781. రాజయోగ ఫలాలు - 4

 

🌸 వైరాగ్యం అంటే అందరికీ దూరం కావడం కాదు . . . 

అది  అంతర్గత స్వేచ్ఛ. 🌸

నేను ఇతరుల ఆలోచనలను వారు చేసే చర్యలను నియంత్రించలేను , కానీ వాటికి నేను ఎలా స్పందించాలో ఎంచుకోగలను . ప్రతి ఒక్కరినీ స్వచ్ఛమైన హృదయంతో ప్రేమిస్తాను , అయితే ఆత్మస్మృతిలో  స్థిరంగా ఉంటాను . 

ఇతరుల ప్రవర్తన  ఇకపై  నా ఆలోచనలను నియంత్రించనప్పుడు  , శాంతి నా సహజ స్వభావంగా  మారుతుంది.

🌹🌹🌹🌹🌹

జీవితంలో తుఫానులు (ఇబ్బందులు , కష్టాలు , అవమానాలు , నిందలు ) రావడం సహజం. కానీ వాటి  తాలూకు బాధను  మనసులో స్థిరపడనివ్వడం  తప్పనిసరి  కాదు.

గొప్ప సిద్ధత (సాధించడం)  అంటే  మన పరిస్థితులను  బలపరచడం  కాదు . మన చైతన్యాన్ని శక్తివంతం చేసుకోవడం . ప్రతిరోజూ మన స్వీయ గౌరవం తో ,  శివుని స్మృతి తో  మన మనసును శాంతితో నింపుకుందాం . 

శాంతియుతమైన మనస్సు  సవాళ్లు (ఛాలెంజెస్) రాకుండా  ఆపలేదు , కానీ వాటిని మన అంతరంగంలో  స్థిరపడనివ్వదు . 

ఆత్మ ఇప్పటికే శాంతితో నిండిపోయి ఉంటే, తుఫానులు  దానిని  కదిలించే శక్తిని కోల్పోతాయి. తుఫానులు  మన జీవితంలోకి వచ్చి వెళ్లవచ్చు, కానీ మన మనసులో శాశ్వత నివాసం ఏర్పరచుకోలేవు .

ముందుగా  మన  అంతరంగిక   ప్రపంచాన్ని రక్షించు కుందాము . అప్పుడు బయట ఉన్న ప్రతిదాన్ని ఎదుర్కోవడం మరింత సులభమవుతుంది.

🌹🌹🌹🌹🌹

ప్రతి పరివర్తనకు (మార్పు) ఆరంభం ఒక పవిత్రమైన ఆలోచన  సంకల్పంతోనే  జరుగుతుంది.

ధైర్యం యొక్క ఒక అడుగు అంటే . . . 

*సౌకర్యాన్ని కాదు , సత్యాన్ని ఎంచుకోవడం.

 *క్రోధాన్ని కాదు ,   శాంతిని ఎంచుకోవడం .

 *అహంకారాన్ని కాదు , క్షమను  ఎంచుకోవడం.

 *ఆకర్షణను కాదు , పవిత్రతను ఎంచుకోవడం . 

  *భయాన్ని కాదు   పరమాత్మ  స్మృతిని ఎంచుకోవడం . 

అంతే . . . ఆ ఒక్క అడుగు మనది. మిగిలినదంతా పరమాత్మదే .

మన సంకల్పం సత్యమైనదిగా , పవిత్రమైనదిగా ఉన్నప్పుడు  , పరమాత్మ . . .  

మౌనంలో మనసుకు శక్తిని ,  బుద్ధికి  స్పష్టతను , హృదయానికి  ధైర్యాన్ని , జీవితానికి సరైన దిశను ఇవ్వడం ప్రారంభిస్తారు. అసాధ్యంగా అనిపించినదే  క్రమంగా సులభంగా మారడం ప్రారంభమవుతుంది.

ఈ రోజు పరమాత్మ వైపు ఒక సత్యమైన అడుగు వేయండి. అప్పుడు చూడండి, వారి వేలాది అడుగుల సహాయం మీ జీవితాన్ని ఎలా మార్చివేస్తుందో !

🌹🌹🌹🌹🌹

నిజమైన స్వ గౌరవం (స్వమానం) అనేది ఇతరుల ప్రశంసలు, ఆమోదం , మన వేషధారణ లేదా తాత్కాలిక అభిప్రాయాల మేళవింపు పై ఆధారపడి ఏర్పడదు.

నిజమైన  ఆత్మ విలువ   మనం  ఈ భౌతిక ప్రపంచంలో  నిత్యం పోషించే  జీవిత పాత్రల నుండి అతీతంగా అయి . . .  స్వచ్ఛమైన , ప్రశాంతమైన ఆత్మగా,  దివ్య కాంతి   యొక్క  ఒక కిరణంగా  మన శాశ్వతమైన  స్వరూపాన్ని  మేల్కొలిపినప్పుడు  ప్రారంభమవుతుంది.

అపరిశుభ్రమైన కొలను నీటిలో ఉన్నప్పటికీ  హంస ఎలా పరిశుభ్రంగా , ప్రశాంతంగా ఉంటుందో  . . . అలాగే ఈ కలుషిత భౌతిక మాయా ప్రపంచంలో ఉంటూనే . . .  సత్యాన్ని అసత్యం నుండి వేరు చేస్తూ , మనం శాశ్వత ఆధ్యాత్మిక స్వరూపంతో శివ పరమాత్మ తో అనుసంధానమై ఉండటం వలన  మనలో ఎవరూ కదిలించలేని  అంతర్గత శాంతి  సుస్థిరపడుతుంది . 

🌹🌹🌹🌹🌹

ఉపాధ్యాయ దినోత్సవం సందర్భంగా విద్యాబుద్దులు నేర్పించిన నా ఉపాధ్యాయులకు మరియు  విద్యాబోధన చేసే ఉపాధ్యాయులు అందరికీ నా నమస్కారములు 🙏 

ఓం శాంతి 

ఓం నమఃశివాయ 

బ్రహ్మ కుమారీస్ డెస్క్ 

యడ్ల శ్రీనివాసరావు. 5 Sep 2026  9:00 AM.