు చెప్పులే మా బింబాలు...... నిలువెత్తు ప్రతిబింబాలు.


లేవు లేవు మాకు చేతి రుమాళ్లు..‌‌.. చెమట ను చెరిపే చేతులే మాకు ఆయుధాలు.   జీవులం .....చిరు శ్రమ జీవులం.


చిన్న విరామం లో చిరుతిళ్ళు ఆరాటం...గేటు బయట  ఈగల్లా , ఐస్ సాంబను చుట్టూ చేరి... తెల్లని చల్లని కమ్మని కొబ్బరి సేమియా పాల ఐస్  లోట్టలతో చీకుతుంటే ,  కనురెప్పలు భారంగా మూసుకుంటే ఆహ మథురం..... ఎంత మధురం.


అప్పుడప్పుడు మా బడి  సందర్శనకు విచ్చేసిన విదేశీయులను( church visiting foreigners) వింతగా చూసి ముసిముసి నవ్వులతో, గుసగుసలతో ఆశ్చర్యాలు... సంభ్రమాశ్చర్యాలు.

మధ్యాహ్న విరామం లో పాండవుల మెట్ట పై జారుడు ఆటలు,  ఎండవేడికి సుర్రుసుర్రులు.   రిక్షాలు రాకపోతే చెరువు గట్టు పై అడ్డదారిలో, పిచ్చిమొక్కల నడుమ ఒకరి వెనుక ఒకరి పిచ్చాపాటీ తో పయనం.  ఆనందం.. మాకు మహదానందం .

కార్యాలయం( ఆఫీస్) ముందు అందమైన నందనాన(ఉద్యానవనం) చిరుమందహసంతో మూర్తీభవించిన ప్రేమమూర్తి మేరిమాతకు వందనాలు...మా పాదాభివందనాలు.

తనదైన విగ్రహంతో రక్షకుడిగా..... నిగ్రహంతో పరిరక్షకుడిగా.... అనుగ్రహంతో సంరక్షకుడివై…….మా అందరి అయ్య వయ్యావు  దైవస్వరూప శ్రీ ఇన్నయ్య ..మా అయ్యా(తండ్రి)....వందనాలు….. మా శిరశాభివందనాలు.


భయమో,  భక్తో,   ప్రేమో ఎన్నో  పసి మనసులు చేతులెత్తి మ్రొక్కిన నీవు,...... మా బడికి,  మాకు మథ్య  పరమాత్మ ప్రతినిధివి కాక ......ఇంకేమీ అనగలం  తండ్రి మా తండ్రి శ్రీ ఇన్నయ్య తండ్రి... వందనాలు.... మీకు ప్రేమాభివందనాలు.

మా బడి రాజరిక భవనాలే  మా బలమైన బంధాలు....నేడు మా బడి కి వృద్ధాప్యం  రావచ్చు.... నాడు యవ్వనంలో  మా బడికి సాటి  ఏది…….సరిసాటి  ఏది?..... గర్వం.... ఇది మా ఆనంద గర్వం.


వీరోచితమైన జ్ఞాన గురువులే మాబడి సామ్రాజ్యానికి దశా దిశా నిర్దేశించిన యోధులు…..…మా గురువులు నిరంతర జ్ఞాన శ్రామికులు….. మా జీవిత గమనానికి మార్గదర్శకులు... వారికి వందనాలు....మా ఆత్మాభివందనాలు.


జాతి కుల మత స్థాయి వర్గ వర్ణాలు కానరాని  హరివిల్లే మా బడి.



తరగతి గదిలోని గుంజీలు , గోడ కుర్చీలు,  మోకాళ్లు,  చింతరివ్వ ముద్దులు  మా వ్యక్తిత్వాన్ని , సమస్యకు ఎదురీదే తత్వాన్ని ,  ఆత్మస్థైర్యాన్ని బలపరిచాయే గాని ......బలహీన పరచలేదు నేటితరం బడి లాగా ...అది మా బడి గొప్పతనం.



మేడ  మీద చివరి గదిలో సైన్స్ ప్రయోగశాలలో........ కిటికీ నుండి భయంభయంగా నక్కినక్కి వీక్షించే , వ్రేలాడే తెల్లని అస్తిపంజరం .....వింతవింత గాజు సీసాలు,  రంగురంగుల రసాయనాలు......ఆ చిన్న వయసులో మా లోని  కొత్త వింత అనుభూతుల్ని , అనుభవాలని పరిచయం చేసి చర్చించుకునే లా చేసింది బడి.... మా బడి. 


శిక్షణ   క్రమశిక్షణ,  రక్షణ   పరిరక్షణ,  వర్తన   పరివర్తన,   వర్తమాన  ప్రవర్తనకు దర్శనం.... నిదర్శనం… మా బడి.


లేడి పిల్లలు, జింక పిల్లలు, సీమ పందులు, గిన్నె కోళ్ళు, కొండ ఉడుతలు, తెల్లని నల్లని పావురాలు, పచ్చని చెట్లు, కోయిల కిలకిలలు,  వడ్రంగి పిట్ట అరుపులు , థాన్యాగారం, వానకు తడిసిన మట్టి వాసన , గడ్డి పైన మంచు , చల్లగా వీచే గాలి,  నల్లటి మబ్బులు , తరగతి గదిలో అరుపులు మా బడి జ్ఞాపకాలు….మా శక్తికి దోహదాలు.


బడి లోని కరుణామయుడు అక్కున చేర్చుకుని జ్ఞానదాతై వందల వేల మందికి వెలుగునిచ్చాడు. ఏది మరువగలం.... ఎలా మరువగలం…. ఎందుకు మరువగలం .....మాబడి తో పాటు  మా శరీరం ఇంకా ఉంది కదా.



పరిపక్వత లేని, తేటతెల్లని,  మరక లేని మనసులతో నాటి బాల్యమెంత స్వచ్ఛత .... అందుకేనేమో ఈ ఆనందం ..... పరిపూర్ణానందం.

గురువే దైవం..... గురువే జ్ఞానం.....గురువే మార్గం.....అన్న మాబడి గురువు లే  మాకు నాటికి నేటికి ఎప్పటికీ ఆదర్శం.


ప్రధానోపాధ్యాయులు : గౌ.శ్రీ.ఇన్నయ్య ఫాదర్ గారు, గౌ.శ్రీ.జోజిబాబు ఫాదర్ గారు.

కీ.శే. గౌ. శ్రీ బుచ్చి మాస్టారు , (ఎలిమెంటరీ స్కూల్ ప్రధానోపాధ్యాయులు ) మరియు గౌ. శ్రీ గాబ్రియల్ మాస్టారు( ఎలిమెంటరీ స్కూలు ప్రధానోపాధ్యాయులు)


ఉపాధ్యాయులు:  కీ.శే. శ్రీ రమణ మూర్తి గారు,    కీ.శే.శ్రీ జోజి బాబు గారు,   కీ.శే. శ్రీ గురునాథం గారు,   కీ.శే.శ్రీ రాజారావు గారు ,   కీ.శే.శ్రీమతి గౌరి దేవి గారు, కీ.శే.శ్రీమతి అనురాధ గారు,   కీ.శే.శ్రీ అంతోని గారు ( క్రాఫ్ట్ మాష్టారు),  కీ.శే.శ్రీ పెద్ద తెలుగు మాస్టారు ,  కీ.శే.శ్రీ పెద్ద ఫ్రాన్సిస్ మాస్టారు ,   మరియు   గౌరవనీయులైన శ్రీ అప్పారావు గారు, శ్రీ పాపారావు గారు, శ్రీ శంకర రావు గారు , శ్రీ నూకరాజు గారు , శ్రీ ప్రభాకర్ రావు గారు , శ్రీ సుందర్ రెడ్డి గారు,  శ్రీ చిన్న ఫ్రాన్సిస్  మాష్టారు, శ్రీ ఆనందరావు మాస్టారు గారు.

చిరస్మరణీయులైన మన గురువులంతా ఆయురారోగ్యాలతో సుఖ సంతోషాలతో ఉండాలని ఆ భగవంతుని ప్రార్ధిస్తూ ......



యడ్ల శ్రీనివాసరావు
ఎస్.ఎస్.సి. 1988,   రోల్.నెం.92,  బి.
(సెయింట్ థెరిస్సా రోమన్ కేథలిక్ మిషినరి హై స్కూల్,   పెదబొడ్డేపల్లి, నర్సీపట్నం, విశాఖ జిల్లా)

Tuesday, July 7, 2020

15. వర్షమా.....ఓ వర్షమా

వర్షమా...... ఓ వర్షమా


వర్షమా!.... ఓ వర్షమా!.... నీ పలకరింపే మా మదిలో  హర్షమా.


వర్షమా!  కారు మబ్బుల కన్నీరు వై .... మా కన్నీరు  తుడుస్తావు.


అలసి  సొలసి  విసిగిన  భానుడి తాపానికి ....సేద తీరే  తల్లి ఒడి వలె  చల్లని  వెచ్చని కమ్మని  హృదయానందాన్నిస్తావు.


వర్షమా! నీ రాకతో పసిపిల్లల కేరింతలు  , కాగితం పడవలు,   గుంతలలో గెంతులు .....రమణీయం ...ఆహా! ఎంత ఆనంద స్మరణీయం.


మోడు వారిన చెట్లకు నీ స్పందనతో ....హరిత శృంగార సింగారమే.


బీడు వారిన పంటలకు నీ నవ్వుతో .....పంచామృతమే .


వర్షమా !  నీ రాకకై పుష్పాలు వేచి చూస్తాయి మధువు నివ్వడానికి ......తేనెటీగలు సిద్ధమవుతాయి మధువును గ్రోలడానికి.


నీ పలకరింపుతో తుమ్మెదలు పులకరించి ఇంద్రధనస్సులా  వర్ణాలు  మారుస్తాయి….   ఆనందం..... ఎంత నయనానందం. 


వర్షమా!  నిన్ను తాకిన  మట్టి  ముద్దై  ముద్దు అయి ..అంతవరకు కానరాని సువాసన వెదజల్లుతుంది…….ఆహా!   పువ్వులే కాదు మన్ను కూడా పారిజాతమే కదా!  ఏమి చిత్రం .....ఎంత విచిత్రం.


వర్షమా!  నీతో కలసి   మెలసి   తడిసి  అడుగేసిన మాకు ఎటుచూసినా చక్కిలిగిలి  సంతోషమే.


వర్షమా!  నీ రాకతో సమస్త ప్రాణికోటి చల్లబడినా....మా లోని ఉష్ణ స్పర్శని తెలియ చేస్తావు.  అద్భుతం  ఆహా! ఎంత అద్భుతం.


వర్షమా!  నీ తొలకరి జల్లు కి  ప్రకృతి నాట్యమాడుతుంది..... మయూరి నాట్యం చేస్తుంది.


వర్షమా!  నీవు ఆగ్రహిస్తే నీ కన్నీరు మున్నీరై,  ఏరులై వరదలైన   నిన్ను మేము శాంతింప గలమా!  ఆ శక్తి మాకు లేదు.


వర్షమా!  నీలారవిందమైన నీలి ఆకాశం లో .నీ..ఇంద్రధనస్సు ....మా లోని పులకరింతకు ....నిన్ను పలకరింతకు .....ప్రకృతి సాక్ష్యం .


వర్షమా ! మాయలో  పడి నీటి బిందువుగనే చూస్తున్నాం . కానీ మానవాళి మనుగడకు ఎంతో మేలు చేస్తున్నావు.  అవును!  ఎంతైనా నువు ప్రకృతివి కదా.

 
యడ్ల శ్రీనివాసరావు.

Tuesday, June 23, 2020

14. ఓం నమఃశివాయ శివాయ నమః ఓం

ఓం నమఃశివాయ…శివాయ నమః ఓం

ఈశ్వరా   ప్రాణేశ్వరా    దివిజ గంగాధరా

పంచభూత సమ్మిళిత రూపా

  సమస్త జీవ ఆత్మాశ్రయా

మాయను మాపే మాయావి

   జ్ఞానం నింపే సద్గురువా

శ్మశానమే ఆవాస మంటావు

   భస్మమే జీవం అంటావు.


ఈశ్వరా   ఓంకార రూపేశ్వరా

త్రిలోకం  త్రిగుణం   త్రినేత్రాధి నేతనంటావు

  త్రిశూలంతో రక్షణ నిస్తావు

ధ్యానమే ధ్యాసంటావు

  ధ్యానంలో  దర్శనమిస్తావు



ధ్యానేంద్రా    ఓ యోగీంద్రా

కంఠ గరళంతో  కరుణిస్తావు

  సిగ చంద్రుడితో శాంతి నిస్తావు


నీలకంఠేశ్వరా   ఓ అర్ధ నారీశ్వరా

నీ కంటి భాష్పాలే 

  అక్షతలయ్యాయి  రుద్రాక్షలయ్యాయి


ఈశ్వరా   ఓ రుద్రేశ్వరా

ఢం ఢం ఢం ఢమరుకమే  

  శక్తి నాదమంటావు 

  లయ తప్పని శృతికి   నటరాజువి.


ఈశ్వరా   ఓ చిదంబరేశ్వరా

శరణు  కోరిన జీవికి      బోళాశంకరుడివి

   శరణు  తప్పిన పాపికి   సంకట హరుడివి


ఓ శంకరా  బోళా శంకరా

ఆడుకుంటావు మాతో  

  ఆటాడుకుంటావు మాతో

 మా తత్వము నెరుగు శక్తి  లేని వారము

  నీ తత్వము నెట్లు తెలుసుకోగలమయ్యా.

ఈశ్వరా   ఓ జ్ఞానేశ్వరా

తెరిపించ వయ్యా మా మనోనేత్రం 

   మరిపించ వయ్యా మా మూర్ఖత్వం




యడ్ల శ్రీనివాసరావు. 2021 June














Wednesday, June 17, 2020

13. ఓ మనిషి.... జీవితం…… ఏది శాశ్వతం

ఓ మనిషి.... జీవితం…… ఏది శాశ్వతం


రాసిన రాతలు రాయయ్యేనా
చేసిన చేతలు చేదయ్యేనా
మాటాడిన మాటలు మౌనమా యేనా
నడచిన నడతే నలుసయ్యేనా
గెలిచిన గెలుపే గేళి య్యేనా
కలసిన కలయిక కాటేసే నా
ఈసడించిన ఈర్ష్య ఈల యేసేనా
దేహించిన దేహం దేభ్యమయ్యేనా
అందించిన అండే అణగతోక్కే నా
అలవిగాని అసూయ ఆరాధన య్యేనా
హేళన తో హోళీ చేస్తే హంకారమే (అహంకారం)
ద్వేషంతో దండిస్తే దారిద్ర్యమే
కాంతిని కాయలనే కన్ను కనుమరుగే
పైన చేయ్యేస్తే పైవాడై అయిపోలేం
ప్రతీకారానికి ప్రతి రూపమా నీ ప్రతిభ
ఏం వజ్రం చీకట్లో మెరవదనుకున్నావా
వజ్ర కాంతి కి చీకటి వెలుతురు సమానమే
చేసిన చేతలు మనసు చెపుతున్నా ... అర్థం కానట్టు నటించాలా......లేకపోతే జీవితానికి మనుగడ కష్టమా. ఎందుకు  ఈ దుస్థితి.

ఏ ఎండకు ఆ గొడుగేనా జీవితం.

పతనానికి ప్రయాణమైన  జీవితానికి జాలి తప్ప ... ఏమి చేయగలము.

మనం చేసే ప్రతి కర్మని పంచభూతాల తో సహా వందల కళ్లు గమనిస్తూ నే ఉన్నాయి. ఎందుకంటే ఆ కళ్లన్నీ  గుడ్డివి కావు……కొన్ని కళ్ల లాగ….

మాయ మంచిదే… భాధకు మగతనిస్తుంది.  ఎక్కువైతే  నిజం కాన రాక జీవశ్చవం అయిపోతాం.


యడ్ల శ్రీనివాసరావు  June 2022

12. నవరసాల నవరత్నాల గోదావరి

నవరసాల నవరత్నాల గోదావరి
( నవరత్నాలు…నవరసాలు కలిపి గోదారమ్మ కి ఆపాదించి చేసిన చిన్న ప్రయత్నం ఈ పాట.)



గోదారమ్మ గోదారి
  ఒంపుసొంపుల గోదారి 
  నవరత్నాల గోదారి 
  నవరసాల గోదారి

ముత్యమంత   శాంతి  నీదమ్మా 
  వెన్నెలారేసిన   బింబాని వమ్మా
  చంద్రబింబాన్ని  వమ్మా.


గోదారమ్మ గోదారి 
  ఒంపుసొంపుల గోదారి

నీలమంత నీలి నీలాంబరమ్మా 
  లావణ్య మంత చిలిపి శ్రృంగారి వమ్మా.


గోదారమ్మా గోదారి 
  నవరత్నాల గోదారి

రాగమంత  పుష్యరాగానీ  వమ్మా
  అద్భుతమైన రూప రూపాని వమ్మా.


గోదారమ్మా గోదారి 
  నవరసాల గోదారి

పచ్చ పచ్చాని ప్రాణదాత వమ్మా
  జీవనాడి నిచ్చే కరుణ దాయని వమ్మా


గోదారమ్మ గోదారి 
  ఒంపుసొంపుల గోదారి.

వజ్రమంటి  వీరనారి వమ్మా
  వినుల వీక్షణకు నీకు సాటిలేరమ్మా


గోదారమ్మా గోదారి 
  నవరత్నాల గోదారి

వైడూర్యమంటి వయ్యారివమ్మా
  హాస్యానికే  గలగల లిస్తావమ్మా


గోదారమ్మా గోదారి 
  నవరసాల గోదారి

(కెంపు) మాణిక్యానికే  మకరందాని వమ్మా
   రౌద్రానికే నువు రారాణి వమ్మా


గోదారమ్మ గోదారి 
  ఒంపుసొంపుల గోదారి

పగడానికే నువ్వు పట్టమహిషి వమ్మా
  ఎంత బీభత్సమైనా
  నీ ముందు  భీతిల్లాలమ్మా


గోదారమ్మా గోదారి 
  నవరత్నాల గోదారి

గోమేథమంటి గోమాత వమ్మా
  భయమెంతున్నా బంధమైయ్యేవు
  నువు మా బంధువయ్యావు


గోదారమ్మ గోదారి 
  ఒంపు సొంపుల వయ్యారి 
  గల గల పారే గోదారి
  ఇసుక తిన్నెల గోదారి



యడ్ల శ్రీనివాసరావు.  2020  May











Monday, June 1, 2020

11. తొలి విఫల మలి సఫల ప్రేమికుడు

తొలి విఫల... మలి సఫల...భగ్న ప్రేమికుడు

(మూలం: యౌవనం లో ప్రేమించిన అమ్మాయి తో తన పెళ్లి జరగక విఫలమై,.  ఇష్టం లేకపోయినా తప్పక మరొకరిని పెళ్ళి చేసుకుని.  వేదన  తనలో తాను అనుభవిస్తు తన ప్రేమను మనసులో సఫలం చేసుకొంటున్న భగ్న ప్రేమికుడు.)



పిలిచితివో......వలచితివో.......మైమరపించితివో   ప్రేయసి.


సంతోషం అంటే నవ్వే అని తెలుసు..... నీ పరిచయం తో అది నువ్వే అని తెలిసింది.

కట్టేసిన కట్టుబాట్లతో కట్టెగా ఉన్న నాలో ప్రేమా ....ఏమి ఈ చలనం ...ఎందుకీ సంచలనం.

అమ్మ తో ఉన్న పసితనాన్ని ఆస్వాదించలేదు...... కానీ నీతో ఉన్న క్షణాల నుండి నేనింకా పసితనం లోనే ఉన్నాను.

పసి పిల్లాడికి రెండే తెలుసు... ఏడవడం, నవ్వడం.... కానీ అది ఎందుకో  కారణం వాడికి తెలియదు...... ప్రస్తుతం నా స్థితి లాగ.

జీవితం అంటే ఆట....  ఆ ఆటలో ఎందరినో గెలిపిస్తున్న ఛాంపియన్ని.....కానీ నిను పొందలేక ఓడిన ఆటగాడిని.


జీవితం అంటే నటన..... ఎందరినో మెప్పిస్తున్న మహానటుణ్ని......కానీ నిన్ను పొందలేక విఫలమైన నటుడిని.

మనసంటే ఒక్కటే......జీవితం అంటే ఒక్కటే...అంటారు..... మరి  నాకెందుకో అవి రెండేసి గా కనిపిస్తున్నాయి .


తనువుకు  కట్టుబాట్లేమో గానీ...... మనసుకు కాదు కదా.


మాటలు మాట్లాడలేను గానీ........మదిలో నాదైన జీవితం నీతో పంచుకోలేనా.


నా ఈ ఆలోచన నేరమా...... నాకు నేను వేసుకున్న శిక్ష లో ఆనందించడం కూడా నేరమేనా.


నా సంతోషం నువ్వని తెలుసు.......కానీ నా బాధకి కారణం నువ్వని చెప్పలేక కూడాపోతున్నా .


వదులుకున్నాను...... వదిలేసుకున్నాను...... నిను పొందే భాగ్యం లేక నీతో నన్ను నేనే వదిలేసుకున్నాను.


నీ వలపుల.... మలుపుల....తలపులు.... పౌర్ణమి వెన్నెలని.... అమావాస్య  నిశని మిగిల్చాయి.

కుటుంబం, వ్రృత్తి, సమాజం పట్ల భాథ్యతను విస్మరించలేదు….. కానీ నా పట్ల నా భాథ్యతను, సంతోషాన్ని గుర్తించలేని అంధుణ్ని.


ఒక్కటి మాత్రం నిజం..... నను నమ్ముకున్న కుటుంబానికి నేను హీరోని.....కానీ నాకు నేను జీరోని .


పరిపక్వత లేని వయసు లో నిను ప్రేమించాను…. కానీ నీ ప్రేమతో నే పరిపక్వత పొందాను.

నీ ప్రేమ తోనే తెలిసింది…. శరీరం వేరు,  మనసు వేరని……అందుకేనేమో శరీరం వద్దన్నా…. మనసు నిను కావాలంటుంది.


ఈ శరీరం ఎక్కడ విహరించినా…. మనసు మాత్రం వదిలిన చోటే పదిలంగా ఉంది.

ఎవరికి సాధ్యం........నా మనసుని  నిలువరించడం ఎలా సాధ్యం .


ఎంతకాలమైనా..... ఎంత మందితో ఉన్నా..... ఎన్ని రోజులు బ్రతికినా..... నీ జ్ఞాపకాలే నా ఊపిరి.


ఈ ఆరు పదుల వయసు దాటినా నిను చూడాలని, మాట్లాడాలని ఉంటుంది….నీ తలంపు తో నావయసు రెండు పదులవుతుంది. బహుశా అదే ప్రేమకున్న బలమేమో.

సంతోషము దుఃఖము రెండూ సమానమే,పాలలో నీళ్ళలా గా కలిసి ఉంటాయనే  జీవిత సత్యాన్ని తెలియజేసిన నీ నా ప్రేమ ఎప్పటికీ సఫలమే....

నేను కట్టుబాట్లకు కట్టుబడి...... కట్టబడి...... కట్టెగా ఉన్నాను…చివరికి కట్టెల మీద  కడ చేరేలోపు…  కడసారైన నిను భౌతికంగా చూడగలనో…లేదో…


      
యడ్ల శ్రీనివాసరావు




Sunday, May 24, 2020

10. బిచ్చగాడు

బిచ్చగాడు

అమ్మా దానం
  అయ్యా  ధర్మం 
  రెండు దినాలు అయింది తిని
  జీవం లేని కంఠంతో పీలగా.

అందుకు సాక్ష్యం 
  ఈ మెట్లు .... ఆ గుడి గంట.

గుడి కి  వచ్ఛేపోయే వారిని 
  చూస్తే కోటి వెలుగుల కాంతి.

భగవంతుని ముందు భక్తులు
  భక్తుల ముందు మేము.

మూతపడే మా కళ్ళకు
  మీ చిల్లర శబ్దం ఓ మెరుపు.

గుప్పెడు నాణెల కోసం 
  బరువు మోయలేనంత గుండె భాథ.

ఛీ .. ఛీ ... ఛీత్కారాలే మాకు ఆశీస్సులు
  పో‌ .. పో ... ఈసడింపులే మాకు ఆప్యాయతలు.

అలంకార వి-గ్రహానికి నైవేద్యం
  ఆకలి ని-గ్రహానికి  దారిద్ర్యం.

ఏమిటో ఈ మాయ
  ఏమిటో ఈ వింత.

దేవుని మొక్కే మీకు అను-గ్రహం
  మిమ్మల్ని మొక్కే మాకు ఉత్త-గ్రహం.

గుప్పెడు మెతుకులు కోసం ఆరాటం
  చావలేక బ్రతుకు తో పోరాటం.

ఎంగిలి ఆకుల కోసం పడే అన్వేషణ 
   కొంచెం అయినా తీరక పోతుందా 
   మా ఆకలి నిరీక్షణ.

బిచ్చగాడికి దేవుడు లేడా
  ఉంటే గుడిలోని దేవుడు మాకు కాడా.


భగవంతుడా
  ఎందుకీ శిక్ష … ఎందుకీ కక్ష
  మా పై ఎందుకీ వివక్ష.

అమ్మా దానం
  అయ్యా ధర్మం రెండు దినాలైంది తిని.


యడ్ల శ్రీనివాసరావు  May 2021











Thursday, May 21, 2020

9. కళ్లు

కళ్ళు



• కళ్ళు ... తెలవారిన తొలి కళ్ళు...
• పచ్చని చిగురుటాకుల పలకరింపుల 
  ఆనందానికి ఆనవాళ్లు.

• కళ్ళు ... ప్రార్థించే కళ్ళు...
• దివి నుండి భువికేగిన తేజస్సుతో 
   నిండిన దైవత్వానికి వాకిళ్ళు.

• కళ్ళు ... నిత్యకృత్యమైన కళ్ళు...
• సమయంతో పరిగెడుతున్న ఆయాస
  ప్రయాసలకు నెమ్మది నిచ్చే నెమళ్లు.

• కళ్ళు ... ఆకలితో ఉన్న కళ్ళు...
• రుచిని ఆస్వాదించ లేని ఆత్రానికి
  ఆరాటానికి వెక్కిళ్లు.

• కళ్ళు ... జాలి కళ్లు...
• ఆర్ద్రతతో బరువెక్కిన ఇనుప గుళ్లు.

• కళ్ళు ... లాలించే కళ్ళు...
• పాటలతో జో  కొట్టే  సరిగమల సెలయేళ్ళు.

• కళ్ళు ... ప్రేమించే కళ్ళు…
• ప్రకృతి పురుషుల పులకరింత తో 
   మమేకమైన పరవళ్ళు.

• కళ్ళు ... సిగ్గుపడే చిలిపి కళ్ళు…
• ముఖారవిందాన్ని అరచేతుల 
  మాటున చిన్నగా చూసే లోగిళ్ళు.

• కళ్ళు ... భయపడే కళ్ళు…
• తడపడే గుండెలయకు చిక్కులు పడిన ముళ్ళు.

• కళ్ళు ... బాధించే కళ్ళు...
• జర జర రాలే నీటి చారికలకు పందిళ్లు‌.

• కళ్ళు ... తేజోవంతమైన కళ్లు...
• నిశి రాత్రుళ్లు కు వెన్నెల నిచ్చే చంద్రుళ్లు.

• కళ్ళు ... మత్తెక్కించే కళ్ళు ...
• నిషా కెరటాలలో ఊయల ఊగే నల్లని ద్రాక్షపళ్ళు.

• కళ్ళు ... ఆనందించే కళ్ళు...
• గలగలలాడే పెదవులకు చక్కిలిగిళ్లు.

• కళ్ళు ... ఆశ్చర్యం మైన కళ్ళు...
• వింతగా విప్పారిన పులకింతకు గొబ్బిళ్ళు.

• కళ్ళు ... ఓరచూపు కళ్లు...
• తహ తహ లాడే తనువుకి తియ్యని
   పుల్లని  కమ్మని రేగుపళ్లు.

• కళ్ళు ... పరవశమైన కళ్ళు...
• వెన్నెల చొరబడని ప్రియుని బాహువు లో 
   బందీయైన ప్రేయసికి సంకెళ్ళు.

• కళ్ళు ... నిజ స్వరూపమైన కళ్ళు...
• ఈ అనంతమైన సృష్టికి నిదర్శనం 
   నేనే అనే పెరుమాళ్ళు (విష్ణువు).



యడ్ల శ్రీనివాసరావు  20 May 2020



Monday, May 18, 2020

8. పిట్ట కధ..... స్నేహితుల యెుక్క మనోభావాలు

పిట్ట కథ



సుమారు 30 సంవత్సరాల తర్వాత 30 మంది చిన్ననాటి  స్నేహితులు కలిసారు. వీరంతా ఒక పార్కులో రౌండ్ గా ఉన్న ఒక పెద్ద రౌండు బెంచి మీద కూర్చుని నిత్యం మాట్లాడుకునేవారు . రోజుకు కొంతమంది చొప్పున వారి భావాలను చెప్పేవారు. మిగతా వారు విని ఆనందించే వారు. కానీ కొంతమంది ఎప్పుడూ వినడమే తప్ప మాట్లాడే వారు కాదు. అది మితభాషం లేదా సిగ్గు లేదా అందరిలాగా మాట్లాడలేరు అని మిగతా మిత్రులు అర్థం చేసుకునే వారు, సంతోషం గా కాలం గడిచిపోతుంది. 

సుమారు 100 రోజు ల తరువాత అర్థాంతరంగా , రోజుకు ఒకరు చొప్పున నలుగురు మిత్రులు నిష్క్రమించారు.  మిగిలిన  స్నేహితులకి ఆశ్చర్యం,  కారణం కోసం వెతికారు…. ఫలితం శూన్యం….. అందరు బాధ పడ్డారు.   అందరి తో కలిసి మెలసి  కొంత కాలం ఉన్నప్పుడు , వ్యక్తిగత కారణాల వల్ల నిష్క్రమించాలనుకున్నపుడు మిగిలిన స్నేహితులకి తెలియపరచాలి అనే కనీస ధర్మం తెలియని  వారి పరిణితి చూసి  మిగతా వారు భాథపడ్డారు.

ఆ తర్వాత కలిసి ఉన్న మిగతా స్నేహితులు మాత్రం  యధాలాపంగా పార్క్ లో కూర్చుని ఇలా అనుకున్నారు. ” సరే పోనీలే…పాపం…విడిపోయన వాళ్లు కూడా మన స్నేహితులే కదా……ఎక్కడ….ఎలా.....ఏపరిస్థితిలో ఉన్నా సంతోషం గా ఉంటే చాలు. జీవితం లో ఎవరు ఇంకొకరికి  పూర్తిగా అర్థం అవ్వాలనే నియమం ఏమీ లేదు.  కానీ కనీసం ఎవరికి వారిమే కొంతైనా మిగతా వారిని అర్థం చేసుకోవడానికి ప్రయత్నించాలి, చేతనైతే చేయూత ఇవ్వాలి. ……. ఎందుకంటే ప్రతీ ఒక్కరూ ఎవరికి వారే చాలా విలువైన వారు.   ఎప్పుడు,  ఏ వయసులో, ఏ సమయంలో, ఎవరి నుండి ఎటువంటి సహకారం తీసుకోవాల్సిన పరిస్థితి వస్తుందో మనకి తెలియదు.  దీనికి ఎవరూ……అతీతం కాదు. ఎందుకంటే మనం  బ్రతికేసిన కాలం కంటే కూడా బ్రతకాల్సిన  కాలం చాలా తక్కువ. “ అని  మిగతా స్నేహితులు అనుకున్నారు.  ఎందుకంటే మిగతా స్నేహితులకు తెలుసు …వారంతా సంతోషం గా శేష జీవితాన్ని గడపగలరని.


యడ్ల శ్రీనివాసరావు 18 May 2020.








7. అమ్మ...మాత్రృదినోత్సవం

అమ్మ 
(మూలం : అమ్మ- నాడు-నేడు సమాజ తీరు  )



బాధ్యత నెరిగిన కూతురివి కాగలిగావో లేదో.... తెలియదు.

ప్రేమను పంచే సోదరివి కాగలిగావో లేదో.... తెలియదు.

సహనం కలిగిన భార్యవి కాగలిగావో లేదో.... తెలియదు.

ఎందుకు తెలియదు అంటే నిన్ను అర్థం చేసుకోగల వయసు లేక.

పరిపూర్ణత్వం తో  దైవానికి ప్రతిరూపమైన  అమ్మవు అయ్యావు.

అమ్మ...ఓ అమ్మ ...ఈ సృష్టి నే  ప్రతి సృష్టి చేయగల శక్తివి నీవు.

నాన్న ఎవరో చూడక ముందే నిన్ను  అణువణువు తాకాను  గర్భంలో.

నన్ను మోస్తూ నువ్వు ఆనందంగా పడే బాధ కు అర్థం....దైవమని తెలిసింది ఆలస్యంగా.

సంతోషాన్ని ఇచ్చే నీలాంటి కూతురే కావాలనుకున్నాను.

ప్రేమను పంచే నీలాంటి సోదరే  కావాలనుకున్నాను.

ఓర్పుకు ప్రతిరూపమైన నీలాంటి భార్యనే కావాల నుకున్నాను.

ఎన్నో సుగుణాల కలబోత అయిన నువ్వే నాకు అమ్మ గా ఎన్ని జన్మలైనా కావాలనుకుంటున్నాను.

ఇన్ని  సులక్షణాల మిళితమైన  నీ రక్తం నుండి ఉద్భవించిన నేను నీలా కాక....ఎలా ఉండాలి.

నా ఈ జన్మ ఎంత పాపిష్టి ది కాకపోతే....నేను వృద్ధాప్యంలో  నిన్ను విస్మరిస్తాను....నువ్వు నా బాల్యంలో ఇలా చేయలేదు కదమ్మా.

నా ఈ జన్మ ఎంత నికృష్టమైనది కాకపోతే....నేను నీకు గంజి పోయ లేక పోతాను....నువ్వు నా బాల్యంలో ఇలా చేయలేదు కదమ్మా.

ఉన్నతంగా బ్రతకమని....ఉన్నతమైన జన్మనిచ్చావు.

నేను చేసిన కర్మలకు, అకృత్యాలకు ....బ్రతికుండగానే నిన్ను  అంటరానిదానిలా ఉంచడం నా పుట్టుకకు అర్థం ఉందా....ఓ భగవంతుడా....అర్థం ఉంటే చెప్పు.

అందరి అమ్మలకు అంకితం ----కొందరి కొడుకులకు మాత్రం కనువిప్పు.



యడ్ల శ్రీనివాసరావు  8  May 2020


 

Friday, May 15, 2020

6. కళాశాల

కళాశాల
(మూలం:  ఇంటర్మీడియట్ కళాశాలలో తన వద్దకు వచ్చిన ఎంతో మంది యువతీ యువకులను  చూసి కళాశాల తనలో తను అనుకుంటుంది )



ఎన్నో చూసా
  నేను ఎన్నో చూసా
  రంగురంగుల చొక్కాలు
  రంగురంగుల పైజామాలు
  రంగురంగుల పరికిణీీలు.


సిగ్గు తెరల మాటున 
  చిలిపి జంటల హొయలు ఎన్నో చూశా.


నూనూగు మీసాల పలకరింపులు
  చిలక నవ్వుల తొలకరి సిగ్గులు.


ఓరచూపు నీలి కళ్లు
  అదిమిపట్టే పెదవులు.


ఎదురే  లేదన్న  దైర్యం తో  
  గోడలెక్కిన   ఎన్నో  క్రాఫులు (అబ్బాయిలు).
  భయం  మాటున  దాగి  దాగి 
  నడుస్తున్న  ఎన్నో  కొప్పులు (అమ్మాయిలు).


కండ కలిగిన బాహువులు
  కోయిల లాంటి కంఠస్వరాలు  
  ఎన్నో చూసా ... నేను ఎన్నో చూసా.


నాలో (కళాశాల) అడుగు పెట్టగానే
  ఆవిరైన  బాధలు,  
  చిగురు తొడిగిన చిరునవ్వులు.


చెట్టు  చాటు  మాటలు
  గడ్డిపైన   బాటలు
  చేయి  చేయి  స్పర్శలు.


గాలికి   ఊగే  ఝంకాలు
  అలజడి  చేసే  అధరాలు.


బొద్దుగా  ఉండే  చెక్కిళ్ళు
  గోదావరి  పాయ లాంటి  పాపిళ్లు.


వాలు  జడల  వలపు హోయలు
  జడ గంటల గలగలు.


కాలి మువ్వల సవ్వడులు
  నిటారు  నడకలు. 
  రివ్వున  ఎగిరే  పరికిణీలు
  వేయికళ్లకు  ఆనందాలు.


ఊగిసలాడే  మనసులు
  ఊహలో  తేలే  వయసులు
  ఆనందం....ఆనందం 
  ఎటు చూసిన  హద్దే లేని ఆనందం.


ఒకటేమిటి
  ఎన్నో చూసాను
  నేను ఎన్నో చూసాను.


ఆకలి లేని రోజులు
  నిద్రలేని  రాత్రులు 
  తొలి పొద్దు   కోసం  ఎదురుచూపులు.


ఉనికి  చాటుకునేందుకు  ఉపాయాలు
  ఉరకలు  వేసే  ఉత్సాహాలు
  లక్ష్యాల  కోసం   విశ్రాంతి లేని పోరాటాలు


ఒకరి కష్టానికి పదిమంది చేయూత
  పదిమంది సంతోషానికి వందమంది ప్రేరణ


కాలచక్రం తిరిగిపోయింది
  రెండు సంవత్సరాలు

దగ్గరలోనే దూరం 
  దూరం లోనే దగ్గర

భారమైన మనసులు
  మూగబోయిన ఆశలు

ఏకాకిలా వచ్చారు
  జంటలుగా వెళుతున్నారు

కొందరిది  స్నేహం 
  కొందరిది ప్రేమ
  మరి కొందరిది ఏకాంతం

అర్థం కాని అనుభవాల తో  
  వయసు పడే ఆరాటం
  మనసు చేసే పోరాటం.


జీవితం  ఎవరిని   గెలిపిస్తుందో 
  ఎవరిని  ఓడిస్తుందో
  కానీ   ఉండాలి    అందరూ ఆనందంగా .


ఎందుకంటే 
నా (కళాశాల) సాక్ష్యం తోనే 
కలిశారు కదా మీరంతా!


 యడ్ల శ్రీనివాసరావు 16 May 2020








Tuesday, May 5, 2020

5. విద్యార్ధి....ఓ.... విద్యార్ధి


విద్యార్థి…….ఓ……విద్యార్థి
(విద్యార్ధి…జీవితం….. లక్ష్యం)


విద్యార్థి...ఓ విద్యార్థి...విద్యను అర్జించే  ఓ ఆర్థి.

మేలుకో....మేలుకో ఇకనైనా మేలుకో.

చదువంటే పుస్తకాలే కాదు....చదువంటే జీవితం.

జీవితమంటే బ్రతకడమే కాదు....బ్రతికి       చూపించటం.

బ్రతుకంటే సంపాదనే కాదు.....బ్రతుకంటే బాధ్యత.

విద్యార్థి....ఓ విద్యార్ధి.....మేలుకో ఇకనైనా మేలుకో.

బాధ్యతంటే కుటుంబం....కుటుంబం అంటే రక్తసంబంధం….రక్తసంబంధం అంటే నీ రక్తం ఆవిరైయంత వరకూ ఎన్నో జీవుల తో ముడిపడిన బంధం.

బాధ్యత అంటే సమాజం....సమాజం అంటే నీ ఉనికి....ఉనికి అంటే నీ ఆలోచనల ప్రభావం.

విద్యార్థి....ఓ విద్యార్ధి....మేలుకో ఇకనైనా మేలుకో.

బ్రతికి చూడు.....‌బ్రతుకు చూడు.

లక్ష్యం వైపు నీ పయనం లో మొదటి ఓటమి నీ బలం అని తెలుసుకో.

నీ బలం లోని శక్తిని స్పృశించి చూడు.....అది నీకు దాసోహం కాకపోతే చూడు.

దాసోహమైన నీ శక్తి నిన్ను కీర్తి శిఖరాలకు చేర్చినపుడు....నీ కనుపాప లోని భాష్పం ఈ విశ్వానికి ఓ సాక్ష్యం.

విద్యార్థి....ఓ విద్యార్ధి...మేలుకో ఇకనైనా
 మేలుకో.

జవాబులేని గణితం లేదు....పరిష్కారం లేని సమస్య లేదు.

కేంద్ర బిందువు లేని వృత్తం  లేదు.....నీ ఉనికి లేని భూ వృత్తం లేదు.

చాటుకో.....చాటుకో.....చోటు లేని చోట కూడ చాటుకో.....హద్దులే లేని ఆలోచనల ఆకాశంలో  నీ అంశని.


యడ్ల శ్రీనివాసరావు 4 May 2020

Saturday, May 2, 2020

4. ఏది సత్యం...... ఏది అసత్యం



ఏది సత్యం........ ఏది అసత్యం
(మనిషి ఆలోచనా…ధర్మం…ఆచరణ)



మాట్లాడేవా ....ఏరోజైనా మాట్లాడేవా ....మాట్లాడి చూడు ....నీతో నువ్వు మాట్లాడి చూడు ...అద్భుతం జరగకపోతే చూడు

నీ సృష్టికి మూలం కణం ...కణానికి మూలం శక్తి (దైవం)...శక్తి కి మూలం పంచభూతాల సమ్మేళనం (పరమాత్మ)

భౌతిక ధర్మప్రకారం( as per physics/material) ఒక పెద్ద రాయి నుండి చిన్న రాయి వేరుపడితే రెండింటికీ ఒకే లక్షణాలు ,గుణగణాలు (physical/ material properties)ఉంటాయి . అంటే పెద్ద రాయి స్వభావం ఎలా ఉంటుందో చిన్న రాయి  స్వభావం కూడా అంతే. జీవం లేని  రాయి భౌతిక ధర్మాన్ని ఆచరిస్తూ కూడా సృష్టి ధర్మాన్ని అనుసరిస్తుంది . మరి జీవమున్న మనిషి ఆచరిస్తున్నాడా.......

అలాగే పంచభూతాల మిళితమైన పరమాత్మ యొక్క మూలకణం లోంచి వచ్చిన నీ ఆత్మ ...మాయ .... మిథ్యలో...పడి పంచభూతాలను విస్మరిస్తే ... దుఃఖం, క్షోభ కాక ఇంకేముంటుంది ఈ జీవాత్మ కి .  సృష్టి ధర్మాన్ని మరచి భౌతిక ధర్మాన్ని ఆచరిస్తే మోక్షం సాధ్యం ఎలా.

తెలుసుకో... ఇకనైనా తెలుసుకో... నీ గురించి తెలుసుకో ...ఏది సత్యం... ఏది అసత్యమో  తెలుసుకో.     భౌతిక సాధనాల సుఖం ఏ రోజుకైనా నశించేదే నీ శరీరం లాగా ..........ఆంతరంగిక సాధనల సుఖం శాశ్వతం నీ ఆత్మ లాగా .

జీవంలేని మట్టి కాలే కొద్దీ దృఢంగా గట్టిపడి ఇటుక అవుతుంది...........జీవంతో ఉన్న నువ్వు బాధలతో, దుఖంతో కాలే కొద్దీ ఇంకేంత గట్టిపడాలో ఆలోచించు...

పరమాత్మ లో ఉండాల్సిన నీ ఆత్మ... భౌతిక ప్రపంచం లోకి వచ్చిందంటే కారణం ఏమిటో తెలుసుకో ........ఏ కారణం లేకుండా నువ్వు  ఏ చర్య (కర్మ, పని)చెయ్యవు. అలాగే ఏ కారణమూ లేకుండా నువ్వు జన్మించవు . ఏ కారణం కోసం నువ్వు జన్మించావో ఆలోచించు, అది నిర్వర్తించు .

ఒంటరితనం నీకు ఎప్పుడూ శాపం కాదు .....ఒంటరితనమే నిన్ను ఈ విశ్వానికి చక్రవర్తిని చేస్తుంది .....ఒక్కసారి ఆలోచించి చూడు ...అందుకు చెయ్యాల్సింది నీతో నువ్వు అంతర్ముఖ ప్రయాణం .

నీ ఏకాంతానికి  నువ్వు రారాజు అయినా కూడా  నీ సామ్రాజ్యానికి పదిమంది శ్రేయోభిలాషులు అవసరం అని తెలుసుకో.

నీ చుట్టూ ఉన్న వారు నీకు అర్థం కావడం లేదు.......లేదా ..... నీ చుట్టూ ఉన్న  వారు నిన్నుఅర్థం చేసుకోవడం లేదు అని క్షోభించే బదులు .....నీకు నువ్వు అర్థం అవుతున్నావా  లేదా అనేది  ఆలోచించి  చూడు..

వైరాగ్యం అంటే సర్వం త్యజించడం ,  బాధ్యతల నుండి తప్పుకోవడం కాదు.  వైరాగ్యం అంటే సత్యం , నిజం.

జ్ఞాన వైరాగ్యం అంటే భౌతిక ఆధ్యాత్మిక బాధ్యతలను ఏ మార్గంలో నిర్వర్తించాలో తెలుసుకోవటం.

బంధించకు...  బాధించకు...  ఎవరిని... దేనిని. ఎందుకంటే నీ నుండి నువ్వు తప్పించుకు తిరగలేవు. నీ ఆలోచనే  నీకు శిక్ష కాగలదు .

రెండు నేత్రాలతో చూసిన నీకు ఈ భౌతికమే కనిపించును. పరమాత్మ యొక్క మూల కణ రూపమైన  నీవు…..నీలో ఉన్న మూడో నేత్రం (భృకుటి మధ్య పినియల్ గ్రంథికి అనుసంధానమై ఉంటుంది. విశ్వంలోని సమస్త శక్తి పినియల్ లో నిక్షిప్తమై ఉంటుంది) తోచూడు ఈ విశ్వంలో జరిగే ప్రతిదీ నీకు స్పష్టంగా కనిపిస్తుంది .

భయాన్ని వీడు ....ధైర్యం తో స్నేహం చెయ్ . ధర్మం కోసం నిలబడు .అది నిన్ను ఎంత ఎత్తులో నిలబెడుతుందో చూడడానికి నీ పాదాలు కూడా నీకు  కనపడవు .


   
 యడ్ల శ్రీనివాసరావు  3 May 2020

481. పరిమళ భాష

  పరిమళ భాష • ఏమిటో     ఈ  భాష   ఎద కే    తెలియని   ఆశ.   అనుభవం  లేని   యాస   సృష్టి   మూలానికి    శ్వాస. • అక్షరాలు   ఉండవు  కానీ   భావం ...