Monday, July 28, 2025

672 . ఆనంద నంద రాగం

 

ఆనంద నంద రాగం


• ఆనంద   నంద   రాగం

  ప్రభు  ప్రేమ   సేద   సదనం .

  అదవదము        అంతకరము

  అనునయము    అంబరాంతము .


• ఆనంద     నంద    రాగం

  ప్రభు  ప్రేమ  సేద    సదనం .


• ఏకాంత    స్మృతి న    మౌనం

  శివ    సంధాన     ప్రియం .

  అంతరము న    జీవ   యానం

  దరహస   నిధి    సోపానం .


• ఆత్మ   పరమాత్మ ల   మిలనం

  హోళీ ల    కేళి    మధురం .

  అంతఃకరణ    ఈ   బంధం

  జన్మాంతరాల    సత్యం .


• ఆనంద   నంద    రాగం

  ప్రభు   ప్రేమ   సేద   సదనం .


• సంతోష     సావధానం

  జీవన్ముక్తి     సౌఖ్యం .

  రాజ    యోగాభ్యాసం

  ప్రభు   హృదయాన్వితం .


• ఆస్వాదన ల    శివం

  జ్ఞానామృతా ల   ధారణం .

  సుందరుని   చేరు    ఈ సమయం

  భాగ్య   రేఖల     స్వ గతం .


• ఆనంద    నంద    రాగం

  ప్రభు   ప్రేమ  సేద   సదనం .



  అదవదము = కలత , దుఃఖం

  అంతకరం   = సమూల సమాప్తం .

  అనునయం  = ఉపశమనం , ఓదార్పు 

  అంబరాంతము = ఆకాశం అంచు

  అంతఃకరణ  = మనసు  సాధనం 


యడ్ల శ్రీనివాసరావు 28 July 2025 11:00 AM.


Saturday, July 26, 2025

671. ఆత్మాభిమానం అహంకారం

 

ఆత్మాభిమానం - అహంకారం


• మానవుని కి , సహచరులతో గాని మరెవరి తో నైనా వాగ్వివాదం సంభవించినపుడు మనసు లోపలి నుంచి తెర మీద కి వచ్చే అంశం , ఒకటి ఆత్మాభిమానం . రెండవది అహంకారం .

 కానీ ఈ రెండింటి మధ్య ఉన్న వ్యత్యాసం నేటి మానవుడు గ్రహించలేని అంధకారంలో మనో స్థితి ఉండడం వలన మరియు , ఆత్మాభిమానం అనే పదాన్ని  సమాజం లో తరచూ వింటూ ఉండడం వలన , ఆ పదాన్ని మనసు కి అన్వయం చేసుకొని తాను వివాదానికి గురైనప్పుడు నా ఆత్మాభిమానం దెబ్బ తింది అనే మాట ను వ్యక్తపరచడం చాలా మంది వ్యక్తుల తరచూ వినడం చూడడం జరుగుతుంది .


• ఎందుకంటే సాధారణంగా మనిషి కి ఇతరుల తో వివాదం సంభవించినపుడు తాను పూర్తిగా తన శరీరాన్ని అభిమానించే  స్థితి లో ఉంటాడు . . . ఈ దేహభిమాన స్థితి , ఎదుటి వ్యక్తి పై కోపం పెంచుతుంది , లేదా తాను పొందిన అవమానాన్ని సహించుకోలేక  దుఃఖం, అసహనాన్ని బయటకు వ్యక్తం చేసేలా చేస్తుంది .


• ఎవరైనా నిందించినపుడు అవమాన భారంతో ఉద్వేగం పొంది , “నేను” అనే శరీర భావన , ఆలోచన ఉండడం వలన ,  తానొక ఆత్మ అనే స్పృహ కనీసం ఆ మనిషి కి స్పురణలో కి రాదు .

మరి అటువంటప్పుడు నా ఆత్మాభిమానం దెబ్బ తింది అని ఇతరులతో చెప్పడం ఎంత వరకు సమంజసం ? వాస్తవానికి ఇది ఒక అవగాహన లోపం. ఎందుకంటే ఆ మనిషి కి ఆత్మ అంటే ఏమిటో తెలియదు కాబట్టి. “ నేను “ అనబడే తన శరీరాన్నే పొరపాటున ఆత్మ గా భావించడం జరుగుతుంది.


• వాస్తవానికి మనిషికి ఆ దశలో వచ్చేది కోపం మరియు అహంకారం. అహంకారం వచ్చినప్పుడు తన అంతర్గత స్థితి , నన్ను నిందిస్తారా  . . . నన్ను అవమాన పరుస్తారా . . . నన్ను మోసం చేస్తారా అనే ఉద్రేక భరితమైన ఉద్వేగాలు బయటకు వస్తాయి. దురదృష్టం ఏమిటంటే  ఇదే ఆత్మాభిమానం అని అనుకుంటాడు ఆ మనిషి .

• నాకు ఆత్మాభిమానం ఎక్కువ, నేను ఎవరిని మాట అనను, నన్ను మాట అంటే పడను అని కొందరు అంటారు .   ఇది పొరపాటు , ఆత్మాభిమాని  ఎవరినీ ఒక మాట అనడు . . . తనను ఎవరైనా ఒక మాట అనినా  పట్టించుకోడు . 

 అసలు ఆత్మాభిమానానికి అర్దం తెలియక పోవడానికి  కారణం ,  అహంకారం .

• ఆత్మ యొక్క స్వధర్మం శాంతి . అంటే ఆత్మ ఎప్పుడూ కూడా , ఏం జరిగినా సరే శాంతి గా ఉంటుంది, శాంతి నే కోరుకుంటుంది. శాంతి అనేది ఆత్మ ఆచరించ వలసిన ధర్మం . 

• మరి మనిషి తనకు ఆత్మాభిమానం ఎక్కువ, అన్నప్పుడు తనకు ఎటువంటి విపత్కర పరిస్థితి ఎదురైనా చిరునవ్వుతో, శాంతి గా నే  ఉండాలి, ఉంటాడు .   మౌనం తో ఆ శాంతి ని అనుభవం చేసుకొని ,  ఆత్మ అభిమాని గా అవుతాడు. ఆత్మాభిమానం ఉన్న వారు దేనికి వెంటనే స్పందించరు , React అవ్వరు. ఎప్పుడూ proactive గానే ఉంటారు. 

ఆత్మాభిమానం ఉన్న వారు ఎవరితోనైనా ఏదైనా సమస్య గాని,  వివాదం గాని , పరిస్థితులు చేతులు దాటి మితిమీరుతున్నప్పుడు  వారికి దూరంగా మౌనం గా ఉంటారు. అంతే కానీ తమలో తాము ఏ విధమైన ఉద్రేకాన్ని పొందరు . పైగా ఎదుటి వారి మానసిక దీనావస్థ , స్థితి పట్ల జాలి కలిగి ఉంటారు . ఎదుటి వారు మరిన్ని పొరపాట్లు , చెడు కర్మలు చేయకుండా ఉండేందుకు ,  నిమిత్తమై  వారికి దూరంగా ఉంటారు.

• మనిషి లో అహంకారం ఒక స్థాయి ని మించి ఉన్నప్పుడు, అనేక రకాల భాష పదజాలంతో , మాటలతో , చేతలతో , సభ్య సమాజం హర్షించని  సంస్కారాల తో ప్రతిస్పందిస్తారు , React అవుతారు.

• మనిషి యొక్క స్పృహ ఆత్మాభిమానానికి , అహంకారానికి మధ్య ఉన్న వ్యత్యాసం యధార్థం గా గమనించుకో  గలిగే  స్థితి పొంది ఉంటే , జరిగిన  జరుగుతున్న  జరగబోయే ఎటువంటి విషయాల పట్ల నైనా క్షోభ , ఆందోళన , ఉత్సుకత,  ఉత్సాహం  వంటి   ఏ విధమైన  భావోద్వేగాలకు  గురి కాకుండా  సాక్షి భూతమై నిమిత్తమాత్రమై  ఆనందంగా తన పని తాను చేసుకుంటూ  జీవిస్తాడు .


యడ్ల శ్రీనివాసరావు 27 July 2025 , 9:30 AM.

Thursday, July 24, 2025

670. అసలు శివుడి తో నాకేం పని ?

అసలు శివుడి తో  నాకేం పని ?


• శివుడు అర్థనారీశ్వరుడు .  శివుని లో   స్త్రీ , పురుష శక్తి సమానం గా ఉంది అని అర్దం . అందుకే శివుడిని తల్లి మరియు తండ్రి గా భావిస్తాము .

 ఈ అనంతమైన విశ్వ సృష్టి శివుని ద్వారా జరిగింది. నేటి మానవులందరూ శివుని సంతానం అనే విషయం జగమెరిగిన సత్యం .

• శివుడు విశ్వ కళ్యాణ కారి. ప్రేమ సాగరుడు, జ్ఞాన సాగరుడు. దుఃఖ హర్త   సుఖ కర్త , దుఃఖం హరించి సుఖాన్ని పంచేవాడు .  నిరాడంబరుడు. వరములను దానం గా ఇచ్చే వరదాని .  దివ్య గుణాలు, దివ్య శక్తులు ఇవన్నీయు శివుని యొక్క ఆస్తి , సంపదలు .


• ఈ భౌతిక ప్రపంచంలో ఏ తండ్రి అయినా తాను సంపాదించిన ఆస్తిని పిల్లల కి వారసత్వం గా పంచినట్లే  , సృష్టి కర్త శివుడు కూడా తన అపారమైన వారసత్వ సంపదలను , ఆస్తిని తన సంతానం అయిన మనకు ఏనాడో పంచేశాడు .

అందుకు నిదర్శనం,  నేటి మానవులు కొన్ని యుగాల క్రితం అనగా సత్య త్రేతా యుగాలలో  శివుని వారసత్వ సంపదగా లభించిన  దైవీ లక్షణాలు, గుణాలు కలిగి ఉండడం వలన దేవతలు గా ఉండే వారు .

 అప్పుడు వారు ఆచరించిన ధర్మమే  . . . 

“ ఆది సనాతన దేవి దేవతా ధర్మం. ”


• మరి ఆ పరంపర లోని మనిషి ,  నేడు తన తండ్రి శివుని వలే , తనకు తాను శుభకరం గా ఉంటూ , తన కుటుంబానికి మరియు ఇతరులకు శుభం కలిగిస్తూ , అందరికీ సహాయకారిగా ఉంటూ జీవిస్తున్నాడా ?

• శివుని వలే అనంతమైన ప్రేమ ను మనసు యందు కలిగి , కుటుంబం లో , సమాజం లో ప్రతి ఒక్కరినీ సంబాళన చేయగలుగుతున్నాడా ?

• శివుని యొక్క విశిష్ట జ్ఞానం ఆచరిస్తూ , మాయ ద్వారా సృష్టించబడిన తన సమస్యలు తానే పరిష్కరించు కుంటూ నేడు ఆనందం గా జీవిస్తున్నాడా ?

• శివుని వలే . . . దుఃఖం లో ఉన్న సాటి వారిని అక్కున చేర్చుకుని మనసు తో , మాటతో దివ్య అనుభూతి నిచ్చి నీకు నేనున్నాను అనే మనోధైర్యాన్ని అభయహస్తాన్ని , వరదానం ఎవరికైనా ఇవ్వ గలుగుతున్నాడా ?

• శివుని వలే , నిరాడంబర జీవనం నేడు మానవులు  సాగిస్తున్నారా ?

• శివుని వలే , దివ్య శక్తి గుణాల తో సుసంపన్నం గా ఉంటున్నారా ? 


ఒకప్పుడు శివుని నుండి పొందిన , ఈ వారసత్వ సంపదలను ద్వాపర యుగం నుంచి క్రమేపీ కోల్పోయి , రావణుని తో సహవాసం చేస్తూ , వికారాలు కి బానిస అయి, దైవీ గుణాలు, శక్తులు పూర్తిగా కోల్పోయి కలియుగం లో దుఃఖం తో జీవిస్తూ ఉన్నారు నేడు మానవులు. అందుకే నేటి మానవుని జీవితం దుఃఖ సాగరం. ఏదైనా భౌతిక సుఖాలు పొందినా, అది అల్పకాలికం అని గ్రహించ లేక పోతున్నారు.


 దీనంతటికీ కారణం , తండ్రి అయిన శివుని యొక్క యధార్థం మర్చిపోవడం. శివుని తో అనుబంధం లేక పోవడం.


• నేడు మనిషి అనుకుంటాడు శివుని ని నిత్యం పూజిస్తున్నాను అని . 

ఆలోచించి చూడు …. శివుని ని ఒక లింగ విగ్రహం గా పూజిస్తున్నావా ? లేక  నీ తండ్రి గా భావిస్తూ పూజిస్తున్నావా ?.

• ఒకవేళ నీవు లింగ విగ్రహం గా భావిస్తూ పూజిస్తే , నీ మనసు కి, శివుని కి మధ్య అనంతమైన దూరం ఉన్నట్లే . ఏ విధమైన బంధం లేనట్లే . నీ కోరికలు, దుఃఖం అవసరాలు తీరడం కోసం స్వార్దం తో  నీవు శివుని ని   దీనత్వం తో వేడుకుంటున్నట్లే  .


• ఒకవేళ నీవు శివుని ని తండ్రి గా భావిస్తే … ఏ తండ్రి కూడా తనను పూజించిమని  అడగడు . తండ్రి పిల్లల నుండి గౌరవం ఆశిస్తాడు , మరియు తాను నేర్పించిన  విధంగా ధర్మ యుక్తం గా నడచుకోమని ఆదేశిస్తాడు  ,  తన కంటే గొప్ప వారిగా కీర్తించ బడాలని కోరుకుంటాడు . . . అదే విధంగా  తండ్రి కి పిల్లల కు ఉన్న అనుబంధం చిర స్థాయి గా ఉండాలని,  ఏనాడూ పిల్లలు అది మరచి పోకూడదని అనుకుంటాడు. తండ్రి తాను  ప్రేమను పంచుతూ  ఆశిస్తూ , తన  సంపదలను  పిల్లల హక్కు గా  అనుభవించాలని , తన వారసత్వాన్ని కొనసాగించాలని కోరుకుంటాడు .


• మరి నేడు మానవుడు తన మనసు యందు శివుని పట్ల తండ్రి అనే భావన బంధం తో ఉంటున్నాడా ? ఆలోచించండి.


• నేడు మనిషి తలపై అనేక జన్మలు గా చేసిన పాప భారం ఉంది. అందు వలన శివుడు తండ్రి అనే వాస్తవికత , శివుని తత్వం , శివుని జ్ఞానం మనిషి తెలుసు కో లేక , తోచిన విధంగా అజ్ఞాన అంధత్వం తో పూజలు చేస్తున్నాడు . ఈ పూజలు వలన ధనం ఖర్చు చేస్తూ , సుఖం శాంతి లభించక , దుఃఖం తీరక ఎదురు చూపులు చూస్తూ జన్మ జన్మలు గా ఎదురు చూస్తున్నాడు .

 భక్తిలో  చేసే ఆడంబర  పూజ  విధానం వలన లభించిన ఫలితం సంతోషం కేవలం బాహ్యం  మరియు  అల్పకాలికం అని గ్రహించ లేక పోతున్నాడు నేటి మనిషి .  అందుకే ఎన్ని పూజలు చేసినా మనిషి కి అంతరంగం లో అలజడులు పోవడం లేదు. 

దీనికి పరిష్కారం శివ ధ్యానం, శివ జ్ఞానం, శివ యోగం.  

ధ్యానం ద్వారా మనసు నిశ్చలం నిర్మలం అవుతుంది.  

జ్ఞానం ద్వారా  బుద్ధి మనో నేత్రం వికసిస్తుంది.

యోగం ద్వారా శివుని తో అనుసంధానం ఏర్పడుతుంది. 

దీనినే  రాజయోగం ... రాజయోగ అభ్యాసం అంటారు.


• శివుని కి   కావాల్సింది  నీ మనసు.  అది నిజాయితీతో ,పవిత్రత తో అర్పించిన నాడు  , నీ పయనం శివుని జతలో ఉంటుంది . అదే నీ  నా  గమ్యం.


• శివుని కి భక్తి పూజలో సమర్పించేది . . . పుష్పం , పత్రం , ఫలం.  దాని అర్దం.

  పుష్పం అంటే   నీ  మనసు.

  పత్రం   అంటే    నీ  దేహం

  ఫలం    అంటే   నీ   ఆత్మ 

• ఇదంతా మనసు తో జరగాల్సిన శుద్ధమైన పూజా ప్రక్రియ .


చేయవలసిన   అన్ని కర్మలు చేస్తూ, నిత్యం మనసు లో  శివ స్మృతి  ఉండడమే అసలైన పూజ . 

ఉదాహరణకు ఎవరినైనా ప్రేమిస్తే మనం ఏ పని చేస్తున్నా దృష్టి ప్రేమించిన వారి పై ఉంటుంది కదా ! అలా . . . .

ఇదే నాకు శివుని తో ఉన్న పని.

ఓం నమఃశివాయ 🙏

ఓం శాంతి 🙏

యడ్ల శ్రీనివాసరావు 24 July 2025 10:00 pm.



Wednesday, July 16, 2025

659 . శివం

 

శివం



• శివమే   సుందరము 

  శివమే    సత్యము .


• శివమనిన   నా లో   చలనం

‌  చేరును

  శివుని    చెంత కు.

• ఆ  చలనమే   నా     ఆత్మ

  అచలమే         నా    దేహం .


• శివమే     సుందరము

  శివమే     సత్యము .

• శివము తో   సంబంధ    మెరిగాక 

  మనసు కు    బంధాల    మెలి    ఏమి .

  కాల    యాపన ల     కలిమి    ఏమి .


• శివమనే    రాగం

  సప్త  లోకాల     సంబంధము .

• శివమనే     స్వరం

  సప్త మాతృకల   సహయోగం .


• శివమే     సుందరము

  శివమే     సత్యము .


• శివమనిన    నా లో    ఆర్ద్రం

  పాయసం  మయ్యే

  శివుని    నైవేద్యాని కి .

• ఆ  మననమే    నా   మౌనం

  అమనమే    నా    జీవం .


• శివమే     సుందరము

  శివమే     సత్యము .

• శివము తో     సంధాన మైన కా

  తనువు కు   మోహ దాహల   మాయ  ఏమి .

  ఆశ   నిరాశల    ఊయల   ఏమి .


• శివమనే     స్మరణం

  ముల్లోకాల   సందర్శనం .

• శివమనే     సంకల్పం

  మూడు కాలాల    అనుబంధం .


 • శివమే    సుందరము

   శివమే    సత్యము .



చలనం = కదిలేది

అచలం = కదలనిది 

ఆర్ద్రం = మనసు తడి

అమనం = శాంతి, సౌఖ్యం, క్షేమం.


యడ్ల శ్రీనివాసరావు 16 July 2025 11:00 AM.



Monday, July 14, 2025

658. మనో శతకం - 10

 

మనో శతకం - 10


సమసిన  సమయమ్  స్వర్ణంబైన  ఆభరణమ్.

ధారణ నొంద  నీ కాలంబు   ధీనత  నొందున్.

క్షరము న జారెడు  పుష్పంబు  ఫలమగునా .

నోచని యత్నంబున  నిర్వేదం నివసమగున్ .

సుందర గుణేశ్వరా ! సంపన్నేశ్వరా !      |24|


భావం :

గడచి పోయిన కాలమంతా  బంగారం అయిన యెడల ఆభరణము అగును .

అది ధరించని చో   నేటి కాలం   వృధా అగును .

సెలయేటి లో  జారి పోతూ ఉన్న  పువ్వు  ఫలము  అగునా .

చేయని  ప్రయత్నము , నిరాశకు  ఇల్లు అగును .

సుందరమైన గుణములు గల ఈశ్వరా ! సంపన్నుడైన ఈశ్వరా !


🕉️🕉️🕉️🕉️🕉️🕉️🕉️


రాలిన పత్రమ్  రవళించగ  నాడే మయూరి .

వీచిన  మారుతమ్  వినువీధున  వీక్షించేన్ .

అంబర వాణి   బలికే   ఆలంబన రాగం .

తన్మయబొందె   తళుకుల్   తారల్ .

సుందర గుణేశ్వరా  ! సంపన్నేశ్వరా  !      |25|


భావం :

రాలిన ఆకులు  రెప రెపల  శబ్దానికి  నెమలి ఆడెను .

వీచే గాలి  ఆకాశ వీధి   నుంచి  చూచెను .

ఆకాశము నుండి  వాణి  పలికింది  శబ్దానికి ఊతమైన రాగము .

మైమరచి  పోయాయి   మెరిసే  నక్షత్రాలు అన్నీ .

సుందరమైన  గుణములు  గల  ఈశ్వరా ! సంపన్నుడైన  ఈశ్వరా !


యడ్ల శ్రీనివాసరావు 14 July 2025 , 7:30 PM


Sunday, July 13, 2025

657. నీ నిజాయితీ - నీ శత్రువు

 

నీ నిజాయితీ . . .  నీ శత్రువు


• “ నీ నిజాయితీ నీ శత్రువు”.  ఇది   ప్రతి ఒక్కరం  ఆమోదించ  వలసిన  విషయం . నిజాయితీ గా ఉండడం వలన అనేక సమస్యలు , నిజాయితీ ని ఆచరించడం వలన   చుట్టూ ఉన్న వారితో పాటు ,  మనకు  మనమే శత్రువుగా  పరిగణించుకో వలసిన  స్థితి పొందుతాము .

ఎందుకంటే  నిజాయితీ అంటేనే  నిప్పు . ఆ నిప్పు  మన  చుట్టూ ఉన్న   అసత్యాన్ని , అధర్మాన్ని  తగలబెడుతుంది ‌, చివరికి  అవసరమైతే  మనల్ని  కూడా . ఇది మనందరి  స్పృహ కి తెలిసిన యదార్థం .

• అందుకే ఎందుకొచ్చిన  నిజాయితీ లే , అని మనం అనేక విషయాలలో  మన బంధువులు , మిత్ర సంబంధీకులు  తమ ప్రవర్తన తో  చేసింది తప్పు అని తెలిసిన సరే నోరు తెరిచి వారికి చెప్పం , వారిని ఖండించం,  వారిని సరిదిద్ధం .  సరికదా మనల్ని మనం సరిదిద్దు కొనే ప్రయత్నం చేయము .  

దురదృష్టవశాత్తు , ఇటువంటి పరిస్థితి  రేపు మన ఇంటి  పిల్లల  ప్రవర్తన లో  నిజాయితీ యొక్క లోపం  కనిపిస్తే ,  మనకేందుకు లే  అని వారిని  ఖండించ కుండా  ఉంటామేమో  కదా .  ఎందుకంటే  మనం నిజాయితీగా వారిని ఖండిస్తే సమస్యలు పెరుగుతాయి కదా .  మనకు సమాజం లోని  వారి పట్ల ఇదే అలవాటు ఉన్నప్పుడు, మన  ఇంటికి కూడా అదే వర్తిస్తుంది కదా .


• మనం సత్యం ఇతరులకు చెప్పడం వలన , లేదా సత్యం ఆచరించడం వలన ఇంటా బయటా మనకు అనేక సమస్యలే సమస్యలు. అందుకే కదా గుంపులో గోవిందా అనుకుంటూ, తందాన తాన అంటూ గుడ్డి  ఎద్దు లా   ఆనందం గా జీవిస్తూ  ఉంటాం.  చెప్పాలంటే  అలా జీవించడానికి   మనం   పూర్తిగా అలవాటు పడిపోయాం. దీనికి అతీతంగా నిజాయితీ తో ఉండడం లేదా మాట్లాడడం అంటే ముందుగా మనలో భయం అనే భూతం పుడుతుంది కదా .


• చిన్నతనం నుంచి బడి పుస్తకాల లో , ఉపాధ్యాయుల  దగ్గర  అమాయకంగా  నేర్చుకున్న , చదివిన , ఈ నీతి వాక్యాలు  , కధలు , విలువలు , ఆదర్శాలు , మనల్ని చాలా చాలా  మోసం చేశాయి  అని  నేడు మనకు  అనిపిస్తుంది  కదా . 

ఎందుకంటే గురువులు చెప్పిన  విలువలు , నీతి , న్యాయం  ప్రకారం నేడు మనుగడ సాగిస్తే , దొంగ లా అందరికీ భయపడుతూ ఉండవలసి వస్తుంది .   కానీ ,  దొర లాగ ధైర్యం గా బ్రతకాలి అంటే , మనసులో  నీతి నిజాయితీ లను తుంగ లో తొక్కితే ,  ప్రతీ క్షణం సంతొషం గా , నాటకీయంగా అద్బుతం గా  జీవించవచ్చు . ఏ ఎండకు ఆ గొడుగు పడుతూ ఆనందం గా ఉండొచ్చు .  నేడు అవునన్నా కాదన్నా మనందరం ,  జీవితం లో ఎన్నో అనుభవాల ద్వారా తెలుసుకున్న ఏకైక సత్యం ఇదే ... కదా .


• అందుకే కాబోలు,  మహానుభావులు అంటుంటారు , నీతి నిజాయితీ న్యాయం ధర్మం అనేవి  చెప్పడానికే  కానీ ఆచరించడానికి కాదు అని .


• నేటి కాలంలో మనిషి లో అసలు సిసలైన ధైర్యం చచ్చిపోయింది. ప్రస్తుతం మనిషి కి ఉన్న ధైర్యం , తన పిరికితనానికి కొనసాగింపు . ఈ విషయం గ్రహించలేక  దురదృష్టం కొద్దీ , ఆ పిరికితనమే  అసలైన ధైర్యం అనుకుంటూ మాయా మత్తు లో హాయిగా బ్రతికెస్తూ ఉన్నాం . ఎందుకంటే మన పొట్ట చల్లగా ఉంది అది చాలు కదా మనకి .


• అందరిలాగే  నేను,  నా  జీవిత అనుభవాల ద్వారా , తెలుసుకున్న పాఠం ఏమిటంటే . . .

  " నీ  నిజాయితీ  నీ శత్రువు  . .  . 

    నీ శత్రువే , నీ అసలైన మిత్రుడు " .


• నువ్వు ఎప్పుడైతే నిజాయితీ తో, నీతి తో, ధర్మం తో ఉంటావో తప్పని సరిగా సమాజం లోని వ్యక్తులు ,  మిత్రులు  , కుటుంబ సంబంధీకు ల తో  తప్పకుండా  మొదట్లో  వ్యతిరేకత వస్తుంది.  ఎందుకంటే నువ్వు ముమ్మాటికీ  వారిలా, లేవు మరియు వారిలా ఉండడం లేదు కాబట్టి .  ఇక వారిలో లో నిజాయితీ లేదు కాబట్టి , నీ నిజాయితీ ని   వారు  అంగీకరించరు .


• ఈ సమయంలో  నువ్వు  ముక్కు సూటిగా నిజాయితీగా  వ్యవహరిస్తే ,  వారు నిన్ను తప్పకుండా  నిందిస్తారు, అవమానాలకు గురి చేస్తారు, మోసం చేస్తారు , తడిగుడ్డతో గొంతు కోస్తారు,  ఎంతకైనా తెగిస్తారు  ఇలా నీ జీవితంలో  నువ్వు  ఎన్నడూ   చూడని ఊహించని  వ్యతిరేకతలను నీ పై చూపిస్తారు .

ఈ దశ లో   అప్పటి  వరకూ నీ లో  ఉన్న , నీ నిజాయితీ  నీకు పూర్తిగా శత్రువు అవుతుంది . ఇదంతా  నీకు మరియు బాహ్య  ప్రపంచ సంబంధీకుల మధ్య  జరిగే వ్యవహారం .


• సరిగా ఇలాంటి వ్యతిరేకమైన సందర్బం సమయంలో  . . .   అంతర్గతంగా   నీ లో మరుగున పడి   ఉన్న   కొన్ని   లక్షణాలు అయిన  కోపం , అసహనం , నిస్సహాయత , అహంకారం , కుంగుబాటు , పట్టుదల  వంటివి  కూడా   నీ లో లో  ప్రేరేపితం అవుతూ,  నీ లోని నీతి  నిజాయితీ లను   నీకు   శత్రువు గా చూపిస్తాయి అనడం లో ఏ మాత్రం సందేహం లేదు.

సరిగా ఇదే  సమయంలో  నీ  బుద్ధి   చిత్త శుద్ధి తో సమర్దవంతంగా పనిచేస్తే , నీ లోని నీతి నిజాయితీ తో పాటు   వివేకం , ఓర్పు , సహనం , సమయస్ఫూర్తి ,  ధైర్యం , నిరీక్షణ వంటి వి  ప్రస్ఫుటంగా ఉంటే , మొదట నీ లోపల ఉన్న   అవగుణాల పై పోరాటం  జరిగి ,  నీ పై నువ్వు విజయం సాధించగలవు . ఈ దశలో  నువ్వు ఒంటరి గానే ఉంటావు . చెప్పాలంటే , ఇది నిన్ను . . . ఉన్న స్థితి నుంచి  ఉన్నత స్థితికి  చేర్చే  బృహత్తరమైన అంతర్యుద్ధం .


• ఏనాడైతే  నీ లోని  శత్రు గుణాలకు నీవు లొంగకుండా ఉంటావో , నీ పై  నీ  విజయం తథ్యం. ఒకసారి విజయం సాధించిన తరువాత , ఆ శత్రు గుణాలు పూర్తిగా నశించి , అవే నీ లోని నీతి నిజాయితీ లకు దాసోహం అవుతాయి, ఇదే నీ లోన ఉన్న శత్రువులు మిత్రులుగా మారడం అనవచ్చు .


• అదే విధంగా బాహ్య ప్రపంచ సంబంధాలు అన్నింటిలో   ఎవరైతే  నీ నిజాయితీ ని వ్యతిరేకిస్తూ వస్తారో . . . కొంత కాలం , సమయం తరువాత వారి దగ్గర లేనిది, నీ దగ్గర ఏముందో తప్పక తెలుసుకుంటారు, వారు తమ జీవిత కాలం ద్వారా పొందలేనిది నువ్వు ఏం పోందావో తెలుసు కుంటారు . . . చివరికి తమలో తాము, తమ అజ్ఞానానికి చింతిస్తారు . 

• నీ నిజాయితీ నీ శత్రువు అయింది  కదా అనుకొని అక్కడే ఆగిపోతే  నీవు ఒక ఫెయిల్యూర్ . అలాకాకుండా ఆ శత్రువే  నీ మిత్రుడు అని ముందుకు సాగిపోతే   అదే నీ సక్సెస్ .


• మనిషి కి ప్రాణం అంటే తీపి. ప్రాణం అంటే భయం. ప్రాణాన్ని కాపాడుకోసమే మనం జన్మ ఎత్తి నట్లు భావిస్తూ ఉంటాం . మరి ఎందుకని ప్రాణాన్ని శాశ్వతం గా, అమరం గా ఉంచుకోలేక పోతున్నాం . … సరే ప్రాణం ఏదో రోజు పోతుందని తెలిసి నా కూడా , నీతి నిజాయితీ లను ఎందుకని ధైర్యం గా ఆచరించ లేకపోతున్నాం ‌ . ఆచరించే లేకపోయినా గాని ఇతరులు ఆచరించినపుడు  ఎందుకని అంగీకరించ లేకపోతున్నాం .  ప్రాణం పోయినా సరే , నీ  నీతి నిజాయితీ  మార్గ దర్శకం తో కొందరికైనా  ప్రేరణ అయి , ఈ భూమి మీద అమరం గా ఉంటాయి . 

దీనిని బట్టి మనమే  ఆలోచించు కోవాలి మనిషి గా పుట్టినందులకు మన కోసం మనం ఏ విధమైన   సంపాదన  వృద్ధి  చేసుకుంటూ  కాలం లో  నిరంతరం  పయనిస్తూ  ఉన్నాం అనేది .


• గమనిక : ఈ రచన లో    నీ , మనం అనే పదాలు పాఠకులకు అర్దం అయ్యే విధంగా సహజత్వం కోసం రాయడం జరిగింది . అంతేకానీ   నీ ,  మన అనే పదాలు ఎవరినీ ఉద్దేశించి కాదు . ఎందుకంటే ఇది రాసిన వాడు కూడా  అంత ఉత్తముడు, ఉన్నతుడు, యోగ్యుడు  కానే  కాదు .


ఓం నమఃశివాయ 🙏 

యడ్ల శ్రీనివాసరావు 13 July 2025 11:00 am.

Friday, July 11, 2025

656. పరమాత్ముని మిణుగురులు

 

పరమాత్ముని  మిణుగురులు


• దేవుడే     అయ్యాడు 

  వెలుగై న   దీపమై .

• ఆ  వెలుగు కి   చేరాయి

  మిణుగురు లు .


• దేవుడే    అయ్యాడు 

  వెలుగై న    దీపమై

• ఆ వెలుగు కి   చేరాయి

  మిణుగురు లు .


• వెలుగు లో   పారవశ్య మై

  కొన్ని    బలిహర మయ్యాయి .

• వెలుగు  వేడిమి     తాళలేక

  కొన్ని   దూరం గా   నిలిచాయి .

• వెలుగు ను    చూడలేని వన్నీ

  ఎటో  ఎటో    పారి పోయాయి .


• దేవుడే   అయ్యాడు 

   వెలుగై న   దీపమై .

• ఆ వెలుగు కి   చేరాయి 

   మిణుగురు లు .


• బలిహరమైన  మిణుగురులన్నీ 

  ఆడాయి

  వెలుగు తో   ఆలంబనమై .


• దరిచేర   లేని  వన్నీ    

  చింతించాయి 

  తమకు    అదృష్టం లేదని .


• ఇక   గల్లంతైన న  మిణుగురులు 

  నక్కి నక్కి     బిక్కి   బిక్కి

  లబో దిబో మంటూ 

  రోదిస్తున్నాయి .


• దేవుడే   అయ్యాడు 

  వెలుగై న    దీపమై .

• ఆ వెలుగు కి   చేరాయి 

  మిణుగురు లు .


• ఆ వెలుగు   పరంజ్యోతి 

  పరమాత్మ    శివుడు .

• ఆ  మిణుగురులు 

  ఆత్మ లైన    మానవులు .


మిణుగురులు = దీపపు పురుగులు .

ఆలంబనము = ఆధారము .


యడ్ల శ్రీనివాసరావు 12 July 2025

 5:00 AM 

807. మనో శతకం -12

  మనో శతకం -12   భవుడి  బాట  భవదీయుగ    జేయ   చితి కి  చేరు చింతల్ .   తపమున  తరియించు  నరున్    ధ్యానంబు  ధన్యము  గాంచెన్ .    యోగాగ్ని నంద...