503. కాంక్ష – ఆకాంక్ష

 

కాంక్ష – ఆకాంక్ష

• కాంక్ష, ఆకాంక్ష వినడానికి ఒకేలా అనిపించినా భావం, అర్దం లో చాలా తేడా ఉంటుంది. ఇది గమనించడం కొంచెం కష్టం.

• కాంక్ష అంటే కోరిక. ఒక వ్యక్తి తన స్వయం సంతృప్తిని నెరవేర్చుకోవడం చేసే ఆలోచన కాంక్ష. ఈ కాంక్ష లో ఒకింత ఆశ, స్వార్థం ఉంటాయి. ఇది ఆ వ్యక్తి, నెరవేర్చుకోవడం కోసం తన మనసు లో బలమైన సంకల్పం చేస్తాడు. కార్యాచరణ చేస్తాడు. కాంక్ష లో బలమైన లోతు ఉంటుంది. కోరిక నెరవేర్చుకోవడం అనేది, ఎప్పుడూ వ్యక్తి యొక్క శారీరక మానసిక శక్తి మీద ఆధారపడి ఉంటాయి.

• మనిషి తన పరిధి కి, శక్తి కి లోబడి నపుడు కోరికలు సహజంగా నే , ఏ ఇబ్బందీ లేకుండా నెరవేర్చు కుంటాడు. కానీ తన శక్తి కి మించినపుడే కాంక్ష, ఆకాంక్ష లనేవి ఉత్పన్నమవుతాయి.

• కాంక్ష నెరవేరాలంటే కొంత సమయం వేచి చూడాల్సిన అవసరం ఉంటుంది. ఈ క్రమంలో మనిషి తన కాంక్ష నెరవేరుట కోసం దేవుని ఎదుట ప్రార్థన కూడా చేస్తాడు. కాంక్ష అనేది లోతైనది, బలమైనది. దీని కోసం తగు రీతిలో ఆలోచన అవసరం. తన శక్తి కి మించిన శక్తి యొక్క సహాయం అవసరం. ఆ శక్తి దైవం కావచ్చు లేదా దెయ్యం కావచ్చు. అంటే పాజిటివ్ లేదా నెగెటివ్ ఎనర్జీస్.

• ఒక మనిషి తన కాంక్ష ను నెరవేర్చుకోవడం కోసం, దైవ అనుగ్రహం (పాజిటివ్ శక్తి) ఉంటే సులభంగా నెరవేరుతుంది. లేని పక్షంలో ఆ వ్యక్తి ఏదొక దారిలో అంటే అపసవ్య దారుల్లో నైనా ప్రయత్నం చేసి తన కాంక్షను తీర్చుకుంటాడు. ఎందుకంటే ఇది స్వయం తన కోసం, తన అనుభూతి, తృష్ణ, ఆనందం కోసం. ఇలా చేయక పోతే తన మనసు అంగీకరించదు.

• ఇకపోతే ఆకాంక్ష ఇది ఒక వ్యక్తి బలమైన సంకల్పం తో , ఇతరుల కోసం కోరుకునే కోరిక . ఇది ఎక్కువగా అన్ని బంధాలలో కనిపిస్తుంది. ఉదాహరణకు ఒక తల్లి తన కొడుకు కలెక్టర్ కావాలని , కొడుకు చిన్న తనం నుంచి అంటే ఎంతో కాలం నుంచి కోరుకుంటూ ఉంటుంది. ఇది ఆకాంక్ష. ఇందులో ఆ కొడుకు కు కలెక్టర్ కావాలని లక్ష్యం ఉండొచ్చు లేదా ఉండకపోవచ్చు.

• మరి ఇటువంటి ఆకాంక్షలు ఇతరుల కోసం చేసేవి నెరవేరుతాయా …. లేదా…. వీటిలో కొన్ని విషయాలు అంతర్లీనంగా ఉంటాయి.

• ఇందులో మొదటి అంశం…. ఒకరి కి మంచి జరగాలి అనో లేదా ఉద్యోగం రావాలనో లేదా మరేదయినా సరే మనం ఆకాంక్షిస్తే, అదే కోరిక ఎదుటి వ్యక్తి లో కూడా ఉండాలి. ఎందుకంటే మన ఆకాంక్ష లో ఉన్న శక్తి కి, ఎదుటి వ్యక్తి కోరుకునే విషయం కూడా matching అవ్వాలి కానీ opposite గా ఉండకూడదు. అప్పుడు రెండు ఎనర్జీస్ కలిసి ఆకాంక్ష తీరే దిశగా పయనం చేస్తాయి.

• రెండవది

• మన ఆకాంక్ష లో ఉండే సంకల్ప శక్తి, ఎదుటి వ్యక్తి మానసిక శక్తి కంటే ఎక్కువగా ఉంటే ఆ ఆకాంక్ష నెరవేరే దిశగా పయనం చేస్తుంది.

• మూడవది

• మనం ఇతరుల ఆకాంక్ష నెరవాలని నిజమైన చిత్తశుద్ధి ఉంటే, మన సంకల్పం లో నిజాయితీ ఉంటే తప్పనిసరిగా మనలో పవిత్రతా శక్తి ఉండి తీరాలి. ఎందుకంటే ఒకరికోసం కోరిక కోరుకున్నప్పుడు,. ఆ కోరిక నెరవేర్చగలిగేది కేవలం భగవంతుడు మాత్రమే. అటువంటప్పుడు మనలో పవిత్రత ఎంత ఉంది అనేది భగవంతుడు తప్పకుండా చూస్తాడు.

• పవిత్రత అంటే శారీరక పవిత్రత కాదు. మానసిక పవిత్రత. శారీరక పవిత్రత అనేది, కలియుగంలో మానవ జన్మ తీసుకున్న ఎవరికీ ఉండదు. ఎందుకంటే మనిషి జన్మ తీసుకున్న విధానమే పూర్తి అపవిత్రం. స్త్రీ పురుషుల రజో, తమో తత్వంతో చేసే శారీరక వాంఛల కలయికతో , తద్వారా జరిగే ప్రక్రియ లో , గర్భంలో 9 నెలలు మలమూత్ర ద్వారంలో శిశువు అనుభవించేది గర్భ జైలు శిక్ష. ఇదంతా నరక యాతన తో కూడుకున్నది. ఈ శరీరం అపవిత్రతని సూచిస్తుంది. ఈ విధంగా జన్మ తీసుకోవడాన్ని కుకవంశావళి అంటారు.

• అదే విధంగా మాంసాహారం, మద్యపానం సేవించడం వలన కూడా పూర్తిగా శరీరం గా అపవిత్రతకు లోనై ఉంటుంది. కానీ మనిషి జన్మ తీసుకున్న తర్వాత మనసు లో ఈర్ష్య ద్వేషం, వికారాలు లేకుండుట, నిస్వార్థం, ప్రేమ, వంటివి స్వచ్చత గా ఉంటే అది మానసిక పవిత్రత అవుతుంది.

• సత్య త్రేతా యుగాలలో జన్మలు గర్భం ద్వారా కాకుండా చూపు యొక్క శక్తి ద్వారా జరిగేది. దీనిని ముఖవంశావళి అంటారు. ఇక్కడ అందరూ దేవతలే. వీరంతా పరమ పవిత్రులు. కాల క్రమేణా వీరు , తమ ఆత్మ శక్తి కోల్పోయి , వికారాలకు వశం అయి ద్వాపర, కలియుగాలలో మానవులు గా తిరిగి జన్మ తీసుకుని అజ్ఞానులు గా అవుతారు.

• అసలు విషయం లోకి వస్తే…. మనిషి మానసిక పవిత్రత కలిగి ఉండి, ధర్మం తప్పని సరిగా ఆచరిస్తే నే , ఇతరుల పట్ల తమ ఆకాంక్ష నెరవేరుతుంది. …. లేకపోతే ప్రతిఒక్కరూ తమ గొప్ప కోసం, తమ మంచి చూపించు కోవడం కోసం, సునాయాసంగా ఇతరుల కోసం , పోయేది ఏముంది లే అని కోరికలు, ఆకాంక్షలు కురిపిస్తారు.

• అదే విధంగా ఆశీస్సులు, అక్షింతలు వేయడం వంటివి కూడా, నేటి కాలం చాలా మంది మొక్కుబడిగా చేసే పనులు. ఆశీర్వచనం ఇవ్వాలంటే మనసు లో పవిత్రమైన సంకల్ప శక్తి ఉండాలి. అక్షింతలు వేసి దీవించడం అంటే, దేవుడు నీకు శుభ దీవెనను ఇవ్వమనే అవకాశం కల్పించాడని మనసు లో తలచి, ఆ సమయంలో అక్షింతలు వేస్తే, వారికి శుభం జరుగుతుంది… అలా కాకుండా ఏదో మొక్కుబడి వ్యాపకాలతో, ఏదో ఆలోచనలతో దీవెనలు ఇస్తే అది వృధా, ఫలితం ఉండదు సరికదా నెగెటివ్ ఎనర్జీ అంటుకుంటుంది. అందుకే దిష్టి హారతి తీస్తారు.

• ఇవి అన్నియు యదార్థాలు. నిధానంగా ఆలోచిస్తే తెలుస్తుంది.

• మనలో ఆలోచనలను శుభ్రం చేస్తే కలిగే లాభం మనకే. నలుగురి కోసం నటిస్తూ జీవిస్తే నష్టపోయేది మనమే.

• స్వయం తమ కోసం కాంక్ష కలిగి ఉండడం మంచిదే.

• అదే విధంగా ఒకరి మంచి కోసం శుభ సంకల్పం తో, ఆకాంక్ష కలిగి ఉండడం మంచిదే.

• కానీ ఒకరి మెప్పు కోసం , మనం మంచి వారిగా నిరూపించు కోవడం కోసం ఆకాంక్షలు కోరుకుంటే, అవి ఎన్నడూ నెరవేరవు.

• కానీ ఒకటి మాత్రం సత్యం. ఆకాంక్ష కోరుకుంటే, మన మనసు లో పవిత్రతా శక్తి ఎంత ఉందో, మనకు మనమే శోధించాలి.

• అష్ట సిద్ధులలో సంకల్ప సిద్ధి ఒకటి. అది కలిగి ఉంటే ఆకాంక్షలు నెరవేరుతాయి. సంకల్ప సిద్ధి అనుగ్రహానికి నిత్యం గణపతి మరియు ఆంజనేయస్వామి ఆరాధన చేయాలి.

 యడ్ల శ్రీనివాసరావు 

 24 May 2024, 2:00 PM