472. కళ్యాణం – వివాహం

 

కళ్యాణం(శుభం) – వివాహం(బంధం)

• సాధారణంగా  ఒక పదం యొక్క  అర్దం పూర్తిగా తెలియనప్పుడు  లేదా అర్దం  చేసుకోవడం లో  లోపం ఉన్నప్పుడు  భావం పూర్తిగా మారిపోతుంది.  దీనినే భావరహిత  సమస్య అని అంటారు.  ఇదంతా ఎందుకు అంటే,  జ్ఞానం అజ్ఞానం ఈ రెండు పదాల  మధ్య ఉన్న   “అ”  అనే అక్షరం  వలన ఎంతో వ్యత్యాసం  కనపడుతుంది.

• అదే విధంగా తెలుగు లో  వాడుక భాషలో ఒక పదానికి అనేక పర్యాయపదాలు చేర్చడం వలన కొన్ని సందర్భాల్లో   జ్ఞాన వంతంగా   చెప్పిన విషయాల అర్థాన్ని కూడా   ఎవరి అనుసారం వారు   మార్చుకొని అజ్ఞాన మార్గం వైపు  మరలతూ  ఉంటారు.  అందుకు ఇది ఒక నిదర్శనం. ఈ సామెత.

• “ వెయ్యి అబద్ధాలు ఆడి ఒక కళ్యాణం / పెళ్లి / వివాహం  చెయ్యాలి “.

• కళ్యాణం  అనే మాట  చాలా  పవిత్రమైనది. వాస్తవానికి  దీని అర్ధం శుభం ,  శుభకరం.  జ్ఞాన వంతులు, పండితులు కలిసి  మనిషికిి   కళ్యాణం  తలపెట్టడం లేదా   కళ్యాణం చేయడం  అంటే ,   ఒక ఆత్మ కి  శుభం  లేదా  మంచి చేయడం  అని చెప్పారు . అదే విధంగా  లోక కళ్యాణం  అంటే  సృష్టిలో సమస్త జీవులకు శుభం,   మంచి   తలపెట్టడం అని అర్థం. ఇక్కడ శుభం అంటే  ఆనందంగా, సంతోషంగా జీవించడం అని అర్దం.

• సాధారణంగా  ఒకరికి  ఏదైనా  మంచి, శుభం , శుభకార్యం  తలపెట్టేటప్పడు  మాయా వలన విఘ్నాలు ఉత్పన్నమయ్యే అవకాశం   ,  ఈ మాయా లోకం లో ఉంటుంది  కాబట్టి ,  కొందరు గణపతిని పూజిస్తారు. మరికొందరు “ వెయ్యి అబద్ధాలు ఆడైనా సరే  ఆ కళ్యాణం చెయ్యాలి ” అంటారు.  అంటే ఇక్కడ ఉద్దేశం   ఒక శుభం,  ఒక మంచి,  ఒక లోక కల్యాణం తలపెట్టినపుడు  ఆ శ్రేయస్సు కోసం  వెయ్యి అబద్ధాలు ఆడడం లో  తప్పు లేదు  అని జ్ఞాన యుక్తం లో  ఈ సామెత  యెక్క భావం.

• కానీ సమస్య అంతా ఇక్కడే మొదలవుతుంది.

• నేటి లౌకిక ప్రపంచంలో కళ్యాణం అంటే కేవలం స్త్రీ పురుష వివాహం బంధం  అని , మానవుడు  తన అవసరం కోసం  ఈ భావనను తీసుకు వచ్చాడు.  అనగా వివాహం అంటేనే,   మనిషి కి ఎంతో శుభం తలపెట్టడం అనే భావన కల్పించారు. ఈ వివాహం అనేది మనిషి కి మంచి చేయడం గా భావించారు.  ఇదంతా  మనిషి కి ,  శారీరక  భౌతిక అవసరాల రీత్యా,  సృష్టించబడింది.

దీనిని దృష్టిలో పెట్టుకొని వెయ్యి అబద్ధాలు ఆడైనా ఒక పెళ్లి చెయ్యాలని ,  సామెత ను ఆచరించడం మెదలు పెట్టి ….. నేడు సమాజంలో , వెయ్యి కాదు లక్ష అబద్ధాలు ఆడుతూ పెళ్లిళ్లు చేయడం మొదలు పెట్టారు.  కుటుంబాలకు, వ్యక్తులకు సంబంధించిన ఎన్నో నిజాలను దాచి ఒక వివాహం చేయడానికి అష్ట కష్టాలు పడుతూ ఒక యజ్ఞం లా భావిస్తున్నారు. 

• ఇది సరియైన విధానమా?  అబద్ధాలు ఆడి పెళ్లిళ్లు చేయడం ద్వారా, అంటే శుభం తలపెట్టడం అవుతుందా ?  నేడు సమాజంలో వివాహ వ్యవస్థ ఉన్నతంగా ఉందా?  వివాహితులు అందరూ ఆనందం గా ఉంటున్నారా ? …. ఇలా వెయ్యి అబద్ధాలు ఆడి వివాహాలు కుదర్చుడం అనేది పాపమా? పుణ్యమా? .….

సామెతలను ప్రామాణికంగా తీసుకుని , వాటి అసలు అర్దం తెలుసుకోకుండా, విచ్చలవిడి తనంతో  ధైర్యంగా నేడు పూర్తి అబద్ధాల మయంతో   మధ్య వర్తులు వివాహాలు కుదర్చుడం అనేది ఒక పాపపు ఖాతాను వారి కర్మ లో జమ చేసుకోవడమే అవుతుంది.

• పెళ్లి చెయ్యాలనుకునేటప్పుడు కుటుంబ, వ్యక్తి గత వాస్తవాలు లోటుపాట్లు,  నిజాలు  చెప్పి,  కాస్త ఆలస్యం  అయినా సరే, ఇరువురికి ఆమోద యోగ్యం  అయితేనే  అప్పుడు వివాహం కుదర్చుడం  మంచిది.

• ఎవరు ఎవరికి శుభం, మంచి చేసినా అది కళ్యాణమే అవుతుంది.

• సూక్ష్మం గా చూస్తే కళ్యాణానికి (శుభం), వివాహానికిి  (బంధం) చాలా తేడా ఉంది.

• ప్రతి కళ్యాణం ( శుభం, శుభకరం, మంచి) వివాహం (బంధం) కానక్కర్లేదు.

• ప్రతి వివాహం (బంధం)  కళ్యాణం గా (శుభం గా) కావాలి.

• తిరుపతి లో వెంకటేశ్వరస్వామి కి మరియు శ్రీశైలం లో శివుని కి నిత్యం కళ్యాణం జరుగుతుంది. నిరంతరం, అనుక్షణం ఈ సృష్టిలో సమస్త జీవకోటికి లోక కల్యాణం చేసేటి పరమేశ్వరుని సంస్మరణకు ప్రతీకగా ఆయా దేవస్థానాలలో ప్రతీ రోజు అర్చకులు కళ్యాణం చేస్తారు.

• ఈ దైవ కల్యాణం, అంటే దైవ వివాహం ద్వారా మనుషులు గ్రహించవలసిలనది సందేశం ఒకటి ఉంది. అది , స్తీ పురుషులు విభిన్నమైన శక్తి కలిగిన వారు. ఈ కలయికల తో కూడిన వివాహం ఏకరసం గా జీవితకాలం మనుగడ సాధించడం అంటే, కలియుగంలో అంత సర్వ సాధారణం విషయం కాదు. సాక్షాత్తు విష్ణు సహస్రనామం లో సంసారాన్ని మహ సాగరం గా అభివర్ణించారు. దంపతులు తమ వైవాహిక జీవితాలలో ఎన్ని అవాంతరాలు, విపత్తులు వచ్చినా అధిగమించి, ఆ భగవంతుని చూసి , ఆ నిత్య కల్యాణ శోభ తాము కూడా సంతరించు కోవాలి, అనేది నిత్య దైవ కల్యాణం యెక్క సూక్ష్మ సందేశం.

• చివరిగా … ఒకటి కాదు, వంద కాదు, వెయ్యి అబద్ధాలు ఆడి ఒకరికి శుభం, కల్యాణం, మంచి తలపెట్టినా …. ఈ అబద్ధాల వలన ఇతరులలో ఏ ఒక్కరికీ అపకారం గాని, చేటు గాని, నమ్మక ద్రోహాం గాని జరగ కూడదు. స్వయానికి నష్టం జరిగినా పరవాలేదు.

యడ్ల శ్రీనివాసరావు 3 March 2024 , 11:00 AM.