Thursday, April 17, 2025

624 . గోదారి బంగారం

 

 గోదారి  బంగారం




• దినచర్యలో  భాగంగా నే  యధావిధిగా   సాయంత్రం 5 గంటలకు ,  సరస్వతి ఘాట్ లో   వాకింగ్ కి వచ్చాను.    గేటు దాటి  ఘాట్ లోనికి   అడుగు పెడుతూనే,   రోజూ కంటే  కూడా  ఈ రోజు మనసు లో    ఏదో   కొత్త గా  సంతోషం గా   అనిపిస్తుంది. కారణం మాత్రం తెలియదు .

• సమయం సాయంత్రం 5:05 నిమిషాలు అయింది. ఘాట్  అంతా ఖాళీ గా  ఉంది.   ఘాట్ ఫ్లాట్ ఫాం పై మౌనం గా  నడుస్తున్నాను.  కానీ   ఏదో  తెలియని సంతోషం  నన్ను  తాకుతూ ఉంది.   చిన్న  పిల్లలు ఆటలు    ఆడేటప్పుడు  మైమరచి  సంతోషం పొందుతూ  ఉంటారు.  నా మనసు లో  ఎందుకో అలా అనిపిస్తుంది.  కానీ  చుట్టూ  వాతావరణం అంతా  సాధారణంగా నే ఉంది . . .  ఏంటో నా పిచ్చి, అని నాలో  నేనే నవ్వుకుంటూ వాకింగ్  చేస్తున్నాను .


• అలా  ఘాట్ పై  నడుస్తూ,  నడుస్తూ   దృష్టి ని ఒకసారి   గోదావరి పై   మళ్లించి   చూస్తే,  ఒక్కసారిగా సంతోషం  రెట్టింపు అయింది.   సూర్యుడు అస్తమించడానికి   సిద్ధం అయ్యే ముందు,   తన వర్ణాన్ని   పసిడి  ఛాయలోకి   మార్చుకున్నాడు.  

ఆ బంగారు   కాంతిలో   గోదావరి   సహజమైన స్వర్ణాభరణం  వలే   మిలా మిలా మెరుస్తుంది. ఎప్పుడూ చూసే  గోదావరే   కానీ,  ఈ సమయంలో మాత్రం   రోజూ  ఉన్నట్లుగా   మాత్రం అనిపించడం లేదు.   కాసేపు  అలా   నిలబడి,  మిలమిలాడే గోదావరి ని    తదేకంగా చూస్తుంటే ,  అకస్మాత్తుగా గోదావరి పై    వీచే గాలుల   ఉధృతి పెరిగింది.   ఆ గాలుల   ఉధృతి కి   అలలు   వేగంగా   ఉరకలు మీద ఉరకలు  వేసుకుంటూ,    అప్పటి వరకు లేని  అతి పెద్ద శబ్దం చేస్తూ  ఒడ్డు ను  పడి పడి తాకుతున్నాయి.


• ఆ అలల ను   చూస్తూ,   వాటి శబ్దం వింటుంటే . . . అవి నన్ను తాకాలని,   ఆ శబ్దం  నాకు ఏదో చెప్పాలని ప్రయత్నిస్తున్నట్లు   నా మనసు కి   పదే పదే అనిపిస్తుంది.

  అయినా  నా పిచ్చి గాని,   కవితా  హృదయం తో ఆలోచిస్తే   ప్రతీది ఇలాగే  అతిగా  ఉంటుంది, అని నాలో నేనే నవ్వుకున్నాను.   కానీ, నిత్యం లేని ప్రత్యేకత ,   ఈ రోజే   ఎందుకు ఇలా నాకు అనిపిస్తుంది  అనే ప్రశ్న కి సమాధానం  నాలో లేదు , నాకు ఎవరు చెపుతారో  కూడా తెలియదు . 

• తిరిగి  మరలా  వాకింగ్  ప్రారంభించాను. ఐదు నిమిషాల తరువాత   గాలి  వేగం  మరింత పెరిగింది. ఘాట్ లో  చెట్లు,  పూల మొక్కలు   శబ్దం చేస్తూ విపరీతంగా  ఊగుతున్నాయి.   ఆ గాలి  నన్ను తాకుతూ  ఉంటే,   కళ్లు చిన్నవి గా   చేసి చూడాల్సి వచ్చింది.   నా ఒంటి పై   డ్రెస్   రెపరెపలాడుతూ ఎగురుతుంది.

• ఈ వాతావరణం  అంతా   నేను  వచ్ఛిన  అరగంట లోపు   అందంగా   మారిపోయింది.  ఇది చాలా సంతోషం ఇస్తుంది   అనే దాని కంటే,  ఈ పసిడి ఛాయ గోదావరి,   రోజూ కానరాని  ఈ అలల ఉధృతి శబ్దం,  చెట్లు  నుంచి వీచే గాలి,   ఈ ప్రకృతి  నాకు ఏదో చెప్పాలని   ప్రయత్నిస్తుంది  అని  మనసులో బలంగా   అనిపిస్తుంది  . . .   కానీ  చెప్పాలనుకున్నది ఏమిటో  నాకు   ఆ నిమిషం లో  తెలియదు .


• మరో   అరగంట    వాకింగ్  చేసాను.   సుమారు 6 గంటల  సమయం  అయింది.   వాతావరణం ఇంకా అలానే  చల్లగా   గాలులతో ఉంది.  సూర్యుడు అస్తమించడానికి  సిద్ధం అయ్యాడు.   వాకింగ్ అయిన తరువాత,   ఘాట్ లో   సిమెంట్ బల్ల పై కూర్చుని , గోదావరి ని    చూస్తూ  ఏంటో ఈ రోజు ఇంత ప్రత్యేకం గా ఉంది అనుకున్నాను.


• ఇంతలో   ఎవరో ,   ఒక యువతీ యువకుడు సుమారు  26 సంవత్సరాలు ఉంటాయి,   వచ్చి నా పక్కనే  ఉన్న   సిమెంట్ బల్ల పై    కూర్చున్నారు. అప్రయత్నంగా నే   నేను   వారిని చూసాను.   వారు చాలా సాధారణంగా,  మధ్యతరగతి  కంటే  దిగువ స్థితి లో   ఉన్న  సహజ  వస్త్రధారణలో ఉన్నారు. వారిద్దరి  మధ్య  సంబంధం ఏమిటో తెలియదు కానీ మౌనం గా   కూర్చున్నారు.  చూడడానికి మరీ అందం గాను లేరు,   అలా అని  అంద విహీనంగాను  లేరు.


• నాలో  ఏదో తెలియని  వైబ్రేషన్ మొదలైంది. అక్కడి నుంచి లేచి,  వెళిపోదాం   అనుకున్నాను  కానీ, వాతావరణం   ఆహ్లాదకరంగా   ఉండడం తో లేవ లేకపోయాను.

• దాదాపు పావుగంట సమయం వరకు వారిద్దరూ మౌనం గా నే   ఉన్నారు.   ఆ తర్వాత,    అతను ఆమెకు    అస్తమిస్తున్న   సూర్యుడి ని  చూపిస్తూ, వేగం గా    తన   చేతులతో   సౌంజ్ఞ లు చేస్తూ,  చేతి వేళ్లను   లెక్కకడుతూ    ఆతృతతో    వివరిస్తున్నాడు.

 ఆ తర్వాత   గోదావరిని,   అలలు ను   చూపిస్తూ చాలా వేగంగా   తన చేతి సిగ్నల్స్ తో, అభినయం చేస్తూ వివరిస్తున్నాడు.   ఆమె పట్టరాని   సంతోషంతో, పెద్ద కళ్లు చేసుకొని    అతని సౌంజ్ఞ లను  అర్దం చేసుకుంటూ,  తిరిగి  ఆమె ఏదో  సౌంజ్ఞ లతో  అతనికి వివరిస్తుంది.

• వారిద్దరి  మధ్య సంబంధం  ఏమిటో తెలియదు కానీ,   వారిద్దరూ  మూగ వారు,   చెవిటి వారు అని కొంత  సమయం  తర్వాత  నాకు అర్థం అయింది. వారి పై  జాలి కలగడం లేదు.   వారు నాకు ఏదో తెలియ చేస్తున్నట్లు అనిపించింది.  వారి ఆత్మ విశ్వాసం   నాకు   సంతోషం కలిగించింది .


• ఆ ప్రదేశం లో  వారి  చుట్టూ  ఎవరు ఉన్నారు  అనేది  కూడా   కనీసం   గమనించ కుండా , మైమరచి అతను  ఆమెకు  ఆ గోదావరి   ప్రకృతి,  ఆ సమయంలో   వీచే గాలిని ,  శబ్దాన్ని   కళ్లకు కట్టినట్టు ఆమెకు  వివరిస్తున్నాడు.    ఆమె  నవ్వుతుంది, మధ్యలో  కొన్ని సార్లు  చప్పట్లతో   తన సంతోషం వ్యక్తం  చేస్తుంది.   అక్కడ  ఆ సమయం అంతా వారి హవ భావాలతోనూ,   మౌన భాష తోను   , అభినయాలతోను   నిండి పోయింది . . . సరిగా అదే సమయంలో,   ఎక్కడి  నుంచో   రెండు  కాకులు వచ్ఛి వారికి  రెండు   అడుగులు  సమీపంలో వాలి , వారినే చూస్తున్నాయి .


• ఒక పది నిమిషాలు  తర్వాత,  అతను తన భుజానికి   ఉన్న సంచిలో  నుంచి   ఒక  పొడుగు పుస్తకం    తీసాడు.

అప్పటివరకు   నేను    వారిని   కొంచెం బిడియం గా చూసి  చూడనట్టు గా   చూస్తున్నా సరే,   ఈ సారి ఆగలేక   పూర్తిగా వారి వైపు తిరిగి  వారినే చూడడం మొదలు   పెట్టాను.


• అతను   మెల్లగా   ఆ పుస్తకం తెరిచి,   ఒకో పేజీ ఆమెకు   చూపిస్తున్నాడు.  ఆమె  తన రెండు చేతులు తన బుగ్గల పై  పెట్టుకుని,  ఆసక్తి గా చూస్తోంది . 

 నాకు ఒక్కసారిగా ఒళ్లు జలదరించింది. 

 ఆ పేజీలలో ,   అతను   అప్పటి  వరకూ  ప్రత్యక్షం గా  ఆమెకు చూపించిన   గోదావరి,  సాయంకాలం సూర్యుడు,   అలలు,   గోదావరి బ్రిడ్జి ,   ఘాట్ ,   సిమెంట్ బల్ల పై వారు  కూర్చున్న విధానం  అంతా  కూడా   ఒక పేజీ తరువాత   మరొకటి   పెన్సిల్   ఆర్ట్   డ్రాయింగ్స్  రూపం లో    ఇది వరకే  వేసి    ఉన్నవి    ఆమెకి   చూపిస్తున్నాడు.   అవి తాను  వేసానని  ఆమెకు మూగ భాషలో చెపుతున్నాడు .

 ఆమె  మరింత ఆశ్చర్యం గా  అతని ని , ఆ స్కెచెస్ ని  ,  తేరిపార   చూస్తుంది.


 అదంతా   చూస్తున్న నాకు,  అసలు  అక్కడ ఏం జరుగుతుందో,  అసలు  అదంతా ఏంటో కూడా అర్దం కావడం లేదు.


• సమయం  6:30 గంటలు అయింది.  ఇంకా చీకటి పడలేదు.   వెలుగు స్పష్టం గానే ఉంది. ఘాట్ లోకి జనం వస్తూ వెళుతున్నారు.


• నాకు  ఆ యువకుడి తో  మాట్లాడాలని అనిపించింది,   కానీ అది  ఎలా  సాధ్యమో తెలియక మౌనం గా నే    చూస్తూ, గమనిస్తున్నాను.   అంత సమయం ఉన్నా  వారు  ఒకరిని  మరొకరు   కనీసం చేతులతో  కూడా తాకలేదు.   వారి మధ్య ఉన్న సంబంధం  ఎటువంటిదో   కూడా   నాకు అర్ధం కాలేదు.


• కానీ   ఒకటి  మాత్రం  అర్దం అయింది,  అతను తాను   గీసిన గోదావరి  ప్రకృతి  దృశ్యాలను, ఆమెకు డైరెక్ట్ గా  లైవ్ లో  చూపిస్తూ ,   వర్ణించడానికి అక్కడికి   ఆమె తో   వచ్చాడు  అని.  వారిద్దరూ మూగ,   చెవిటి వారు అని.


🌹🌹🌹🌹🌹


• ఒక ఐదు   నిమిషాలు తరువాత,   ఆమె తన హేండ్ బాగ్ లోనుంచి,   పింక్  కలర్  💗  హృదయం ఆకారంలో  ఉన్న  చిన్న  ప్లాస్టిక్ భరిణి  తీసింది. ఆమె ఆ భరణి లో   నుంచి   కుంకుమ తీసి,  అతని నుదుట బొట్టు   పెట్టింది.    

ఆ  హృదయ భరణి ని   ఆమె అతని   చేతిలో పెట్టి, తన చేతిని పైన  ఉంచింది.   మాటలు రాని  ఆమె తన   ప్రేమను చాలా   అద్బుతం గా  అతనికి వ్యక్తపరిచింది .  అప్పుడు  నాకు అర్ధం అయ్యింది. ఆ సమయం  ,   వారి ప్రేమను   వ్యక్తపరచు  కోవడానికి ప్రకృతి  వారికి  కల్పించిన   సందర్బం అని.   అందుకు నేను సాక్షి గా ఉన్నాను అని.

అదంతా  చూస్తున్న  నాకు  గుండె వేగం పెరిగింది. కానీ అదంతా అక్కడ చాలా సహజంగా జరిగింది.


• నేను రెండు గంటల క్రితం ఘాట్ లో కి వచ్చేటప్పుడు,   ఈ రోజు   ఏదో   ప్రత్యేకంగా అనిపిస్తుంది   అన్న మాట కి ,   కారణం అప్పుడు తెలిసింది .

• ఎందుకో తెలియకుండా నే ,   నా కళ్లలో తడి అనిపించింది .  సమయం  7 గంటలు కావస్తోంది.  లేచి , బంగారు  గోదారి నుంచి   వెను తిరుగుతూ . . . 

 ఈ రోజుల్లో   మాటలు వచ్చి ,    ప్రేమించు కునే వారు ఎందరో   తమ  అతి తెలివి తోనో   లేక అమాయకత్వం  తోనో    లేక    అహం తోనో    లేదా మనసు లతో    ఆటలాడే    విధానం   తోనో   ఒకరి పై మరొకరు   ప్రేమను   సవ్యంగా    వ్యక్తం   చేయలేని ఎందరో    మానసిక   వికలత  కలిగిన వారి  కంటే కూడా,   ఆ యువతీ యువకుడు  చాలా ఉన్నతంగా అనిపించారు .   బహుశా  ఇది వారికి   ప్రకృతి ఇచ్చిన ఆశీర్వాదం  అనుకుంటా. 

 ప్రేమ కి మనసే ఒక భాష అనిపించింది.


🌹🌹🌹🌹🌹


• కేతువు కి  మొండెం  మాత్రమే ఉంటుంది.  తల,  కళ్లు ఉండవు ,  మాటలు రావు.   అంటే  కేవలం హృదయం, స్పందనల తో  మాత్రమే కేతువు  విశ్వంలో   సమస్త   ప్రకృతి తో   అనుసంధానం అవుతుంది,   చీకటిని   స్పష్టం గా చూస్తుంది, బొమ్మలు గీస్తుంది ,  రాతలు రాస్తుంది. …..

• కళ్లు , మాటలు  రెండు  కూడా  నిలకడగా ఉండవు . అవి    మోసం చెయ్య గలవు .    హృదయం మాత్రం మోసం చెయ్యదు .   ఒకవేళ   హృదయం మోసం చేస్తే మరణం తో సమానం.   అదే కేతువు గొప్ప తనం. వారిలో   నాకు కేతువు  యొక్క శక్తి , మరియు ప్రేమ కనిపించింది. 


ఆ యువతి యువకుడి కి  ఈ రచన అంకితం.


యడ్ల శ్రీనివాసరావు 16 APR 2025 , 10:00 PM.








Monday, April 14, 2025

623. విశ్వ రాజసం

 

విశ్వ రాజసం


• కనులకు      ఏమయిందో

  కలలను       కాదంటుంది .

  కాదంటుంది   . . .   కలలను కాదంటుంది .


• కలల లో     వెలిగే     కాంతులను

  చూడనంటుంది  . . .   చూడలేనంటుంది .


• బహుశా     . . .    బహుశా

  కలలకు     చీకటి      కావాలేమో

  కావాలేమో    . . .     చీకటి   కావాలేమో .


• నిశి లో     విరిసిన    శిశిరమా

  శశి నే       దాచిన     తరుణమా


• కలలు     లేని     కనుల లో

  కలవ      లేని      కలవరింతలు

  మౌనం గా     ఉన్నాయి.


• అలల    లోని      గాలులు

  వీనుల ను      వయ్యారం గా

  తాకుతూ     ఉన్నాయి .


• కాంతి     లేని    ఏకాంతం

  ఏకం     చేస్తుంది    కమ్మగా

  విశ్వ     రాజసం తో .


• నిశి లో     విరిసిన     శిశిరమా

  శశి నే      దాచిన      తరుణమా


• కనులకు      ఏమయిందో

  కలలను       కాదంటుంది .

  కాదంటుంది    . . .    కలలను  కాదంటుంది .


• కలల లో     వెలిగే     కాంతులను

  చూడనంటుంది   . . .    చూడలేనంటుంది .


• బహుశా      . . .     బహుశా

  కలలకు     చీకటి     కావాలేమో

  కావాలేమో    . . .     చీకటి   కావాలేమో .



నిశి = చీకటి

శిశిరం = మంచు , చల్లని , బుతువు

శశి = చంద్రుడు

వీనులు = చెవులు


యడ్ల శ్రీనివాసరావు 14 APR 2025 6:00 AM.






Saturday, April 12, 2025

622. ప్రణతి

 

ప్రణతి


• ప్రియము న      ప్రణతి

  ప్రీతి  న      ప్రణయతి .

• నగవు తో      నడిచిన

  మనసు కి      ఉన్నతి .


• సారిక     . . .   అభిసారిక

  

• ప్రియము న      ప్రణతి

  ప్రీతి న           ప్రణయతి .

• నగవు తో      నడిచిన

  మనసు కి      ఉన్నతి .


• కరము   ల    స్వగతి 

  హృదయ  మ  హారతి .

• విరిసి న     పదము లు

  సంగమ      వారధి .


• ప్రియము న    ప్రణతి

  ప్రీతి న      ప్రణయతి .

• నగవు తో     నడిచిన

  మనసు కి      ఉన్నతి .


• హరిక      . . .      నీహారిక


• బిగువు న    భారము

  దేహపు        దుర్గతి .

• శూన్యపు     శ్రావ్యత

  స్థితము కి     దివ్యత .


• భావపు     వినతి

  రాతల      భారతి .

• భాష న    సమ్మతి

  కావ్య పు       సద్గతి .


• ప్రియము న     ప్రణతి

  ప్రీతి న      ప్రణయతి .

• నగవు తో     నడిచిన

  మనసు కి     ఉన్నతి .


యడ్ల శ్రీనివాసరావు 13 APR 2025 10:00 AM.




Friday, April 11, 2025

621. Fairness - స్వచ్ఛత

 

Fairness - స్వచ్ఛత


• పూర్వం రోజుల్లో ,  కొన్ని తరాల క్రితం  ఈ స్వచ్ఛత fairness   అనే పదం   అందరూ    దేహ స్వరూపం లో   ముఖ వర్చస్సు ,  వస్త్ర ధారణ శుభ్రత   విషయం లో  ఉపయోగించే వారు .   ఆ పదం  శరీర  అందం కోసం వర్ణించే వారు.   

ఎందుకంటే     ఆ పూర్వ కాలం లో   అందరూ  ఇతరులను  దేహభిమానము తో   చూసేవారు , గౌరవించే వారు .   ఎందుకంటే   ఆరోజుల్లో వారికి మనుషుల   మనసు ల గురించి,   వాటి అంతర్గత లోతు  స్వభావం గురించి  మరియు ‌  వాటి శుభ్రత , స్వచ్ఛత (fairness)  అనే విషయాలు  కనీసం అవగాహన  ఉండేది కాదు.  వారికి ఆ అవసరం ఉండేది కాదు.   ఎందుకంటే ,  ఆ రోజుల్లో  ప్రతి ఒక్కరి స్వభావ సంస్కారాలు   ఏ కల్మషాలు   లేకుండా స్వచ్ఛంగా,   శుభ్రత తో (fairness)   ఉండేవి.


• అందుకే   సామాన్య ఆదాయం కలిగి ఉండి, 10 మంది పిల్లలు   ఉన్న   ఉమ్మడి కుటుంబాలు  కూడా  ఒకే మాట పై ఉండేవారు, ఆనందం గా జీవించే వారు.   సంఘం,  సమాజం అంతా   ఒక మాట పై నడిచేవి.  మనుషుల లో స్వతంత్రత ,   స్వేచ్ఛ అనేవి   పూర్తిగా  ఐకమత్యం లో ఇమిడి పోయి  ఉండేవి.  


 ☘️☘️☘️☘️☘️☘️


• కానీ  నేటి కాలంలో   ఫెయిర్ నెస్   అనే  పదం పూర్తిగా   మనిషి మనసు కి ,  మనిషి  అంతర్గత స్వభావానికి   సంబంధించినదిగా   మారిపోయింది . ఎందుకంటే   నేటి కాలంలో  ప్రతీ ఒక్కరూ   తమ  స్థితులు ,  పరిస్థితులు బట్టి  మానసిక కాలుష్యం తో జీవించడానికి  అలవాటు పడిపోయి   ఉన్న వారే.

• నేటి  కాలం లో   స్వతంత్రత,  స్వేచ్ఛ  అనేవి  మనిషి యొక్క   వ్యక్తిగతం గాను ,   మనోభావాలు గాను  పరిగణించే  స్థాయి కి   తన మానసిక  స్థితి ని  ఏర్పరచు కున్నాడు .   మనిషి   ఎప్పుడైతే  వీటి పై అధికారి గా  తయారు  అయ్యాడో  , తాను   ఏది ఎలా చేసినా   సరే   తాను   పెర్ఫెక్ట్  అనే భావం ,  తనకు తానే గొప్ప  అనే   భావన  పొందుతున్నాడు  .  

ఇలా  ప్రతి మనిషి    ఎవరికి వారే  తాము  కరెక్ట్ అని అనుకోవడం   చాలా   సహజంగా  అయిపోయింది. అంతే కాని ,   నేను చేస్తున్నది కరెక్టా ,   కాదా    అని కనీసం    ఆత్మ  విమర్శ      చేసుకోవడం లో   పూర్తిగా . . . . పూర్తిగా   విఫలం   అవుతున్నారు.    దీనికి కారణం   కనీసం ,    తమ యధార్థ స్థితి పై  తాము నియంత్రణ కోల్పోవడం   మరియు  ఆలోచించే గుణం లేకపోవడమే .

• ఈ విషయం బట్టే తెలుస్తుంది ,   మనిషి కి స్వచ్ఛత, శుభ్రత  ( fairness)  అనేది   తన  మనసులో కొరవడుతోంది అని .   తద్వారా    అహంకారం , అజ్ఞానం ,   మూర్ఖత్వం ,   మాయా వికారాలు రాజ్యమేలుతున్నాయి    అని .


🌹🌹🌹🌹🌹


  అసలు ఈ ఫెయిర్ నెస్ ను  ఎలా  చెక్  చేసుకోవాలి.

• మనం   మాట్లాడే మాటలు, చేసే కర్మలు అసలు ఎంత వరకు నిజాయితీ తో ఉంటున్నాయి. అందులో మనల్ని  మనం ప్రతీ విషయం లో సమర్థించుకుంటూ సరిపెట్టుకుంటున్నామా ?   లేదా  లోపాలను సరిచేసుకుంటూ ఉత్తమం గా మార్చుకుంటున్నామా ?

• మన కోరికలు , అవసరాలు తీర్చుకునేందుకు తగినట్లుగా   మన వ్యక్తిత్వాన్ని  ఎవరు చూస్తారు లే అని,   అస్తమాను  మార్చుకుంటూ  ఉంటామా ? లేదా ఒక  నిబద్ధత,   విషయ పరిశీలన తో   ధృడం గా నిశ్చయం తో  ఉంటామా ?

• వ్యక్తిత్వ   హద్దులు  మరచి  విస్తృత మైన ఆలోచనలు  చేస్తూ  వాటి  పరిధి పెంచుకుంటూ, speculation తో   I am always perfectly correct  అనే ముసుగులో ,  కర్మలు(actions) చేస్తూ ఉంటామా ?

• కళ్లెం లేని మనసు కి , స్వచ్ఛత శుభ్రత (fairness) అనేవి  కొరవడతాయి  అనేది వాస్తవం.  ఇది ఆత్మ లో కుసంస్కారమై   మరలా  జన్మాంతరాలు   మనిషికి ఆపాదన   అవుతుంది .

• నేడు ఫెయిర్ నెస్  అనేది   మనసు కి సంబంధించిన అంశం .  ఇది ఎవరికి వారే స్వయంగా చెక్ చేసుకోవాల్సిన అంశం.  ఎందుకంటే , ఫలితం ఎవరికి వారే అనుభవిస్తారు.

• ఒక మనిషి మనసు ఫెయిర్ గా ఉంటే , తనకు ఉన్నంత లో సంతోషంగా ఉంటాడు. ఏ లోటు ను అనుభవించడు.  ఈ గందర “గోళం” లో గజిబిజి గా ఉండడు.  మంచి ఆరోగ్యం తో ఉంటాడు.

 ఎందుకంటే   మానసిక శక్తే   మనిషి ని మనిషి గా నిలబెడుతుంది  …. ఎన్నటికైన  ….  ఎన్నాళ్లైన


యడ్ల శ్రీనివాసరావు 11 APR 2025 10:00 PM.




Thursday, April 10, 2025

620. మౌనభాష

 

మౌనభాష 



• మౌన   భాష     తెలుపు

  నీ    అంతర్ముఖతను .

• అందు      చూపు

  నీ    స్థితి    రూపతను  .


• బాహ్య  భాషల   రణగొణులు

  మనసులో    నింపును

  మలినాలు    . . .  మలినాలు .


• ఆసక్తి ని    పెంచే     వ్యర్ధ మాటలు 

  నీ శక్తి ని    తుంచే     జీవాయుధాలు .


• మౌన    భాష     తెలుపు

  నీ    అంతర్ముఖతను .

• అందు     చూపు

  నీ    స్థితి    రూపతను .


• బాహ్య   భాషల    ఘోషల లో

  నిండి ఉండును

  విష  వాయువులు   . . .  విష  వాయువులు.


• తేనే  లొలుకు   అపరిపక్వ  పలుకులు 

  కానరాని    కలతల    కారకాలు .


• మౌన    భాష    చేయు

  నీ     మనసును    శుద్ధము.

• అందు       పెరుగు

  నీ   శుభ   సంకల్పపు   శక్తులు .


• మౌనం     మహిమాన్వితం

  మౌనం     మహిమాన్వితం .


కానరాని = కంటికి కనపడని

కలతలు = Disturbance , చిందర వందర



యడ్ల శ్రీనివాసరావు 10 APR 2025 10:00 PM 



619. ఓ యాత్రికుడా

 

ఓ యాత్రికుడా


• ఓ యాత్రికుడా  . . .   ఓ యాత్రికుడా

  తెలుసుకొను    నీ   గమ్యం .


• ఆత్మంటే     అర్దం    ఎరుగక

  ఆత్మీయత లని     ఎగిరే

  నీ  ప్రేమా పాశాలు   నాటకాలు .


• సంసారం    ఓ   జీవిత సారం

  అదే   నీకు   వేదం .


• ఓ  యాత్రికుడా  . . .   ఓ యాత్రికుడా

  తెలుసుకొను    నీ  గమ్యం .


• అలుపెరుగని    కోరికల    కోసం

  వేసే  నీ   దారులు 

  మల్లెలు   పూసిన     ఊబి  నేలలు.


• వైరాగ్యం     ఓ జీవన  రాగం .

  అదే    నీకు   భోగం .


• ఓ యాత్రికుడా   . . .   ఓ యాత్రికుడా

  తెలుసుకొను    నీ గమ్యం .


• నామ రూపాల    కీర్తనలు 

  నిను  నట్టేటను    ముంచే

  మాయా    నావలు .


• ఆనందం    ఓ   అంతఃరసం 

  అదే   నీకు    కైవల్యం .


• ఓ  యాత్రికుడా   . . .   ఓ  యాత్రికుడా

  తెలుసుకొను   నీ  గమ్యం .


• భావోద్వేగాల    అలజడులు

  నీ  శక్తి     నిర్వీర్యకాలు.


• శాంతం     ఓ  సుఖం

  అదే   నీకు   రాజయోగం.


• ఓ యాత్రికుడా  . . .   ఓ యాత్రికుడా

  తెలుసుకొను    నీ గమ్యం .



కీర్తనలు = పొగడ్తలు 

అంతఃరసం  =  మనసు లో   ఊరేది .

కైవల్యం  = మోక్షం 


యడ్ల శ్రీనివాసరావు 10 APRIL 2025 10:00 AM.



Tuesday, April 8, 2025

618. వెలుగు రేఖలు

 

వెలుగు రేఖలు 


• ఎన్నో   జన్మల    భాగ్యం

  ఈ   వెలుగు   రేఖలు  .


• అలసిన    వారే      తీరం    చేరును .

  సొలసిన   వారికే    అమృతం   దొరకును .


• తీరం తో     తనివి   తీరుతుంది       తనువు .

  అమృతం తో    అమరం  అవుతుంది    ఆత్మ .


• ఎన్నో    జన్మల    భాగ్యం

  ఈ   వెలుగు    రేఖలు .


• ఓర్పు     సహనం

  రెండు కళ్లు    అయిన   నాడు

  కాలం

  నీ మనో   నేత్రమే  కదా .


• మాయా     మెరుపులు

  క్షణ   భంగుర    ఆకర్షణలు .

• రెప్పపాటులో    సత్   బుద్ధి ని

  ఆవిరి చేసే     నీటి  బుడగలు .


• ఎన్నో     జన్మల    భాగ్యం

  ఈ    వెలుగు   రేఖలు .


• అలసిన    వారే        తీరం      చేరును .

  సొలసిన   వారికే     అమృతం  దొరకును .


• తీరం తో       తనివి  తీరుతుంది     తనువు .

  అమృతం తో    అమరం  అవుతుంది     ఆత్మ .


• భ్రమలలో     బొంగరమై న

  బొమ్మ వే      కదా     నీవు .

• నీవి     కాని     

  ఉచ్ఛ్వాస    నిచ్ఛ్వాసలతో 

  నీవేమి        మోసుకెళతావు .


• ఎన్నో    జన్మల    భాగ్యం

  ఈ    వెలుగు  రేఖలు .



అలసిన =  శ్రమ చేసిన

సొలసిన =  చెమ్మగిల్లిన


యడ్ల శ్రీనివాసరావు  7 APR 2025  3:30 AM


Monday, April 7, 2025

617. ఏకరసము

 

ఏకరసము 



• సాగే   నీ సమయం    సంబరం

 అది    చేర్చును    నిన్ను అంబరం .


• అవని లో    అందలం   ఎక్కినా

  మోసే   నలుగురికి    భారం .

• ఆ   భారం    అవుతుంది

  తిరిగి     నీకు    ఓ బుణం .


• రాజయోగ   సాధనతో   కావాలి

  నీవొక    సూక్ష్మ    స్వరూపం .

• బిందువు గా     మారి

  జ్ఞాన  సింధువు లో    కలిసి

  చేరాలి    విశ్వనాథుని    సన్నిధి .


• సాగే      నీ సమయం     సంబరం

  అది      చేర్చును    నిన్ను  అంబరం .


• వైకల్యపు     కర్మ    ఫలితాలు

  మోయలేని    భారం .

• ఆ భారం తో      భూమి ని

  విడవడం     నరకం .


• ఏకరసమై    కావాలి    శివ సంధానం .

  అది    చేర్చును   నిన్ను   అంబరం .


• సాగే    నీ   సమయం   సంబరం

  అది   చేర్చును    నిన్ను  అంబరం .



అవని = భూమి

అంబరం = ఆకాశం.

అందలం = పల్లకి

ఏకరసము = ఒకే ఒక మానసిక స్థితి.


యడ్ల శ్రీనివాసరావు 4 APR 2025 9:00 AM.



Sunday, April 6, 2025

616. శరణుచ్ఛు వాడు

 

శరణుచ్ఛు వాడు


• శిల లో    లేడు    శివుడు . . .

  శిల లో     లేడు .

• శరణుచ్ఛు      శివుడు

  శిలలో      లేడు .


• నీ జననం లో     తండ్రి యై 

  జన్మాంతరాలు   విడువక   ఉన్నాడు.

• పాప గా    లాలిస్తూ

  కనుపాప గా     ప్రేమిస్తూ   ఉన్నాడు .

• శయ్య న       నీడవుతూ 

  నీ   మరణ శయ్య న    తోడున్నాడు .


• శిల లో    లేడు    శివుడు . . .

  శిల లో    లేడు.

• శరణుచ్ఛు     శివుడు

  శిలలో     లేడు .


• ఆలోచన లలో    శివుడు  ఉంటే

  అంబరం     ఎక్కుతారు .

• ఆదమరచి   ఉంటే    మాయకు

  ఆహారం    అవుతారు .


• నీ   ఈతి  బాధలన్నీ    చేసిన

  కర్మల   ఫలితాలు .

• అవి   శివుని    యోగాగ్ని   తోనే

  హారతి     అగును  .


• అడగనిదే    అమ్మ

  అన్నము   పెట్టునా .

• పిలవనిదే    శివుడు

  పిల్లలకు    పలుకునా .


• శిల లో     లేడు   శివుడు . . .

  శిల లో    లేడు.

• శరణుచ్ఛు      శివుడు

  శిల లో     లేడు.


• కనులకు    కానరాని    శివుడు

  మనసుకి    మధురానుభూతి  నిస్తాడు .

• స్పర్శ కి      తాకలేని      శివుడు

  దేహాన్ని    పరవశింప    చేస్తాడు .


• శివ   నామ    స్మరణం

  సుఖ   శాంతుల    సంగమం .

• శివ   గీతా    సారం

  పాప   పుణ్యాల  జ్ఞానం .


• శిల లో    లేడు   శివుడు . . .

  శిలలో      లేడు .

• శరణుచ్ఛు     శివుడు

  శిల లో     లేడు .



శరణుచ్ఛు = రక్షణ ఇచ్చు

శయ్య  =  నిదుర, పడక 


యడ్ల శ్రీనివాసరావు   2  Apr 2025 6:00 AM


Saturday, April 5, 2025

615. సుపదం

 

సుపదం



• ఈ పదం    . . .   ఈ పదం

  ఓ    సుపథం .

• సత్య   శోభ    వికసితం 

  జీవాత్మ ల     అమృతం .


• ఈ పదం    . . .    ఈ పదం

  ఓ    సుపథం .

• విశ్వ మాత    ఆభరణం

  సాధన తో       సౌలభ్యం .


• పదనిసల కు    పల్లవి   కాదు   కానీ

  గాయనం తో

  ఇది    పరమ  పదం   . . .   పరమ  పదం .

• గారడీలు   చేయని     గాండీవం

  గురి తో     చేరును    గమ్యం .


• ఈ పదం    . . .    ఈ పదం

  ఓ    సుపథం .

• గారెలంత      మధురం

  పలుకుట   కిది    పాయసం .

• నిప్పు   లాంటి    నిజాలకు 

  ఇది   ఒక   శపథం   . . .   శపథం .


• ఈ    పదం

  మనసు   గతి కి    సదనం

  మధన     స్థితి కి    ఔషధం .


• ఈ     పదం

  శాంతి   నింపు     వదనం

  విశ్వం లో   వ్యాపించిన   తరంగం .


• ఈ పదం    . . .    ఈ పదం

  ఓ.  సుపథం .



సుపదం = స్పష్టమైన పలుకు , మంచి పదం

సుపథం = దివ్య మార్గం.

గాండీవం = అర్జునుని విల్లు.

శపథం = ప్రతిజ్ఞ.

సదనం = గృహం.

వదనం = ముఖ వర్చస్సు.


యడ్ల శ్రీనివాసరావు 1 APR 2025 , 9:00 PM.



Friday, April 4, 2025

614. సంతోషం – ఆనందం – ఎక్కడ ఎలా మనిషి కి శాశ్వతం ?

 

సంతోషం – ఆనందం – ఎక్కడ ఎలా 

మనిషి కి శాశ్వతం ?




• ఈ   ప్రపంచంలో   మనిషి   జీవించడానికి,  తన జీవితంలో   ఏది ఉన్నా  లేకపోయినా   ఒకటి మాత్రం తప్పకుండా  కావాలి .   అదే ఆనందం సంతోషం.  ఇది మనసును  ఉల్లాసంగా  ఉత్సాహంగా  శక్తి వంతం గా ఉంచుతుంది.   ఈ ఆనందం  అనేది  పొందలేని వారికి దాని  లోటు  ఏమిటో   తెలుస్తుంది.

• కానీ   ఈ ఆనందం కోసం  మనిషి  ప్రతీ చోటా తన స్పృహ లో   ఉన్న ఆలోచనలతో   నిత్యం   అనేక మార్గాలు   వెతుకుతూనే   ఉంటాడు.   ఎందుకంటే మనిషి కి   ఏది ఎంత  ఉన్నా సరే,   ఈ సంతోషం ఆనందం   అనేది    స్థిమితంగా,   స్థిరంగా   ఎక్కడా దొరకని   పరిస్థితుల్లో,   నేటి కాలం   ప్రతి మనిషి కి గడుస్తుంది  అనేది   పరమ సత్యం.

• సంతోషం,  ఆనందం కోసం,  శాంతి కోసం  కొందరు దేవాలయాలకి  వెళ్తారు.   కొందరు  ధనం వెచ్చించి పార్క్ లు ,  బీచ్ లు,   సినిమా లు,  విహర యాత్రలు చేస్తారు.   కొందరు  నచ్ఛిన  మనుషుల తో  కాలక్షేపం చేస్తూ  ఆనందం పొందాం ,  పొందుతున్నాం  అనే భ్రమ లో ఉంటారు.   కొందరు   ఏదొక వికారం, వ్యసనం,   మత్తు లో   మునుగుతూ   ఆనందం గా ఉన్నట్లు  తాత్కాలిక   అనుభూతి   పొందుతూ ఉంటారు.

• దేవాలయం   నుండి  తిరిగి ఇంటికి  రాగానే ఆ ప్రశాంతత,   ఆనందం,  శాంతి  ఆవిరి అయిపోతుంది. ఎందుకంటే  దేవాలయం లో  ఉండే  వాయుమండలం ఇంటిలో   ఉండదు.   అలాగే  తీర్ద యాత్రలు ,  విహర యాత్రలు,  సినిమాలు   వలన  తాత్కాలిక  ఆనందం లభిస్తుంది. వాటి  నుంచి   తిరిగి   ఇంటికి  రాగానే   మరలా  అదే పాత  మానసిక స్థితి.   ఇక తోటి,  సాటి మనుషుల తో చేసే  పిచ్చాపాటి  వ్యర్ద  కబుర్లు ,  కాలక్షేపం తో పొందేది   ఆనందం, సంతోషం   అనడం   కంటే కూడా దుఃఖం  అనే విషయం   క్రమేపీ   కొన్ని రోజులు తరువాత  వారితో   ఏదొక వివాదం,  అభిప్రాయ భేదం  వచ్ఛిన  తరువాత  స్పష్టం గా  అర్దం అవుతుంది.   అసలు  ఎవరైనా  ఒక మనిషి   కల్మషం, అపవిత్రత ,  వికారాలు  కలిగి ఉన్నప్పుడు  మరొకరికి సత్యమైన  ఆనందం,  సంతోషం  ఎలా పంచగలడు …. ఆలోచించండి.

• పైన  చెప్పిన  వీటన్నింటి ద్వారా   మనిషి  పొందే ఆనందం  శాశ్వతం  అయితే  కనుక  ఏ మనిషి  కూడా   ఈ లోకం లో   దుఃఖం  అనే మాట  కనీసం ఎరుగడు.   కానీ   నేటి కాలంలో  ఎవరిని పలకరించినా,   ఎలా ఉన్నారు  అని  అడిగితే నటిస్తూ,   నవ్వుతూ  . . . బాగున్నాను  అని  మాట వరుసకు  అంటారు కానీ,   అది  మనసు  లోతుల్లో నుంచి  అణువంత   కూడా రాదు.   కొంత  సమయం వారితో  గడిపితే ,  వారి  మాటల్లోనే  వారి  దుఃఖం, అసహనం,  సమస్యలు   ఏమిటో  వ్యక్తం చేస్తారు.

• మనిషి కి  మనసు  లోతుల్లో   నుంచి  వచ్చే సహజమైన  ఆనందం  మరియు  సంతోషం  స్థిత ప్రజ్ణత తో   ఉంటుంది.  దానిని  ఆ మనిషి   తన మాట,   ముఖ కవళికలు ,   నవ్వు తో  వ్యక్తపరిచడం  కంటే   కూడా ,   మౌనంతో నే   సహజ సిద్ధమైన  ఉనికి  ( వైబ్రేషన్స్ )   ద్వారా   ఆ వ్యక్తిలో  నిండి ఉన్న ఆనందం,  సంతోషం  ఎదుటి వారిలో సహజంగా  అనుభవం అయిపోతూ ఉంటుంది.  దీనినే  ఆరా మరియు   హీలింగ్  ఎనర్జీ  అని కూడా అంటారు. ఇది ఒక అద్భుతం.


డబ్బు వెచ్చిస్తేనే  ఆనందం దొరుకుతుందా ? 

  మరి డబ్బు లేని వారి పరిస్థితి ఏమిటి ?.

• అసలు నేడు మనిషి కి దొరుకుతున్న ఆనందం అంతా శాశ్వతం అయితే కనుక . . . కొత్త పుంతలు తొక్కుతూ , కొత్త మార్గాలు వెతుకుతూ , ఆనందం కోసం   ప్రయత్నాలు,  ప్రణాళికలు (plans) వేయ వలసిన అవసరం , స్థితి  ఎందుకు?

• ఆనందం అనేది   వెతికితే   దొరికేది   కాదు , డబ్బు ఖర్చు చేస్తేనో   లేక  డబ్బు తో   కొంటేనో   లభించేది అంత  కన్నా కాదు.   అలాగే  మనుషుల  సహచర్యం, సాంగత్యం వలన  లభించేది కూడా కాదు.  మనిషి తన బాధలు,  సమస్యలు,  దుఃఖం నుండి తప్పించుకునేందుకు  తాత్కాలికంగా  ఉపశమనం పొందేందుకు   ఆనందం , సంతోషం అనే  ముసుగులో  ఈ రకరకాల  విన్యాసాలు,  పార్టీలు చేస్తూ  ఉంటాడు.   

ఆ కాస్త సమయం  అయిపొయాక  మరలా  కధ మొదటికే వస్తుంది. లక్ష రూపాయలు ఖర్చు చేసి ఎదో తీర్ద యాత్రలు , విహార యాత్రలు  చేసి తిరిగి వచ్చిన తరువాత   అక్కడ  పొందిన  ఆనందం ఆక్షణం వరకే మరియు   నాలుగు రోజుల కి  అనవసరంగా  లక్ష రూపాయలు  ఖర్చు చేసాను  అనే  ఆలోచనే మిగులు తుంది . ఇది మానవ నైజం .


• దీనంతటికీ  కారణం మనిషి కి,  ఆనందం, సంతోషం అంటే  ఏమిటో యధార్థంగా   తెలియక పోవడమే.


• ఆనందం అనేది   మనసు యొక్క భావోద్వేగం.  ఇది ధనం వలన ,  చుట్టూ ఉండే  పరిస్థితుల  వలన , వ్యక్తుల వలన   దొరికేది కాదు.  ఒకవేళ  దొరికింది  అని  ఎవరైనా అనుకుంటూ   ఉన్నా సరే   అది ముమ్మాటికీ  క్షణభంగురం ,  తాత్కాలికం.


• మనసు యొక్క స్థితి  స్థిమితంగా,    స్థిరంగా, శాంతంగా,  వాస్తవికత లో  ఉంచుకో గలిగితే ప్రతి మనిషి కి అనుక్షణం,  నిత్యం పరమానందమే . దీనికి నయా పైసా   ఖర్చు ఉండదు.   ఏ మనిషి తోను కాలక్షేపం  చేయనవసరం లేదు.  ఏ ప్రదేశాలు  తిరగ నవసరం  లేదు.   ఎవరి సాంగత్యం పై  ఆధారపడ వలసిన  అవసరం ఉండదు.


• మతి స్థిరం గా లేనప్పుడు,   మనసు  భ్రమిస్తూ ఉంటుంది.  ఆలోచనలలో  గందరగోళం ఏర్పడుతుంది.  దానితో   సమస్యల  వలయం  ఏర్పడుతుంది.  తద్వారా   ఆనందం  సంతోషం కరువు  అవుతుంది.  తదుపరి చెడు కర్మలు  చేయడం జరుగుతుంది.   మనిషి   జన్మ జన్మలు గా కొన్ని  కుసంస్కారాలకు  అలవాటు పడి పోయి,  అవే ఆలోచనలతో   కొట్టుమిట్టాడుతూ   ఉంటాడు.  కానీ వాటి నుంచి  పూర్తిగా బయటకు వచ్చి  ఆలోచన చేసిన నాడు,    తన పట్ల తనకే  నవ్వు వస్తుంది. ఎందుకంటే  తాను ఎంత  అమాయకంగా  ఇన్నాళ్లు ఉండిపోయాను అని.


• శాశ్వతమైన ఆనందం అంటే . . .

  నిత్యం మనిషి తనలో తాను రమించడం. (రమించడం అంటే అద్వితీయమైన స్థితి.)

  మౌనం గా ఉంటూనే ప్రకృతి ద్వారా తన ఆలోచనలలో ఉన్న శక్తి ని నలువైపులా విస్తరింప చేయడం.

  కేవలం  తన దృష్టితో  సమస్తాన్ని ఆనంద సాగరంలో ముంచడం.


• కల్మషం లేని జీవులతో , కలుషితం కాని ప్రకృతి తో అనుసంధానం అవడం వలన శక్తి తో కూడిన ఆనందం లభిస్తుంది.

  అనగా చిన్న పిల్లలు, మూగ జీవాలు. కోకిల రాగం , కుక్క పిల్లలు, పిల్లి పిల్లలు , నదీ తీరాలు, పంట పొలాలు, వెన్నెల రాత్రులు, పూల వనాలు, పుష్పాలు, సాయం సంధ్య, సూర్యోదయం, నీటి అలలు, ఇసుకలో నడవడం, పక్షులతో సంభాషించడం, పచ్చని గడ్డిలో సేద తీరడం , ఆకాశం లో మేఘాలను తదేకంగా చూడడం , సంగీతం వినడం వంటివి మనిషి ఏకాంతం గా, ఒంటరిగా చేస్తూ ఉంటే మనసు కోల్పోయిన ఆనందం, సంతోషం , శక్తి  తిరిగి పొందుతూనే ఉంటుంది. ….. ఇలా చేయడం సాధ్యం కాకపోతే, కనీసం ఏకాంతం గా, ఒంటరిగా కూర్చొని కళ్లు మూసుకుని ప్రశాంతంగా వీటన్నింటినీ నిత్యం ఊహించుకున్నా చాలు, తెలియని సంతోషం, ఆనందం, శక్తి మనసు పొందుతూ ఉంటుంది.


• ఓ మనిషి  . . .  ఆనందం, సంతోషం  అనేవి ఎక్కడో ఎక్కడో   లేనే లేవు.  అవి నీ లోనే . . . నీ లో లో నే . . . నీ మనసు  లోతుల్లో నే  విస్తారంగా   అనాదిగా కప్పబడి పోయి ఉన్నాయి.   నిన్ను నువ్వు ఒకసారి బాగా తవ్వుకుని,   నీ లోని  వ్యర్ధాన్ని  ఏరి  పారేసిన నాడు,  నీ లో   నిక్షిప్తమై   ఉన్న   అనంతమైన శాశ్వతమైన   ఆనంద  నిధులు  బయటపడతాయి. అవి నీకు,  నీ చుట్టూ ఉన్న వారికి  మరియు ప్రకృతి కి,   విశ్వానికి  ఉపయోగం అవుతూ సహ యోగం చేస్తాయి.

• ఓ మనిషి . . . తాత్కాలిక సుఖాలు, విలాసాలు అనబడే  వాటి కోసం  ఇంకా ఎంతకాలం  అని ధనం, సమయం,  జీవితం ,  కాలం ,  జన్మలు  వృధా చేసుకుంటావు  . . .  నిన్ను  నువ్వు  మోసం చేసుకొని నువ్వు  సాధించేది  ఏమిటి .


• శాశ్వతమైన ఆనందం సంతోషం పొందడం కోసం అసలు  నీ వెవరో  నువ్వు తెలుసుకో.  నువ్వు గతంలో ఏం చేసినా ,  ప్రస్తుతం ఏం  చేస్తున్నా  సరే  నిన్ను నువ్వు  నిజాయితీగా అంగీకరించడం నేర్చుకో. ఇతరుల లోపాలు  ఎంత సూక్ష్మంగా చూడగలవో  అదే విధంగా  నీ లో  లోపాలను  స్పష్టం గా చూడడం నేర్చుకో.   ఎందుకంటే  నీ లోపాల పై  ఏదొక రోజు నీకే అసహ్యం వేసినప్పుడు,   వాటి మూలాలను   వేర్ల తో తీసి పడేసిన నాడు   నువ్వు వికసించే  కమలం లా తయారవుతావు.

  ఆ రోజు … ఆ రోజు … ఆనందం, సంతోషం రెండు కూడా వెతుక్కుంటూ వెతుక్కుంటూ నీ చుట్టూ తిరుగుతూ ఉంటాయి.


• దీని అంతటి కోసం …. నిత్యం కొంత సమయం , శివ పరమాత్మ (సృష్టి కర్త శివుడు) తో ఏకాంతంగా , నిజాయితీగా   అనుసంధానం  అవడం తప్పని సరిగా అవసరం.   చేసిన పాప కర్మలు ఆయనకు చెప్పడం చాలా అవసరం. తిరిగి ఆ పాప కర్మలు చేయకుండా ఉండడం అవసరం. పశ్చాతాప స్థితి పొందడం అత్యంత  అవసరం.   మనసు లో మలినాలు తొలగితే నే   శాశ్వతమైన  ఆనందానికి  అర్హత లభిస్తుంది.


  యడ్ల శ్రీనివాసరావు  30 Mar 2025. 12:30 AM.




Monday, March 24, 2025

613. పద - నది

 

పద - నది


• పదమే     ఈ   పదమే

  నదమై   ఓ     నదమై 

  చేరెను    చెలి    సదనము.


• ఈ  అలల  కావ్యాలు   తరంగాలు 

  తాకుతునే    ఉన్నాయి   

  ఎన్నో     అంతరంగాలు .

• ఈ కలల   శ్రావ్యాలు    విహంగాలు 

  చేరుతునే     ఉన్నాయి    

  ఎన్నో     మనసు తీరాలు .


• మౌనం గా    విరిసాయి   వినువీధి లో.

  గారం గా     పిలిచాయి    మంజరినాదం తో .


• పదమే     ఈ   పదమే

  నదమై     ఓ     నదమై

  చేరెను    చెలి    సదనము.


• హద్ధు లే     లేని       ఈ విశ్వమంతా

  శుద్ధి తో    నిలిచాయి    పట్టుగొమ్మలై .

• పొద్దు     పొడవని      దేశాలను

  బుద్ధి తో    తాకాయి   పంచభూతాలై .


• ఆగని    ఈ పదం      ప్రగతి పథం

  రాసిన   ప్రతి  రచనం    జన రంజకం .


• గతించిన     నా   స్వ గతం

  దిశ    ఎరుగని     దిక్సూచి .

• అరవిరిసిన   ఈ   ప్రావీణ్యం

  నిశి     ఎరిగిన      సద్గతి .


• పదమే    ఈ    పదమే

  నదమై     ఓ      నదమై

  చేరెను    చెలి     సదనము .

• పదమే   ఈ        పదమే

  నదమై    ఓ    నదమై

  చేరెను    చెలి    సదనము .



🌹🌹🌹

సుమారు 80 కు  పైగా  దేశ విదేశాల లో  

విస్తృతంగా   నిత్యం 

ఆదరిస్తున్న   తెలుగు సాహితీ 

అభిమానులందరికీ   

నా మనస్సుమాంజలి 🙏

🌹🌹🌹


యడ్ల శ్రీనివాసరావు 25 March 2025 6:00 AM.

+91 9293926810.

612 . ఈ దేహం

 

ఈ  దేహం



• శివ  స్మరణం   . . .  శివ  స్మరణం

  బుద్ధి కి    తస్మతం .

• హరి  మననం  . . .   హరి   మననం

  సిద్ధి కి    సంకల్పం .


• శివుని   లోని    హరి

  విశ్వ     రాజ్యాధికారి.

• బుద్ధి    లోని     సిద్ది

  విఘ్న   విజయ   కారి.


• శివ   స్మరణం   . . .  శివ  స్మరణం

  బుద్ధి కి   తస్మతం .

• హరి   మననం  . . .  హరి   మననం

  సిద్ధి కి    సంకల్పం .


• లక్ష్మి   నారాయణుల    జీవనం

  ప్రకృతి    పురుషుల    ఆదర్శం .

• రాధా   కృష్ణుల    బృందావనం

  ఆలు  మగల     ప్రేమాన్వితం .


• బ్రహ్మం    బహు   జ్ఞానం .

  శంకరం    సృష్టి    లయకారం .

• రావణం    దశ వికారాల    కాష్టం .

  మాయం    అరిషడ్వర్గాల   వలయం .


• అష్ట  శక్తులు  

  ఆది శక్తి     ఉద్బోదకాలు .

• అష్ట   సిద్ధులు  

  అర్థనారీశ్వరుని    ఆవిర్భావాలు.


• సర్వ    సారూప్యాల

  ఆవాహనం 

  ఈ దేహం   . . .   ఈ దేహం .


• శివ    స్మరణం   . . .  శివ  స్మరణం

  బుద్ధి కి    తస్మతం .

• హరి   మననం  . . .  హరి   మననం

  సిద్ధి కి     సంకల్పం .



తస్మతం = ముత్యాలు గుచ్ఛడం.


యడ్ల శ్రీనివాసరావు 24 March 2025 8:30 pm.




Friday, March 21, 2025

611. మా బడి - మా సుగుణాలు

 

మా  బడి -  మా  సుగుణాలు 



• మా   బడి ….   మా బడి

  మా   జీవన   యాన గుడి.


• బడి లోని    గురువు లందరూ   దేవతలు

  సుడి లేని    ఎందరికో     శ్రీకారం చుట్టారు.


• విలువలతో    తిలకం    దిద్దారు

  బుద్ధి     సంస్కారాలు    నేర్పారు .

• క్రమ శిక్షణ     ముఖ్యం    చేశారు

  క్రమం   తప్పితే    తాట    తీశారు .


• మా  బడి ….    మా బడి

  మా    జీవన   యాన గుడి.


• మా బడి   హర్షిస్తుంది   నేడు . . .

  మాయా  వ్యసన  వికారాల  బురదలో

  మేము  కూరుకు   పోలేదని .


• మా బడి    చెపుతుంది    నేడు . . .

  మేమంతా   తన కొంగు బంగారం  అని.


• విలువలను     పాటిస్తాం . . .

  అది    మా  మనస్సాక్షి కి    తెలుసు .

• తోటి    వారిని     ప్రేమిస్తాం . . .

  అది   పంచభూతాల కి    తెలుసు .


• సత్యాలనే     చెపుతుంటాం . . .

  అది    ఆ   పరమాత్మ కు    తెలుసు.

• నిరహంకార     నిర్మల    వీరులం . . .

  ఆది  మా   అంతరాత్మ కు     తెలుసు.


• గురువులను      ఆచరిస్తాం . . .

  అది   మా   నడవడిక కు    తెలుసు .

•  స్నేహానికి    ప్రాణం   ఇస్తాం . . .

   అది  మా   మిత్రులందరికీ   తెలుసు.

    

• బడి దిద్దిన   బ్రతుకు లు  మావి

  నేటికీ   బడి తోనే   ముడిపడి  ఉన్నాయి .


• మా బడి   ….   మా బడి

  మా  జీవన  యాన  గుడి .



యడ్ల శ్రీనివాసరావు 20 March 2025 7:00 PM



610. తారలలో సితారలు

 

తారలలో  సితారలు  



• నా బడి   రాగం    సరాగం

  సవ్వడి   చేసే     నేడు   ఆనందం .


• తారలలో     సితారలు    రెండున్నాయి .

  ధృవ తార     ఇన్నయ్య   ఫాదర్

  దివ్య తార    జోజిబాబు   ఫాదర్          (2)


• ఆ   సితార ల    వెలుగు   మా   భాగ్యం .

  వారు  చూపిన   ప్రకాశం   మా  జీవన  యానం .


• విలువలెన్నో      నేర్పించారు . . .

  వరములు     ధారణ   చేశారు .

• ఆచరించిన    వారందరూ 

  అయ్యారు   భాగ్య శాలురు .


• క్రమ శిక్షణ    చొప్పించారు . . .

  కరుణను    వరుణం    చేశారు .   

• పాటించిన     వారందరూ

  అయ్యారు  ఎందరికో   మార్గదర్శకం  .


• నా బడి     రాగం    సరాగం 

  సవ్వడి    చేసే     నేడు   ఆనందం .


• తారలలో    సితారలు    రెండున్నాయి .

  ధృవ తార     ఇన్నయ్య    ఫాదర్

  దివ్య తార     జోజిబాబు ఫాదర్          (2)


తారలెన్నో    చూస్తున్నాయి 

  నేడు

  ఆ    సితారల     వైపు .

• విశ్వమంతా     వీస్తున్నాయి

  నేడు

  వారి    ప్రేమ     పరిమళాలు .


• తారలెన్నో     పిలుస్తున్నాయి 

  నేడు

  ఆ   సితారల    కోసం  .

• విశ్వమంతా   నిండి ఉన్నాయి 

  నేడు

  వారి     సేవా    సైన్యం.


• నా   బడి     రాగం    సరాగం

  సవ్వడి    చేసే    నేడు    ఆనందం.

• నా బడి     రాగం     సరాగం

  సవ్వడి   చేసే     నేడు     ఆనందం.



యడ్ల శ్రీనివాసరావు  18 March 2025 , 

2:00 PM

.


Sunday, March 16, 2025

609. తాండవ తన్మయం

 

తాండవ  తన్మయం 


• తాండవం         తన్మయం

  శివ తాండవం    తన్మయం .


• తాండవమే     అభినయాల    ఆనంద  హేల .

  తాండవమే      పరవశాల        ప్రదర్శన లీల .


• భావాలు       . . .      భంగిమలు

  అభిరుచులు  . . .    ఆస్వాదనలు 

  ఉద్వేగాలు    . . .    ఉపమానాలు


• శివుని    వదనం        చంద్ర    బింబం

  నఖశిఖ   పర్యంతం    తేజో విలాసం .

• ముని   మౌనం         మహిమాన్వితం 

  లయకర  వలయం     విశ్వ తరంగం.


• తాండవం       తన్మయం

  శివ తాండవం   తన్మయం .


తాండవమే     జీవ     కళా  సౌజన్యం .   

  తాండవమే     దివ్య   సృష్టి   రూపకం .


•  త్రి శూలం          . . .    త్రిగుణ ఆత్మకం.

   అర్ధ నారీశ్వరం  . . .     అగ్ని  హోత్రం

   అఖండం           . . .     జ్యోతి  స్వరూపం .


• శివుని  రహస్యం       సృష్టి   చేతనం

  నృత్య  రూపకం        కళా   విన్యాసం .

• ఢమరుక నాదం       సింహ స్వప్నం

  మాయా మోహం      శంకరగిరి మాన్యం .


• తాండవం        తన్మయం

  శివ తాండవం      తన్మయం .

• తాండవం         శత్రు సంహారం 

  శివ తాండవం      లయకరం .

• తాండవం         శత్రు   శేషం 

  శివ తాండవం   స్థితి    ఆవిర్భావం .



లయకర వలయం  = ఆరా


యడ్ల శ్రీనివాసరావు 15 March 2025 6:00 pm.






Tuesday, March 11, 2025

608. విధి - నిర్వాణం

 

విధి - నిర్వాణం 




• నాది   . . .   నాది

  నాదన్నది     ఏది .

• నేను   . . .   నేను

  నాకున్నది    ఎవరు .


• నిన్న      ఉన్నాను   

  కానీ   

  ఆ నిన్న    నేడు   లేదు .

• నేడు     ఉన్నాను    

  కానీ 

  రేపు   ఉంటానో    లేదో  తెలియదు  . . .


• నాది   . . .   నాది

  నాదన్నది     ఏది .

• నేను   . . .   నేను

  నాకున్నది   ఎవరు .


• నాదన్నది    అంతా

  నా   మనో నేత్రం   లో నే   ఉంది .

• నాకున్నది    అంతా 

  నా   తండ్రి    శివుడు .


• నేనొక     పూర్వజు  ను

  అనుభవాల   నిధి   నా సంపద .

• ఇహ  లోక   ఘటన లెన్నో 

  గత  స్మృతులు    తెరిచాయి .


• దృష్టి తో    రాసిన   

  సృష్టి      రచనలే

  ఈ  సంతుష్ట   పరిచయం.

• విఘ్నాలు    అన్నీ 

  విజయం  గా   మారాయి .


• కర్మల   ఖాతాల   చెల్లింపు  కోసం

  నిమిత్తమై   ఉన్నాను .

• అవి   ముగిసిన   తక్షణం

  నా సొంత   ఇంటికి   వెళతాను .

• బుణం    తీరిన    వారు

  నా మజిలీ ని     దాటారు .

  ఇక   తీరవలసిన   వారు    

  ఇంకొందరే   . . .


• నాది   . . .   నాది

  నాదన్నది     ఏది .

• నేను   . . .   నేను

  నాకున్నది    ఎవరు .


• మూలాల    స్పష్టత       సుకృతం.

  ఈ  జీవిత  పయనం    అత్యద్భుతం.

• ఈ గమ్యము    బహు   సుందరం 

  అది   దివ్య భరిత    సుగంధం.


• నాది   . . .   నాది

  నాదన్నదంతా    

  నా  తో నే   ఉంది  .

• నేను   . . .    నేను

  నాకున్నదంతా  

  నా   తండ్రి   శివుడే .  

  


విధి  =  నిర్వర్తించ  వలసిన కర్మ

నిర్వాణం  = ముక్తి ,  మరణం.

పూర్వజ = పూర్వ యుగాల నుంచి అనేక జనన మరణాలు  ఎత్తిన  ఆత్మ.

మజిలీ = జీవిత ప్రయాణంలో విడిది చేసిన చోటు.


ఓం నమఃశివాయ 🙏

ఓం శాంతి ☮️.

యడ్ల శ్రీనివాసరావు 11 March 2025 10:00 PM


Monday, March 10, 2025

607. దాది హృదయ మోహిని

 

దాది హృదయ మోహిని



• మధురం   మధురం

  మీ  దీవెనలు  మధురం.

• యజ్ఞ   సేవ లో

  శివుని కి   రధం   అయిన

  మీరు

  మాకు   ఎంతో  మధురం.


• మధురం    మధురం

  మీ  హృదయ   మోహనం

  మధురం.

• భావి  ఆత్మల   పురుషార్ధాని కి

  మీ   దివ్య ప్రేరణ

  మాకు   ఎంతో   మధురం.


• నవ వర్షం లో     శ్రీ కృష్ణ

  సాక్షాత్కారం     మీ  భాగ్యం.

• చిరునవ్వుతో     చిరంజీవిగా

  చేయడం     మీ  మహాన్నత్యం.


• వ్యర్దం   అంటే   అర్దం   తెలియని

  మీ  రూపం     దైవ  స్వరూపం.

• దేహం లో   ఓ  దేవత 

  అనుటకు   మీరే  నిదర్శనం.


• మధురం    మధురం

  మీ   దీవెనలు    మధురం.

• యజ్ఞ   సేవ లో

  శివుని కి   రధం  అయిన

  మీరు

  మాకు  ఎంతో  మధురం.


• త్యాగం   అంటే    భోగమని 

  యోగం   అంటే    రాజసమని

  సేవ       అంటే   సౌందర్యమని 

  సాకారం   చేసారు.


• నారి  యే  విశ్వ శక్తి   అని

  నవ  వసంత   స్థాపన  చేసారు.

• కళ్యాణ  కారిగా   

  మా మది లో   కొలువయ్యారు.


• మధురం    మధురం

  మీ   దీవెనలు   మధురం.

• యజ్ఞ    సేవ లో

  శివుని కి    రధం    అయిన

  మీరు

  మాకు   ఎంతో   మధురం.


గుల్జార్ దాది  అవ్యక్త దినం 11 March 2021. 

ఆ రోజు మహా శివరాత్రి పర్వదినం.


యడ్ల శ్రీనివాసరావు 11 March 2025 10:30 AM.


624 . గోదారి బంగారం

   గోదారి  బంగారం • దినచర్యలో  భాగంగా నే  యధావిధిగా   సాయంత్రం 5 గంటలకు ,  సరస్వతి ఘాట్ లో   వాకింగ్ కి వచ్చాను.    గేటు దాటి  ఘాట్ లోనికి  ...