760. అస్తికత్వం – నమ్మకం

 

అస్తికత్వం – నమ్మకం

• అస్తికత్వానికి  నాస్తికత్వానికి  తేడా కేవలం ఒక్క “నమ్మకం” మీదే ఆధారపడి ఉంటుంది. నిజానికి భగవంతుడు ఉన్నాడు అని నమ్మే  మనమందరూ కూడా అస్తికులమే  , కానీ పూర్తిగా కాదేమో ? ఒకసారి ఆలోచించండి.

ఎందుకంటే రోజువారి మనం చేసే కర్మలలో మంచితో పాటు చెడు లేదా తప్పుడు పనులు చేయటం కూడా జరుగుతుంది కదా! 

• కొన్ని సందర్భాలలో  మనం  తెలిసి , తప్పుడు పనుల చేసిన  సమయాలలో . . . మనకు భగవంతుడు ఉన్నాడు , మనలని గమనిస్తున్నాడు అనే ఆలోచన ,  జ్ఞప్తి  మన  స్పృహలో ఉంటుంది అనగలమా ?  ఒకవేళ ఉన్నా , మనం  జీవిస్తున్న లౌకిక విధానం లో తప్పుడు పనులు చేయడం సాధారణం , సహజం , ఆమోదయోగ్యమే  అని ఊరుకుంటూ  సరిపెట్టుకోగలమా ? 

 మన నమ్మకం ఆయా తప్పుడు పనులు చేస్తున్న సమయాలలో సందర్బాలలో ఏమైనట్టు ? లేక సమయానుకూలంగా భగవంతుని పై నమ్మకం మారుతుందా? అటువంటి పనులు చేసే సమయంలో భగవంతుడు గుర్తుకు రాడేమో కదా ! . . . దీనినే మనలో మాయ ఆవహించి ఉండడం అంటారు .

• భగవంతుని పై నమ్మకం అనేది కొంత భక్తితో కూడుకున్నప్పటికీ  ఎక్కువ మొత్తంలో భయంతో , అవసరాలతో , కోరికలతో , దుఃఖం భరించలేక కలుగుతుంది అనుకోవాలేమో  కదా !

• లోక కళ్యాణార్దం జన్మించిన రమణ మహర్షి , ఆది శంకరాచార్యులు , బ్రహ్మ బాబా, యోగానంద పరమానంద వంటి  సర్వసంగ పరిత్యాగుల నమ్మకాలు భగవంతుని పై పూర్తి గా వేరు కదా! 

• భయంతో , కోరికలతో , అవసరాల కోసం భక్తి చేస్తే భగవంతుని సమీపం , చేరుట సాధ్యమా? . . . భయం నిన్ను ఎక్కడో దూరంగా నిలబెట్టి కొలిచేలా చేస్తుంది కదా !  

• నీ కోరికలు , అవసరాలు కోసం భగవంతుని తో నీవు నిర్వహించే వ్యాపార బేరసారాలు . నిన్ను దళారి వలే  భగవంతుడి గడప బయట ‌ఉంచేలా చేస్తున్నాయోమో , కాస్త ఆలోచించి చూడు !

• భక్తి పాలు లో , నీ ప్రేమ ను చక్కెర గా కలిపితే భగవంతుని సమీపానికి వెళ్లగలుగుతావేమో ? ఆలోచించు . 

• భయం తో కూడిన భక్తి , మనిషి ని భగవంతునికి దూరం గా ఉంచే లా ఎందుకు చేస్తుంది ? . . . ఈ భయానికి కారణం , ఒకవైపు చేసి చేస్తున్న తప్పుడు పనుల ప్రభావం , ఆలోచనల లోని అపవిత్రత కాదని అనగలమా ! నీ మనస్సాక్షి కి తగిన ధైర్యం లేక భగవంతుడు అంటే భయపడుతుందేమో  ? ఎందుకంటే చేసిన ప్రతి పని భగవంతుడికి ఎరుక కాబట్టి .

• ప్రేమతో కూడిన భక్తి , భగవంతుని హృదయం లో స్థానం పొందేలా చేస్తుంది . బహుశా ఈ ప్రేమ పుట్టడానికి కారణం తన్మయత్వం . అంతర్దృష్టి మరియు మనసు లో నెలకొన్న బుద్ధి ఆలోచనల శుభ్రతయే  . . . కాదని అనగలమా ! 

 ఇవి . . ‌ నా మాటలు కాదు , ఎందరో మహానుభావుల నోట పలికిన ముత్యాల మూట.

ఏమంటే . . . సృష్టి లో ఒక అతీంద్రియ శక్తి ఉన్నది అదే మన అందరినీ నడిపిస్తోంది , అనే  సత్యం నమ్మడం ‌. ఇదే అస్తికత్వానికి ప్రామాణికమైతే మనమందరం భగవత్ ప్రియులం  . 

 కానీ,  ఈ సత్యాన్ని తెలుసుకునేది  ఎందరో ? సత్యాన్ని నమ్మేది మరెందరో ?  సత్యాన్ని  నోటితో పలికేది ఇంకెందరో ? . . . ఈ విషయం పైన ఉన్న భగవంతుడికి తెలియాలి , లేదా మనలో ఉన్న మాయ కి తెలియాలి .

సత్యమేవ జయతే!

ఓం శాంతి 

ఓం నమఃశివాయ 🙏 

యడ్ల శ్రీనివాసరావు 23 June 2926 , 11:00 AM.