ఆనంద సృష్టి
• పువ్వులను మనం సృష్టించలేం. వాటికవే పుష్పించి, వికసించి అందరికీ ఆనందం కలగజేస్తాయి. నవ్వులను మనం సృష్టించుకోగలం . ఆ నవ్వుల్లో మునిగి ఆనంద డోలికల్లో తేలియాడగలం. కొన్ని మన చేతుల్లో ఉంటాయి. పెద్ద పెద్ద పనుల్ని మనం చెయ్యలేకపోయినా చిన్న చిన్న పనులను పెద్ద హృదయంతో చెయ్యాలి.
• గొప్ప పనులు చెయ్యలేకపోతున్నామని బాధ పడకూడదు. ఆ సందర్భం వస్తే అనుకోకుండా అద్భుతమైన, పనుల్లో మనం భాగస్వాములం అవుతాం. ఆనందం ఎప్పుడూ , మనం చేస్తున్నది చిన్నపనా పెద్దపనా అని కొలతలు వెయ్యదు. ఎంతగా మనసు పెట్టి, హృదయపూర్వకంగా పసివాడిలా ఆ పని చేస్తున్నామా అని చూస్తుంది. ఆనందానికి మనం చిరునామా అయిపోవాలి. బాధలు కేవలం కిటికీ తెరలు. మహాద్వారం మాత్రం మన అంతులేని సంతోషమే. దాన్ని నిలబెట్టుకోవాలి.
• అటువంటి గృహంలో నిత్యం గంతులు వేస్తూ ఉత్సవం చేసుకోవాలి. చెట్టును, పిట్టను , కొంగను , కోడిని , ఉడతను చూసి మురిసిపోవాలి. ప్రతీ దృశ్యం సూర్యోదయంలా ఉండదు. ప్రతి సందర్భం పడమట సంధ్యారాగంలా సంగీతాన్ని ఆలపించదు.
కానీ, చేతిలో ఉన్న చిన్న వెదురు ముక్క లోని నాలుగు రంధ్రాల ద్వారా చక్కటి వేణుగానం వినిపిస్తుంది. హృదయంలో సంతోషం సెలయేరు లా ఉండాలి . మనసులో మంచి జ్ఞాపకాల మంచు కురుస్తూ ఉండాలి. ప్రేమ లేకుండా మనిషిని భగవంతుడు సృష్టించలేదు. ఆనందం లేకుండా ఎవరిని జీవించమని చెప్పలేదు. మనిషి ఆనందిస్తుంటే మురిసిపోయేవాడు ఆ దేవదేవుడే .
• ఉదయం లేవగానే రెండే రెండు అవకాశాలు మన ముందుంటాయి. రోజంతా సంతోషంగా ఉండాలా, లేదంటే వేదనతో కాలం గడపాలా అని. ఆనందం మన హక్కు . ఆనందంగా ఉండటం మన స్వభావం. పుట్టుకతో నే బాధలు అందరికీ ఉండవు. మధ్యలో వచ్చేవి మధ్యలోనే పోతాయి. ఆనందాన్ని సృష్టించు. అపరిమితంగా సృష్టించు. గడ్డిపువ్వుల్లోనూ మానస సరోవర బ్రహ్మకమలాన్ని చూడగలిగే మనసును తయారుచేసుకోవాలి. బతకడానికి సిరులు-సంపదలు కాదు కావాల్సింది. పెద్ద హృదయంలో చిన్ని చిన్ని ఆనందాలు, సృష్టించుకోవడం తెలిసిన నేర్పరితనం కావాలి. శివాలయం లోనికి ప్రవేశించినంతనే ఈశ్వరుని దర్శనం కాదు. అదే పరమాత్మను నిత్యం మనసులో ద్యానిస్తూ ఉండగా ప్రతి మొక్క, ప్రతి పూవు, చిరు గాలి, సెలయేటి నీరు నీతో మాట్లాడతాయి. కాకపోతే మనసును తెరచి ఉంచుకోవాలి .... అంతే !
• మన లోపల ఆ శివుని ప్రేమ వ్యాపిస్తే, కళ్లకు విశ్వమంతా ప్రేమ మయంగా అనిపిస్తుంది. దైవాన్ని భావనతో మనం లోపల సృష్టించకపోతే బాహ్య ప్రపంచంలో ఆయన ఎలా కనిపిస్తాడు ... నిత్య సంతోషికి దూరంగా దేవుడు ఉండగలడా ? కొంత సంతోషం ఇతరుల మీద చల్లగలిగితే మనకు అది రెట్టింపై తిరిగి వస్తుంది. జీవితాంతం నవ్వుతూ ఉండటం అనేది , జీవన రహస్యం తెలిసినవాడికి మాత్రమే సాధ్యమవుతుంది. అతడే జ్ఞాని , అతడే తనకు తాను చాలా ఇష్టమైనవాడు అంటాడు గీత ఆచార్యుడు. బాధలు, బాధ్యతలు అందరికీ ఉంటాయి. ప్రపంచం భూతం లాగా కనిపిస్తుంది. సంసారం సముద్రం లాగా అనిపిస్తుంది. విరక్తి తో మనసు చేదెక్కి ఉంటుంది. అక్కడే మనిషి తన భావాన్ని మార్చుకుని చిరునవ్వు నవ్వగలిగి ఉండాలి. వెంటనే మరిచిపోయి, కళ్లు తుడుచుకున్న చిన్న పిల్లాడిలాగా జీవితాన్ని ఆహ్వానించాలి. ప్రపంచాన్ని కౌగిలించుకోవాలి. నవ్వుతూ అందరినీ పలకరించాలి. ఇది అంతా ఒక సత్యతతో, పరివర్తన తో, సహృదయంతో జరగాలి .... అంతే కాని స్వీయ వంచన తో మాత్రం ఉండకూడదు.
సర్వం ఈ శ్వరం .
ఓం శాంతి.
యడ్ల శ్రీనివాసరావు 1 Feb 2025. 1:00 pm.
No comments:
Post a Comment