Tuesday, October 7, 2025

697 . Life is not a Failure

 

Life is not a Failure 



• Life is not a failure to anyone. Life is a Lesson to everyone.


• జీవితం ఎప్పుడు ఎవరికీ కూడా అపజయం ఇవ్వదు. జీవితం అందరికీ పాఠాలు నేర్పిస్తుంది . అపజయం అనేది కేవలం ఒక భావన మాత్రమే. అనుకున్నది జరగలేదని, సాధించలేదని ఆలోచనలతో ప్రేరేపితమైన ఒక మానసిక భావన అపజయం. ఇది కేవలం అంతర్గత దృక్పథం. ఈ భావన లోనుంచి బయటకు వచ్చి చూసినపుడు ఎంతో విశాలమైన ప్రపంచం కనిపిస్తుంది.

• జీవితం ఎప్పుడు ఎవరిని ఓడించదు, అపజయాన్ని కలిగించదు. జీవితం ఎన్నో పాఠాలు నేర్పిస్తుంది. ఆ పాఠాలు అర్దం చేసుకోవడం లో అనుభవం కొరవడి విఫలం కావచ్చు, అంత మాత్రాన జీవితం లో ఓడిపోయాం అని అనుకోవడం, అవివేకం తో కూడిన అమాయకత్వం.

• జీవితం నేర్పే పాఠాలు నేర్చుకోవడానికి సహనం ఓర్పు అవసరం . ఈ ఓర్పు సహనం అలవడినపుడు అసలు అపజయం అనే పదానికి అర్థం ఉండదు. సరికదా ప్రతి అంశం పైన అర్దం చేసుకునే దృష్టి, అవగాహన పెంచుకునే ఏకాగ్రత పెరుగుతుంది. ఇది చివరకు నీ అంతర్గత స్వభావం అనే డిక్షనరీ లో అపజయం అనే పదాన్ని పూర్తిగా తుడిచి వేస్తుంది . అనగా ఆ పదం యొక్క అర్దం స్పృహ లో లేకుండా చేస్తుంది .


• బాహ్య ప్రపంచంలో మన చుట్టూ ఉన్న వ్యవహారాలు, ధోరణుల లో కొన్ని సార్లు అనుకున్న ది సాధించలేక పోవడం వలన అపజయం పొందినట్లు భావిస్తాం . ఇది ఒకరి మానసిక పరిస్థితి ని బట్టి వారిపై ప్రభావం చూపించడం జరుగుతుంది. దీనికి అపజయం అనే పదం అలంకరించే బదులు , ఈ సంఘటన నాకు ఏదో తెలియని విషయం తెలియచేస్తుంది అని పరిశీలిస్తే అద్భుతమైన రహస్యాలు తెలుసుకోవచ్చు . దీనినే కొందరు మహారధులు అంటుంటారు , జీవితం నిరంతరం పాఠం అని. తద్వారా కలిగేది అపారమైన అనుభవం .

• ఉదాహరణకు ఒక ఆటలో తర్ఫీదు పొందిన రెండు జట్లు A, B ఆటగాళ్ళు ఉంటారు. A జట్టు విజయం సాధించింది అని అంటారు. అలా అని B జుట్టు విఫలం అయింది అని కాదు . B జట్టు ఇంకా ఏదో నేర్చుకో వలసినది ఉంది అని అర్దం.

• ఇదే AB జట్లు మరో రోజు ఆడితే B జుట్టు గెలిచిందని అంటారు. అంటే A జుట్టు విఫలం అయింది అని కాదు.  ఇక్కడ గమనించవలసినది కాలం అనే ప్రయాణం లో కొన్ని సార్లు అనుకున్నది సాధించాం అదే విజయం అనుకుంటాం. కానీ కాలం అనుకూలించక సాధించలేకపోతే అదే అపజయం గా భావిస్తాం. జయపాజయాలు సహజం. ఈ రెండింటి మధ్య ఉత్పన్నమయ్యే భావోద్వేగాన్ని స్థిరీకరించడం , జీవితం నేర్పించే అతి పెద్ద పాఠం .


• జీవితం చాలా విలువైనది . అందులో విఫలం సఫలం , దుఃఖం సంతోషం, మంచి చెడు , పాపం పుణ్యం ఇలా ప్రతీ అంశం తో జరిగే కర్మల అనుభవాలు నిరంతరం నేర్చుకోవడానికి మనం పుట్టాం . ఇది జన్మ జన్మలు చేస్తూ ఉండవలసిన నిరంతర చర్య.


జీవితం ఎప్పుడు ఎవరిని ఓడించదు అపజయాన్ని కలిగించదు.  జీవితాన్ని అనుభవిస్తున్న మనమే మన ఆలోచనల లోని  సమర్థత శక్తివంతం గా లేకపోవడం  మరియు  విధి విధాన లోపం  వలన అపజయం పొందినట్లు  భావిస్తాం .  మనం నేర్చుకోవడానికే  ఇక్కడ  ఉన్నాం,  అంతే కానీ  కుంగుబాటు (Depression) కి గురి అవడానికి గాని,  ఇతరులపై  అభియోగాలు మోపడానికి గాని , వ్యవస్థలను  వేలెత్తి చూపడానికి గాని లేము .  జీవితం ఒక ఆట. ఆటలో అన్నీ ఉంటాయి .  అవి సహజమైనవి గా  భావించి సానుకూల దృక్పథంతో ఉండాలి .


ఓం శాంతి 🙏 

ఓం నమఃశివాయ 🙏 

యడ్ల శ్రీనివాసరావు 7 Oct 2025 , 11:00 PM.


Saturday, October 4, 2025

696. శివ శాంతి

 

శివ  శాంతి 


• శాంతి   స్వరూప    శశి వదన

  శాంతి    స్వరూప   శశి వదన .

• మా దేహం    నీ స్మృతి   సదనం

  మా ప్రాణం    శాంతి    కాముకం .


• నీ వాసం    పరంధామం .

  సూర్యచంద్రులు   చేరని   తేజోమయం .

• నీ స్థానం    నిర్వాణ ధామం .

  పవనగీతికలు   లేని   మౌన   సాగరం .


• క్షణము లో    చేరే     యోగము తో

  నీ   సన్నిధానం .

• తక్షణము   పొందే   ధ్యానము లో

  నీ   శక్తి  ధారణం  .


• శాంతి   స్వరూప     శశి వదన

  శాంతి   స్వరూప     శశి వదన

• మా దేహం    నీ స్మృతి  సదనం

  మా ప్రాణం     శాంతి   కాముకం .


• శివమను     స్వరం

  మన   బంధానికి   పాశం .

• తెలియక    ఈ  సత్యం

  ఎన్నో   భవబంధాలకు   వశం .


• నీ   మౌనం   మనోహరం

  అదే   మేలుకొలుపు   దివ్యాస్త్రం .

• నీ      జ్ఞానం    మనోవికాసం

  అదే   జీవనయానపు   రాజరికం .


• నీ  సహవాసం   దివ్యానుభూతం.

  అది  జన్మ  జన్మల    పుణ్యఫలం .

• నీ   స్నేహం       మధురానుభూతం 

  అది  వర్ణ కు రాని   అతీంద్రియ సుఖం .

  

• శాంతి    స్వరూప     శశి వదన

  శాంతి    స్వరూప     శశి వదన

• మా  దేహం    నీ స్మృతి    సదనం

  మా  ప్రాణం     శాంతి     కాముకం .


ధన్యవాదములు శివ బాబా. 🙏

మీ  కోసం రాయాలి  అని  మనసు  తపన పడుతున్న ఈ సమయంలో ,  ఏమి రాయాలో  తెలియక  ఆలోచనల శూన్యం తో  ,  చేతులు కదలడం లేదు . కానీ , నా  మనసు  ఈ క్షణం  రాయాలి అని ఒత్తిడి చేస్తుంది . కానీ రాసే శక్తి లేదు .

ప్రేమ తో  నోరు తెరిచి  మిమ్మల్ని అడిగిన ,  కొద్ది క్షణాలలో నే   మీరు ఈ  ఆలోచనలను  ధారణ చేశారు , ఇలా రాయించారు.  నా ఆర్తి ని  తీర్చారు .  ఇది మీ  శక్తి కి  , మన బంధానికి  నిదర్శనం అనడానికి , ఇంతకు మించి ఈ నిమిత్తమాత్రునికి  ఏం కావాలి   శివ బాబా. 

ధన్యవాదములు శివ బాబా. 🙏


కాముకం = కోరుకోవటం 

పరంధామం =  ఇహ లోకం కానిది . పర లోకము.

నిర్వాణధామం = వాణి లేని లోకం. నిశ్శబ్ద లోకం

పవనగీతికలు  = గాలుల అలలు

వర్ణ =  వర్ణించు , వివరించు 


యడ్ల శ్రీనివాసరావు 5 Oct 2025 9:30 AM.


Wednesday, October 1, 2025

695 . కొడుకా ఓ కొడుకా !

 

కొడుకా    ఓ     కొడుకా !



• కొడుకా  ఓ  కొడుకా  !

  కొడుకా  ఓ  కొడుకా  !


• అమ్మవారి   కంటే    ముందు

  నీ   అమ్మను   కొలువ  రా  . . . 

• పండుగలు     పబ్బాలు

  ఇంటి  అమ్మతోనే    కద  రా . . . 


• ఆ    అమ్మవారి    రూపమే

  నీ    అమ్మ   అని   తెలుసుకో  . . . 

• ముసలిదైన   గాని   ముగ్గురమ్మల

  మూలపుటమ్మగా   కొలచుకో  రా   . . . 

  కొడుకా  ఓ   కొడుకా  !


• పిండి పెట్టి  ఒళ్ళు నలచి   

  వండి  పెట్టి   వడ్డిస్తే  . . . 

• ఇంటివాడి   వైతివి   

  ఓ జంట  తోడు  వైతివి  రా .

• ఆలి    నీ   అంతరమై నా   కానీ 

  అమ్మ  నీ   ఆరాధన రా  .

• గర్భం లో    పంచింది   అమ్మ  ఊపిరి 

  దర్పం తో    దీనం గా   చూడకు రా .


• నీ కంటిలోన   నీరు   

  తుడిచేది   అమ్మ రా  . . . 

• నీ   వొంటిలోన   సత్తువను  

  సేర్చేది    నీ   అమ్మే రా .

  కొడుకా   ఓ   కొడుకా  !


• నీ గుండెలో   లేని   అమ్మ

  గుడి లోన   ఉండదు రా . . .

• గుడి లోన   అమ్మ కూడా

  ఒక   అమ్మకు   బిడ్డే  రా .


• ఇంటిలోన   అమ్మను   బొమ్మగా చూస్తావు

  గుడిలోన   బొమ్మను   అమ్మగా  కొలుస్తావు . 

• ఆకలేసిన   అమ్మకు   పస్తులు   వడ్డిస్తావు  

  గుడిలోన   బొమ్మకు  నైవేద్యాలు నివేదిస్తావు .


• వెతికితే    నీకు   వెయ్యి   దేవుళ్ళు . .

  ఆ . . . 

  వెతికితే    నీకు    వెయ్యి   దేవుళ్ళు . .

  దొరుకుతారు   గానీ

• నీ   కన్నతల్లి    సాటిరాదు   

  వేరెవరూ   ఈ    లోకములో . . . 


• తెలుసు   కో   రా   కొడుకా . . . 

  తెలుసు   కో 

  లేకపోతే . . .

  అమ్మ  పాణం  వదిలాక   . . 

  ఆ . . . 

  అమ్మ   పాణం   వదిలాక . . 

  నువు   పెట్టే    పిండా  కూడు 

  కాకులు   కూడా   

  ముట్టవు రా  . . .  ముట్టవు రా .

  

• తెలుసు కో  రా   కొడుకా . . . 

  తెలుసు కో 

  ఇప్పుడు   కాకపోతే   ఇంకెప్పుడు  రా . . .

  కొడుకా   ఓ   కొడుకా   !

  కొడుకా   ఓ    కొడుకా !


ఓం శాంతి . . . ఓం నమఃశివాయ 🙏 


🌹 🌹 🌹

అమ్మలకు . . . 

అమ్మలను  కన్న   పెద్దమ్మ కు  

వందనములు  🙏

అందరికీ  విజయదశమి శుభాకాంక్షలు 🙏.

💐 💐 💐


తులసి రామకృష్ణ  , యడ్ల శ్రీనివాసరావు .

1 Oct  2025 .   10:00 PM 




Monday, September 29, 2025

694 . తలెత్తుకు జీవిద్ధాం

 

తలెత్తుకు జీవిద్ధాం 





• మనం ఈ భూమి మీద జీవించడానికి జన్మించాం. మన పాదాల కింద భూమి (నేల) ఉంది , తల పైన ఆకాశం ఉంది. మధ్యలో మనం ఉన్నాం . ఇది  అందరికీ  తెలిసిన విషయం .

• అయితే ఇక్కడ విశేషత ఏమంటే, ఉత్తములైన పెద్దలు, అనుభవజ్ఞులైన యోగ్యుల నుంచి ఒక మాట  వింటుంటాం, అది ఏంటంటే  " మనం జీవించినంత కాలం తలెత్తుకు బ్రతకాలి , తల దించుకుని కాదు "  అని.

దీని అర్థం , సమాజం లో అందరి చేత శెభాష్ అని  అనిపించుకునే లా  గౌరవం గా బ్రతకాలి  అని  అనుకుంటాం . తప్పులేదు . ఇది చాలా మంచి విషయం.

కానీ ఇందులో ఒక ఆధ్యాత్మిక రహస్యం దాగి ఉందని  మనకు తెలియదు .


• మానవుని  మూలాల లోకి వెళితే,  ప్రతి మనిషి కి (ఆత్మ కి) తప్పకుండా భగవంతుని తో (పరమాత్మ తో) , తండ్రి పిల్లల సంబంధం ఉంది. కానీ మనం నేడు ఈ మాయా లోకం లో జీవిస్తూ ఉండడం వలన మన మూలమైన యధార్థ సంబంధాన్ని పూర్తిగా మర్చిపోయాం. భగవంతుడు అంటే వేరు, అని అనుకొని భక్తి తో  పూజిస్తాం .  కానీ భగవంతుని తో మనకు ఉన్న గత సంబంధం వలనే (తండ్రి, పిల్లలు) మనం కొలుస్తున్నాం  అనే విషయం పూర్తిగా మర్చిపోయాం .


• మరి భగవంతుడు (పరమాత్మ ,తండ్రి ) ఎక్కడ ఉన్నారు? అంటే . . . ఆకాశం , ఆ పై సూక్ష్మ లోకం దాటి ఉన్న పరంధామం లో. (కొందరు దీనినే పరలోకం అంటారు). ఇదంతా యధార్థ మైన సత్యం అని మన ఆత్మ కి  ముందే  పూర్తిగా తెలుసు .

అందుకు  నిదర్శనం , మనం ఏ కులము , ఏ మతము , ఏ వర్ణము , ఏ జాతి వారిమైన  సరే , భగవంతుని తలంచు కునేటపుడు , తలని పైకెత్తి ఆకాశం వైపు చూస్తూ ఓ భగవంతుడా అని తలచుకుంటాం . ఇంకా . . .  భగవంతుడు పైన ఉన్నాడు అన్నీ చూస్తుంటాడు అనే మాట కూడా అంటుంటాం . ( అవునా ? . . .  కాదా ? ఒకసారి ఆలోచించండి. ) కానీ ఈ రెండు చర్యలు , మన శరీర స్పృహ ద్వారా జరగవు. మన ఆత్మ స్పృహ తో జరుగుతాయి. ఎందుకంటే ఆత్మ కి మాత్రమే మన మూలం తెలుసు.  కానీ , నేడు మన లోని ఆత్మ స్పృహ కి , శరీర స్పృహ కి మధ్య అనుసంధానం (కనెక్షన్) లేకపోవడం వలన శరీర స్పృహ కి తెలియకుండా నే , మన ఆత్మ చాలా చర్యలు చేస్తూ ఉంటుంది.   

ఇందుకు ఉదాహరణ  కొన్నిసార్లు  అసాధారణం అనుకున్న పనులు ,  శక్తి కి మించిన పనులు చాలా సులభంగా   చేసేసి   ఆశ్చర్యం తో అంటుంటాం  . . . 

" ఏమో నాకే తెలియకుండా అంతా అలా చేసేశాను ,  

నువ్వు అడిగిన ప్రశ్నకు సమాధానం నాకు అసలు తెలియదు.  కానీ , అలా ఎలా చెప్పానో నాకు అర్దం కావడం లేదు.

నాకు ఆ సమయంలో శక్తి ఎలా వచ్చిందో తెలియదు . కానీ ఆ శక్తి, నిత్యం నాతో ఉండేది మాత్రం కాదు.

ఇది  ఇదివరకే  ఎప్పుడో  అచ్చం  ఇలాగే జరిగినట్లు అనిపిస్తుంది .

ఇదంతా నాకు తెలుసు,  నేను ఇదంతా ఎప్పడో చూశాను. నాకు ఈ ప్రదేశం కొత్త గా అనిపించడం లేదు . 

నేనే ఇదంతా చేశానా ? నమ్మలేకున్నాను " 

అని  మనలో మనం ఇలా రకరకాలుగా వివిధ సందర్భాలలో  అనుకోవడం జరుగుతుంది. ఇదే  ఆత్మ శక్తి .


☘️  ☘️ ☘️ ☘️ ☘️ ☘️

ఇక  మొదటి  విషయానికి  వస్తే . . . 

• భగవంతుడు , పరమాత్మ శివుడు నివసించే స్థానం  పరంధామం ,  ఇదే మన (ఆత్మల) స్వస్థానం .  ఇహ లోకంలో  మనం శరీరం విడిచిన (చనిపోయిన ) 13 రోజుల తరువాత ,  తండ్రియైన పరమాత్మ  శివుని వైపు మన ఆత్మ చూస్తుంది . శివుని వద్దకు మరియు  ఆత్మ  స్వస్థానం అయిన పరంధామం వెళ్ళడానికి  ఆత్మ  ప్రయత్నం చేస్తుంది .   

కానీ , అనేక జన్మలు గా  భూమి పై ఆత్మ చేసిన కర్మలు లెక్కలు  ఇంకా పెండింగ్ ఉండడం , బుణానుబంధాలు లెక్కలు  పెండింగ్  ఇంకా భూమి పై  మిగిలి ఉండడం వలన  , మరియు ఆత్మ  పూర్తిగా  సంపూర్ణ పవిత్రత శక్తి  సాధించ లేకపోవడం వలన  తిరిగి శరీరం తీసుకొని జన్మిస్తుంది.  ఆత్మ కి శరీరం ఉంటేనే  కర్మలు  లెక్కాచారం  పూర్తి చేసుకోవడానికి సాధ్యం అవుతుంది .  ఇదే  మనిషి  జనన మరణ చక్రం లోని  సూక్ష్మ రహస్యం .


• తలెత్తుకుని బ్రతకాలి అని ఎందుకు అంటారు . అంటే  ,  ఏనాడైతే  పైన  ఉన్న పరమాత్మ ను మరువకుండా  నిత్యం మనసు తో  చూస్తూ ధ్యానిస్తూ  స్మృతి  చేస్తూ  ఉంటావో,   నీలో అణగారిపోయిన  నీ మూల స్వభావాలు , సంస్కారాలు అయిన  . . . 

ప్రేమ - శాంతి , పవిత్రత ‌- జ్ఞానం , సుఖం - ఆనందం , శక్తి  అయిన ఏడు దివ్య గుణాలు  తిరిగి నీ  ఆత్మలో నిండు కుంటాయి .

ఈ గుణాలు నీ లో  నిండి ఉన్న నాడు ఈ భూమి పై దుఃఖం లేకుండా, పవిత్రం గా, ధర్మం గా, సంతోషంగా , గౌరవం గా జీవించిన నాడు శివుని వద్దకు  వెళ్తావని , తలెత్తుకు బ్రతకాలి అంటారు . ఇదే  ఇందులో ఉన్న ఆధ్యాత్మిక రహస్యం .


• అంతేకానీ అందరూ ఊహించినట్లు  ధనం , ఉద్యోగం,  పేరు,  హోదా,  కీర్తి  సంపాదిస్తే తలెత్తుకుని జీవించడం అని అనుకోవడం చాలా  అమాయకత్వం.  ఎందుకంటే  ఇవన్నీ తాత్కాలికం .  ఇందుకు నిదర్శనంగా ఎన్నో  ఉదాహరణలు చెప్పుకోవచ్చు .  దేశానికి అధినేతలు గా చలామణి అవుతున్న వారికి సర్వ సౌఖ్యాలు, ధనం , కీర్తి , పేరు అన్నీ ఉన్నా  చాలా నీచాతి నీచంగా  ప్రవర్తిస్తూ బహిరంగంగా బ్రతుకు తున్నారు (అమెరికా , పాకిస్థాన్ అధ్యక్షులు  . . .  ఇంకా మరెందరో  నిత్యం  మన  కళ్ళ ముందు ఉన్న వారు కూడా . . . )

అందుకే  ధనం , అధికారం , కీర్తి  , పేరు సంపాదించిందిన   మనిషి    ,  ఎంతటి  స్థాయి వారైనా సరే  బుద్ధి  సరిగా లేకపోతే , పవిత్రత శక్తి లేకపోతే  సుఖం  శాంతి  లేక , నిత్యం ఒత్తిడి తో నిద్ర లేక , మానసిక హింస అనుభవిస్తూ , అందరిని  హింసిస్తూ , బయటకు చెప్పుకోలేక  నరక యాతన తో జీవించ  వలసి వస్తుంది . ప్రస్తుతం నేడు , ఈ లోకంలో ఇదే జరుగుతోంది . 


• ఇక రెండో విషయం . . .

తలదించుకునేలా జీవించ వద్దు అని ఎందుకు అంటారు ?  . . . తల దించుకుంటే కనిపించేది నేల, భూమి, భౌతిక ప్రపంచం . ఇందులో శరీర భారం, మాయ , దుఃఖం , విలాసాలు , కామ వికారాలతో  పాటు  ఈ నేల మీద ధర్మాన్ని అతిక్రమించేవి  ఎన్నో పుష్కలంగా ఉన్నాయి .  ఇవి మన పాదాల కింద  ఉన్న ఈ భూమి మీద మాయా రూపం లో  ఉంటాయి .  వీటన్నింటి  వలన సంతోషం ఆనందం లభిస్తున్నాయి అని అనుకుంటాం , కానీ  అవి నీటి బుడగలా  అల్పకాలికం మాత్రమే ఉంటాయి .  ఇవి మనిషి ని  ఆకర్షిస్తూ తలదించుకొనేలా చేసి  పతనం చేస్తాయని,  క్రమేపీ బలహీనుడి గా  అయి  , మనిషి ( ఆత్మ ) మరింత క్షోభకు గురవుతాడని  అని సూక్ష్మార్థం .

ఇవన్నీ మనిషి మనసు వెనుక జరిగే  నిత్య సత్యాలు  .


• మనిషి జీవించడానికి  ధనం,  ఆహారం , గృహం , ఆరోగ్యం,  వసతుల  సౌఖ్యం , మంచి  మానవ సంబంధాలు  అత్యంత అవసరం . వీటి సంపాదన కోసం  మనిషి  మంచి బుద్ధి తో కృషి చేయడం అవసరం. 

కానీ ,  వీటి   కోసం  మాత్రమే  కేవలం మనిషి జన్మించినట్లు , యాంత్రికంగా  తనను  తాను మరచి , అర్దం లేకుండా  జీవించడం వలన  చివరికి  ఆత్మ కి మిగిలేది  క్షోభే .  ఎందుకంటే  శరీరం ఎలాగో బూడిద అవుతుంది. ఆత్మ కి మరణం లేదు. ఆత్మ  మరలా ఇవే స్వభావ సంస్కారాల తో  తిరిగి మరో  జన్మ ఎత్తుతుంది .  


మనిషి కి   అంతరం లో   ఉండే  బలమైన ఆధ్యాత్మిక శక్తి    మాత్రమే   బాహ్య  ప్రపంచంలో  సజావుగా   జీవించడానికి కావలసిన   భౌతిక శక్తి ని  సమతుల్యం చేస్తుంది .   లేనిచో , నేటి  ప్రపంచంలో  విస్తరించిన  మాయకు (బలహీనత లకు) మనిషి  లోని  భౌతిక శక్తి  పెరుగుతూ ఉన్నట్లుగా అనిపించినా చివరకు పూర్తిగా నిర్వీర్యం అయిపోతాడు .

మనిషి  ఈ విషయం  స్వయంగా  తాను అనుభవ పూర్వకంగా  గ్రహించడానికి  కొన్నిసార్లు ,  అనేక జన్మలు కూడా పట్టవచ్చును.


• తలెత్తుకుని జీవిద్ధాం . మన మూలాల లో ఉన్న శివ పరమాత్ముని బుద్ధి తో స్పృశిద్ధాం.  మానసిక బలవంతులు గా అయి  భౌతిక జీవనం లో  ఉండే  మాయా బలహీనతలను  జయిద్ధాం .  

ఇదే మనిషి తనపై  తాను విజయం సాధించడం .  తలెత్తుకు తిరగడం.


ఓం శాంతి 🙏

ఓం నమఃశివాయ 🙏.

యడ్ల శ్రీనివాసరావు 29 Sep 2025 1:00 PM


Friday, September 26, 2025

693.దృఢత్వం - సానుకూలత

 

దృఢత్వం మరియు సానుకూలత


• మన జీవితంలో వేసే ప్రతి అడుగులో మనం ఎంత దృఢంగా ఉంటున్నాము, ఆ దృఢత  శక్తిని ఉపయోగించి అనేక ఆటంకాలను ఎలా అధిగమిస్తున్నాము అన్నది చాలా ముఖ్యమైన మరియు ప్రభావ వంతమైన  విషయం.

అయితే కొన్నిసార్లు మనం ఈ విషయానికి సరైన ప్రాముఖ్యతను ఇవ్వము. విశ్వాసం పర్వతాలను కదిలించగలదు , విశ్వాసం అంటే జీవితంలోని ప్రతి అడుగులో  దృఢమైన సంకల్పం అని అంటారు.   నెగెటివ్ నుండి ,  అనవసరమైన ఆలోచనల నుండి నేను దూరంగా ఉంటాను అని మీతో మీరు చెప్పుకోవడమే విశ్వాసం. 

అలాగే , ప్రతి పరిస్థితిలో, కష్టాలను అధిగమించే సమయాలలో అవసరమైన సానుకూల ఆలోచనలను మనసులో నింపుకుని విజయాన్ని సాధించడమే విశ్వాసం.


• ప్రతికూల పరిస్థితుల  గాలులు  ఎంత తీవ్రంగా  ఉన్నాగానీ , బాహ్య పరిస్థితి కన్నా , నా ఆంతరిక మానసిక స్థితి  గొప్పది  అన్న నమ్మకంతో  బలంగా  ఉండటమే దృఢత.

మనం దృఢం గా ఉంటే,  పరిస్థితి  బలహీనపడి తక్కువ సమయంలోనే అది వెళ్ళిపోతుంది. కనుక , పరిస్థితితో   ఎన్ని రకాలుగా పోరాడాలి అన్నది ముఖ్యం కాదు ,  మీ ఆత్మ బలంతో , మీరు కోరుకున్న  విధంగా  కష్టంలో వచ్చే దృశ్యాలను  మార్చడం  ముఖ్యం. 

చాలాసార్లు మనం కోరుకున్నట్లుగా పరిస్థితులు ఉండవు,  మనకు కావలసిన విధంగా మరల్చుకోవడానికి   మనం  ముందుగా బాహ్యంగా పోరాడుతుంటాం . ఒక్కోసారి మనం గెలవవచ్చు ,   ఒక్కోసారి గెలవకపోవచ్చు , ఇందుకు కారణం మనకు సరిపడేంత ఆత్మ బలం లేకపోవడమే. ఇందుకు మరో ముఖ్య కారణం, మన ఆంతరిక స్థితి, మనలో  దృఢత  బలంగా లేకపోవడమే .  అందువలన , స్వయాన్ని  శక్తివంతమైన  స్థితిలోకి   తీసుకురావాలి.  

శక్తి అంటే బాహ్య శక్తి కాదు. ఆంతరిక శక్తితో మనసును శక్తివంతంగా చేసుకుని కష్టాల ప్రభావానికి మనసును దూరంగా ఉంచాలి. బాహు బలం కన్నా , ఆయుధ బలం కన్నా , హోదా బలం కన్నా  మనో బలం చాలా గొప్పది. మనో బలం కష్టాలను అనతి  కాలంలోనే మార్చివేసి వాటిని సానుకూలంగా మార్చగలదు.

ఏదైనా చిన్న పెద్ద సమస్య  వచ్చినప్పుడు , అది  సమస్య కాదు ,  ముందుకు వెళ్ళేందుకు పరీక్ష . ఆధ్యాత్మిక  శక్తి  మనసు కి  తోడైతే  ఆ సమస్య ను  ఆట బొమ్మ వలే  ఆడుకోవచ్చు .


 ☘️ ☘️ ☘️ ☘️ ☘️ ☘️ 


• దృఢత్వం ఒక మానసిక బలం , ఇది ఎంతోకొంత  మనందరిలో ఉంటుంది . దీనిని మనం ఎంత కావాలంటే అంత పెంచుకోవచ్చు . ముందుగా,  నేను దృఢంగా అవ్వాలి, నేను ప్రతికూల పరిస్థితులను ఎదుర్కోవాలి, నేను నా ఆంతరిక వ్యక్తిత్వాన్ని దోహదపరుచుకోవాలి , నేను జీవితంలో   ప్రతి క్షేత్రంలో  విజయాన్ని పొందాలి అని గుర్తించాలి. 

దృఢత్వం  ఏకాంతాన్ని (Isolation) ఇష్టపడుతుంది , ఒంటరితనాన్ని (Aloneness) కాదు .  ఏకాంతం ద్వారా  పంచభూతాలతో  మమేకమై  విశ్వ శక్తి తో అనుసంధాన క్రియ సూక్ష్మ స్థితిలో  జరుగుతుంది .

వీటితోపాటు జీవితంలో ఉండవలసిన ఇతర ఉద్దేశాలు – అందరితో  ప్రేమ ,  గౌరవం తో ఉండటం  ,  అందరి గురించి మంచిగా ఆలోచించడం ,  నా బంధాలను మరింత చక్కగా, శాంతియుతంగా మరియు ఆనందమయంగా చేసుకోవడం , మంచి వృత్తిని ఏర్పరచుకోవడం . నా జీవిత పాత్రను మరింత సానుకూలంగా మలచు కోవడం  వంటివి. 

ఇవి మన జీవితంలోని వివిధ దశలలో ఉండవలసిన వివిధ లక్ష్యాలు మరియు ఉద్దేశాలు. వీటిని సాధించడానికి భౌతికంగా ఏదో ఒకటి చేయడంతో పాటు  ముందుగా  మన లోపల బలమైన దృఢమైన సంకల్పం ఉండటం అవసరం .

• మానసిక దృఢత్వం లేకుండా , బాహ్యంగా మనం ఎన్ని చేసినా  ఆశించిన లక్ష్యాన్ని విజయవంతంగా సాధించలేము . ఎందుకంటే , మన లక్ష్యాన్ని సాధించే దిశలో చేసే ప్రయాణ మార్గంలో మనకు ఆటంకాలు ఎదురవుతాయి . ఆటంకాన్ని చూసిన మరుక్షణం దానిని దాటగలిగే ఆత్మ శక్తి  మనలో లేకపోవచ్చు . ఆశ , ఓర్పు , దృఢత్వం నిండిన ఆత్మ శక్తి మనసులో ఆలోచనలుగా , భావాలుగా  ఉండాలి. 

కనుక,  ధృఢత   ప్రారంభం అనేది మన మనసులో  జరగాలి . దృఢత్వం  కఠినత్వం గా  ఇనుము వలే కాకుండా  మృదుత్వం తో రబ్బరు వలే ఉండాలి .  చాలా చాలా జాగ్రత్తగా, దృఢత్వం వైపుగా మన అడుగులు పడాలి, దృఢత్వం మన కర్మలలో కనిపించాలి. అప్పుడు ఈ దృఢత్వం క్రొత్త అవకాశాలను తెరిచేందుకు తాళం చెవి అవుతుంది, ఇది మీరు ఆశించిన విజయ గమ్యానికి  తీసుకువెళ్తుంది .  

దృఢత్వం లోని పరిణితి . . . మౌనం , ఏకాంతం , స్థిరత్వం , శాంతి , సుఖాలను  ఆహ్వానిస్తుంది . మనసు లో  వ్యర్థాలను , మలినాలను ,  అంతర్గత శత్రువులను  శాశ్వతం గా తొలగిస్తుంది .  

దృఢత్వం అనేది   ఒక  కారణ భూతం గా (Purposeful )  ,  యోగదాయకం గా  (Fruitfulness) ,  ప్రాప్తుల  ఖజానా గా (Beneficial)  ఉండాలి .  అంతే కానీ  మూర్ఖత్వం , మొండితనం (Rudeness) గా  కారాదు .

ధృడంగా  ఉండడం వలన  స్వీయ  రక్షణ కలిగి  ఉంటాం .   సంబంధ  సంపర్కాలలో  బలహీనత  నొంది  ఉన్న  వారికి   మన ద్వారా  సహయత ,  రక్షణ  చేకూరుతుంది .

కానీ  దృఢత్వం  లోపించిన నాడు , మనలోని  బలహీనతల తో పాటు గా ,  సహచరుల    బలహీనతలు మరియు  నెగెటివ్ ఎనర్జీ  ప్రభావం  మనం  అనుభవిస్తాం .  

ద్వేషము తో   ఎవరినీ  జయించలేము .  మౌనం, శాంతి  ప్రేమ  తో  ప్రపంచాన్ని జయించవచ్చు  .  అందుకు నిదర్శనం  రమణుల వంటి ఎందరో భారత యోగులు . 

జీవితం అనే సాగరం లో ,  సత్యమైన  నావ  తుఫానుల ఆటుపోట్ల కు ఒడిదుడుకులకు  లోను కావచ్చు , కానీ మునగదు . తీరం  తప్పకుండా చేరుతుంది .  అదే , సత్యమైన నావ కలిగి ఉండే దృఢత్వం లో మహత్యం.


గులాబి  మొగ్గ పిందె గా  ఉన్నప్పుడు కంటే ఎదుగు తూ . . .    ఉన్న సమయం లో,  సమీపంలో ఉన్న   ప్రతి ముల్లు   పదే పదే  గుచ్చుతూ హింసిస్తాయి . ఒకసారి  ఆ మొగ్గ  పువ్వుగా   వికసించిన మరుక్షణం , చుట్టూ ఉన్న అవే ముల్లులు   గులాబీ యొక్క  సౌందర్యం  ఆస్వాదిస్తూ  రక్షణ  అవుతాయి.  


ప్రతి  మనిషికి తెలియని , తన    యధార్థ స్వరూపాన్ని   తెలియచేసేది  కేవలం శివుడు మాత్రమే . ఎక్కడైతే  ఈశ్వరుడు ఆరాధించ బడుతూ ఉంటాడో అక్కడ  శుభం ఉంటుంది .

యడ్ల శ్రీనివాసరావు 26 Sep 2025 , 11:00 pm .


Tuesday, September 23, 2025

692.స్వభావం - హద్దులు - గౌరవం


స్వభావం - హద్దులు - గౌరవం


• మనిషి జన్మతః , ఒక స్వభావం  సంస్కారం కలిగి ఉంటాడు. ఇది సహజంగా గత జన్మల కర్మల అనుసారం వచ్చేది . జన్మతః  కలిగి ఉన్న స్వభావ సంస్కారాలు  ఉన్నతి  తో  అన్ని వేళలా  స్థిరత్వం గా  ఉండడం  మనిషి అభ్యున్నతికి అత్యంత అవసరం . 

కానీ , ఈ  ఉన్నతిని  మన   స్వభావం  మరియు సంస్కారాలలో  యదార్థ రీతిలో కలిగి ఉన్నాము అని  నిర్ధారణ చేసుకోవడం  అత్యంత అవసరం .

దీనికి నిదర్శనం , స్వభావ సంస్కారాల లో  ఉన్నతి   కలిగి  ఉంటే  పరిస్థితులు ఎలా ఉన్నా, నిర్లిప్తత , వేదన ,  నిరాశ , అసంతృప్తి , దుఃఖం  అనే  అంశాల పట్ల  మనం అంతర్గతంగా  కూడా ప్రభావితం  చెందము .   ఇవి  మన ద్వారా  ఇతరులకు  కలిగేలా  ప్రవర్తించము .  

ఈ యధార్థం గమనించని  మనం , అహం తో  మన స్వభావం  సంస్కారాలు చాలా  గొప్పవి గా భావిస్తాం .

 

• అనేక సార్లు,  మన  స్వభావ  సంస్కారాల శైలి వలన  మన జీవనం లో  వైఫల్యాలు పొందడం , సంతోషం కోల్పోవడం ,  సమస్యలు సృష్టించు కోవడం వంటివి  తరచుగా  జరుగుతూ ఉన్నా సరే  వాటిని  మార్చుకోవడానికి  సిద్ధపడం , అంగీకరించం, ఇష్టపడం . 

దీనికి కారణం . . . ఒకటి  స్వభావ సంస్కారాల లోనే  మన బలహీనతలు దాగి ఉన్నాయి  అని గ్రహించలేక పోవడం. 

రెండవది అవి మన నేచర్ , అనగా మన సహజ తత్వం  అని భావించడం. 

మూడవది వాటిలో  మాయ , భ్రమ  బలంగా ఇమిడి ఉంది అనే విషయం మన స్పృహ లో లేక పోవడం .  అనగా సత్యాన్ని , వాస్తవాన్ని సంగ్రహించుకొని , నిర్దారించుకునే శక్తి మనలో లేకపోవడం .


☘️ ☘️ ☘️ ☘️ ☘️


• ఈ  భూమి పై  మనం పుట్టింది , కోరికలు తీర్చుకోవడాని కే  అనుకుంటాం కానీ . . .  మన కర్మలను  పూర్తి చేసుకోవడం కోసం అని గాని , మన అంతర్గత  స్థితి ని  ఉన్నతి గా తీర్చి దిద్ది కోవడం కోసం అని గ్రహించం . 

ఈ విషయాలన్నీ ,  మనకు ముఖ్యం గా ఆఖరి రోజుల్లో  కదలలేని స్థితిలో ,  మరణం పొందడానికి  కొన్ని రోజులు , గంటలు , నిమిషాల ముందు కళ్ళ ఎదుట  మన ఈ జన్మ యధార్థ స్థితి ని భగవంతుడు  ప్రత్యక్షం చేయిస్తాడు .(దీనికి కారణం  . . .   మన ఆత్మ , జన్మ తీసుకునే ముందు భగవంతుడి ని  శరీరం కావాలని ప్రాధేయ పడుతుంది .  నేను ఏ పాప కర్మలు చేయను , భూమి పై  పెండింగ్ ఉండిపోయిన కర్మలను పూర్తి చేసుకుని , పావనం గా అయి పవిత్రత తో   తిరిగి వస్తానని  భగవంతుని కి మాట ఇస్తుంది.  భగవంతుడి అంగీకారం తో మన ఆత్మ , నేటి  ఈ  శరీరం ధరించడం జరుగుతుంది.  కానీ , తల్లి గర్భం నుంచి  బయట పడే  మూడు నెలల  ముందు నుంచి ఆత్మ నేత్రం ముసుకు పోవడం తో  ఇవేమీ  ఈ లోకం లోనికి వచ్చాక  మనకు జ్ఞాపకం ఉండవు.  మనం శరీర స్పృహ తోనే మన జీవన ప్రయాణం కొత్తగా మొదలు పెడతాం.)  కానీ మనల్ని మనం మార్చుకోవడానికి అప్పుడు సమయం మిగిలి ఉండదు . భగవంతుని కి ఇచ్చిన మాట తప్పడం జరుగుతుంది . శిక్షల భారం పెరుగుతుంది.


☘️ ☘️ ☘️ ☘️ ☘️


• మనలో ఎవరి స్వభావ సంస్కారాలు ఎప్పుడు ఎవరితో  ఎలా ఉంటాయి అనేది  వర్ణించలేం . కానీ  వీటిలో మన కోరికలు సాధించుకోవడం . . . మన అవసరాలకు అనుగుణంగా  భావోద్వేగాలు ప్రదర్శించడం  , అమాయకత్వాన్ని చూపించడం , అనుభవజ్ఞులు గా  వాక్ చాతుర్యం ప్రదర్శించడం ,  మితిమీరిన పరిణితి తో  వ్యవహరించడం  వంటివి అనేకం జరుగుతుంటాయి .  నేటి కాలంలో  మన ప్రదర్శన ఇలా ఉంటేనే  మన  కార్యాలు  రూపం దాలుస్తాయి  అని భావిస్తాం.


దీనికి  ప్రధాన కారణం మన హద్ధులను  మనం అతిక్రమించడం .  ఒక మనిషి తన ఆలోచనల  హద్దులను  అతిక్రమించి   ఇతరుల ఆలోచనల లోనికి   చొరబడడం అనేది  మొదట  చిన్న గా సూక్ష్మం గా  ఆరంభం అయి తదుపరి  వట వృక్షం వలే  వృద్ధి  అవుతుంది .

ఈ క్రమంలో   ఇతరుల పై   మనకు  ఉన్నది  హక్కు , స్వతంత్రం  ,  స్నేహం  అని భావిస్తాం .  కాని ఎదుటి  వారికి  ఇది  ఏమైనా  అసౌకర్యం కలుగుతుందా  అనేది ఊహించం .  ఎందుకంటే  మన స్వభావం తో  చేసే ప్రతి ఆలోచనా  ధోరణి  సహజమైనది సమంజసమైనది అని బలంగా సమర్థించుకుంటాం . 

విచిత్రం ఏమిటంటే ,  మన వ్యక్తిగత , వ్యక్తిత్వ  జీవన  స్వేచ్ఛ స్వాతంత్ర్యాలలో ఇతరులను ,  ఎవరిని ఎంత దూరం లో ఉంచాలో  అలా ఉంచగలుగుతాం . ఇది మన మేధస్సు లో ఒక భాగం .

• నేటి సమాజంలో ,  సాంగత్యాలలో సహృదయంతో   నిండిన    ఆరోగ్యకరమైన వాతావరణం , సన్ని "హిత" తత్వం , మనుషుల మధ్య   కుటుంబ వ్యవస్థ ల మధ్య  సుస్థిరంగా , దీర్ఘ కాలం   ఉంటుందా ?  అని  ప్రశ్నిస్తే ,  ఉంటున్నట్లు అనిపిస్తుంది . కానీ  ఒక దశలో ఈ సఖ్యతలు  పూర్తిగా విఫలం అవుతున్నాయి  అనేది  నిజం .

నేడు   ఒక  నాటకీయత తో   మాత్రమే మన జీవన ప్రయాణం   నడుస్తూ  ఉంది   అనేది వాస్తవం .  దీనికి  ప్రధాన  కారణం మన అంతరంగం లోని   ఆలోచనలు  మనతో  ఉండే వారి పట్ల హద్దులు దాటడం . ఇవి దాటినప్పుడు  కుటుంబం లోని , సమాజం లోని  మనుషుల తో సహృద్బావం  ఉండదు ,  గౌరవం కొల్పోవడం జరుగుతుంది .  ఇది ప్రధానంగా మొదట కమ్యునికేషన్  భాష ,  పిలుపు ,  సంభోధన లోని   లోపాల తో  ఆరంభం  అవుతుంది . పిదప వివాదాలు తలెత్తుతాయి .


•  మనం , సహచరుల మధ్య  సాన్నిహిత్యం తో  స్వేచ్చ ,  స్వాతంత్ర్యం  అతిగా ఫీల్ అయినపుడు హద్దులు మీరడం  జరిగి ,   ఉపయోగించే కమ్యూనికేషన్ భాష   పిలుపు  సంభోధన లను  వారి పై  హక్కుగా  భావించి , అధికారం చెలాయించడం లేదా వ్యంగ్యాస్త్రాలు విసరడం , నవ్వుతూ  అతి తెలివి చూపించడం, మనలోని వికారాలను  తెలివిగా ,  వారికి చెందినవి గా ప్రోజెక్ట్  చేయడం వంటివి సహజంగా ఆరంభం అవుతాయి .  

ఇదే ,  ఒకానొక దశలో మనుషుల మధ్య సంబంధాలు పూర్తిగా బీటలు వారి సమస్యలు ఆరంభం అవడానికి , అగాధాలు  ఏర్పడడానికి ప్రధాన కారణం .  విచిత్రం ఏమిటంటే  ఈ యొక్క   ప్రతీ దశలో  మనం చేసేది  అంతా కరెక్ట్  అనుకుంటాం కాని , ఆ సంబంధాలు పూర్తిగా బీటలు వారిన తరువాత మాత్రమే తెలుస్తుంది, నేను ఎంత హద్దు మీరి ప్రవర్తించాను అని. దీనినే మాయ ప్రభావం చేత  మన  కళ్లు కప్పబడి ఉండడం  అంటారు.

దీనంతటిని  ఆధీనం లో ఉంచుకోవాలి అంటే , ఒకటి మనం హద్దు లో ఉండగలగాలి . రెండవది పరివర్తన చేసుకోవలసింది కమ్యూనికేషన్ భాష , పిలుపు , సంభోధన తో కూడిన  స్వభావం  మరియు  సంస్కారం .

సహృదయ మైన    ప్రేమ తో , శాంతియుత వాతావరణం తో ,  సహచర  సంబంధాలన్నీ  సఖ్యత గా  ఆనందం గా  ఉండాలి , అంటే  నిజాయితీ తో   పాటు  స్వభావాలు సంస్కారాలు  మిళితం  కావాలి .  అందుకు  స్వయం  పరివర్తన  చాలా  అవసరం . 


హద్దు యొక్క విశేషత : 

• మన   ప్రవర్తన  సమర్థవంతంగా తయారు కావాలంటే  మొదట ఆలోచనలు హద్ధులో ఉండాలి. హద్ధు లోని  ఆలోచనల పై ఎప్పుడూ ఒక అవగాహన ,  స్పష్టత కలిగిఉంటాం . దీని ద్వారా మన ఆలోచనలు ధర్మబద్ధమైనవా (ఆమోద యోగ్యమైన వా)  కాదా అనే స్పృహ కలిగి ఉండడం జరుగుతుంది.

ఒకసారి నిష్ణాతులైన తరువాత,  హద్దులను విస్తారం చేసుకుంటూ వెళ్లాలి.  అప్పటికే, ఆలోచనలు సమర్థవంతంగా అయి ఉండడం వలన , మన ప్రవర్తన వలన ఎవరికీ నష్టం ఇబ్బంది  జరగదు. 

• హద్దులు లేకపోతే ఆలోచనలు ఇష్టానుసారం గా రాజ్యమేలి , ప్రవర్తన కు నష్టం కలిగిస్తుంది. ఇది నైతిక మానసిక పతననాలకు దారితీస్తుంది.


☘️ ☘️ ☘️ ☘️ ☘️

దీనంతటికీ చక్కటి  వాస్తవిక ఉదాహరణ :

• కొందరు తమకు ఎంత వయసు వచ్చినా సరే తండ్రిని “ నాన్నగారండి ” అని బహువచనం తో పిలుస్తారు . ఇంకొందరు మాత్రం “నాన్న” అని ఏకవచనం తో పిలవడం చూస్తుంటాం .

నాన్నగారండి  అనే పిలుపు లో   ప్రేమతో పాటు , మన జీవితం లో  ప్రతీ దశలో  , ఆయన గౌరవం కాపాడే  విధంగా ఉండడం జరుగుతుంది. ఇది హద్ధు తో  కూడిన కమ్యూనికేషన్ భాష పిలుపు సంభోధన . . . 

అదే విధంగా  " నాన్న " అని ఏకవచనం తో స్వతంత్రంగా పిలిచే పిలుపులో ప్రేమతో పాటు హక్కు , అధికారం ఉంటుంది . ఇది హద్ధు ను అతిక్రమించిన కమ్యూనికేషన్ భాష పిలుపు సంభోధన.  ఈ హక్కు అధికారం అనేవి మన పరిస్థితులు మారినప్పుడు ఏనాటికైనా తండ్రి తో ఉన్న బంధం లో  సఖ్యత   బీటలు వారే లా చేస్తుంది . ఎందుకంటే  హక్కు ,  అధికారాల కు మనసు లోని  ప్రేమ బదులుగా   మనిషి లోని అహంకారం  నాయకత్వం వహిస్తుంది.


• మన యుక్త వయసు బాహ్య  సాంగత్యాలలో, నువ్వు , నీవు అనే ఏకవచన పిలుపుకు బదులు , బహు వచనంతో  మీరు , అండి , గారు అని సంబోధించడం వలన నష్టం ఏమైనా ఉంటుందా ?  అంటే లేదు, సరికదా  మనం గౌరవం ఇవ్వడం తో పాటు ఇతరుల నుండి సహజంగా గౌరవం పొందవచ్చు . 

దీని వలన మనం మన హద్దు ని అతిక్రమించ కుండా ఇతరులతో ఎంత వరకూ ఎలా ఉండాలి అనే విషయం , మన స్పృహ నిత్యం మనకు గుర్తు చేస్తూ ఉంటుంది . తద్వారా ఎటువంటి పరిస్థితుల్లోనూ ఎవరితో ఏ సమస్యలు తలెత్తవు .

• వస్త్రాలు ధరించినపుడు , అవి మన శరీరాన్ని బహిర్గతం కాకుండా సంరక్షిస్తూ ఉంటాయి. అయినప్పటికీ మనం సమాజం లో కార్యక్రమాలకు వెళ్లి నప్పుడు తరచూ మనం ధరించిన వస్త్రాలు పదిసార్లు , అవసరం ఉన్నా లేకపోయినా సరి చేసుకుంటూనే ఉంటాం . ఎందుకంటే , ఒకవేళ పొరపాటున వస్త్రం జారినా, చిరిగినా అభాసుపాలు అవుతాం అనే  విషయం , స్పృహ లో అలెర్ట్ గా ఉంటుంది కాబట్టి .

మరి అదే విధంగా, మన నేచర్ ను   స్వభావ సంస్కారాలను వయసు తో పాటు తరచూ చెక్ చేసుకోవటం,  సరి చేసుకోవడం వలన కూడా మన గౌరవాన్ని సంరక్షించు  కోవచ్చు . ఎటువంటి పరిస్థితి లోను  అభాసుపాలు కాకుండా  ధైర్యం గా  సంతోషంగా  జీవించవచ్చు .


మన  స్వభావ సంస్కారాల  ఉన్నతి , మేలు కోరే భగవంతుడు మనకు సహాయకారిగా ఉంటూ , ఏదో విధంగా  మనల్ని సరిదిద్దుతూనే  ఉంటాడు. అది ఆయన భాధ్యత. ఎందుకంటే భగవంతుడు మన తండ్రి . . .  కానీ  మనమే అది గ్రహించ లేక మాయ వైపు  పరిగెడతాం ,  చివరికి  దుఃఖం పొందుతూ ఉంటాం .


ఓం శాంతి 🙏.

ఓం నమఃశివాయ 🙏 .

యడ్ల శ్రీనివాసరావు  23 Sep 2025, 5:00 PM .


Saturday, September 20, 2025

691.ప్రతి అడుగులో విలువలు

 

  ప్రతి  అడుగులో విలువలు 



• మనం  ఉన్నతిని పొందాలంటే , ఎక్కువ సంపాదించాల్సిన  అవసరం లేదు . కానీ మనకు ఉన్న వాటిని మరియు మన విశేషతలను కోల్పోకుండా చూసుకోవాలి. 

సాధారణంగా  మన ప్రవర్తన ఎప్పుడూ కూడా , మనతో ఎవరైనా ప్రవర్తించే  విధానాన్ని  బట్టి ప్రతిబింబిస్తుంది. వాళ్ళు మనతో బాగుంటే మనం బాగుంటాము . లేకపోతే మనం వారి పట్ల ప్రతికూలంగా మారతాము . కానీ వారి చర్యలను కాపీ చేయడం వలన, మన స్వంత విశేషతలు  మాత్రం  ఎన్నడూ మసకబారకూడదు .

• నేడు  ప్రపంచంలో  క్షీణిస్తున్న  నైతిక విలువల వల్ల  మీరు  తరచుగా  నిరుత్సాహానికి గురవుతున్నారా? 

• మీరు మీ సుగుణాలతో  ఎవరితోనైనా మాట్లాడితే , ఆ వ్యక్తి ఏ మాత్రం సానుకూలంగా స్పందించనప్పుడు , మీరు వారి ప్రవర్తనను కాపీ చేయాలని భావిస్తున్నారా?  

• మీ  చుట్టూ ఉన్న  వ్యక్తులు ఏదైనా విలువను పాటించనందున మీరు వారిని వదులుకున్నారా? 

మనమందరం మనకు వీలైనంత మంచిగా మరియు దయతో ఉండటానికి ప్రయత్నిస్తాము. సమస్య ఏమిటంటే అవతలి వ్యక్తి అంతే మంచిగా (లేదా ఇంకా మెరుగ్గా) ఉండాలని మనం ఆశిస్తాము . అంతకన్నా పెద్ద సమస్య ఏమిటంటే, ఆ వ్యక్తి మనతో సరిగ్గా లేకపోతే, మనము వారి ప్రవర్తనను కాపీ చేస్తాము. 

మనం ఒకరి తప్పుడు ప్రవర్తనను కాపీ చేసిన ప్రతిసారీ,  మనం మన సుగుణాలకు  దూరంగా అవుతాము. చివరికి మనం మనలో ఉన్న విశేషతలను వదులుకుంటాము  .  

అందువలన వారి ప్రవర్తనను కాపీ  చేయడం అనేదాని  కంటే  కూడా  వారికి  కామా పెట్టి  చూద్దాం  ,  పరిస్థితి ఇంకా అలాగే  కొనసాగితే  శాశ్వతం గా  వారికి  బిందువు (పుల్ స్టాప్) పెడదాం .


• మీ చుట్టూ ఉన్న వారి పై ,  మీరు నమ్మకం కోల్పోయారా ?

ప్రవర్తన లలో  సమానతలు  లోపించి నపుడు మాత్రమే  నమ్మకం సడలుతుంది . అది మీ భాగ్యం . తరచూ మోసపోవడం అనే విష కోరల నుంచి విముక్తి పొందారు .  అందుకు ఎవరిని  నిందించకూడదు , వీలైతే వారికి మనసు ద్వారా కృతజ్ఞతలు తెలియచేయాలి .  ఇక  మీ ఆలోచనలు మరింత మెరుగు అయ్యే సమయం ఆసన్నమైంది. ప్రతీ సంఘటన  వెనుక  శ్రేయస్సు  ఉంటుంది . సాధారణంగా మనం నమ్మిన వారికే , మనల్ని  మోసం చేసే హక్కును  ధైర్యం  కలిగి ఉంటారు. అటువంటి వారి నుంచి విముక్తి లభించడం అదృష్టంగా భావించాలి.


• ప్రశంసలను  ఆస్వాదన  చేద్దాం .  కానీ ఆకళింపు చేసుకోవద్దు .  ప్రశంసలు కురిపించే వారు, తమ మానసిక స్థితి తో  భావోద్వేగాలను ఎన్నో విధాలుగా  ప్రదర్శిస్తూ ఉంటారు . వాటిని  కొన్ని   క్షణాలు ఆస్వాదించి వదిలివేయాలి. వాటిని ఆకళింపు చేసుకోవడం  వలన  నైతిక  పతనం ఆరంభం అవుతుంది . 


• మన విలువలు , సుగుణాలు , సూత్రాలు  మరియు నైతికత  మన శక్తి అని , మనం వాటికి కట్టుబడి  ఉందాము .  మన చుట్టుపక్కల ఉన్నవారెవరూ  వాటిని  ఉపయోగించక పోయినా ,   ఇతరులు . . .  మానవ విలువలు పని చేయవు అని భావించినా , మనం వాటిని వదులుకోవద్దు .  ఇతర వ్యక్తులు పూర్తిగా మీకు భిన్నమైన  గుణాలను కలిగి ఉండవచ్చు , అవి మీలో  లోపించవచ్చు . 

ప్రతిసారీ, మీ లో ని  విలువలను తప్పకుండా ప్రతి  ఒక్కరితో  ఉపయోగించాలని నిర్ధారించుకోండి . అందుకు సరియైన  ప్రవర్తనా  మార్గం ఎంచుకోండి . ఇతరుల  కాలక్షేపాలకు  మనం  సమిధ గా  అవడం కంటే , అందరి కాలక్షేమాలకు జ్యోతి గా  అవడం  పుణ్యం .


• మీకు మీరు గుర్తు చేసుకోండి – నేను ఎల్లపుడూ పరిస్థితులు మరియు చుట్టూ ఉన్న వ్యక్తులతో సంబంధం లేకుండా అందరితో నా సద్గుణాలను నా పరిధి లో  ఉపయోగిస్తాను  . నా విలువలు నా శక్తివంతమైన  వ్యక్తిత్వాన్ని  ప్రతిబింబిస్తాయి.

• మీలోని  ఏ విశేషతనైనా  మీ జీవితంలో వేసే ప్రతి అడుగులో , అది మీ నుండి ప్రతి ఒక్కరికి , ప్రతి పరిస్థితిలో ప్రవహించేలా చూసుకోవడం ప్రారంభించండి.  ఇతరులలో  ఆ విశేషత  ఉండాలని ఆశించకూడదు. కేవలం అది వారిలో లేదని మీరు మీ  విశేషతను  వదులుకోకూడదు. 

మీకు మీరే గుర్తు చేసుకోండి – నా సుగుణాలు నా ఆస్తులు . నేను వాటిని అన్ని సమయాలలో ప్రసరిస్తాను . వ్యక్తులు మరియు పరిస్థితులతో సంబంధం లేకుండా నా విలువలు  నాతోను  తప్పక  ఉంటాయి . అదే " నేను " . . .   నేను  ఒక  ఆత్మ ను .   

ముందు మీరు మీ కోసమే ఉన్నారు . . . ఆ తరువాత ఇతరుల కోసం . మార్గాన్ని  అవలంభించ లేని వారు ,  దారి చూపలేరు . ముందుకు సాగాలి అంటే వెను తిరగకూడదు .

మీరు మీ మార్పు కోసమే జన్మించారు , కానీ  ఏ  ఒక్కరి మార్పు కోసం కాదు .  మీలోని  మార్పు  సహజంగా నే  మీ చుట్టూ ఉన్న వాతావరణాన్ని ప్రభావితం చేస్తుంది. 

మంచి మార్పు , నిరంతరం నిజాయితీతో  కూడిన  ఆత్మ విమర్శ  తోనే  సాధ్యం. 

ఇవన్నీ  మనస్సాక్షి తో  జరగవలసిన  ప్రక్రియలు .  


యడ్ల శ్రీనివాసరావు 18 Sep 2025 , 10:00 AM.



807. మనో శతకం -12

  మనో శతకం -12   భవుడి  బాట  భవదీయుగ    జేయ   చితి కి  చేరు చింతల్ .   తపమున  తరియించు  నరున్    ధ్యానంబు  ధన్యము  గాంచెన్ .    యోగాగ్ని నంద...