708. మనిషి మోసపోయాడా ?

 

మనిషి మోసపోయాడా ?

• అవును . . . మనిషి ఈ కలి కాలం ఆది నుంచి 

  మోస పోయాడా ?

  మోసపోతూ  ఉన్నాడా ?  . . .

 ఈ విషయం  మనం ఎప్పుడైనా ఆలోచించామా ?

 ఇది గ్రహించలేక   అమాయకత్వం తో ఉన్నామా ?

• మన అందరికీ తెలిసిన విషయం , మనిషి ఇతరులను మోసం చెయ్యగలడు . ఒక మనిషి , ఇతరులను  మోసం  చేస్తేనే , ఆ మోసం బయటపడితేనే   మోసగాడు గా   ఈ లోకం లో అందరూ అభివర్ణిస్తారు . ఒకవేళ ఆ మోసం గురించి అందరికీ అంతర్గతం గా  తెలిసినా కూడా  అది బహిర్గతం  కాకపోతే  ఆ మనిషి ని  దొర లాగే కొనియాడుతారు . ఇది ఎంతవరకు నిజం ? . . . ఆలోచించండి ?.

అసలు, ఒక మనిషి ఇతరులను మోసం చేయకుంటే తాను గొప్ప వాడు అయిపోతాడా ? 

తాను  మంచివాడి గా   కీర్తించ బడతాడా ? 

తాను   మంచి మనిషిగా  రూపు దిద్ధికున్నట్లేనా ?

వీటిన్నిటికి సమాధానం స్పష్టత మనలో ఉందా? . .

• అసలు  మోసం అంటే ఏమిటి ?

 నయవంచన, ద్రోహం, అబద్ధాలు చెప్పడం , నిజాన్ని వక్రీకరించడం ఇలా అనేక విధాలుగా చేసే కర్మ ని మోసం  అని  అంటాం , వింటాం  .

• కానీ , మోసం  అంటే ఒక నిజాయితీ కలిగిన ఆలోచనని , సత్యత కలిగిన విషయాన్ని  మభ్య పెట్టడం లో ఆరితేరిన  మాయతో  కూడిన చర్య ,  ప్రక్రియే  మోసం .

• సహజ సిద్ధంగా  ప్రతి మనిషి కి  మానవ ధర్మం అనేది  ఒకటి ఉంటుంది. దాని  ప్రకారం మనిషి కి  తన  విజ్ణత తో  నిజాయితీ అనేది తెలుస్తుంది . ఈ నిజాయితీ ని  మనిషి  తనలోని మాయతో  మభ్య పెట్టడం ద్వారా  చేసే చర్య (కర్మ) యే  మోసం . 

అనగా ఇది ఒక మనిషి మనసు లో నుంచి ఆరంభం అయినపుడు , ఇతరులను మోసం చేయడం అనే దాని కంటే కూడా, ముందుగా మనిషి తనను తాను మోసం చేసుకుంటాడు అనేది వాస్తవం . అనగా తనలో  ఉన్న నిజాయితీ ని   తానే  మభ్య పెట్టుకుంటాడు. ఇది మనిషి అంతరంగం లో అనాదిగా  పెరుగుతూనే  ఉంది అనేది యధార్థం. 

అందుకే మనిషి అనేక సార్లు తాను  ఆలోచించేది ఒకటి . . . మాట్లాడేది మరొకటి . . . చేసేది ఇంకొకటి గా ఉంటుంది. ఈ మూడింటి కి సమన్వయం వంద శాతం ఎప్పుడూ ఉండదు . దీనినే మనిషి తనను తాను  మోసం  చేసుకోవడం గా  పేర్కొనవచ్చు.

• మనిషి , మానవ ధర్మం ద్వారా ఆచరించడానికి , ఉద్భవించిన  తన ఆలోచనల లోని  సత్యతను , నిజాయితీని తానే వక్రీకరించుకుంటూ , తనకు అనుగుణంగా ఉండే విధంగా మార్పులు చేసుకుంటూ , అనుకూల మైన  విధంగా కార్యాచరణ చేస్తూ ఉంటాడు . అవునన్నా కాదన్నా ఇది నిజం. ఇందులోనే తనను తాను మోసం చేసుకునే ప్రక్రియ ఇమిడి ఉంది. మనిషి ఎన్నో జన్మలు గా దీనికి అలవాటు పడిపోయాడు. అందుకే మనిషి యొక్క స్పృహ  ఈ విషయం  నేడు గుర్తించ లేకపోతుంది . ఇతరుల పట్ల  జరిగే మోసాలను  చక్కగా గుర్తిస్తాడు  మనిషి ,  కానీ స్వయం  తన పట్ల తాను చేసుకుంటున్న మోసాన్ని  గ్రహించలేక పోతున్నాడు అనేది వాస్తవం.

• ప్రతీ మనిషి తనకు తోచిన విధంగా తాను జీవిస్తాను అని నిర్ణయించు కోవడం లోనే, తనను తాను మోసం చేసుకుంటున్నాను అనే విషయం గ్రహించ లేకనే మోసం చేసుకుంటున్నాడు.

• మనిషి ఇతరులను మోసం చేయడం అనే దాని కంటే ముందు గానే తనను తాను మోసం చేసుకోవడం లో  సిద్ధహస్తుడు  అయినాడు . ఎందుకంటే తనను తాను మోసం చేసుకో గలిగిన వాడే ఇతరులను సమర్థవంతంగా మోసం చేయగలడు.

ఈ అలవాటు అనేక జన్మలు గా అలవాటు పడి పోయి ఉండడం వలన నేడు మనిషి శక్తి హీనుడై తన లోని  మనసా శక్తి  మరియు వాచా శక్తిని పూర్తిగా కోల్పోయాడు. ఈ వాచా శక్తి నే వాక్ సిద్ది అంటారు. మనసా శక్తి ని  మనో శక్తి, సంకల్పాల శక్తి అంటారు .  అందుకే మనిషి చేసే కర్మలు కూడా వికర్మలు గా అయిపోయాయి . . . మనం ఈ అంశాన్ని స్పష్టంగా గమనిస్తే ,  నేటి కాలంలో ఏదైనా భగవంతుని పూజ గాని, వ్రతం గాని చేసేటప్పుడు మనసా వాచా కర్మణా త్రికరణ శుద్ధి తో ఉంటాను అని అంటూ ఉండడం గమనార్హం.

• కొన్ని యగాల క్రితం అనగా త్రేతా, ద్వాపర యుగాలలో మనిషి నోటి తో ఏది పలికితే అది సిద్దించేది , ఫలించేది . కానీ నేడు మనిషి తన నోటితో ఏదైనా పలికినా, మాట్లాడినా బయట వారి సంగతి  సరే ,  ఇంటిలోని  సొంత వారే  , రక్త సంబంధీకులే  మాట వినే వారు లేరు.

దీనికి కారణం  మనిషి తన మాట లోని శక్తి పూర్తిగా కోల్పోవడం . అందుకు ప్రతిగా బ్రతిమాలో, శాసించో , హింసించో తన మాట ఇతరులు వినేలా చేసుకుంటున్నాడు. దీనికి కారణం మనిషి తనను తాను మోసం చేసుకోవడానికి అనాదిగా అలవాటు పడి పోయి ఉండడం. ఆ విషయం కూడా గుర్తించే కనీస అంతర్ముఖ పరిజ్ఞానం మనిషి కోల్పోయాడు.

• ఒక మనిషి , ప్రకృతి మరియు సృష్టి ధర్మాన్ని అనుసరించి నిజాయితీ తో తన ఆలోచన ఉన్నప్పుడు , అప్పుడు నోటి ద్వారా వచ్చే మాట యొక్క శబ్దాన్ని  ,  మనసు ద్వారా ఆలోచించే  ప్రతి సంకల్పాన్ని  యధావిధిగా అమలు పరిచే బాధ్యత ప్రకృతి, విశ్వసృష్టి రెండు తీసుకుంటాయి అని అనడం లో ఏ మాత్రం సందేహం లేదు . ఇందులో మనిషి కి  ఏ భారం, కష్టం ఉండదు .

అందుకే పూర్వ కాలాలలో సత్యవంతులు నోటి తో వరం ఇచ్చినా , మనసు తో సత్ సంకల్పం చేసినా జరిగి తీరేది.

• కానీ నేడు మనిషి అదే విధంగా ఎందుకు చేయలేక పోతున్నాడు ? అంటే కారణం ఒకటే మనిషి తనను తాను మోసం చేసుకోవడానికి అలవాటు పడి , పూర్తి శక్తి హీనుడు గా  అయిపోయాడు. అందుకే నేటి మనిషి లో సంపూర్ణత లేక  మానసిక అనాధ గా మిగిలి జీవిస్తున్నాడు .

ఇందులో  ప్రస్తుత కలియుగం లో ఉన్న ఏ మనిషి కి మినహాయింపు లేదు. అందుకే అన్నాను , మనిషి మహా మోసగాడు. … ముఖ్యం గా తనను తాను మోసం చేసుకోవడం లో మాత్రమే మహా మోసగాడు .

• మనిషి పొందే ఈ స్థితి కి కారణం కూడా లేకపోలేదు. అదే మనిషి కి కమ్మేసిన మాయ. ఆ మాయ నే  వికారాల బలహినత అని అంటారు.

• మనిషి తన బలహీనతలను యధార్థ రీతిలో తెలుసుకొని అధిగమించి నాడు అద్వితీయమైన శక్తి స్వరూపుడు అవుతాడు. ఈ బలహీనతలను అధిగమించాలి అంటే, విఘ్నాలను ఎదుర్కోవడానికి శివ స్మరణ , పరమాత్మ శివుని యొక్క సాంగత్యం, శివుని తో అనుక్షణం మానసిక సాన్నిహిత్యం అత్యంత అవసరం.

• అనాది గా మనిషి తనను తాను మోసం చేసుకోవడం వలనే తనలో ఉద్భవించే దుఃఖానికి అశాంతికి  నేడు కారణభూతుడు  అవుతున్నాడు. తాను మోసపోకుండా, తనను తాను మోసం చేసుకోకుండా ఉండ గలిగే  అభ్యాసం , శివ పరమాత్మ జ్ఞానం తో రచించబడిన బ్రహ్మ కుమారీస్ రాజయోగ శిక్షణ ద్వారా మాత్రమే విని ఆచరించడం వలన సాధ్యం .

  ఓం శాంతి 🙏

  ఓం నమఃశివాయ 🙏

  యడ్ల శ్రీనివాసరావు 24 Nov 2025 9:00 PM.