57. చిత్రమైన మహిళకి విచిత్రమైన సంతోషం.

చిత్రమైన మహిళకి విచిత్రమైన  సంతోషం.

(మూలం : బాల్యం నుంచి చూసిన ఒక విచిత్రమైన మహిళ వ్యక్తిత్వాన్ని చూసి, గమనించి ప్రేరణతో  రాసింది.)

హనీత

• ఎలా, ఎక్కడినుంచి మొదలు పెట్టాలో తెలియడం లేదు. కానీ ఎలా గోలా మొదలు పెట్టాలి. పేరు కి ఆడపిల్ల నే అయినా, నన్ను మాత్రం నా తల్లి దండ్రులు చిన్నతనం నుండి మగాడి లాగే పెంచారు. కట్టు, బొట్టు, జుట్టు, మాట ఒకటేమిటి అన్నీ పురుష వేషధారణ, అవే లక్షణాలతో పెరిగాను. నేను నా సాటి వారితో, మగవాడి లా ప్రవర్తిస్తూ ఉంటే, నాలో విపరీతమైన మానసిక ఆనందం కలిగేది. నెమ్మదిగా నేను మగాడిలా అజమాయిషీ, పెత్తనం చేస్తుంటే , ఇంట, బయట అందరూ భయపడుతూ ఉండేవారు. అది నాకు చెప్పలేని సంతోషం ఇచ్చేది.  

• వయసు పెరిగిన కొద్దీ నాలో ఈ ధోరణి విపరీతంగా పెరిగిపోయింది.  తల్లి తండ్రులు , తోడపుట్టినవారు నన్ను భరించలేక పోయేవారు. వారు ఏదో విషయాలను నాకు చెప్పాలని ప్రయత్నించేవారు, వారు చెప్పేది నిజమే అనిపించినా, చాలా విసుగు గా ఉండేది. స్త్రీ కాలచక్ర ధర్మం సమయం రోజుల్లో మాత్రమే, నేను ఒక ఆడదాన్ని అని అనిపించేది.  తరువాత అంతా మగరాయుడి లా ఉండే(వాడిని) దాన్ని.  తోడ పుట్టిన వారికి పెళ్లిళ్లు అయ్యాయి. వాళ్లు సుఖం గా, సంతోషంగా ఉంటుంటే , నాలో ఏదో భాథ, వారిని చూసి తట్టుకోలేక, అవసరం లేకపోయినా, ఏదొక విధంగా నోటికి వచ్చినట్లు మాటలు అంటూ, , గొడవలు పెట్టె దాన్ని…అది నా మనసు కు చాలా హాయిని ఇచ్చేది, ఆ తర్వాత సంతోషం తో తిండి తినాలని అనిపించేది కాదు.   “నాకు దక్కనిది నాతో ఉన్నవారికి ఎవరికైనా దక్కితే ఎంతకైనా తెగించాలనిపిస్తుంది”. అది చాలా సరదాగా ఉంటుంది. మా నాన్న కూడా ప్రభుత్వ డాక్టర్ వృత్తి లో ఉన్నప్పుటికి  నా ప్రవర్తన చూసి  నన్ను ఒకరోజు ప్రైవేటు డాక్టర్ దగ్గరికి తీసుకెళ్ళారు. అక్కడ డాక్టర్ చెప్పిన విషయం ఏమిటంటే హార్మోన్ల సమతుల్యత లేకపోవడం వలన అలా అవుతారు అన్నారు. కొన్ని రోజులు మందులు వాడి మానేసాను. మందులు వాడి మానేసిన తర్వాత నా పరిస్థితి అంతకు ముందు కంటే 10 రెట్లు అయింది. నేను చెప్పింది వినకపోయినా, నా మాట కు అడ్డు వచ్చినా ఎవరిపైనైనా చేయి చేసుకునేదాన్ని. నా మాట వినకపోతే  ఇప్పటికీ విపరీతంగా కోపం వచ్చెస్తుంది. ఇది ఎంత సంతోషంగా ఉంటుందో మాటలలో చెప్పలేను.

• అమ్మా, నాన్న పెళ్ళి సంబంధాలు చూసేవారు. ఒక మగాడు ఇంకొక మగాడి ని పెళ్లి చేసుకొని ఏం చేయాలి, అని సంబంధాలు చెడగొట్టే దాన్ని . నేను మగవారితో ఎక్కువ స్నేహం చేసేదాన్ని. మగవాళ్లు చాలా నిస్సంకోచంగా ఎటువంటి విషయాలైనా (వివరం అవసరం లేదు) మాట్లాడుకో గలరో,  నేను వారితో కలిసి అలాంటి మాటలు, మాట్లాడేదాన్ని.  అలా ఉంటే చాలా చాలా ఆనందంగా ఉండేది.  కానీ ఎవరూ ఏనాడు నాతో ఎంతో కాలం స్నేహం చేసేవారు కాదు.  ఇక నా వయసు అమ్మాయిలతో స్నేహం అయితే సరేసరి. వాళ్లందరి దగ్గర మగాడిలా హీరోయిజం చూపించాలని ఉంటుంది. అలాగే వాళ్ల చేత పొగిడించుకోవాలనే తపన ఉంటుంది. నా మాట వినకపోయినా, వాళ్లలో ఎవరైనా సంతోషంగా, అందంగా  నా కంటికి కనపడితే అది వాళ్ల కర్మ, దౌర్భాగ్యం. 

• చెప్పుకో కూడదు కాని నేను అలుపు ఆయాసం లేకుండా ఎన్ని గంటలైనా , మాట్లాడగలను. అది మంచా, చెడా అనేది అనవసరం. ఇది గుర్తించి , కొంతమంది ఎవరూ చేయలేని పనులు నాకు అప్పచెపుతారు. అవి మంచా,చెడా అనేది అనవసరం. ఒక రకంగా చెప్పాలంటే నాకు మిత్రుల కంటే , శత్రువుల పైన ప్రేమ, ఎందుకంటే వాళ్లు ఇచ్చే మానసిక సంతోషం ఎవరూ ఇవ్వలేరు. అందుకే ఎక్కువ కాలం ఎవరిని మిత్రులు గా ఉంచుకోను. గొప్ప విషయం ఏమంటే, నాలాంటి వాళ్ళే నన్ను చేరదీస్తుంటారు. మళ్లీ మాలో మాకే ఆధిపత్యం పోరు మొదలవుతుంది. కానీ ఇలా భలే ఉంటుంది.

• చివరిగా,    కొన్నిసార్లు ఇంట్లో తల్లి తండ్రులు, తోడపుట్టినవారు, సమాజం, సాటివారు నన్ను ఒక “ చీడపురుగులా” దాపరించావు అని అంటుంటే , ఆ మాటలు విన్న నాకు ఈ జన్మకు ఈ సంతోషం చాలు అనిపిస్తుంది.  నేను మనిషినే, నాకు ఆలోచనలు ఉంటాయి అవి ఎలాంటివి అనేది అనవసరం. నా లా ధైర్యం గా బ్రతకలేని పిరికి వాళ్లు, ఏవేవో మాటలు చెపుతుంటారు, మంచి, మర్యాద, గౌరవం, నీతి, నియమం....అంటూ.…ఛీ …ఇటువంటి మాటలు నాకు పరమ రోత. కొంతమంది యొక్క గొప్పదనాన్ని చని పోయాక చెప్పుకుంటారు. కానీ నా లాంటి వాళ్ల గొప్పదనం,  బ్రతికి ఉండగా నే చెప్పుకుంటారు.. ఎంతమంది కి దొరుకుతుంది ఈ అద్రుష్టం. కొందరు ఏనుగులా, సింహంలా, పులిలా బ్రతాకాలి అంటారు. కానీ నేనైతే  “బురదలో దొర్లే పందిలా బ్రతకాలి” అంటాను. ఎందుకంటే ఏదైనా దులుపుకుని సిగ్గు లేకుండా తిరగడం పంది అద్రుష్టం. నాకు అదే ఆదర్శం

.  

ఇప్పుడు నా వయసు 50 సంవత్సరాలు. నా తోటి వారు పెళ్లి పిల్లలు సంసారం అంటూ జీవిస్తుంటే నాకు వారి మీద చాలా జాలిగా ఉంటుంది. ఎందుకంటే నాకు నచ్చిన చోట తిరుగుతూ, నచ్చిన వి తింటూ, నచ్చిన మనుషులతో తిరుగుతూ స్వేచ్ఛ గా  నా జన్మను సార్ధకం చేసుకుంటున్నాను.  నన్ను చూసి ఓర్వలేని వారు ఏదో అంటుంటారు. పాపం అటువంటి వారి పై జాలి వేస్తుంది.

🌿🌿🌿🌿🌿🌿🌿

YSR 20 Apr 21